Jâŋ 6
6
Yésù líhií nɨ̀ŋgwáàb tɔ́sìn ŋgiì
(Góòmɓwê Mt 14.13-21; Mk 6.30-44; Lk 9.10-17)
1Cùr kɨ́ no, Yésù ɨ́ pèndôŋ ɓáí Gàlìléè cəə́r, (ɨ́r ɓáí kíì á ɓwê Tìbèriyâdə̀). 2Kùŋkùŋ kàm nɨ̀vɨ́tɨ̀bì yaá ŋgə́ tùnɨ ɓe pê ŋgáb ya pə́kom lìím ŋgə́ ya ndɨŋkom ɓe wáŋhȩ̀ȩ́ nɨ̀yábì rè. 3Yésù ɓe nɨ̀fuùb noò ɨ́ wû ɓe kù ya, ŋgáb ɨ́ dùrê ɗàá. 4Páskà, jùrúb Jwîf ɓoò yaácɨ̀ ŋgóblîn. 5Yésù ɗə́əŋwú còóm, ŋgə́ ɨ́ pê kùŋkùŋ kàm nɨ̀vɨ́tɨ̀bì á ŋgə́ gàìnwònɨ, á ŋgə́ fɔ́ Fɨ́lɨ̂b ɨnè: «Ŋga á nɨ́m ɓa gùnnɨ cɔŋ nɨ́m na vùùm kàm nùb lèè lâs?» 6(Ŋgə́ yi fɔ́ fɔ́ kɨ́ u̧ óknɨ pìí Fɨ́lɨ́ɨ̀b á, ɓetí ŋgə́ nɨ̀mɨr yi ɗəəŋcií nɨ́m ŋgə́ ɓa ndɨ̀ŋniì). 7Fɨ́lɨ̂b ɨ́ pììnà Yésù ɨnè: «Dugɨ ɓe sure mònéè təmərì bɨrɨ́b, sàmàìn nɨ́m gwɨi bɨ̀rê nùb lâs a kwà dugɨ gbɨ́ktèìn mwi̧í̧ mwi̧ ɗàà.»#6.7 Ɓwâ ya kɨ́ sure mònéè mwi̧ á ɗóhîn ɓe mwèìn kùb gom nò ə́ré mvii mwi̧í̧. 8Nɨ̀fuùb ŋgéé kù, Àndɨ̀rê, wúrúb Sìmóŋ Píyéèr ɨ́ tànà ŋgə́ ɨnè: 9«Mwɨi ti nɨ̀ŋgwá kù á hò̧ ɓe bɨ̀rê kùb ɓóŋ ɓe mùm óòrjə̀ ŋgáré ŋgiì, ɓe həré bɨrɨ́b. Ɨ́dù ɓe vùùm nùb lèè, tɨ̀ ɓaŋce ŋgáb ŋga?» 10Á Yésù ta: «Tanáam nùb lâs dùré ɗàá.» Ɓwìn yaá yɨ́ kɨ́ ɓè cei. Nɨ̀vɨ́tɨ̀b ɨ́ dùréhá cè ɗàá. Ŋgáb lâs yaá sàmàìn ndɨŋ nɨ̀ŋgwáàb tɔ́sìn ŋgiì. 11Yésù ɨ́ â bɨ̀rê bɨ rè, ŋgə́ ɨ́ sáktè Mèín, ŋgə́ ɨ́ nà nɨ̀fuùb noò gɔ̀knà nùb yi du ɓè kɨ́, ŋgə́ ɨ́ tà gɔ̀knàɓwê ŋgáb həré. Nùb lâs ɨ́ fùb. 12Ɓwâ nùb lâs yi fublé, Yésù ɨ́ tànà nɨ̀fuùb noò ɨnè: «Ɓáanáam tèré kɨ́, àm tɨ̀ ɓáaŋndé.» 13Ŋgáb ɨ́ ɓáhè tèré bɨ̀réè tɨ ŋgiì rè, há̧á̧ ɨ́ yúhè lɨ̀ŋtɨ̧̀ cóóŋ ɨ́ bɨrɨ́b. 14Hȩ nɨ̀vɨ́tɨ̀b pénɨ lɨ̀m Yésù yi ndɨŋ kíì, ŋgáb ɨ́ tàɓà wááŋ ɨnè: «Nɨ̀ŋgwá rè dumeɓa tɨ́kìn Mèèín yi ɓa gònɨ ɗɔ̀bín ndè á!» 15Yésù ɨ́ ɗə̀ŋhȩ̀ nɨ́ ɨnayâna ŋgáb ɓa bɨ gònɨ ní bìnɨ ɓe nyòme kɨ́kwúnɨ ní mvènnì á, ŋgə́ ɨ́ wúíndôŋ nɨ́ ɓeè còóm ŋgə́ mwi̧.
Yésù á gìnɨ gùr mvúmí ya
(Góòmɓwê Mt 14.22-33; Mk 6.45-52)
16Ɓwâ lɨ́tɔ̧ yi kerɨré, nɨ̀fuùb Yésùù ɨ́ sê sɔ̀ɔ́. 17Ŋgáb ɨ́ lê kwáìn, pènɨ ɓáá, gìnɨ péín Kàpèrnàwúùm. Mɨ̀sɨ́mnɨ̀r yi sɨ́ɨmcií, Yésù yi nɨ́ ŋgáb kwàsòháyèwá. 18Ɓárín ku, mvúm yaá nɨ tɔ̀nɨ ɓetí kəŋmbə́r yaá nɨ fùnɨ cei. 19Ŋgáb yi gɨɓacií sàmàìn kílòmétà ŋgiì ɓe tínmwi̧, ŋgáb ɨ́ pê ŋgə́ ŋgáb gàìnsònɨ ŋgə́ a ɗeisoce mvúmí còóm. Vùù ɨ́ bì ŋgáb. 20Kí á Yésù tana ŋgáb ɨnè: «Nyí nɨ vùù ô, mɨ á!» 21Ŋgáb ɗúnɨ ŋgə́ gàmndésònɨ kwáìn, ŋgáb sɨ̀rɨ̀cì na kór féíntɨ́ nɨ́ sɔ̀ɔ́ féin yɨ́ ŋgáb yi du gìniì.
Nɨ̀vɨ́tɨ̀b á mátèènɨ Yésù
22Ye saín, nùb yi me ɓáá cəré yi ɗəəŋtɨ́ ɨnayâna kór tɨ á há nɨ sɔ̀ɔ́ ɓè mwi̧; Yésù tɨmcè nɨ́ kwáìn lə́wa ɓe nɨ̀fuùb noò gìnɨ cəə́r, ŋgáb tɨ gɨɓa bɨ ŋgáb kɨ́ ŋgáb á. 23Ɨ́dù kwááì kù yi éíwo bɨ́ Tìbèriyâdə̀ ɨ́ féínwò ɓè, yɨ́ ŋgáb tɨ taŋ bɨ̀rê Yésù tɨ gɔkna ŋgáb cùr ŋgə́ tɨ sákte Mèín ndè. 24Hȩ nɨ̀vɨ́tɨ̀b pə́ bɨ́ ɨnayâna dùgɨ̀ Yésù, dùgɨ̀ nɨ̀fuùb noò bɨ ɓè ɗàwáá, ŋgáb ɨ́ lê kwááì lè no gìnɨ Kàpèrnàwûm másénɨ Yésù.
Yésù ɨ́ du cɔŋ du nànɨ mè àmɨrì ru
25Ŋgáb ɨ́ gì kwànɨ Yésù cəə́r ku, ŋgáb ɨ́ fɔ̂ ŋgə́: «Tá tɔ̀hí, wu féínce wú hò̧ ɓwâ ŋge?» 26Yésù ɨ́ pììnà ŋgáb ɨnè: «Mɨ tanaɓa nyí àmɨɨr wááŋ á: nyí má nɨ́ mɨ àm nyí tɨ taŋ bɨ̀rê nyí ɨ́ fùb lè á, nɨ àm nyí tɨ ók njàb lìím mɨ tɨ ndɨŋndé sé. 27Nyí nɨ ə́r ɓe ɨ́r cɔŋ du ɓáàŋnɨ ɓáŋhɨ́nne ə̂r, éínáam ɓe ɨ́r cɔŋ du ɓáàŋnɨ ɗàwáá, duce nànɨ mè mɨ̀cɨ̧̀. Cɔŋ kɨ́, Mwin Nɨ̀rì ɓa nyí nànɨ á. Lɨ̀m Mèín nɨ̀mɨr nò du Táà á ŋgéé só.» 28Á ŋgáb fɔ́gi ŋgə́ ɨnè: «Ní á nɨ́m fɨ́tɨ ndɨ̀ŋnɨ, nɨ́m a éì ə́r Mèín ɗúré?» 29Á Yésù piina ŋgáb: «Nɨ́m Mèín ɗú nyí ndɨ̀ŋte du nyí ə́mnɨ̀ nò ŋgə́ yi tómworé á.» 30Ŋgáb ɨ́ tànà ŋgə́ ɨnè: «Ní á wu ɓace nɨ́m túùmnànɨ? Wu ma ndɨ̀ŋnà nɨ́m lìím kù kà, nɨ́m a ə́ə̀mhà nɨ́ wu ye. 31Tákɨ̀rɨ́b nɨ́mè ya taŋtɨ́ Mân#6.31 Mân du cɔŋ ya ɗisónakom gbàŋ Ísràyéèl ɓɨllin ŋgáb á cè ti súmnií rɨ á. Ŋgáb ya ɓáíkom ɓe kí. ŋgáb a cè ti sumnií. Káàtà Mèèín taá u̧, ɓetí á no tɨín ɨnè: ‹Mèín ya naá ŋgáb cɔŋ só ɓɨllɨnne.› » 32Yésù ɨ́ pììnà ŋgáb: «Mɨ tanaɓa nyí àmɨɨr wááŋ á, nɨ Mòyîs sé yi na nyí cɔŋ só ɓɨllɨnne, ɨ́dù Tá moò ɨ́ du nànɨ cɔŋ àmɨrì só ɓɨllɨnne ru. 33Ɓetí cɔŋ Tá moò du nàniì du cɔŋ só ɓɨllɨnne duce nànɨ mèè á.» 34Á ŋgáb tana ŋgə́ ɨnè: «Tá, nalɨ́ŋ nɨ́m cɔŋ kɨ́ ye.»
35Yésù ɨ́ wáànà ŋgáb ɨnè: «Mɨ du cɔŋ du nànɨ mè àmɨrì á. Nò gainwo mé, cɨ̧̀ kwá nɨ ŋgə́ nôm. Nò ə́mne mé, síì kwá nɨ ŋgə́ ndɨ̀ŋ. 36Ɨ́dù, mɨ tanacií nyí: nyí péé mɨ, nyí ɨ́ dù nɨ́ mɨ ə́ə̀mnɨ ɗàà. 37Nùb Tá na mé lâs ɓa mɨ gàìnwònɨ mwi̧í̧ mwi̧ á; nò gainwoce mé, mɨ tɨ̀ mɨ nò kɨ́ lèècée. 38Ɓetí mɨ éísówo mɨ ɓɨllin gònɨ ndɨ̀ŋnɨ nɨ́m nò yi tómwo mé ɗúré á, nɨ kɨ́ mɨ nɨ̀mɨr mɨ ɗúré sé. 39Nɨ́m nò yi tómwo mé ɗúré á rè: nùb ŋgə́ ya na mé lâs, nɨ̀mwi̧ nɨ lɔ̧̂, ɨ́dù ye cáŋhȩ̀ ɗɔ̀bí, mɨ sə̀ə̀mcùhó̧ ŋgáb cwéé. 40Nò lâs ɗəəŋcu mwin Tá tómworé, ɨ́ ə́mnè mwin kíì, nùb kɨ́ á kwànɨ mè mɨ̀cɨ̧̀, mɨ a sə̀ə̀mcùhô̧ ŋgáb cwéé ye cáŋhȩ̀ ɗɔ̀bí. Àà, nɨ́m Tá moò ɗúré á ná kí yáà.»
41Jwîf bɨ ɨ́ yà ŋgùùŋtèènɨ àm Yésù yi ta: «Mɨ du mɨ cɔŋ só ɓɨllɨnne á» na rè. 42Á ŋgáb yaré ŋgùùŋtèènɨ mvókín ŋgábè no ɨnè: «Ɨna! Yésù mwin Yòsə́ə̀b nɨ rè sé à? Nɨ́m ɗəəŋɓatɨ́ tá noò ɓe yà nóò, ŋgə́ a tà ní só nɨ́ ɓɨllin á na á à?» 43Yésù ɨ́ tànà ŋgáb: «Uweenáam ŋguŋguŋné! 44Nò kù sàmàìn gainwo mé ɓè Tá ya tómwo mé du nò kɨ́ njɔ̧̀ nə̀tɨ̀nàwáá ɗàà. Nò kɨ́ cè, ye cáŋhȩ̀ ɗɔ̀bí, mɨ ɓa ŋgə́ sə̀ə̀mcùhó̧nɨ cwéé á. 45Tɨ́kìn Mèèín kù yi tɨintɨ́ ɨnè: ‹ŋgáb lâs, Mèín ɓa ŋgáb tɔ̀ɔ̀nɨ á›. Nò lâs ók tɔ̀ɔ́ Táà, ɨ́ jə̀ŋɓwê tɔ̀ɔ́ kíì, ɓa mɨ gàìnwònɨ á. 46Nò kù nɨ Tá pə́kɨ́yèwá, sé nò Mèín yi tómworé ɨ́ pə́ Tá. 47Mɨ tanaɓa nyí àmɨɨr wááŋ á: nò ə́mne mé, á ɓe mè mɨ̀cɨ̧̀. 48Mɨ du cɔŋ du nànɨ mè àmɨrì á. 49Tákɨ̀rɨ́b nyínè ya taŋtɨ́ cɔŋ kùb ɓé Mân ndɨ ti súmnií. Cɔŋ kɨ́ ɨ́ dù nɨ́ ŋgáb mè mɨ̀cɨ̧̀ nàwá. 50Ɨ́dù nò ɓa tàŋnɨ cɔŋ só ɓɨllɨnne, ɓa dùnɨ ɓe mè mɨ̀cɨ̧̀ á. 51Mɨ du cɔŋ jáŋ só ɓɨllɨnne á. Nò taŋ cɔŋ kíì ɓa dùnɨ ɓe mè mɨ̀cɨ̧̀ á. Cɔŋ mɨ ɓa nànɨ kɨ́ du síí mɨ nɨ̀mɨ́rí á; mɨ nakɨ́ síí mó kɨ́ u̧ àm nùb ɗɔ̀bɨ́nné a ɓáì á.»
52Nyindí Yésù yi nyin kɨ́ ɨ́ nà Jwîf bɨ njù̧, ŋgáb ɨ́ yàrê wáàmnɨ mvókín ŋgábè no ɨnè: «Ɓwà rè duye nɨ i̧ á, nànɨ nɨ́m sɨ́r noò nɨ́m tàŋtɨ na á à?» 53Yésù ɨ́ tànà ŋgáb ɨnè: «Mɨ tanaɓa nyí àmɨɨr wááŋ á, nyí ɨ́ dù sɨ́r Mwin Nɨ̀rì tàŋwá, nyí ɨ́ dù tɨ́m noò mèìɓwêwá, nyí tɨ̀ nɨ ɓe mè dùr. 54Nò taŋ sɨ́r moò, ɨ́ mèìkwà tɨ́m moò á ɓe mè mɨ̀cɨ̧̀, mɨ ɓace ŋgə́ sə̀ə̀mcùhó̧nɨ cwéé ye cáŋhȩ̀ ɗɔ̀bí á. 55Ɓetí sɨ́r moò du cɔŋ àmɨrì á, tɨ́m moò cè súm àmɨrì. 56Nò taŋ sɨ́r moò, ɨ́ mèìkwà tɨ́m moò á ɓaín ɓe mɨ, mɨ á cè ɓaín ɓe ŋgə́. 57Tá ya tómwo mé á jáŋ, ŋgə́ ɨ́ du mɨ nànɨ mè ru; u̧nè á ɓwê mɨ du nànɨ nò taŋ sɨ́r moò mè. 58Cɔŋ só ɓɨllɨnne á rè: cɔŋ kɨ́ nɨ hȩ kɨ́ tákɨ̀rɨ́b nyínè ya taŋ ɗà ɨ́ dù nɨ́ ŋgáb mè mɨ̀cɨ̧̀ nàwá rɨ ɗàà, nò taŋ cɔŋ ndèè ɓa nɨ dùnɨ ɓe mè mɨ̀cɨ̧̀ á.» 59Yésù yi nyin nyindí rè ŋgə́ á cè Kàpèrnàwûm, Dúú mɨ̀yú̧ú̧ no tɔ̀hí á.
Kìn du nànɨ mè mɨ̀cɨ̧̀ɨ̧́
60Hȩ nɨ̀fuùb Yésùù óknɨ nyindí ŋgə́ yi nyin kíì, ŋgáb ɨ́ tà: «Tɔ̀ɔ́ kɨ́ á ɓa nɨ ɓí yáà, na ɨ́ fɨ́tɨ ə́ə̀mnɨ kí?»
61Hȩ Yésù ɗəŋhȩ ɨnayâna nɨ̀fuùb noò á bɨ ŋgùùŋtèènɨ rèé, ŋgə́ ɨ́ fɔ̂ ŋgáb: «Kí ɨ́ ɓa nɨ́ ndɨ̀ŋnɨ ə́ə́m nyínè gùu ru à? 62Nyí ɨ́ pə́cè Mwin Nɨ̀rì wúícùnɨ yɨ́ ŋgə́ yi goré na! 63Nyéhè Sarîn ɨ́ du nànɨ mè ru, nɨ̀vɨ́tè nɨ̀mɨr sàmàìn kwa mè ɗàà. Nyindí mɨ yi nyinna nyínè ɨ́ du ndɨ̀ŋnɨ nyí kwà Nyéhè Sarîn du nànɨ mèè ru. 64Ɨ́dù, nùb kù mvókín nyínè no nɨ mɨ ə́ə̀mnɨ ɗàà.» Yésù yi nyin u̧ ɓetí yànɨ ɓwâ ŋgə́ ɓe nɨ̀fuùb noò yi marɨré, ŋgə́ yi ɗəəŋtɨ́ nùb yi du ɓe ə́ə́m ɗàwáá ɓe nò yi ɓa ŋgə́ sə́rɨ̀niì. 65Yésù ɨ́ tàkwà ɨnè: «Àm kɨ́ á mɨ tɨ tana nyí ɨnayâna nò kù sàmàìn gainwo mé ɓè Mèín du nò kɨ́ njɔ̧̀ nə̀tɨ̀nàwáá ɗàà ru.»
66Yànɨ ɓwâ kɨ́ á nɨ̀fuùb noò ví̧i̧ ya mbɨ́kci bɨ́ ŋgə́ tùnɨ. 67Á Yésù fɔ́ nɨ̀fuùb cóóŋ ɨ́ bɨrɨ́b lè ɨnè: «Ɨna, nyí nɨ gɨ̀ɓwênɨ ɗàwá à?» 68Sìmóŋ Píyéèr ɨ́ pììnà ŋgə́ ɨnè: «Kìn wo ɓɔ̧ne ɨ́ du nànɨ mè mɨ̀cɨ̧̀ ru, nɨ́m gàìnndóŋkwàcɨ̀ na. 69Ɗàrò nɨ́m ə́əmtɨ́ wu, nɨ́m ɗəəŋceé ɨnayâna wu ɨ́ du nò járkɨ́ták Mèín yi tómworé ru.» 70Yésù ɨ́ tànà ŋgáb ɨnè: «Nyí cóóŋ ɨ́ bɨrɨ́b lâs, mɨ ɨ́ caha nyí ru ye! Ɨ́dù nɨ̀mwi̧ mvókín nyínè noò nɨ sátàìn á!» 71Sátàìn ndè, Yésù yi ɓé Yúdàs mwin Sìmóŋ Ìskàrìyôt á. Ɓetí Yúdàs ɨ́ du nò yi ɓa sə́rɨ̀nɨ Yésùù ru, dugɨ hȩ ŋgə́ ya du mvókín nɨ̀fuùb cóóŋ ɨ́ bɨrɨ́bì.
S'ha seleccionat:
Jâŋ 6: NTV
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
© 2007 Alliance Biblique du Cameroun, B.P. 1133, Cameroon