Lúkàs 20
20
Nyòm Yésùù goye ŋga?
(Góòmɓwê Mt 21.23-27; Mk 11.27-33)
1Ye kù, Yésù yaá tɔ̀hí, tànànɨ nɨ̀vɨ́tɨ̀b Kìn Nyɔ̧ɔ̧́ Dúú Jíri Mèèín no. Á mvènnɨ́b nùb na satɨgàà ɓe nɨ̀gááŋ káàtàbì ɨ́ kɨ̀jííb lə́so. 2Ŋgáb ɨ́ fɔ̂ ŋgə́ ɨnè: «Nɨ́ɨ́b wu duye ndɨ̀ŋnɨ rè, na ɨ́ na wu nyòm kɨ́. Tanam nɨ́m nò ta wu ndɨ̀ŋ u̧nèé?» 3Yésù ɨ́ pììnà ŋgáb: «Mɨ á nyí fɔ́cùɓwênɨ fɔ́ mwi̧. Tananáye mɨ: 4Na yi ɨ́ tómwo Jâŋ gò kɔ̀ɔ̀nɨ kùb kɔ ə́mní, Mèín kèè nɨ̀vɨ́tɨ̀b?» 5Ŋgáb ɨ́ yàrê ndáŋnɨ mvókín ŋgábè no, mánɨ kɨ̀cáàb ŋgáb piina ŋgéé. Ŋgáb ɨ́ tà: «Nɨ́m ɨ́ tà: ‹Mèín yi tómwo Jâŋ ndu›, ŋgə́ ɓa nɨ́m fɔ́nɨ, àm níì á nɨ́m yi duce nyindí ŋgéé ɓɔ̧ne ə́ə̀mwá á. 6Nɨ́m tàgɨ̀cé: ‹Nɨ̀vɨ́tɨ̀b á›, nùb lâs ɓa nɨ́m ndɨ̀llénɨ ya, lóòŋkwíìkɨ́nɨ ɓe sɨɨ á, ɓetí nùb lâs ɗəəŋtɨ́ bɨ́ ɨnayâna Jâŋ ya nɨ́ tɨ́kìn Mèèín á.» 7Á ŋgáb piinagi Yésù ɨnè: «Nɨ́m nɨ ɗə̀ə̀ŋwá nò ya tómwo Jâŋ gò kɔ̀ɔ̀nɨ nɨ̀vɨ́tɨ̀bì.» 8Kí á Yésù yi tana ŋgáb: «Àà, mɨ ma mɨ nyí tànàcénɨ nyòm mɨ du ndɨ̀ŋnɨ nɨ́ɨ́b kɨ́ ɓe kíí ɗàà.»
Sà̧à̧ nùb ə́ré njɔ̧̀ ɓáŋhɨ́bí
(Góòmɓwê Mt 21.33-46; Mk 12.1-12)
9Yésù ɨ́ yàrê átɨ̀nànɨ nɨ̀vɨ́tɨ̀b sà̧à̧ rè: «Nɨ̀ŋgwá kù ya ɗȩȩtɨ́ mwar yɔ̀ gum na súmé, ŋgə́ ɨ́ ɗòblékɨ́sò tɨ́ɗèìn bɨ mwai kɨ́ no. Ŋgə́ ɨ́ gì nɨ ti kù no cóo. 10Ɓwâ guum yi waŋndé, ŋgə́ ɨ́ tómsò nò no ə́ré kù yɨ́ tɨ́ɗèìn bɨ kíì, tànànɨ ŋgáb, ŋgáb nàwòcé ní kɨ́ ɗóhe ɓe níì yáá. Ɨ́dù, tɨ́ɗèìn bɨ ɨ́ jɨ̀m nò no ə́ré kɨ́, ŋgáb ɨ́ ŋgɨ́ícù ŋgə́ ŋgáár sam. 11Tá mwarí ɨ́ tómsònàkwà ŋgáb nò ə́ré ji, ŋgáb ɨ́ jɨ̀mɓwê ŋgə́, ŋgáb ɨ́ àndè ŋgə́, ŋgáb ɨ́ ŋgɨ́ícùwòɓwê ŋgə́ ŋgáár sam. 12Ŋgə́ ɨ́ tómsòkwà nò taarɨ́bí; nò kɨ́, ŋgáb ɨ́ ɗə́mɨ̀ɓwê ŋgə́, ŋgáb ɨ́ lèèhó̧sò ŋgə́ mwar gɨ́ní. 13Á tá mwarí dukɨ́ u̧u̧, ŋgə́ ɨ́ tà: ‹Mɨ á ŋgáb tómsònànɨ mwin ɗûnɨ́mí mo rè. Mɨ lə́mne ŋgáb ɓa ŋgə́ jə̀ŋnɨ á.› 14Ɨ́dù ɓwâ tɨ́ɗèìn bɨ pə́so mwɨi kɨ́ gòniì, ŋgáb ɨ́ tà mvókín ŋgábè no ɨnè: ‹Nò kwá me ɓe nɨ́ɨ́b kwíhɨ̀bì á du gònɨ ɗàrɨ́, nɨ́m kwíìná ŋgə́, nɨ́ɨ́b kwíhɨ̀b kɨ́ a ô ɓe nɨ́m.› 15Á ŋgáb njóohó̧so ŋgə́ mwar gɨ́ní, ŋgáb ɨ́ kwíìkî ŋgə́.»
Á Yésù fɔ́: «Ɓe vùùm nɨ́ɨ́b ndóŋ kɨ́ lâs, cùr kɨ́ no, ní á tá mwarí ɓa ndɨ̀ŋnɨ ɓe tɨ́ɗèìn bɨ rè? 16Ŋgə́ ɓa gɨ̀sònɨ á, ŋgə́ a kwíìkî ŋgáb, ɗà ŋgə́ a ɗòbcùrê nùb ji mwai kɨ́ no.» Hȩ Yésù nyìnnɨ u̧nèé, á nɨ̀vɨ́tɨ̀b ta: «Áì, Mèín nɨ nɨ́m wu nyin ɗàrɨ́ ókháà.» 17Ɨ́dù Yésù ɨ́ góòmkî ŋgáb u̧u̧, ŋgə́ ɨ́ tà: «Nɨ́m du tɨín káàtà Mèèín no ɨnè rè tace i̧ á?
‹Sɨ̀ne nùb óŋ dúhéé yi leehó̧kɨ́ gə́nȩ̀né
á yi sei jù̧ú̧ dúhéé›?
18Nò lâs kwá jób jù̧ú̧ kíì, nò kɨ́ kwá ɓei, nò ŋgə́ kwá muŋlomséce yáà, ŋgə́ kwá ŋgírɨkɨ́ nò kɨ́.»
Làmpô ók ɓe Sèsáàr
(Góòmɓwê Mt 22.15-22; Mk 12.13-17)
19Ɓè mu̧u̧, nɨ̀gááŋ káàtàbì ɓe mvènnɨ́b nùb na satɨgàà ɨ́ yàrê mánɨ i̧ á vúm ɓa ndɨ̀ŋnɨ, vúm a bì Yésù, ɓetí ŋgáb yi ɗəəŋtɨ́ ɨnayâna Yésù átɨ sà̧à̧ rè lèènɨ vúm nyindí só á. Ɨ́dù ŋgáb yaá ónɨ vùù nɨ̀vɨ́tɨ̀bì. 20Á ŋgáb yaré óòtèènɨ Yésù ɓɔ̧. Ŋgáb ɨ́ tôm nùb kù gɨ̀ ndɨ̀ŋnɨ hȩ vúm nùb ɗɨ́ɗɨ̧́ á, ŋgáb a fɔ̂ Yésù fɔ́ àm bɨ ŋgə́ pìí nó ɓɔ̧ne ya kwe, ɗà vúm a gɔ̀ksòkɨ́nà ŋgə́ gómnà nò du ɓe nyòme nɨ̀vɨ́tɨ̀b lâs ya kwe. 21Fɔ́ ŋgáb yi fɔ́ ŋgéé á rè: «Tá tɔ̀hí, nɨ́m ɗəəŋtɨ́ nɨ́m wu du nyìnniì ɓe kɨ́ wu du tɔ̀ɔ̀niì lâs á hàrák. Àm woò cè nɨ́ ɓe ju jíri nɨ̀vɨ́tèé ɗàà. Ɓe àmɨɨr cúk, wu á ɓwêcé tɔ̀ɔ̀nɨ ɗɨ́m juu Mèín ɗúré. 22Tanaye nɨ́m, ɓíì nɨ́mè á tànɨ kùb gòmnà Sèsáàr nò du mvèìn kàm jírií làmpô kèè, kùb gòmwá?» 23Ɨ́dù Yésù ɨ́ bì nɨ́ kɨ̀cáàb ŋgábè, á ŋgə́ tana ŋgáb: 24«Nawonáye mɨ sure mònéè ɓè mwi̧. Ɓɨ̀m du yá hò̧ ɓe ɨ́r du yá tɨín ndè, kɨ́ naà á?» Á nùb kɨ́ pihe, ŋgáb ɨ́ tà: «Kɨ́ Sèsáàr á.» 25Á Yésù tana ŋgáb: «Àhâ̧, nanáam Sèsáàr nɨ́m ók ɓe ŋgéé, nyí a nàhàcè nɨ́ Mèín nɨ́m ók ɓe Mèèín ye.» 26Nyindí Yésù yi du nyìnnɨ nɨ̀vɨ́tɨ̀bì tíí kɨ́ no, nɨ̀gááŋ satɨgàà ɨ́ dù bɨ́ kwàwá kum ŋgáb ɓa Yésù no bìniì. Ŋgáb ɨ́ gbɨ̀ɨ̀ŋɓà bɨ́ nyindí nó kɨ́ cei, ŋgáb yɨrɨ́b.
Fɔ́ Sàdúsààb yi fɔ́ ɓe ɨ́r sə̀ə̀mcùhô̧ cwéé nɨ̀kwíbí
(Góòmɓwê Mt 22.23-33; Mk 12.18-27)
27 Sàdúsààb yaá bɨ tànɨ nɨ̀kwííb kwá bɨ sə̀ə̀mcùhô̧. Ŋgáb ɨ́ gàìnwò Yésù gònɨ fɔ́nɨ ɨnè: 28«Tá tɔ̀hí, ɓíì Mòyíìs tanaá nɨ́m ɨnè: ‹Nɨ̀ŋgwá kù ɨ́ dù ɓe gwi, ŋgə́ ɨ́ kû ŋgáb mwin fèìnwá, á ɗúnɨ mwin yàá noò ácù gwi kɨ́, ŋgə́ a fènnà nɨ̀kúr mwin.› 29U̧ á yi ndɨŋ ɓe mwin yàá bɨ tɨ́ɓaám. Nò tíí yi ɓuú gwi, ŋgə́ ɨ́ kúmbɨ́kkɨ́sò gwi kɨ́ ŋgáár sam, mwin ɗàà. 30Nò bɨrɨ́bí ɨ́ ácù gwi kɨ́, ŋgə́ ɨ́ kúɓwê u̧. 31Nɨ́m mwi̧ kɨ́ ɨ́ ndɨ̀ŋɓwê ɓe nò taarɨ́bí, há̧á̧ vùùm ɓoò tɨ́ɓaám lâs ɨ́ kû u̧, ŋgáb mwin fèìnwá. 32Cùr kɨ́ no, nɨ̀gwi ɨ́ kútèrécáŋhȩ̀. 33Ɓwâ nɨ̀kwííb kwá səəmcuhó̧ré, ŋgə́ kwá duhó̧bɨ́ɨŋ gwi naà? Ɓetí ŋgáb tɨ́ɓaám lâs yi ɓuú ŋgə́!» 34Á Yésù piina ŋgáb ɨnè: «Nɨ̀ŋgwáàb ɓe nɨ̀gub ɗɔ̀ɔ́b lè noò á ɓùnɨ gùúm. 35Ɨ́dù nɨ̀ŋgwáàb ɓe nɨ̀gub, Mèín pə́ du bɨ́ ɗóhîn ɓe sə̀ə̀mcùhô̧ nɨ̀kwíbí a tì gì dùnɨ ɗɔ̀ɔ́b cɨ́m yȩné noò bɨ ɓùcɨ̀nɨ gùúm ɗàà. 36Sàmàìn ŋgáb kúcɨré nɨ ɗàà, ŋgáb ducɨ bɨ hȩ dùgallɨb Mèèín á. Ŋgáb ducɨ bɨ munɨ́b Mèèín á, ɓetí ŋgáb səəmcuhó̧ó̧ bɨ́ cwéé. 37Duceé kɨ́ nɨ̀kwííb kwá səəmcuhó̧ cwéé, Mòyîs yi túumnacií nɨ́m laŋtɨ̧ɨ̧́, sà̧à̧ mvɨ́ŋjè yɔ̀ɔ wa ya laihó̧ nóò no, ɓwâ ŋgə́ yi ɓékom Kéké: ‹Mèín Àbɨ̀ràhâm, Ìsâk ɓe Yákòb.› » 38Á Yésù tagi: «Kɨ́ nɨ̀vɨ́tɨ̀bì, Mèín nɨ Mèín nùb jááŋ á, ŋgə́ nɨ Mèín nɨ̀kwíbí sé. Ɨ́dù kɨ́ Mèèín, nɨ̀vɨ́tè nɨ kúnɨ kú̧u̧ ɗàà.» 39Kí á nɨ̀gááŋ káàtàbì kù ta: «Wu nyinɓatɨ́ mîn, tá tɔ̀hí.» 40Ŋgáb yi nyin u̧ ɓetí fɔ́ndóŋkwànɨ Yésù fɔ́ tíí tíí yi yɔ́kci nɨ́ ŋgáb.
Yésù ta Mèsî du Kéké Dàvíìt á
(Góòmɓwê Mt 22.41-46; Mk 12.35-37)
41Yésù ɨ́ tànà ŋgáb: «I̧ á nɨ̀vɨ́tɨ̀b fɨ́tɨce bɨ́ tànɨ ɨnayâna Mèsî nɨ nyȩ Dàvíìt á? 42U̧ kɨ́ Dàvît kɨ́ nɨ̀mɨr taá káàtà wàìbì no ɨnè:
‹Mèín nò du Kékéé ya tanaá Kéké móò ɨnè:
gom ŋgáŋnɨ mo ŋgáár lame,
43há̧á̧ hȩ mɨ ɓa ndɨ̀ŋnɨ nùb wo ɓi̧ní,
wu kpók ŋgáb ŋgwé ɗàá.›
44Dàvît ma ɓéha nɨ Mèsî ‹Kéké› á ye, i̧ á cè Mèsî fɨ́tɨ dùcùkwànɨ nyȩ Dàvíìt?»
Yésù ta nɨ̀fuùb níì bɨ nɨ̀gááŋ káàtàbì gàndɨ̀r
(Góòmɓwê Mt 23.1-36; Mk 12.38-40)
45Nɨ̀vɨ́tɨ̀b á cè ókkɨ́nɨ nɨ́m Yésù yi nyinkomndé, á ŋgə́ tana nɨ̀fuùb noò ɨnè: 46«Gə́tɨnáam ɓe nɨ̀gááŋ káàtàbì. Ŋgáb á ɗúnɨ yə̀ŋtèènɨ ɓe gâŋ kàtɨ́b só. Ŋgáb á ɗúɓwênɨ kùb nyìndɨ̀tèè vúm laŋtaaŋ jííbí. Dúhɨ́b mɨ̀yú̧ú̧ no, ŋgáb á cànɨ ju tíí. Yɨ́ cɔɔ̀ŋ cè, ŋgáb a cà ju dɨmɨri. 47Ŋgáb á pɨ̀ɨ̀mkɨ́nɨ nɨ́ɨ́b cutɨ́b mámkwíbí ŋgáréè, ŋgáb a ŋgòòŋgì mɨ̀yú̧, túùmnɨ vúm nùb nyɔ̧ɔ̧́ á. Jábɨ́r ŋgábè kwá ndóŋ kɨ́ nùb lâs.»
S'ha seleccionat:
Lúkàs 20: NTV
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
© 2007 Alliance Biblique du Cameroun, B.P. 1133, Cameroon