Luka 20
20
Toy baawɗe Yeesu iwi?
(Matta 21:23-27; Markus 11:27-33)
1Nyannde feere Yeesu ɗon ekkitina yimɓe nder haykaliiru, o waazini ɓe kubaruwol belŋgol. Mawɓe liman'en e moodiɓɓe e ndotti'en ngari, 2ƴami mo: “Yeccu min bee duŋayeere moy a waarata kuuje ɗe'e? Malla moy duŋani ma waɗugo bana nii?” 3O jaabi ɓe: “Min boo mi ƴaman on huunde woore. Mbi'eeɗam: 4Moy duŋani Yuhanna waɗango yimɓe baptisma? Allah naa malla yimɓe?” 5Ammaa ɓe mbi'mbi'tiri: “To en mbi'i: Allah, o wi'an: Koni on nuɗɗinaay mo? 6To en mbi'i: Yimɓe, nden boo yimɓe fuu piɗan en bee kaa'e, ngam ɓe nuɗɗini Yuhanna o annabiijo fakat.” 7Nden ɓe njaabi: “Min anndaa.” 8Yeesu wi'i ɓe: “Min boo mi wi'ataa on bee duŋayeere moy mbaɗanmi kuuje ɗe'e.”
Balndol dow demoowo kalluɗo
(Matta 21:33-46; Markus 12:1-12)
9Ɓaawo man Yeesu fuɗɗi wolwango yimɓe balndol ngo'ol: “Goɗɗo jubi ngesa inabooje, o halfini ka remooɓe, o dilli jahaaŋgal, o duuri#Esa 5:9.. 10Nde saa'i teɓugo inabooje waɗi, o neli jaggiiɗo maako haa remooɓe ngam ɓe ndokka mo geɗal maako haa inabooje. Ammaa remooɓe tappi nelaaɗo, ɓe lortini ɗum meere. 11Jawmu ngesa inabooje neli jaggiiɗo mum feere, ɓe tappi mo boo, ɓe lortini mo meere. 12O neli tataɓo fahin, ɓe naawni ɗum, ɓe ndiiwi ɗum. 13Jawmu ngesa inabooje wi'i: Ko mbaɗanmi? Mi nelan ɓiɗɗo am giɗaaɗo, kaŋko kam ɓe teddinan mo! 14Ammaa nde remooɓe ngi'i mo, ɓe carwootiri, ɓe mbi'i: Ndaa donoowo, mbaren mo ngam haa ngesa laatano en. 15Ɓe ndasi mo yaasi ngesa, ɓe mbari mo.
Ɗume jawmu ngesa inabooje tammi waɗango ɓe? 16O waran, o halkan remooɓe ɓe'e, o hokkan woɗɓe ngesa man.” Nde yimɓe nani ɗum, ɓe mbi'i: “Ɗo kam waɗataako!” 17Ammaa Yeesu suti ɓe, wi'i: “Ɗume binndaaɗum ɗu'um yiɗi wi'go?
Hayre nde mahooɓe ngudini,
laati hayre talkumoore ɓurnde saman#Jab 118:22..
18Koo moy do'i dow hayre nde'e, sampititto. To nde do'i dow goɗɗo boo, nde naman mo.”
Jomorgol ngam laamiiɗo Roma
(Matta 22:15-22; Markus 12:13-17)
19Moodiɓɓe tawreeta e mawɓe Farisa'en tefi naŋngugo Yeesu saa'i man nden, ammaa ɓe kuli yimɓe, ɓe paami dow maɓɓe o wolwi balndol ngo'ol. 20Ɓe puɗɗi aynugo Yeesu, ɓe neli horooɓe. Yimɓe man mbaɗi ko'e maɓɓe bana ɓe yimɓe adili'en, ngam ɓe naŋngira Yeesu nder bolle maako ngam ɓe keɓa hokkugo mo haa hiitooɓe e yimɓe marɓe baawɗe ngomnati. 21Ɓe ƴami mo: “Moodibbo, min anndi ko mbolwata e ko a ekkitinta ɗum gooŋga. A senndindirtaa yimɓe, a ɗon ekkitina laawol Allah bee gooŋga. 22Kaanduɗum min ndokka laamiiɗo Roma jomorgol naa malla taa min ndokka?” 23Yeesu annditi faasikaare maɓɓe, o wi'i ɓe: 24“Kolleeɗam suleyre. Suura moy e innde moy ɗo?” Ɓe njaabi: “Kaysara, laamiiɗo Roma jeyi.” 25O wi'i ɓe: “Nden kam njoɓe Kaysara ko haanani mo, ndokke Allah boo ko haanani Allah.” 26Ɓe keɓaay naŋngirgo mo yeeso yimɓe nder bolle maako. Ammaa ɓe kayɗini ngam jaawaabu maako, ɓe njeeɗi.
Ƴamol dow ummitineeki maayɓe
(Matta 22:23-33; Markus 12:18-27)
27Saduki'en woɗɓe ɓaditi Yeesu. Kamɓe ngoni wi'anɓe maayɓe ummitittaako. Ɓe ƴami Yeesu ƴamol ngo'ol#KN 23:8.: 28“Moodibbo, Muusa winndani en umroore nde'e: To goɗɗo maayi, acci debbo bilaa ɓiŋngel, sey deerɗiiko te'a debbo man, heɓana maayɗo danygol#TT 25:5.. 29Woodino deerɗiraaɓe njoweeɗiɗo. Arano te'i debbo, maayi bilaa ɓiŋngel. 30Ɗiɗaɓo te'i debbo go, 31non boo bee tataɓo. Ɗum laati bana non haa njoweeɗiɗo fuu maaydi bilaa heɓugo ɓiŋngel. 32Ragare man boo debbo maayi. 33Kadi nyannde ummitineeki maayɓe kam, o laatoto debbo moy caka maɓɓe? Ngam njoweeɗiɗo fuu te'ino mo.”
34Yeesu jaabi ɓe: “Yimɓe zamanuuru ndu'u ɗon te'indira. 35Ammaa he'iiɓe heɓugo geɗal haa zamanuuru waranndu e haa ummitineeki maayɓe, ɓe te'indirtaa. 36Ngam ɓe maayataa fahin. Ɓe nanndi bee malaa'ika'en, ɓe laatake ɓiɓɓe Allah ngam o ummitini ɓe diga maayde. 37Muusa wi'i laaɓɗum maayɓe ummititto bee yoŋki nder aayaaje ko winnda dow haala wumre, nde o wi'i Jawmiraawo o Allah Ibrahiima, o Allah Isiyaaku e o Allah Yaakubu#Gurt 3:6.. 38Allah laataaki Allah maayɓe, ammaa o Allah yeeɗɓe, ngam yimɓe fuu ɗon ngeeɗa fodde maako.” 39Woɗɓe haa moodiɓɓe, mbi'i: “Moodibbo, a wolwi booɗɗum.” 40Ɓe kuli ƴamugo mo ƴamol goɗŋgol.
Almasiihu o moy?
(Matta 22:41-46; Markus 12:35-37)
41Yeesu wi'i ɓe: “Noy ɓe mbi'rata Almasiihu o ɓii Daawuda? 42Ngam Daawuda bee hoore muuɗum wi'i nder deftere Jabuura:
Jawmiraawo wolwani jawmam:
Jooɗa haa nyaamo am,
43haa to mi laatini konne'en ma jaaɓruɗum kosɗe ma#Jab 110:1..
44Daawuda ewni mo Jawmiraawo, kadi noy Almasiihu laatori ɓiyiiko?”
Feloore dow haala moodiɓɓe tawreeta
(Matta 23:1-36; Markus 12:38-40)
45Yeesu wolwani pukara'en muuɗum yeeso nananɓe mo fuu, o wi'i: 46“Ndeente e moodiɓɓe tawreeta, yiɗɓe waancugo bee ngapaleeji juutɗi. Ɓe ngiɗi yimɓe koofna ɓe haa luuɓe. Haa joole tedduɗe ɓe ngiɗi jooɗaago nder cuuɗi dewal e to ɓe ewnake ɓe ngam nyaamdu boo, ɓe ɗaɓɓitan joole camɗinaaɗe. 47Ɓe ɗon njaɓta marle rewɓe yurumɓe, ɓe ɗon njuutina do'aare ngam yimɓe ngi'a ɓe. Ɓe keɓan kiita naawka masin.”
S'ha seleccionat:
Luka 20: FBDC
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
DEFTERE ALLAH © Alliance Biblique du Cameroun, 1994.