JOHN 2
2
Kana Me Naoyhapoi Mo
1 #
Jn 4.46; 21.2. Nyih lüm shepu nyih me Galilee mepu Kana chingme naoyhapoi mopu ngoh; hüyange Jesu ünyu tüome ngoh. 2Jesu hüyange I pinlan-o tüopa naoyha poipute nanpheng. 3#Jn 19.26; Mk 3.31.Aope wuwüngti khongküm yinge küm, Jesu ünyuwe Ite i, “Iman wuwüngti yenang.” 4#Mk 1.24; 5.7; Jn 7.6,30; 8.20.Hüwante Jesuwe janne i, “Sheko, hanghe linglak nange üte ilak ne yeje.” “Ü-hipak üne-o manngoi.” 5Inyuwe namnopalante i, “Iye hanghe ilakei numan-e tüo lingyah.”
6 #
Mk 7.3; Jn 3.25. Jehudilan jaopu wanglam kih-e hüyange tüopa jingne longtük wok ja ja me taksheng ni hei lüm nyippu tüome ang. 7Jesuwe namnopalante i, “Tüoyin longtük me yenge maatümtüoh.” Iman-e tüolan khongkümpu tükju ngoiye maatam; 8hüyange Iye imante i, “Sha-a ütam shaotehu hüyange mo nokpupa tangte yah wenhu.” Iman-e tüopa I tangte yahwen. 9Mo nokpupawe yeng jüppe nyao, hüyange wuwüngti ne mengteiye ngoh. Tüopa wuwüngti ümmepu pei Iye yeshing, hüyangpoi shaoshanpalan aoyinne yengshao iman-e shing. Iye nyemthe te nyik, 10hüyange Ite i, “Kahta liliye üwangne shemeipupa wuwüngti jonnang, hüyange yinpalan-a moh yang pheime Iye shewengpupa phenang. Hüyangpoi nange sha-a ngoiye shemeipupa wuwüngti angpu a!”
11 #
Jn 2.23; 3.2; 4.54; 6.2. Jesuwe Galilee mepu Kana me tüopa kahnyingwüngha füo üwangpa linge wang; I müktishiwapu hatüome ütahte ngai, hüyange I pinlanne Ite ütinglak.
12 #
Mt 4.13; Jn 7.3; Mk 3.31. Tüophei me Jesu hüyange Inyu, Inaolan hei pinlan Kapernaum te lai, hüyange tüome iman nyih üten ja ngoh.
Jesuwe Khümjing Jaotam
(Mt 21.12,13; Mk 11.15-17; Lk 19.45,46)
13 #
Jn 6.4; 11.55; Hin 16.1-6; Lk 2.41. Jehudilan Yinyepu mo oteiye ngoh, hüyange Jesu Jerusalem te ong. 14#Mt 21.12-13; Mk 11.15-17; Lk 19.45-46.Khümjing me Iye mahu, nyee, hei awyei yaopalan hei ngin leijeipalan khao me shotyange nge. 15Iye shetlak wu ling hüyange khümjing mepu yinmok üshei nyee hei mahu omme jange tei; Iye ngin leijeipalan khao shokke win hüyange iman ngin shaitam; 16#Lk 2.49.hüyange awyei yaopalante Iye ngaowe i, “Tüomepu tüoyin khongküm teitüoh! Numan-e üpa nok pheeileih nyoine tahmeng!” 17#Tüo 60.9.I pinlanne laingao me hüke nyanne ngohpu teihpei, “Nang nok jingne tao lahnyikpuwe hahshulak.”
18 #
Mk 11.28; Mt 21.23; Lk 20.2. Jehudilan I tangte ngoi hüyange tong, “Nange tüoyin linglak jingne toman shaome hanghe kahnyingwüngha füo linge hüolak shi?” 19#Mk 14.58; Lam 6.14.Jesuwe jan, “Tüopa khümjing mengtam tüoh, hüyange nyihlüm mongme Taowe loilak.” 20Hüwante Jehudilanne i, “Tüopa khümjing welak jingne wangpeng deli me wok yah, hüyange nange tüopa nyih lüm mongme loipu oklak a?”
21 #
1 Kor 6.19; Jn 8.57. Hüyangpoi Jesuwe I püm khümjing jeng ngao. 22#Jn 12.16; 14.26.Tüokhei, aope I lipu mepu yange ye, I pinlanne Iye ngaoyangpu tüopa teihtüo; hüyange iman-e lai ngaote, hüyange Jesuwe ngaoyangpu ngaote ütinglak.
23Aope Yinyepu Mo hipak me I Jerusalem me ngoh, Iye lingpu kahnyingwüngha füo ngeye kahtalan maawe I min me meng. 24Hüyangpoi Jesuwe imante yoi nying nyingke mong yehüm, hangjingne kahta lili Iye meiye shing. 25#Jn 1.47; 6.61; 13.11; Mk 2.8.Hüyange kahta aowe-o ülao ja jingne saki phawe ilak wongpong yeje, hangjingne kahtalan mongjang me hanghe pei hüyange ngai Iye shing.
S'ha seleccionat:
JOHN 2: KONYBSI
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
Konyak Naga Bible - ÜJAO LAITEP
Copyright © 2011 by The Bible Society of India
Used by permission. All rights reserved worldwide.