LUK 21
21
Wamnyuwe Dopu
(Mk 12.41-44)
1 #
Mk 12.41-44. Jesuwe leiye ngoh hüyange hakpalan ne khümjing dojing me iman hünghao hei dopu phapu nge, 2hüyange Iye leiye ngohwante muh yeonge toipu wamnyu jawe nginmei poisa ni hinpu nge. 3Hüyange Iye i: “Taowe numante iphaning üshei phei sheyong she ütingme tüopa wamnyuwe hin yangki. 4Hangjingne ülao lanne phapuwa, iman-e jonyange topu hei phayangki: hüyangpoi, tüopa wamnyu, tüolan me I üyin ngoh hüpoi üshei phayangki.”
Üküm Jin Füo
(Mt 24.1-14; Mk 13.1-13)
5 #
Mt 24.1-19; Mk 13.1-17. Pinlan ütamme khümjing jeng ngaowe ngoh, hüyange hüke i, long ümei shaha phei hüyange Kahwang te hünghao ne phapu hangshin meipuweih no! Hüpoi Jesuwe i, 6#Lk 19.43-44; Mk 14.58; 15.29; Lam 6.14.“Hipak ja peilak, numan-e ngepu tüolan long khongkümpu yeiteiye, ja nehoi yoi yoi nyoijing me angyange ye-ngelak.”
7 #
Lk 17.20; Lam 1.6. Iman-e Ite tong, “Konnyüopa, tüolan aope ngailak? Hüyange tüolan khongkümpu jingne hipak oteki she hanghe füo kaiye hüolak shi?”
8 #
Lk 17.23; Mk 13.21; 1 Jn 2.18. Jesuwe janne i: “Kentinge yomme ngoh yah. Hangjingne ü-min me kahtalan maawe hüke ngaowe peikülak, ‘I-a tao üja!’ hüyange ‘Hipak owe peiteki!’ Hüpoi iman pheite tahwoi. 9Aope numan-e hokpu hei moppu jailakei tahnyam; üwangne tüoyin ngaiye wanglak, hüyangpoi tüolan kaiye üküm hipak owe peipu ne yeje.” 10#2 Put 15.6; Isa 19.2.Iye yelakpe imante hüke i: “Jat jawe jat ja phei tüi-e, hüyange ahngchinge ahngching phei tüi-e yonglak; 11nyamlakpa ne minweleipu ngohlak, seanyao yenglepu, hüyange kenphe me dak ümeng ngailak; yashanpu toi hüyange wangme füo üyong ngelak.
12 #
Mt 10.17-21. #Lam 25.24; Jn 16.2.“Tüolan khongküm ngai eipe, numan phophalak hüyange shangne tamphalak; synagogue me ngaophünlak jingne numan phünne phakülak hüyange numan shapu nok me angphalak; ü-min jingne ahnglan hei wanglam lampalan shaome numan woipei phalak. 13#Phi 1.12.Numan-e Pungao ümei ngaowe tamlak jingne hipak ümei tüone menglak. 14#Lk 12.11-12.Hüpoi nang nying nyingke hangke tienlak she mong yeshanglak jingne hipak ngoishao memuh nang juteih mongjang tümme tanyah: 15hangjingne wepalanne nang phei yela oklak ne Taowe nang ju me konjong hintam phalak. 16#Lk 12.52-53.Numan nyupalan-e, numan jeihei naolanne, numan pheipu lanne, hüyange numan shümpa lanne numan phünne phakülak; iman-e numan ütam-a li ne tamphalak. 17#Mt 10.22; Jn 15.18-25.Ü-jingne kahta üsheiye numante nuphalak. 18#Lk 12.7; Mt 10.30; Lam 27.34; 1 Sam 14.45.Hüpoi numan shang mepu shangmin ja nehoi yemahlak. 19#Mt 10.22; Ütah 2.7.Numan nün-okpu ngohtüoh, hangjingne hükih-e numan yinpu oklak.”
Jerusalem Menglak
(Mt 24.15-21; Mk 13.14-19)
20 #
Lk 19.41-44; 23.28-31; 17.31. “Hüyangpoi aope nyahponglanne Jerusalem neikon yange ngelakei, chingnyuwa mamshe mengkülak she numan-e shinglak. 21Tüophei me aoyin Judea me ngoh kahtang yete phettüoh, hüyange aoyin chingnyu me ngoh, tüolan-a yanne taitüoh, hüyange aoyin chingnyu mepu yanne taiye ngoh, chingnyu yamme yene tahtam. 22Hangjingne tüoyin khongkümpu üyin laime ngohpu ütahte ngailak jingne peipu ‘Shaoshi yali phapu nyih ngohnang.’ 23#Lk 23.29.Tüoyin nyih hei hipak me aoyin sheko püm yekengpe ngoh, hüyange naotak halan phei ngohpu nyuyonglan jingne hangshin shaomenglak! Tüopa kahmük me yashan yali shaoshi peilak, hüyange Kahwang mongshihpu tüolan kahta tangme ngohlak. 24#Rom 11.25; Isa 63.18; Dan 8.13; Ütah 11.2.Yanglow-e iman toilak, hüyange kahmük üshei yete iman phowe teilak, hüyange iman hipak manlin manlin eiha jat lanne Jerusalem wanglam lamlak.”
Kahta Üha Peipu
(Mt 24.29-31; Mk 13.24-27)
25 #
Mt 24.29-30; Mk 13.24-26. #Ütah 6.12-13; Isa 13.10; Joel 2.10; Zeph 1.15.“Wanghe, linnyu, hüyange shanha me füo ngohlak. Kahtoknyu me jat hei li üshei, yengching hüyange yengmokh ngaipu wüng jaiye nyamme yanlak. 26Kahtoknyu me hanghe peikülak she tanne ngohpu peipu kaiye kahtalan nyampuwe liye talak; hangjingne wangtok me hanghe wong ngoh iman nyoite jange teilak. 27#Lk 9.27; Dan 7.13-14.Tüophei me wangphom me Kahta Üha yoi wong üyongpu phei hüyange müktishiwa puphei ngaipu iman-e ngelak. 28#Lk 18.7-8.Aope tüoyin ngaine ükong wanglakei, yongtüoh hüyange numan üng ngantüoh, hangjingne numan yinyelak oteki.”
Phukpee Me Ngaolep
(Mt 24.32-35; Mk 13.28-31)
29 #
Mt 24.32-35; Mk 13.28-31. Tüophei me Jesuwe imante tüopa ngaolep ngaowe i: “Phukpee hüyange ülaolan peete leiyah: 30Aope iman peeyak üyoi ngaine ükong wangpu numan-e ngeya peih jüo hipak ngoi nang she numan-e shingnang. 31Tüo ja leye, aope tüoyin ngaipu numan-e ngeyapeih, Kahwang ahngching peine oteki she numan-e shinglak. 32#Lk 9.27.Ütingpa me Taowe numante inang, tüolan lili manngai manngai, tüopa jin linne yetailak. 33#Lk 16.17.Wangdang hüyange kahtoknyu linne tailak; hüpoi ü-ngao aope-o linne yetailak.”
34 #
Lk 12.45; Mk 4.19; 1 Thes 5.6-7. “Hüpoi numan kentinge ngohyah! Meiyange motappu, hüyange yujok hah-ngapu, hüyange mongshangpu üyin ja ne, numan menge tah tam, yejema-a tüonyih mokhshe hankhak shümpuke yu ne ok. 35Hangjingne tüopa-a hankhak kih-e kahtoknyu kahtalan nopu tangme peilak. 36#Mk 13.33.Tüokhei numan kentinge ngohyah hüyange peikülak üshei me yinpu oklak jingne hüyange Kahta Üha sheshao me yongpu oklak nanjingne, jinte yoppe ngohyah.”
37 #
Lk 19.47; Mk 11.19. Hüyange nyihjeih she Iye khümjing me konnyüo, hüyangpoi wangnyak me Olive Kahtang yeme taiye phapan hipak win. 38Hüyange napning shomme I ngao jailak jingne kahta üshei khümjing me I shongte pei.
S'ha seleccionat:
LUK 21: KONYBSI
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
Konyak Naga Bible - ÜJAO LAITEP
Copyright © 2011 by The Bible Society of India
Used by permission. All rights reserved worldwide.