LUK 24
24
Yange Yepu
(Mt 28.1-10; Mk 16.1-8; Jn 20.1-10)
1 #
Mt 28.1-8; Mk 16.1-7; Jn 20.1,11-13. Hüpoi hat me üwangpu nap wangngai shaome shekolan iman-e tümpu üpe ümei yahyange mangjong te pei. 2Hüyange mangkoksa mepu longa shunge winyange iman-e nge, 3hüpoi aope iman üsha te ong iman-e Youngwanpa Jesu mang ye-nge. 4Hüyange tüo ngai, iman tüopa jingne nüngneiye ngohwante, mokhshe kahta ni phihlangpu inkhek inyange iman phin me yong; 5hüyange nyamme iman sheta kahtokte khuhta wante iman-e imante, “Hangne numan-e üyin-a lipu yo me yampu shi? I tüome yenang; hüpoi yange ye ngohnang! 6#Lk 9.22; 13.32-33.I aope üne-o Galilee me ngoh, Iye numante hangke i, teih tüoyah, 7hüke Kahta Üha ünulan yak me phünne phalak, hüyange tangpem me taklak, hüyange nyih lüm shepupa me nishe yange yelak she i.”
8Hüwante shekolanne I ngaolan teihtüo. 9Hüwante iman-e mangjong mepu leihye-e, hüyange tüolan üshei pen me ja te hüyange ülao khongkümpu te i. 10#Mk 16.1; Lk 8.1-3; Jn 20.2.Hüyange iman-a Mary Magdalene, Joanna, hüyange Jeams ünyu Mary ngohyangki; hüyange iman phei ülao shekolanne kahta lante tüolan i. 11Hüpoi tüolan ngao khongkümpu pinlan shaome jajang japu ngaopu ne meng, hüyange imante üting yelak. 12Hüpoi Peter yayonge mangjong te phet, hüyange Iye khuh tawe ümongte leiwante, Iye nye ükhai hei ülao nyoi me nge. Hüyange hanghe ngai she yashanne Iye yoi nokte ye.
Emmaus Me Kem
(Mk 16.12,13)
13Tüopa nyih memuh iman kahta ni Jerusalem mepu mile nyit phei me tangkhüw, jaipu Emmaus chingte taiye ngoh, 14hüyange hanghe ngai, tüolan khongkümpu jeng imnipa me teingao. 15Aope iman-e jamjamshe ngaowe teitong kemwante, Jesu imni yome pei, hüyange iman phei tai. 16#Jn 20.14; 21.4.Hüpoi I shinglak mepu iman mük büange ang. 17Hüyange Iye imante i, “Numan kemwante teingaopu ngaowa hanghe shi?” Hüwante sheta yengaipe iman-e yepope yong. 18Hüyange iman kahta ja Kleopas she minpuwe janne Ite i, “Jerusalem me nyoiyange tüome tüolan nyih hipak me hanghe ngai sha-a ngoiye yeshingpu-a nang ja shing a?”
19 #
Mt 21.11; Lk 7.16; 13.33; Lam 3.22. Hüyange Iye imante i, “Hangkih-e?” Hüyange iman-e Ite i, “Nazareth mepu Jesu jeng ao ngao hei toi me Kahwang hüyange kahta üshei tangme wongnangpu hipa ja ne ngoh; 20hüyange hangke ngengpalan hüyange teman wanglamlampa lanne I li ne tamlak jingne yeine tamme phünne pha, hüyange I tangpem me ep. 21Hüpoi I Israel Yinyepa ngoh nang she toman-e monghümme ngohyangki. Eiyang, tüolan khongkümpu kaiye, tüolan ngaiyang phei me sha-a nyih lüm shepupa ngohnang. 22Tüopahi angyange toman eihalan sheko ütamme toman yashanne tam. Napning shomme iman mangjong me ngoh, 23hüyange I mang ye-nge; wangdang shongmokpalan ngaipu nge she, hüyange I üyin me ngohnang she iküja she iye iman leihye. 24#Jn 20.3-10.Hüyange toman phei ngohpu ütamme mangkoksate leine wenne shekolanne ipuke nge, hüpoi iman-e I ye-nge.”
25Hüwante Iye imante i, “O üngapalan, hüyange hipalanne ipu üshei monglaowe menglaklan! 26Khrista tüopa shangepongpu ngeye I müktishiwa te onglak wongpong ne yejepu a?” 27#Lk 24.44-45; Lam 28.23; 1 Pet 1.11.Hüyange Mosa hei hipalan üshei mepu wange laingao üshei me I jeng nyanpu Iye imante khoih-e hüo.
28 #
Mk 6.48. Tüokhei iman ümeken me taiyapeih tüopa ching owe pei. Jesu I üne-o tailak kih hüo, 29hüpoi iman-e Ite henge i, “Toman phei ngohkei, hangjingne shaaji ün ngoinang hüyange nyih-a yeonge taiteki.” Tüokhei I iman phei jamme ngohlak jingne ong.
30 #
Lk 9.16; 22.19. Hüyange tüo ngai, aope Iye iman phei hahlak jingne shot, Iye an yahpuwe moiman, hüyange tüopa khoih-e imante pha. 31Hüwante iman mük eppe ngai, hüyange iman-e I shing. Hüpoi iman-e ye-ngepe I mah. 32Hüyange imanpa me teingaowe i, “Lamme Iye teman phei ngaowe laingao khoih-e hüowante, teman mongme powe yeteih a?”
33Hüyange tüopa hipak memuh iman yayonge Jerusalemte leih ye hüyange penme ja hüyange iman phei ngohpalan jamshe jemme nge, 34#1 Kor 15.5.hüyange i, “Youngwanpa ütingme yange yeteki, hüyange Simon tangte ngai!” 35Hüyange lamme ngaipulan hüyange hangke an khoihwante Iye imante shingne tam, she iman-e ngao.
I Pinlan Tangte Jesu Ngai
(Mt 28.16-20; Mk 16.14-18; Jn 20.19-23; Lam 1.6-8)
36 #
Jn 20.19-20,27; Jn 21.5,9-13; 1 Kor 15.5; Lam 10.40-41. Hüyange iman-e tüolan ngao ngaowante, Iye yoi nying nyingke iman hotan me yong (Hüyange imante i, “Numan phei chingmei ngohtüoh.”) 37Hüpoi iman mokh hüyange nyam, hüyange moung ja ngenang she teih. 38Iye imante i, “Hangne numan shangpu, hüyange hangne numan mongjang me teitongpu shi? 39#1 Jn 1.1.Ü-yak hüyange ü-yate leitüoh, tüopa-a ütingpa Tao. Üte jontehu hüyange leitüoh, hangjingne numan-e Tao ngepuke yaha ja te mei hei üwaan yenang.” 40Aope Iye tüo ngao, Iye yoi yak hüyange ya imante hüo. 41Hüyange aope iman üne-o mongmeipuwe ütingyelak okpe yashanwante, Iye imante i, “Tüome numan-e hahlak ütam ngohyah?” 42Iman-e Ite nyah üyang üpüm ja pha, 43hüyange Iye tüopa yah, hüyange iman sheshao me hah.
44 #
Lk 24.26-27; Lam 28.23. Hüyange Iye imante i, “Tüolan-a Ü-ngao hanghepa Taowe numan phei ngao, Tao aope üne-o numan phei ngoh, hüke Mosa ngaokeng hüyange hipalan hüyange Tüowelaihem me üjingne hanghe yin nyan, tüolan-a ütahte ngailak she i.” 45Hüwante iman-e laingao shinge oklak, Iye iman kenmong eppetam, 46#Hos 6.2; 1 Kor 15.3-4.hüyange Iye imante i, “Hüke hatüo nyanne ngohnang, Khrista shanglak, hüyange nyihlüm shepupa lipu mepu yange yelak, 47#Lam 1.4-8; Mt 28.19.hüyange Jerusalem mepu wange jat üshei monglüppu hüyange ünu winpu jeng I min me konnyüolak. 48Tüolan jingne numan saki ngohnang. 49#Lam 2.1-4; Jn 14.26; 20.21-23.Hüyange leihu, Üpawe janpu Taowe numan tangte shonnang, hüpoi ütang mepu numan tangte ünganwong manpei manpei numan chingnyu me nyoitüoh.”
Jesu Wangdangte Woi In
(Mk 16.19,20; Lam 1.9-11)
50Tüophei me Iye iman Bethani yekao yete woi, hüyange Iye yoi yak nowe honge, imante moiman tam. 51#Lam 1.9-11.Aope Iye imante moimantam, I iman mepu yan, hüyange wangdangte woi in. 52#Lam 1.12-14.Hüyange iman-e Ite khüm, hüyange mongmei üyong phei Jerusalemte leih ye. 53Hüyange Kahwang minyonge, iman khümjing me yelakpe ngoh.
S'ha seleccionat:
LUK 24: KONYBSI
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
Konyak Naga Bible - ÜJAO LAITEP
Copyright © 2011 by The Bible Society of India
Used by permission. All rights reserved worldwide.