A-pûn Awang 19
19
Sodom Eq Gomora Lhoqhtên Pyám Huî É Hkyô
1Haû maumang lagyo í yùq gi, myínhtâng zó lé Sodom wà mó má jé ri; haú hkûn, Lot gi, haû wà wàng hkúmdong hí má zung tô ri. Yhang gi, haú nhik lé myàng jáng, ê hui râ ga toq e ló mù, myigùng má, yhâng é myòqdong ngóm gòp ri. 2Haû mù, yhang gi, “Ngá yhûmsing nhik ê, núngnhik é duìnhâng zoshâng ngá yhûm má lhing lé keq. Núngnhik é hkyî chi luî, hkû-myîn hkyîng yù mù, nàpkyó noq le, núngnhik é hkyôwuì shut wó xoq e ló lhê.” ga taî ri.
Haú nhik gi, “Ngá-nhik a lé râ nghut lhê; hkû-myîn ngá-nhik wà hkyô yàm pé má hkyîng yù râ nghut lhê.” ga taî akô nghut ri.
3Nghut kôlhang, yhang gi, haú nhik yhâng htâng cháng mù, yhâng é yhûm má wàng shoq a-nhô nhô yhang lung yu ri. Yhang gi, poî kut byi luî, múnchi a bo é mùk nyhîn yù mù, haú nhik lé zoshuq lajang byî é nghut luî, haú nhik le zo bekô nghut ri. 4Yhángmòq yhup râ hí má, Sodom wà mó chyûn hkangmó mâ é, tiq é mâng é yùqgè wuì bànshoq, yhûm hau é lhînghkyùq má lé lóm bum akô nghut ri. 5Yhángmòq gi, Lot lé, “Hkû-myîn náng chyáng lé é su nhik hká má htà? Yhángnhik eq ngá-mòq gùngsho wó zûm yàp râ matú, yhángnhik lé ngá-mòq chyáng shuî htoq lé byi aq.” ga taî garû akô nghut ri.
6Lot gi, yhángmòq lé hui râ matú, shinggan shut htoq ê mù, hkum myhî pyám luî, 7“Luzúm wuî ê, haû gi, a gè. Îsû é agè ashop hkyô hkâkut kó. 8Wú keq, ngò gi, yùqgè eq hkâ-nhám le a yhup wú shî é byìzo í yùq wó lhê. Yhángnhik lé, núngmòq chyáng shuî htoq lé byi bá, yhángnhik lé, núngmòq kâm é su kut yû keq. Nghut kôlhang, shí nhik lé gi, haî le hkâkut kó; hkâsu mù gâ le, yhángnhik gi, ngá é shûhtâng ô má mâgum yu é hui râ matú jé lé bekô nghut ri.” ga taî ri.
9Yhángmòq gi, “Byù shí yuq, shî má lé nghêhkau nyì sû wá, ahkuî, târâ agyì kut nau ri myhî-nhung! Yhángnhik lé kut é htoq, nang lé je ashop é dông kut râ nghut lhê; hui aq.” ga tû taî akô nghut ri. Haú bang gi, Lot lé chôm dûn nghop pyám mù, hkum lé bàt htong râ dông hí shut huî e akô nghut ri.
10Nghut kôlhang, ahkaû má lúng tô é maumang lagyô nhik gi, lòq lhâm kat mù, Lot lé yhúmhkaû má lâng hâng yù luî, hkum myhî pyâm ri. 11Hau htâng, yhángnhik gi, hkum hí má nyi tô é, tiq é mâng é yùqgè wuì lé, yhángmòq, hkum a myang hô loshoq myòq lhoqchit pyám byi bê nghut ri.
12Byù haû í yùq gi, Lot lé, “Shí má nàng eq sêng é byù a nyi lo lùq? Náng zâ-au pé, náng é yùqzo byìzô pé eq, wà hkaû má nàng eq sêng é bang nyi lhê a nghut lhú? Haú bang lé, shî mai shuî htoq ló aq. 13Haî mù gâ le, ngá-nhik gi, jowò shî lé lhoqhtên pyám berâ nghut lhê. Yhángmòq lé mara hun garû é htê gi, haû Yhûmsîng Garaî é hí má gyai ko luî hkyang ròt ló bê nghut mù, jowò shî lé lhoqhten râ matú, ngá-nhik lé nhang kat ri.” ga taî ri.
14Haû mù, Lot gi, htoq ê luî, yhang zo byìzô pé lé dûng tô é#19:14 Dûng tô é gâ é lé, hâng yù bang ga le ra-am hpuq tô akô nghut ri. yhâng zâ-au pé lé, “Hân keq, shí jowò mai htoq ló keq, haî mù gâ le, haû Yhûmsîng Garai gi, wà mó shí lé lhoqhtên pyám berâ za nghut bê.” ga ê taî ri. Nghut kôlhang, yhâng zâ-au pé gi, yhang, gyâ nyi ri ga sôn pyám byî akô nghut ri.
15Myòq myàng mau bó é hkûn, maumang lagyo haú nhik gi, Lot lé, “Hân àq! Shî má nyi é náng yhûmsîng myhí eq nungzo byìzô nhik lé hân shuî htoq ló aq; haû a nghut jáng, nàng gi, wà shî lé dam byî é hkûn bo lom byùq râ nghut lhê.” ga taî akô.
16Yhang gi, uq-ô nyì jáng, haú nhik gi, yhâng é lòq má le, yhâng yhûmsîng myhí eq yhang zo byìzô nhik é lòq má le, kyaq zuî she chûng mù, yhángmòq lé wà mó haú mai rago za shuî htoq ló bê nghut ri; hkâsu mù gâ le, haû Yhûmsîng Garai gi, yhángmòq lé shogyo nhikmyîn yu é yánmai nghut ri. 17Yhángnhik haú bang lé wó shuî htoq eq yhang, yhángnhik mâ é rayùq gi, “Núngmòq é chyungxe lùt râ matú hpâng keq! Nùnghtáng shut hkâlhik wú kó; pá mâ é hká jowò má le hkâ-no kó! Bùm pé shut hpang jé keq; haû a nghut jáng, nàng bo lom byùq râ nghut lhê!” ga taî ri.
18Nghut kôlhang, Lot gi, haú nhik lé, “Ngá é yhûmsing nhik ê,#19:18 Ngá é yhûmsing nhik ê gâ é lé, Hebre má ngá é yhûmsîng ê gâ tô lhê. haú dông a nghut sháng gàq! 19Núngnhik é duìnhâng zoshâng ngò, núngnhik é myòq hí má myòqdong wó é nghut luî, núngnhik gi, ngá é chyungxe lhoqlhut byî é dông chyitdàp myìt mó shit bekô nghut ri. Nghut kôlhang, ngò gi, bùm pé jé shoq a wó hpang; yubàk dam mó shî ngá chyáng jé râ nghut mù, ngò gi, shî râ za nghut bê. 20Wú aq, hé wâ gi, wó din jé râ su dùt ri; wà le tiq ri; wà le gyai tiq lhê, a nghut lhí? Ngo lé, hé má hpang ê nhâng àq. Haú hkûn, ngá é chyungxe lùt râ nghut lhê.” ga taî ri.
21Maumang lagyo haû gi, yhang lé, “Ge ri; shí hkyô lé le ngò gyo byî lhê; nàng taî é wà lé ngò a lhoqhten râ nghut lhê. 22Nghut kôlhang, hé má hân hpang ê àq; haî mù gâ le, nàng hê má a jé jé, ngò haî le a wó kut nghut ri.” ga taî ri. Haû mù, wà haú lé Zora#19:22 Zora gâ é gi, tiq ri gâ é lichyúm nghut lhê. ga myhîng ri.
23Lot, Zora má jé é hkûn, haú mau má buì htoq bê nghut ri. 24Haú hkûn, haû Yhûmsîng Garai gi, Yháng nyi é mauhkûng mai, dùq nyi é hang myi lé, Sodom eq Gomora htoq má wo hkyó nhang ri. 25Haú dông, Yhang gi, haû wà mó í wâ lé le, haú pá gón lé le, wà haú má nyi é lhúnglháng lé le, haú maumyî mâ é mhan-haq hpoqnòq pé lé le, lhoqmhuq lhoqhtên pyám bê nghut ri. 26Nghut kôlhang, Lot é yhûmsîng myhí gi, lhing wú kat é nghut luî, xo zîng dùt byùq bê nghut ri.
27Htang nàpkyó noq le, Abraham gi, toq luî, haû Yhûmsîng Garaî é hí má yàp wú é jang má dum ê jé ri. 28Yhang gi, Sodom eq Gomora wà shut le, haú pá haú mau gón shut le, wú hkyô kat é hkûn, myihkau dùm gi, myi au htum mâ é myihkau dùm su, ra-mau gón mai htoq nyi é lé, myang kat ri.
29Garai Gasang gi, haú pá haú mau mâ é wà mó í wâ lé lhoqhtên pyâm é hkûn, Abraham lé myìtbun luî, Lot nyi é wà pé lé lhoqhtên pyâm é hkûn, haû mai Lot lé shuî htoq yu ri.
Lot Eq Yhang Zo Byìzô Nhik
30Lot eq yhang zo byìzô nhik gi, Zora wà mai htoq luî, bùm pé má ê nyi akô; hkâsu mù gâ le, yhang gi, Zora wà má a wám nyî nghut ri. Yhánghpe wuî gi, lùqhkyûng rahkyûng má nyi nyi akô nghut ri. 31Ra-nyí lé, î-nhá yùq gi, yhang gu lé, “Ngá-nhik é âwa gi, mang bê; haú htoq agó, myìdàm htoq gón má htûng jòq kôle, ngá-nhik tâng lé yù râ yùqgè, shí awui ayàm má a nyì nghut ri. 32Haû mù, âwa lé tsibyiq wing huq luî, yhang eq yhup mù, âwa dông mai, ngá-nhik é i-kun hkûngxoq byù xoq yû gòq.” ga taî ri.
33Haú myîn, yhángnhik tâng gi, yhángnhik é yhâng wa lé tsibyiq wing huq luî, î-nhá yùq wàng mù, yhâng wa eq yhup yu ri. Yhâng wa gi, yhang, hká u lo bo yhup mù, hká u toq ló é lé a sê kat nghut ri.
34Htang nyí, î-nhá yùq gi, yhang gu lé, “A-màn gi, ngò, âwa eq yhup bê nghut lhê. Hkû-myîn le, yhang lé tsibyiq wing dum huq gòq; âwa dông mai, ngá-nhik é i-kun hkûngxoq byù wó xoq yû sháng gàq, nàng wàng mù, yhang eq yhup àq.” ga taî ri. 35Haû mù, yhángnhik tâng gi, haú myîn le, yhángnhik é yhâng wa lé, tsibyiq wing huq luî, yhang gu yùq gi, wàng mù, yhâng wa eq yhup yu ri. Dum, yhâng wa gi, yhang, hká u lo bo yhup mù, hká u toq ló é lé a sê kat nghut ri.
36Haû mù, Lot é yhang zo byìzô nhik tâng gi, yhángnhik é yhâng wa dông mai, zogûng dùt bekô nghut ri. 37Haû î-nhá yùq gi, yùqzo rayùq hkû luî, yhang lé Moba#19:37 Moba gâ é lé, Hebre dang má Îwa gâ é htê eq du é su gâ ri. ga myìng myhíng byî ri. Yhang gi, hkû-nyí lhê é Moba byu pê é îchyí îwa nghut ri. 38Haû yhang gu yùq le, yùqzo rayùq hkû luî, yhang lé Ben Ammi#19:38 Ben Ammi gâ é gi, ngá é byu pê é yùqzo gâ é lichyúm nghut lhê. ga myìng myhíng byî ri. Yhang gi, hkû-nyí lhê é Ammon byu pê é îchyí îwa nghut ri.
S'ha seleccionat:
A-pûn Awang 19: znot
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
© 2025, Wycliffe Bible Translators, Inc.