A-pûn Awang 20
20
Abraham Eq Abimelek
1Abraham gi, haû mai, Maupyî Mau shut htòt gyó ló mù, Kadesha eq Shura gyoro má ló nyi ri. Yhang gi, Gerara má rayòq rabun zo nyi é hkûn, 2yhâng é yhûmsîng myhí Sara eq séng luî, “Yhang gi, ngá gu nghut lhê.” ga taî ri. Haû mù, Gerara hkóhkâm Abimelek gi, byù nhâng mù, Sara lé ê shuî lò nhâng ri.
3Nghut kôlhang, Garai Gasang gi, ra-myìn lé, yhupmòq má Abimelek chyáng lé jé mù, yhang lé, “Nàng gi, myiwe haú yùq lé shuî yu é yánmai, shî gùng dùt byùq bê nghut ri; myiwe haû gi, myi ló bê sû nghut lhê.” ga taî ri.
4Ahkuî, Abimelek gi, myiwe haú yùq chyáng a chyâng htèp ê shî é nghut mù, “Yhûmsîng ê, Nàng gi, mara a bo é a-myû lé sat pyám râ lhú? 5‘Yhang gi, ngá gu nghut lhê.’ ga, yhang yhang taî é a nghut lhí? Myiwe haû le, ‘Yhang gi, ngá mang nghut lhê.’ ga taî é a nghut lhî? Ngò gi, múzó shî lé, sansêng é i-myìt eq, mara a dàp é lòq èq kut é ru nghut lhê.” ga taî ri.
6Haû mù, Garai Gasang gi, yhupmòq má, yhang lé, “Nghut lhê, nàng, shí hkyô lé sansêng é i-myìt mai kut é hkyô lé Ngò sê lhê; haû mù, nàng, Ngo lé mara a kut shut râ matú, Ngò, nang lé mâgum yù bê nghut lhê. Hau é yánmai, nang lé, Ngò, Sara lé a záng nhang é nghut lhê. 7Ahkuî, yùqgè hau é yhûmsîng myhí lé taû dé byi aq; yhang gi, myìqhtoi rayùq nghut lhê mù, náng é matú kyû lhom dung byi râ nghut mù, nàng gi, chyungxe duì râ nghut lhê. Nghut kôlhang, nàng gi, yhang lé a taû dé byî é nghut jáng, nàng le, nàng eq sêng é bànshoq le, shi byùq râ nghut é lé, nàng teng za sê to aq.” ga taî ri.
8Htang nàpkyó noq le, Abimelek gi, yhâng é zaugun wuì bànshoq lé ji yù mù, dùt laî lo é hkyô bànshoq, yhángmòq lé taî kyo jáng, yhángmòq gi, gyai yhang gyùq bùm bekô nghut ri. 9Hau htâng, Abimelek gi, Abraham lé wùt yù mù, “Nàng, ngá-mòq lé haî kut bê lhú? Ngò gi, náng lé haî wá kut shut luî, ngá é ahtoq má le, ngá é mîngdán ahtoq má le, shî í kô é mara shuî hâng lhê lhú? Nàng gi, a kut gíng é hkyô pé lé, ngá chyáng kut bê nghut ri.” ga taî ri. 10Hau htâng, Abimelek gi, Abraham lé, “Nàng gi, haî wá dùt mù, shí hkyô kut é lhú?” ga xoq myî ri.
11Abraham gi, “‘Shí jowò má, Garai Gasang lé gyùq é byù teng za nyì râ a nghut; haû mù, yhángmòq gi, ngo lé, ngá é yhûmsîng myhî é yánmai, lhom sat pyám kôrâ nghut lhê.’ nghû ngá gûng ngò taî é nghut lhê. 12Gè gè ga jáng, yhang gi, ngá gu nghut lhê; înu a húm kôlhang, îwa gi, rayùq za nghut lhê; yhang gi, ngá é yhûmsîng myhí dùt byùq é za ru nghut lhê. 13Garai Gasâng èq, ngo lé, ngá wâ é yhûm mai htoq yông ló nhang é hkûn, ngò gi, yhang lé, ‘Nàng gi, ngá-nhúng jé é jowò hkangmó má, “Yhang gi, ngá mang nghut lhê.” nghû taî é dông, nàng, ngo lé chyitdàp é hkyô lé, shí dông ge shit lhê.’ nghû taî é nghut lhê.” ga taî ri.
14Haû mù, Abimelek gi, sau pé, no myang pé eq jùn myhí jùn hpô pé lé, kôn lé shuî lé lô mù, Abraham lé byi luî, yhâng yhûmsîng myhí Sara lé le, yhâng chyáng dum taû àp byi bê nghut ri. 15Hau htâng, Abimelek gi, “Ngá é maumyî gi, náng é hí má nghut nyî bê; nàng, kâm nyi é jang má nyì àq.” ga taî ri.
16Yhang gi, Sara lé, “Wú aq; ngò gi, nung mûnghpó lé ngùnhtung myi joí èq ngó xe hkyuq rûng byî lhê. Haû gi, nàng eq rahá nghut bâng é hí má, ngò, nang lé lhoqshut é myòq hoq zê nghut lhê; haû mù, nàng gi, maróng gyùt bê nghut ri.” ga taî ri.
17Haú hkûn, Abraham gi, Garai Gasang lé kyûdung jáng, Garai Gasang gi, Abimelek lé le, yhâng yhûmsîng myhí eq yhâng é jùn myhî pé zô dum wó râ matú, yhángmòq lé le, lhoqgê lhoqyô byi bê nghut ri. 18Hkâsu mù gâ le, Abraham é yhûmsîng myhí Sarâ é yánmai, haû Yhûmsîng Garai gi, Abimelek yhûm má nyì bâng é zoyhûm hkangmó lé myhî pyâm to byi mù nghut ri.
S'ha seleccionat:
A-pûn Awang 20: znot
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
© 2025, Wycliffe Bible Translators, Inc.