Apozelɨyara 1
1
1A'mwe Tɨyopɨlaazaigɨ, Bukuya pɨrɨ' gɨmɨnyɨna wi'na yavɨkarye. Jizaazai yuya yaka yuya wɨjɨwaakɨna yaka yagaala yuya sa wi'na yavɨkarye. Jizaazai aayawɨdaasɨ yaka 2Sɨgunyavɨ ayɨna yɨlaawaka sanna wi'na yavɨkarye. Sɨnnawɨ sagaa' milaawiagaa' Jizaazalyɨ Kuryai Tewaanyai mwaaidori Jizaazai Wɨdaasade Apozelɨyaraavɨ kumɨre wawɨnya'na nayaa yɨjɨwaaka' ata dahɨlakɨnɨkeraavɨ. 3Sahwai balakegaa' sawɨta a'mweraare sɨvɨlatɨraalya jɨnnadaa'nyɨ sahwai bada yuya dɨragɨnya yada kumɨ yuya tɨnna wangadɨvɨ' dara yawɨresa' “O, nebulyasɨ. Sarenna Jizaazai ayɨna damwaalɨka!” Sara yawɨreva kumɨ mwaaidɨvɨ' Gotɨyai a'mweraavɨ maremwaalade'na wɨdakelyɨra. 4Pɨgaa' kumɨ yɨkabesagaa' wɨda' “Anga Jeruzaalemɨ myagalya'mapɨnera! Aawa. Nɨmwai gannya yangerɨ yɨhɨzaavade'na jemwaalyɨla! Gotɨyai dɨragɨnna yɨhɨthake' nɨmɨ mena yɨhɨthe'na jemwaalyɨla! 5Jonɨ Bavɨtaazɨya Yadei aalyavɨ bavɨtaazɨya yake' kɨrɨ' dɨvi maalɨkegaa' bavɨtaazɨya'bɨsa' Gotɨyare Kuryai Tewaanyai sarɨmɨnyɨ munyɨkaavɨ yunebanna wɨlamwaaina yɨhyatheihɨlyɨra,” wɨda'.
Sɨgunyavɨna Jizaazarɨ makɨlaawake'nesɨ.
(Maakɨ 16:19,20; Lukɨ 24:50-53)
6Sarevɨdaa'nyɨ pɨgaa' Apozelɨyara yɨkabesagaa' Jizaazai mwaaidɨ'nyɨ kumɨ wɨde' “Naangeigɨ, dahaasagaa' Maremwaaide' Yɨzɨrelɨyainaavɨna ayɨna dɨnejaade'na daaka?” 7Sara kude' wɨda' “Sare'na yɨma'nade'na myawɨpɨnera! Sarɨmɨnyɨne'na mɨka! Nɨmwai sahwai sara yawɨrajai sagaasɨ yuyagaasɨ sagaa' wakadelyɨra. Sare'na gamɨre dɨragɨnya'na gavei yawɨ'manɨkesɨra. 8Sa'na kɨrɨ' Kuryai Tewaanyai sarɨmɨnyɨ bayɨhɨmwaaidozɨ dɨragɨnya naange' kihɨzaavojɨ Anga Jeruzaalemɨ dava Kwaaka Juthɨya yuyabanna Kwaaka Samerɨya yuyabanna Kwaakevakɨ tɨyawɨ anga yuya dawɨnna nɨmɨnyɨna pwaraavɨ duzalɨkurakyideihɨlyɨra.” 9Mi'na kuda' gamɨrera baihana'dapi Sɨgunyavɨnerɨ makɨlaawɨna ya'. Makidawadaa'nyɨ yɨraaya' galayewaa'mwanna kya' tɨnna mwanganyage'. 10Makidawadaa'nyɨ Sɨgunyavɨ tɨnna kuna wangadaapɨjɨ, yɨthaa, a'mweraai baazɨ'ma'nya yaaka baazɨ'ma'nagɨleraai kwaraayaba bima'nyɨna yagi. 11Mi'na bima'nyɨna yagɨla wɨdahi “Kwaaka Galɨli mwaalyaihi, saba daaveva Sɨgunyavɨ tɨnna be'na baihanakava? Sare'na sɨmunya kwalaalya myawɨpɨnera! Sarɨmɨnyabadaasɨ Sɨgunyavɨnei Jizaazarɨ makimwaawɨkei sahwai Sɨgunyavɨ sara yimwaakabaaibɨ' ayɨna walaabathelyɨra,” wɨdahi.
Juthaazare wawɨnya' a'mwe mudɨkei maarake'nesɨ.
12Sagaa' Mugunya Wolivɨdaasɨ Jeruzaalemɨnera ayɨna wawe'. Mugunya sa' angeba esaba kilomitaaya pɨrɨ' warɨkesɨ. (Juyaraavɨre Kwazaakevɨ kaanya wodɨvɨsabe.) 13Wawesara Jeruzaalemɨ wɨleva ku'dɨkevɨ munyaba kɨgaa' aya mwaalesabanna yɨlaawe'. A'mwe sarajɨya pwai Pitai, pwai Jonɨ, pwai Jemɨzai, pwai Edɨruyai, pwaraai Pilipɨjɨ Tomaazalyɨ, pwaraai Baatolomyulyɨ Matɨyulyɨ, pwai Alɨpɨyaazare gawaalɨ' Jemɨzai, pwai Saaimonɨ gannya kwaakevɨna yawɨ'dei (Selotɨyai), pwai Jemɨzare gawaalɨ' Juthaazai, sara yuyara mwaale'. 14A'mwe sahwarajɨ a'mwejɨ Maarɨyaa' Jizaazarɨ ganaangesɨ gya'mwerajɨ avaaizɨmunya yawɨreva yuyagaa' Gotɨyarɨ wɨja'na yɨkabadɨvɨ' Gotɨyarɨ wɨde'.
15Yɨrɨka sagaa' kwɨya'mwera kwalaalyara yavɨnakera (120) yɨkabeva mwaaidapiyaraayawɨ tɨnnyawɨ Pitai daavaka yagaala wɨdɨna ya' 16“Nya'mweihi, kɨgaakuna Kuryai Tewaanyai Ne Devitɨmɨ kujɨwakyaa' Devitɨ sara yɨdayaa'. Sara yɨdayaake' nebulya' yunebanna yɨma'nya'ne' mena yɨma'na'. Juthaazai kyɨbwarɨdaakwa' a'mwera Jizaazarɨ wɨla pwɨyesai Juthaazarɨna nebulya' yɨma'na'. 17Juthaazai nemɨjɨyarɨ Naangei dahɨlakakelyɨ. Nemɨjɨ gamɨjɨ avaaiwawɨnya wɨdaayo, Apozelɨyaina,” wɨda' Pitai.
18Kayaa'nanya'na yɨbwarɨdaakwia'ne'na Juthaazai nɨgwia tɨvɨkɨsa maarakenna wawɨnya pɨjɨ' mube'. Sajɨkɨ walaraawaka gannya munya kayaaka yɨna yaka gannya lɨ'gɨlya' mwasaba kabwalyara' sahwai bala'. 19Savɨna Jeruzaalemɨ mwaalyara yuyara kadɨka wɨ'neva wawɨnya sajɨ' kunnya yagaala “Akelɨthaama,” wo'nɨke' “Wawɨnya tawanake',” dɨnɨkesɨ.
20Pitai wɨda' “Sare' dare'nesɨ. Bukuya Saamɨya (Yɨledaata) yɨda'nyɨna
‘Gamɨre ange' kune' yɨma'nana!
Savɨ a'mwera mulamwaalyɨ yɨpɨka!’
Nabaai yagaala pɨrɨ' yɨda'nɨka
‘Gotɨyarɨna yade' a'mwe pwai yana!’
21-22Sara yɨda'nɨkevɨdaa'nyɨ Juthaazare wawɨnya yɨya' pwai maarana! Sahwarɨ kadahɨlakawaajɨ Naanga Jizaazai baryai dɨkaavake' tɨnna wanganakelyɨ pwaraavɨ wɨjalɨkuraadeinera. Kɨgaa' nemɨjɨyai Naanga Jizaazalyɨ kaanya yamaryorɨ dahɨlakaana! Sɨnnawɨ Jonɨ Bavɨtaazɨya Yadei wɨdakegaasɨ pɨgaasɨ Sɨgunyavɨ Jizaazarɨ makyimwa'daawadɨkegaa'na nemɨjɨyarɨ dahɨlakaana!” 23Pitai sara kuda' pɨba a'mwera a'mweraarɨ wɨmwaaihe'. A'mwe pwai Baazavaazai Jozepɨyai wo'nɨkei yaya pɨrɨ' Jaazɨtazai wo'nɨkelyɨ. A'mwe pwai Mataayazai wo'nɨkelyɨ. 24Wɨmwaaiheva dahɨlakya'na Naangerɨ wɨde' “Naangeigɨ, a'mwe yuyaraavɨre kuryarajɨ sɨdusajɨ yawɨ'mwaa. Sa'na, Naangeigɨ, a'mwe daraarɨna gawarɨ dahɨlakaajɨwona? 25Sai Juthaazai gɨthaayake' apozelɨyare wawɨnya' yana! Juthaazai gɨmɨre wawɨnya' ya'mavaka gannya kayaa'nanyabanna wawaka. Wawɨnya sa' pwai yana!” 26Mi'na wɨdeva kɨrɨmɨre yaya yɨdaveva Mataayazare yaya' yɨda'nɨke' wanganeva dɨne' “Sare'na Mataayazai dahɨlakɨwo. Jizaazai Wɨdaasade atɨraai sɨvɨlyɨrɨdaasɨ pwaraalyai Apozelɨyaraayaba wɨmwaaihɨwo,” dɨne'.
S'ha seleccionat:
Apozelɨyara 1: byr
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
© 2013, Wycliffe Bible Translators, Inc. All rights reserved.