Lukɨ 16
16
Wɨdaayadɨvɨsaraavɨ maremwaaide sɨdu'nakei ke'ba'na dɨnɨke'nesɨ.
1Nabaai Jizaazai gamɨre mɨdɨdɨvɨsaraavɨ wɨdɨna “A'mwe gɨlyɨvɨkɨravɨnaka pwai gamɨre wawɨnyavɨ maremwaaidei kɨnɨnnakelyɨ. Nabaai a'mwe pwara gɨlyɨvɨkɨravɨnaka saryawɨnna yɨkabɨna yeva wawɨnyavɨ maremwaaide sarɨna jɨda'na ‘Gɨmɨre wawɨnyavɨ gɨmaremwaalyadei gɨmɨre gɨlyɨvɨsa yaasɨwa'na mariwɨnama'na yɨvanɨkelyɨra.’ 2Sara jɨda'na kye' sai gamɨre wawɨnyavɨ maremwaaiderɨ jaka jɨvwarɨjɨmaa'nyɨna yaka wɨdɨna ‘Gɨmɨnyɨna yagaala wɨ'nɨwe' gatha'darevaka! Kaanya wawa'gɨzɨ gɨmɨre wawɨnya'ne pɨkarɨyɨkwia yavada'galakaawɨna ja nɨmɨre gɨlyɨvɨta yuya maremwaaidɨnya sanna! Sare' dare'nesɨ. Gɨmɨ maremwaalya' ayahi pɨrɨsɨ jɨtheigɨ mɨka!’ 3Sarevɨ maremwaala dazai gamɨre sɨmunyavɨ dara dɨnyɨna ‘Aka, nɨmɨre naangei nɨmɨre maremwaala yadɨnya savɨ nyɨdaasade'na nyɨwake'na gara yɨdeinyaka? Nɨmɨ kwaakeva' yɨnɨga malɨki yɨwɨneinyɨ dɨragɨnya maayainyɨra. Sare'na nabaai a'mwe pwaraavɨ wapejanna damaasa'na, nɨmɨnyɨ wagɨla nyɨvwa'nadeinyɨra. 4Kɨrɨ' dahaa' nɨmɨ yawɨ'manɨge. Nɨmɨ gara ya'mujɨ yɨdeinyaka? O, mi'na yawɨramaa'mwana! Naangei maremwaala savɨ nyɨdaasajahaa' “A'mwera kumɨre angengɨ wɨwɨjahaa' nɨmɨnyɨ nyɨmaapɨka!” dadɨ mena yawɨ'mwa.’ 5Sara yawɨ'na yaka sarevɨ sai a'mwe gamɨre naangerɨ dinaaya damaa'dɨvɨsaraavɨ jaka wɨdɨna kya' sare sara pwaidaa'nyɨ pwaidaa'nyɨ gamɨnyawɨnna bɨna. A'mwe pwaidaa'nyɨ sɨnnawɨ wɨlaabɨna kya' maremwaaidei yɨdaanganna ‘Nɨmɨre naangerɨ dinaaya gara gare gwarɨkaigɨnaka?’ 6Yɨdaanganna kya' sai wɨdɨna ‘(100) Waanɨ aadɨretɨ kwadɨka naanga welivanatainakengɨra.’ Wɨdɨna kya' maremwaaidei wɨdɨna ‘Gɨmɨre dinaaya daza'ne pɨkarɨyɨkwia' maara'gɨzɨ sarevɨ walamwaaina ya'gɨzɨ yune (50) pivɨtiya'na yarai jɨthaka! Nabaai nɨmɨnyɨna nayaa sara jawɨka!’ 7Nabaai dɨvidaa'nyɨ a'mwe pwai bi'ma'na yɨna kya' sahwai yɨdaanganna ‘Gɨmɨre dinaaya gara garengaka?’ Sara wɨdɨna kya' sai wɨdɨna ‘Gɨlya naanga (100) waanɨ aadɨretɨ witɨyangɨra.’ Wɨdɨna kya' sai wɨdɨna ‘Gɨmɨre dinaaya'na pɨkarɨyɨkwia da' maara'gɨzɨ yune (80) eitiya'na jɨthawakya!’ Sana sana yɨna. 8Sana sana yɨna kya' naangei sare' yawɨranganna yaka maremwaala kayaa'nanya kukebwi yaka kɨrɨ' dazai a'mwe sɨduta yawɨ'nɨkeibɨ' yade sabwine'na yɨ sahwarɨ wɨdɨna ‘Gɨmɨ saigɨnyɨ gaimwannya'neigɨ sɨdu'nakeigɨne!’ A'mwe naangei sara yɨna. Sare'na dare'nanyɨ. Kumɨregaasaraavɨna a'mwe Kwaaka dathavakɨyabwinera kumɨre wawɨnya yabwina dɨragɨnya yadɨvɨsare. Sara yadɨvɨ' a'mwe baakevɨyabwineraavɨ wavɨla'dɨvɨsare. 9Nabaai nɨmɨ sarɨmɨnyɨ yɨhɨthɨvanɨge. A'mwera nɨgwia maa'dɨvɨ' dazajɨ kayaa'nanya dala nabinabinyanna marayadɨvɨsare. Sare kɨrɨ' sarɨmɨ daza maarapɨjɨ dazajɨ nawɨ'nyanna kamarayapɨjɨ sarɨnnya sɨrya'mwe yɨma'nɨpɨ'de'nanyɨ. ‘Dɨvi nɨgwia lɨmwagasagaa' mena kiwawojɨ yɨ anga yuyagaa' yuyagaa' nayaa kwaamu' mwaalya'nebanna Gotɨyai nemaramwaaihana!’ dapi sara jideihɨlyɨ. 10A'mwe kwai gɨlyɨvɨta wana maalɨke'na nayaa pada'gainemwaaina yajai yɨ sai gɨlyɨvɨta naanga kɨrɨvɨnajɨ nayaa pada'gainemwaaladelyɨ. Nabaai a'mwei gɨlyɨvɨta wana maalɨke'na kayaa'na yɨna, yɨda'na myajai yɨ sai gɨlyɨvɨta naanga kɨrɨvɨna kayaa'na yɨna, yɨda'na mi yadelyɨ. 11Sarevɨdaa'nyɨ sarɨmɨ Kwaaka davakɨya nɨgwiajɨ kayaa'na marayadɨvɨta sanna mavada'gainemwaalyɨ yɨpɨja' nebula nawɨ'nya maremwaala ya'neihɨrɨ aaihwai yɨhɨzaavadeihɨlaka! 12Nabaai sarɨmɨ pware gɨlyɨvɨsangɨ nayaa mamaremwaalyɨ yɨpɨja' yɨ nebula nawɨ'nya sarɨnnyannanya' Gotɨyai dɨragɨnna dake' yɨhɨzaavade' daaka! 13Angevɨ wɨdaayadei maremwaala yuyaraare wawɨnyawaai lɨmwagaradei aane pwai kwai mɨka. Aawa. Sare' dare'nesɨ. Maremwaala pwarɨna sɨmɨlɨka wimwaaina yojɨ pwarɨna tewaanna wima'nyɨna yadei dɨngaka! Pwarɨ lɨmwaga'na yada pwarɨ bule'na wɨjaavɨna yadei dɨngaka! Sarɨmɨ Gotɨyarɨnajɨ gɨlyɨvɨsangɨnajɨ saburaarɨna wawɨnya wɨdaayɨpɨneihi mɨka!”
14Perɨzɨyara nɨgwianna tewaanya wima'nadere. Sare sara Jizaazai dadaa'nyɨya yagaala yuya dazangɨ kadɨka wɨ'nevera gamɨnyɨ bɨraiyagaala wɨdɨna. 15Sara yɨna yadaapi sai wɨdɨna “Sarɨmɨ yawɨ'na ‘A'mwera nenganapɨjɨ nemɨnyɨna yawɨpɨka! “A'mwe yɨda'maraangerera.” ’ Yawɨ'na yadɨvɨ' yɨvanɨgasaihɨlyɨra. Sara yadɨvɨta sabwina sarɨmɨre sɨmunyaburɨ Gotɨyai mena yɨhyawɨrangamanɨkelyɨ. A'mwera yɨlaaya yadɨvɨsanna yɨ Gotɨyare tɨnnyarɨ gɨrɨkita'nanya kayaa'nanyabulyɨra.
16Mozɨzare yagaala Kɨwɨnyavɨnesɨ pɨropetɨyaraavɨre yagaalyasɨ yune Jonɨmɨregaa'na wa'mwa'dɨkengɨ. Kɨrɨ' yune Jonɨmɨregaa'daasɨ yaka dahaakɨgaasɨ Gotɨyai a'mweraavɨ maremwaaidevɨne yagaala tewaanya' anga yuyabanya yɨma'nɨvanaabɨkesɨ. Nabaai a'mwe yuyara maremwaaide dazavɨ wɨlamwaalya'na dɨragɨnya kuna yɨvanɨgasare. 17Sɨgunyavasɨ Kwaakevasɨ yɨwawode' wawɨnya maalɨkesɨ. Kɨrɨ' kɨwɨnyavɨya maalɨka pimagɨnyamɨlɨ' sa' yɨwawode' wawɨnya naangesɨ. Yunenna yɨma'nadengɨ.
(Matɨyui 5:31-32; 19:9; Maakɨ 10:11,12)
18Gazaizai gannya a'mwevɨ wɨdaasada a'mwe mudɨka pɨrɨvɨ maarajai ba'dalavalɨmwangebwi yɨna. Ata lɨmwangebwi yɨna. Nabaai a'mwei a'mwe pɨrɨvɨ sɨnnawɨ gannya wasɨ'najavɨ kwala maarajai sai ba'dalavalɨmwangebwi yɨna.
Gɨlyɨvɨkɨravɨnakelyɨ Lazaarazalyɨ saraarɨnesɨ.
19A'mwe pwai gɨlyɨvɨkɨravɨnakei mwaalɨna yakelyɨ. Yuyagaa' baazɨ'ma'nya taaihɨja tewaanyanna tewaanyanna, baazɨ'ma'nya wayaakejɨ wakadelyɨ. Sara yada yuya yɨrɨkerɨkaavɨ tɨka wapaa tewaanyanna tewaanyanna yovɨgalamaa'delyɨ. 20Gamɨre angevɨne tɨkuryaba a'mwe gɨlyɨvɨ'maaya pwarɨ walawɨmwaaihɨna yesalyɨ. Gamɨnne yaya' Lazaarazai wo'nɨkei gamɨre kɨlaakejɨkɨ yunebanna wa'waaya wa'dɨsɨyai. 21‘A'mwe gɨlyɨvɨkɨravɨnaka dazare yɨ'bɨnya wapewakyaba wapaaya tɨrɨdɨrɨnya yɨ'bɨnyavɨ dalaangewɨ bwala'dawadaa'nyɨya maranɨdeinya. Sa maranadɨ munya nyɨnadeinya,’ yawɨ'da nabaai jɨlɨkera wɨlaabɨna yadɨvɨ' gamɨre wa'waayangɨ kumɨre taalɨsajɨ yanyɨna. 22Dɨvi a'mwe gɨlyɨvɨ'maaya dazai balɨna yɨna kya' sare' ejelɨyara maarɨna yɨna yeva makuna yevera Evɨraamɨjɨ ye'mwannamwaihaawɨna. Nabaai a'mwe gɨlyɨvɨkɨravɨnaka sai kwalyɨ balɨna yɨna kya' lɨkirakɨna. 23Sai Dɨkevɨ mwaalaka daanga naanga wɨvɨnyɨna. Sara wɨvɨdaa'nyɨ munyaba kekina tɨnna maranganna. Evɨraamɨ saamɨnya menyaba mwaaidɨ'nyɨ Lazaarazai sahwalyɨ ye'mwannemwaaidɨ'nyɨ tɨnna wanganna. 24Tɨnna wanganna yaka gɨlyɨvɨkɨravɨnakei jaka danganna ‘Nɨmwai, Ne Evɨraamɨ, dɨka davɨ daanga naanga kayaa'na nyɨvɨmanɨke'na nɨmɨnyɨna kale kagyozɨ “Gamɨre a'jawɨnyai aalyavɨ bwalapaihojɨ a'mwere taalɨsarɨ kudathɨwagaavojɨ yɨrɨla maalɨ'na wɨdana!” da'gɨzɨ Lazaarazarɨ dɨmaryasaama!’ 25Sara danganna kya' kɨrɨ' Evɨraamɨ wɨdɨna ‘Kaimɨraayaigɨ, dahaa' gɨmɨ pɨnɨnna jawɨka! Sɨnnawɨ gɨmɨ gaala mwaalagɨnegaa' gɨlyɨvɨta yuya tewaanya maaragɨ. Nabaai Lazaarazai yuya kayaa'nanya maarakelyɨ. Kɨrɨ' dahaa' anga dava gamɨre munyɨ' tewaanna wa'manɨka. Sara yadaa'nyɨ gɨmɨ daanga kayaa'nanya' maa'manɨgɨ. 26Nabaai pɨnɨjɨyavɨ nemɨnyɨ tɨnna dava sarɨmɨnyɨjɨ nemɨnyɨjɨ Gotɨyai sitɨkulala naanga pɨrɨ' wakakesɨ. Sarevɨna a'mwe dava mwaaihasara sitɨkulala savɨ mavɨralavaabyapɨjɨ sarɨmɨnyawɨnna wɨya'na wɨpɨnera mɨ'. Nabaai a'mwe kengimagɨ mwaaihasara sitɨkulalyavɨ mavɨraalayapɨjɨ nemɨnyawɨnna wɨlaabɨpɨnera mɨ'.’ 27Wɨdɨna kya' sai wɨdɨna ‘Sarevɨdaa'nyɨ Nɨmwai, gɨmɨnyɨ githaangamanɨge. Nɨmaamaangere angevɨna Lazaarazarɨ dɨmaryaasa! 28Sare' dare'nesɨ. Nɨmɨ atɨla nyɨdaa'nyɨgwaaravaava mwaaihasara kɨnɨnnakeinyɨ. “Saraayawɨnna Lazaarazai wawojɨ yagaala jalɨkurakɨna yana! Nabaai daanga naanga maarya'ne davanna sara kwarajɨ nabɨpɨdɨka!” dena githaangamanɨge. Sɨmunya mudɨkebwi yawɨramaapɨja' daanga wɨvɨnadera mɨka!’ 29Wɨdɨna kya' Evɨraamɨ wɨdɨna ‘Mozɨzare yagaalyajɨ Gotɨyarɨ wɨ'nawɨjɨwakyaasaraavɨrejɨ warɨka. Sare sangɨ kadɨka wɨ'nɨpɨka!’ 30Wɨdɨna kya' sai wɨdɨna ‘Aawaawa, Nɨmwai Evɨraamɨ, sa' yɨnɨga wi'nanne' mɨka! Aawa. A'mwe bainɨka pwai bainɨkeraayawɨ ayɨna dɨkaavojɨ kumɨnyawɨnna kwawojɨ sahwara sɨmunya mudɨkebwina yawɨramaa'na yɨpɨ'derera.’ 31Wɨdɨna kya' kɨrɨ' wɨdɨna ‘Nabaai Mozɨzare yagaalyangɨjɨ wɨjaata pɨropetɨyaraavɨrengɨjɨ kadɨka mu'nyɨ yɨpɨja' yɨ nabaai a'mwe pwai bainɨkeraayawɨ ayɨna dɨkaavaja'na nabaai sa' kɨrɨ'najɨ dɨragɨnna lɨmwabɨ'dera mɨka!’ ”
S'ha seleccionat:
Lukɨ 16: byr
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
© 2013, Wycliffe Bible Translators, Inc. All rights reserved.