If you have would like a copy of this version please contact info@davarpartners.org

Text: Rana Tharu New Testament, CC-BY-SA-4.0, The Love Fellowship. -- Audio: Rana Tharu New Testament Audio Bible, CC-BY-SA-4.0, Davar Partners International, The Love Fellowship, 2023

Rana Tharu New Testament

Rana Tharu Bible (राना थारु) by The Love Fellowship is licensed under Creative Commons Attribution-ShareAlike 4.0 License.

जा पुरो संसारको सृष्टि होनसे पहिले एक जनै रहए जोके बचन कहोजात हए, और बचन परमेश्वरके सँग रहए, और बचनए परमेश्वर रहए। बचन सुरुवएसे परमेश्वर सँग रहए।
बचनसे परमेश्वर सब चीज बनाइ। और जो कुछ बो बनाइ कोइ चीज फिर बचन बिना नाए बनो। परमेश्वरमे जीबन रहए, और बा बहे हए, जो सब आदमीनके उजियारो देतहए। और उजियारो अंधियारोमे चमकत हए, और कभु फिर अंधियारो उजियारोके बुताए नाए पाइ। परमेश्वर एक आदमीके पठाइ जौनको नाउँ यूहन्ना रहए। यूहन्ना उजियारोके बारेमे गवाही देनके आओ, ताकी सब आदमी बोको गवाहीसे बिश्वास कर पामएं। यूहन्ना अपनए, उजियारो नाए रहए, पर बो उजियारोके बारेमे गवाही देनके आओ। बो एक सच्चो उजियारो हए, जौन सब आदमीनके उजियारो देतहए, बहे संसारमे आन बारो हए। बा संसार रहए, संसार बहेसे बनोगओ, तहुँफिर संसारके आदमी बाके नाए चिन पाइं। बा अपन आदमीनके घरमे आओ, पर बाके अपने आदमी बाके स्वीकार नाए करीं। पर जित्नो येशूके स्वीकार करीं, और बाके उपर बिश्वास करीं, बिनके बा परमेश्वरको सन्तान होनके अधिकार दइ। बे आदमी नए त अइयादौवासे, नए आदमीनको इच्छासे, नए आदमीनके बच्चा पान इच्छासे हए, पर बे परमेश्वरको इच्छासे जन्मे रहात हएं।
जोके बचन कहोजात हए, बो एक आदमीके रुपमे आओ, और अनुग्रहसे और सत्यसे भरिपूर्ण हुइके हमर बीचमे बास करी। और हम बाको अइसो महिमा देखे, जौन महिमा दौवाको एक लौंणाके इकल्लो रहात हए।
यूहन्ना येशूके बारेमे गवाही देत जोडसे कही, “जा बहे आदमी हए, जौनके बारेमे मए कहो, ‘मिर पिच्छु आन बारो मोसे बडोहए, काहेकी बा मए जन्मनसे पहिलीयएको अग्गुको हए।’” पर बाको अनुग्रहको पूर्णतासे हम एक अनुग्रह उपर दुस्रो अनुग्रह पाएहएं। काहेकी मोशाको नियम कानुन मोशासे दओगओ, पर परमेश्वर येशू ख्रीष्टके माध्यमसे अनुग्रह और सत्यता दिखाइ। परमेश्वरके कोइ कभु नाए देखिहएं। बाको एक लौंणा इकल्लो बाके देखी, हए जो परमेश्वर कता हए। और जो परमेश्वरके ढिँगै हएं, परमेश्वर बहे लौंणाके प्रकट करी हए।


बप्तिस्मा देन बारो यूहन्नाको गवाही जहेहए, जब यहूदी अगुवाको नेता यरूशलेम सहर मैसे यहूदी पुजारी और लेबीनके बप्तिस्मा देन बारो यूहन्ना ठिन जा पुछनके पठाइ कि “तुम कौन हओ?” तओ बो बिनके स्पष्ट रुपसे कहीदइ “मए ख्रीष्ट नाए हओं।”
तओ बे यूहन्नासे फिर दुस्रो चोटी पुछीं, “उइसो हए तओ तुम कौन हओ? का तुम एलिया अगमबक्ता हओ, जो अबैया रहए?” यूहन्ना कही, “मए नाए हओं।” तओ फिर बे कहीं, “तओ का तुम परमेश्वरके अगमबक्ता हओ?” यूहन्ना बिनके जबाफ दइ, “मए नाए हओं।”
बे यहुन्नासे पुछीं, “तुम कौन हओ? हमके बताओ, ताकी हमके पठान बारोके हम जबाफ दइ पामएं। तुम अपने बारेमे का कहान चाँहत हओ?”
यूहन्ना कही, “जैसे परमेश्वरको अगमबक्ता यशैयाको किताबमे लिखो हए,
‘परमप्रभुको डगर तयार करओ’ कहिके
जंगली इलाकामे चिल्लान बारो मए एक आदमीको अबाज हओं।”
बिनके फरिसीनको समुह पठाइ रहए। और बे बोसे पुछीं, “अगर तुम ख्रीष्ट फिर नाएहओ, एलिया फिर नाएहओ, अगमबक्ता फिर नाएहओ, तओ काहे बप्तिस्मा देत हओ?”
बिनके जबाफ दइ, “तुमर बीचमे एक जनै ठाणो हए, जौनके तुम चिनत नाए हओ। बा मोसे पिच्छु आबैगो, और बा मोसे बहुत शक्तिशाली हए, और कमैया बनके फिर लोहोकके बाको जुत्ताको तनि खोलनको लायकको मए नाए हओं। मए तुमके पानीसे बप्तिस्मा देत हओं। पर बा तुमके पबित्र आत्मासे बप्तिस्मा देबैगो।” जा बात यर्दन नदीयाके पार बेथानिया गाउँमे भओ रहए, जहाँ यूहन्ना आदमीनके बप्तिस्मा देत रहए।

दुस्रे दिन बप्तिस्मा देन बारो यूहन्ना येशूके अपन घेन आत देखी और कही, “देखओ, अपनएके बलिदान करके सारा संसारके पापसे छुटकारा देन बारो परमेश्वरको थुमा! बा बहे हए, जौनके बारेमे मए तुमसे कहात रहओं, ‘मोसे पिच्छु एक आदमी अएहए, जो मोसे बडो हए, काहेकी बा मोसे अग्गुसे हए।’ बा ख्रीष्ट हए कहिके मए अपनए फिर बाके नाए चिनो रहओं, पर इस्राएल देशके आदमीन चिन पामएं कहिके मए पानीसे बप्तिस्मा देत आओ हओं।”
और बप्तिस्मा देन बारो यूहन्ना अइसे कहातए गवाही दइ, “मए पबित्र आत्माके कबुतरके रुपमे स्वर्गसे उतरत आत येशूके उपर बैठो देखो। और बा ख्रीष्ट रहए कहिके मए बाके नाए चिनो रहओं, पर जौन मोके पानीको बप्तिस्मा देनके पठाइ, बहे मोसे कही, ‘जौन आदमी उपर तुम पबित्र आत्मा आत और बैठत देखैगे, बहे पबित्र आत्माको बप्तिस्मा देन बारो हए।’ और मए देखो हओं, और मए तुमसे फिर सच्चो कहात हओं, कि बहे परमेश्वरको लौंणा हए।”

फिर दुस्रो दिन बप्तिस्मा देन बारो यूहन्ना बहे ठिहामे अपने दुई जनै चेलनके सँग ठाणो रहए। और बो येशूके जात देखके यूहन्ना कही, “देखओ, बहे परमेश्वरको थुमा हए!” जा सुनके बे दुई चेला येशूके पिच्छु लग्गए।
येशू घुमके देखी, और उनके अपन पिच्छु आत देखके बा उनसे पुछीं, “तुम का चाँहत हओ?” बे बासे कहीं, “रब्बी (जौनक अर्थ हए, महान गुरु) तुम कहाँ रहात हओ?” बा बिनसे कही, “आओ, और आएके तुम देखैगे।” जब बे बाके सँग बाको रहान बारो ठाउँ देखनके गए तओ संझाको लगभग चार बजिगओ रहए। तभीमारे बाँकी रहो समय बे हुनै येशूके सँग बैठे।
बे दुनौ मैसे, बप्तिस्मा देन बारो यूहन्नाकी बात सुनके येशूके पिच्छु लागन बारो एक सिमोन पत्रुसको भइया अन्द्रियास रहए। बो पहिले अप्नो खास भइया सिमोनसे भेँटी और बोसे कही, “हम ख्रीष्टके (मसीह) पाइगए हएं।” अन्द्रियास, सिमोन पत्रुसके येशूके ठिन ल्याइ। येशू बोके देखी और कही, “तुम यूहन्नाको लौंणा सिमोन हओ, देखओ तुम केफास (जौनक अर्थ हए, चट्टान) कहेजाबैगे।”

दुस्रो दिन फिर येशू गालील परदेशमे जानके पक्का करी। और फिलिपसे भेँटके येशू कही, “मिर चेला बननके ताहीं मिर पिच्छु लाग।”
अन्द्रियास और पत्रुस बेथसेदा सहरमे बैठन बारे आदमी रहएं और फिलिप फिर बहे सहरको रहए। फिलिप नथानेलके भेँटके कही, “हमके बा आदमी भेँट हुइगओ हए, जौनके बारेमे मोशाको नियम कानुन और परमेश्वरके अगमबक्ता फिर लिखी रहएं, कि बा नासरत गाउँको योसेफको लौंणा येशू हए।”
नथानेल बोसे कही, “का कोइ अच्छी बात नासरत गाउँसे फिर आएसकत हए?” फिलिप बोसे कही, “आएके देखओ।” येशू नथानेलके अपने घेन आत देखके बक बारेमे कही, “देखओ, एक जनै भरोसालायक इस्राएल देशको (जौन याकूब) पिढी हए: जौन पुरा रितिसे इमान्दार हए।”
नथानेल बासे पुछी, “तुम मोके कैसे चिनलए?” येशू बक जबाफ दइके कही, “फिलिप तोके बुलानेसे अग्गु, अञ्‍जीरको रुखा तरे मए तोके देखो रहओं।” नथानेल येशूसे कही, “गुरुजी, तुम परमेश्वरको लौंणा हओ; तुम इस्राएल देशके राजा हओ।”
येशू बोके जबाफ दइके कही, “मए तोके अञ्‍जीरको रुखा तरे देखो, कहो, का बहेमारे तए बिश्वास करत हए? तए जहुँसे बणे-बणे काम देखैगो।” फिर येशू कही, “नेहात्तओ, मए तोसे कहात हओं, तए स्वर्ग उघरो और परमेश्वरके दूतके उपर जात और मए, आदमीको लौंणाके उपर चढत और तरे उतरत देखैगो।”

گوێگرتن لە यूहन्ना 1