If you have would like a copy of this version please contact info@davarpartners.org

Text: Rana Tharu New Testament, CC-BY-SA-4.0, The Love Fellowship. -- Audio: Rana Tharu New Testament Audio Bible, CC-BY-SA-4.0, Davar Partners International, The Love Fellowship, 2023

Rana Tharu New Testament

Rana Tharu Bible (राना थारु) by The Love Fellowship is licensed under Creative Commons Attribution-ShareAlike 4.0 License.

तओ तिस्रो दिन गालील परदेशको काना गाउँमे कोइ एकको बेहा रहए, और हुवाँ येशूकी अइया फिर रहए। येशू और बाके चेला फिर बो बेहाको निउतो पाइ रहएं। जब अंगुरको रसा खतम हुइगओ, तओ येशूकी अइया बासे कही, “बिनके ठिन भओ अंगुरको रसा खतम हुइगओ हए।”
येशू अपन अइयासे कही, “अइया, मोके का करन पणैगो, तए मोसे मत् कहाबए? हबए ख्रीष्टके रुपमे चिन्हानके ताहीं मिर समय नाएअओ हए।” पर येशूकी अइया कमैयनसे कही, “जो कुछ येशू तुमसे कएहए, बहे करीयओ।”
हुवाँ यहूदी समुहको अपने धार्मिक नियमके अनुसार हात धोनको चलन रहए। अइसे करनके ताहीं, बे पत्थरको छय घल्ला धरे रहएं। सबए घल्लामे लगभग सओ लिटर अपात रहए। येशू कमैयासे कही, “घल्लामे पानी भरओ।” तओ कमैया घल्लामे मोहोणो तक पानी भरदइं। तओ येशू कमैयनसे कही, “अब बो मैसे पानी निकारके थोणी अख्नाएके बेहाको भोजको मुखिया ठिन लैजाओ।” तभीमारे गाउँके कमैया पानी निकारके मुखिया ठिन लैगए। भोजको मुखिया बो पानी चाखीं, जो अब अंगुरको रसामे बदलिगओ रहए। बो अंगुरको रसा कासे बानो हए, सो बेहाको भोजको मुखियाके पता नाए रहए; पर बे कमैया इकल्ले जानत रहएं जौन पानी निकरी रहएं, तओ दुलहाके बुलाएके बोसे कही, “हर करबरेहा सबसे अग्गु अच्छो अंगुरको रसा देत हएं, और आदमी बहुत खाएके अघाएजात हएं तओ बे सस्तो अंगुरको रसा देत हएं। पर तुम त अच्छो अंगुरको रसा अभएतक बचाएके धरे हओ।” येशू गालील परदेशको काना गाउँमे, अपनो हियाँ पहिलो शक्तिशाली चमत्कार दिखाएके अपन महिमा प्रकट करी, तओ बाके चेला बाके उपर बिश्वास करीं, कि बा ख्रीष्ट हए।


जाके पिच्छु येशू और बाकी अइया, भइया, और चेलनसँग कफर्नहुम सहरमे गओ, और कुछ दिन हुवाँ रहे।
यहूदीनको निस्तार तेवहार ढिँगैए रहए, और येशू यरूशलेम सहरमे गओ। येशू यरूशलेमको मन्दिरमे बर्धा, भेंणा, कबुतर बेचन बारे और पैसा बदलन बारेनके किनबेच करत पाइ। तओ रस्सीको एक पैना बनाएके येशू यरूशलेमको मन्दिरसे बिनको भेंणा और बर्धा समेत मन्दिरसे बाहिर निकारके दलाएदइ, और पैसा बदलन बारेनको टेबुल पलटाएदइ। और कबुतर बेचन बारेनसे बा कही, “हियाँसे जम्मए लैजाओ। मिर दौवाको भवनके व्यापारको घर मतबनाओ।”
तओ येशूके चेलनके पबित्र-शास्त्रमे लिखो जा बचन याद आइगओ, “तुमर यरूशलेम मन्दिरको भक्ति, मिर भितर आगी जैसो पजरत हए।”
तओ यहूदीनको समुह येशूसे कहीं, “जा काममे अपन अधिकार साबित करनके ताहीं तुम हमके का शक्तिशाली चमत्कार दिखाबैगे?”
येशू बिनके जबाफ दइ, “जा मन्दिरके उजाड देओं? और मए फिर तीन दिनमे जाके दुबारा बनाए देमंगो।”
तओ यहूदी समुहके अगुवा कहीं, “जा यरूशलेमको मन्दिरके बनानके छयालीस बर्ष लागो हए, और का तुम जाके तीन दिनमे बनाए देबैगे?” पर येशू जौन मन्दिरके बारेमे बतात रहए, बो बाकी शरीर रहए। फिर जब येशू मरके जिन्दा भओ, तओ येशूकी कहीभइ बात चेलनके याद आइगओ; तओ बे पबित्र-शास्त्रमे, येशू मरके जिन्दा होनोके बारेमे लिखो बचनके और येशूकी कहीभइ बातमे बिश्वास करीं।

जब येशू यरूशलेम सहरमे यहूदीनको निस्तार तेवहारको भोजको बेरा, तेवहारमे रहए, तओ येशू बहुतनके शक्तिशाली चमत्कार दिखाइ रहए, और देखके बहुत येशूके नाउँमे बिश्वास करीं। पर बे बामे बिश्वास करी हएं कहिके येशू बिश्वास नाए करी, काहेकी येशू आदमीनको स्वभाबके जानत रहए। और येशूके कोइकी जरुरत नाए रहए, जो बाके आदमीनके बारेमे बताए, काहेकी आदमीनकी मनकी बात और बिचारके बारेमे येशूके पता रहए।

گوێگرتن لە यूहन्ना 2