मत्ती 4
4
शैतान रा यीशु जो परखेया जाणा
1तां पवित्रात्मा ने तिस्सी बेल्ले यीशु जो बियाबान जगाह् जो भेज्जेया, ताकि शैतान तिन्हा जो परखी सको। 2जां यीशु चाली रोज अते चाली रात्तां तिकर ब्रत्त रख्खी बैठ्ठे तां तिन्हा जो भूख लग्गी। 3तां शैतान यीशु का आया अते बोलणे लग्गेया, “जे तू परमेश्वर रा पुत्तर है तां इन्हा बट्टेयां जो अपणे खाणे तांइ रोट्टी बणी जाणे रा हुकम देई करी साबित कर।” 4यीशु ने जवाब दित्तेया, “पवित्रशास्त्र बिच लिख्खे रा है, मणू सिर्फ रोट्टी कने ही नी पर से परमेश्वर रे हर इक्क वचन जो मनणे कने जिन्दा रैहन्दा।”
5तां शैतान तिन्हा जो पवित्र सहर यरुशलेम बिच लेई गेया अते मन्दिर री चोटी पर खड़ा करी के, 6उसने यीशु जो बोल्लेया, “जे तू परमेश्वर रा पुत्तर है तां तू इत्ते का छाल मारी करी साबित कर किजोकी पवित्रशास्त्र बिच लिख्खे रा है:
तिसने तेरी रक्षा तांइ अपणे स्वर्गदूतां जो हुकम दैणा अते तिन्हा तिज्जो हत्थों हत्थ चुक्की लैणा,
ताकि तेरे पैरां पर बट्टे कने चोट भी ना लग्गो।”
7यीशु ने तिसजो बोल्लेया, “पवित्रशास्त्र बिच ए भी लिख्खे रा है: तू प्रभु अपणे परमेश्वर जो मत परख।”
8फिरी शैतान तिन्हा जो इक्क बड़े उच्चे पहाड़ पर लेई गेया अते दुनिया रे सारे राज अते तिन्हेरी महिमा दिखाई करी तिन्हा जो बोल्लेया, 9“जे तू मेरे अग्गे झुके अते मेरी अराधना करगा, तां मैं ए सारा किच्छ तिज्जो देई दैणा।” 10तां यीशु ने तिसजो बोल्लेया, “ओ शैतान, दुर होई जा किजोकी पवित्रशास्त्र बिच लिख्खे रा है,
‘तू प्रभु अपणे परमेश्वर जो ही प्रणाम कर अते सिर्फ उन्हेरी ही सेवा कर।’”
11तां शैतान तिन्हा जो छड्डी करी चली गेया, अते दिख्खो, स्वर्गदूत आई करी यीशु री सेवा-टहल करणा लग्गे।
गलील प्रदेश बिच यीशु
यीशु रा सेवा रा कम्म सुरु करणा
12अते जां यीशु ने ए सूणेया कि यूहन्ना कैद करी लित्तेया गे रा है, तां से यहूदिया जिले का निकली करी गलील प्रदेश जो हटी गे। 13तां से नासरत कस्बे का निकली करी कफरनहूम कस्बे बिच रैह्णा लग्गे, जे जबूलून अते नप्ताली नां री जातियां रे इलाके बिच ते गलीली समुन्द्र रे किनारे पर थिया। 14ताकि जे यशायाह भविष्यद्वक्ता ने बोल्लेया थिया, से पूरा होई जाओ,
15“ओ जबूलून ते नप्ताली रे इलाके बिच रैह्णे वाले लोक्कों,
जे यरदन नदी रे पार, गलीली समुन्द्र रे किनारे पर रैह्णे वाले गैर यहूदी लोक,
16जे मणू न्याहरे बिच जिया करदे थिये तिन्हा ने इक्क महान ज्योति दिख्खी,
अते जे मणू मौत रे साये बिच रैह्न्दे थिये उन्हा पर से ज्योति चमकी।”
17तिस बेल्ले का यीशु ने सुब बसेख रा प्रचार करणा सुरु करी दित्तेया, “पाप्पां का तौबा करी लेयो किजोकी स्वर्ग रा राज नेड़े आई गे रा है।”
पैल्ले चेल्लेयां रा सद्देया जाणा
18जां यीशु गलील री झील का जाया करदे थिये तां तिन्हा ने दो भ्याल, शमौन जिस जो पतरस भी बोलदे, अते तिसेरा भ्याल अन्द्रियास जो झील अन्दर जाल पांदे दिख्खेया किजोकी से मणू मछुआरे थिये। 19यीशु ने तिन्हा जो बोल्लेया, “मेरा चेल्ला बणो मैं तुसा जो मणूआं जो पकड़ने वाला मछुआरा बणांगा।”
20तिन्हा ने तिस्सी बेल्ले जाल छड्डे ते तिन्हेरे पीच्छे चली पे। 21ते तित्ते का अग्गे जाई करी दो भ्याल, याकूब ते यूहन्ना जो दिख्खेया जे जब्दी रे मुडें थिये ते किस्ती पर अपणे प्यो कने जाल जो साफ करेया करदे थिये; तिन्हा जो भी सद्देया। 22से तिस्सी बेल्ले किस्ती अते अपणे प्यो जो छड्डी करी तिन्हेरे पीच्छे चली पे।
गलील बिच यीशु रा बिमारां जो ठीक करणा
23यीशु सारे गलील प्रदेश रे सभास्थल अंदर स्वर्ग रे राज रे सुब बसेख री उपदेस दिंदे अते हर तरह री बिमारियां का खरा अते मणूआं री कमजोरी जो दुर करदे रे। 24अते गलीली जिले रे उत्तर दिसा बिच जे सीरिया इलाका थिया, तित्ते तिन्हेरी खबर फैल्ली गई ते मणू इदेय सब मणूआं जो, जे नेक-बनेक्की बमारियाँ अते दुखां अन्दर जकड़ित्तेरे थिये, जिन्हा अन्दर दुष्टात्मा थिया, जिन्हा जो मिरगी आंदी थी अते जे अधरगं रे मारे थिये यीशु का लियाणा लग्गे यीशु ने तिन्हा जो खरा कित्तेया। 25इधेरे तांइ यीशु रे पीच्छे मणूआं री इक्क भीड़ गलील जिले, दिकापुलिस, यरुशलेम सहर, यहूदियां ते यरदन दरिया रे पार का चली पेई।
دیاریکراوەکانی ئێستا:
मत्ती 4: CDHNT
بەرچاوکردن
هاوبەشی بکە
لەبەرگرتنەوە
دەتەوێت هایلایتەکانت بپارێزرێت لەناو ئامێرەکانتدا> ? داخڵ ببە
Chambeali Bible (चम्बयाळी बाइबिल) 2020 by The Love Fellowship is licensed under a Creative Commons Attribution-ShareAlike 4.0 International License.