संत.जोहन 17
17
ईसु आला विनती
1ईसु नोःआँ जामा बात कंहड़ी केते अपन मेःड सिरमा पखा बिरिःड केते, “ए बाबा होना बेरा हीःग ना अपन होपोन आला महिमाय मे, ची होपोन होः आम आला महिमाये। 2एता लःअय ची आम हुनी के जामा होड़ जाईत रे हक एमा तदियाम, जेकर से हुनी हुंकू जामा के का-अन्तोः जिनगी एमा कु, जेके आम हुंकू के सोंपावओ तदिङाम। 3आउर का-अन्तोः जिनगी नोःआँ हेके, ची हुंकू आम के माने कि मियांड ठुका सचा परमेसर के, आउर ईसु ख्रीस्त के जेके आम कुलगोःड तदिंङाम पड़ीकु। 4जे काम आम ईङ के ककामी लःअय एमा थिलङाम, होना के ईङ पुरा लाईङ, नोःआँ लकान ईङ धरती रे आम आला महिमा तदिङ। 5ए बाबा दुनिया रअः सिरजअः तरअः पहिल ईङ के आम दुबाःड़े जे महिमा ताही नेना, नहाअः आम आला हाजीर रे होना महिमा तरअः महिमाये मे।
अपन चेलाकु लःअय बि-बिनती
6“आम जे होड़ के दुनिया तरअः चुनाव केते ईङ के जिमाओ लिङाम, हुंकू के ईङ आम आला नुमू के दिसतार तदिङ। हुंकू आम आलकु गी ताही नेनाकु, आम हुंकू के ईङ के जिमाओ लिङाम आउर हुंकू आम आला वचन के मनाव तनाकु। 7नहाअः दो हुंकू, जे होः आम ईङ के एमा तदिंङाम होना जामा, आम पखा तरअः हीःग ताना सेके पाड़ी केदाकु। 8एता लःअय ची जे बचन आम ईङ के एमा लिङाम, ईङ होना के हुंकू के एमा लिकुईंग, आउर हुंकू होना के गरहन केते, नोःआँ पाड़ी केदाकु ची ईङ आम दुबाःड़े तरअः हीःग तानिङ, आउर हुंकू सथेगी बिसवास केदाकु ची ईङ आम दुबाःड़े तरअः हीःग तानिङ। 9ईङ हुंकू लःअय गोहराअ तनिङ। ईङ दुनिया लःअय कोवान, बकिर हुंकू लःअय बिनतीअ दाईंग, जेके आम ईङ के जिमाओ तदिंङाम, एता लःअय ची हुंकू आम आलकु हेके। 10आउर जे होः ईङ आला हेके, होना जामा आम आला हेके, आउर जे आम आला हेके होना ईङ आला हेके, आउर हुंकू तरअः ईङ आला महिमा दिसतार नेना। 11नहाअः दो ईङ दुनिया रे एरिङ ताहिनोआँ, बकिर हुंकू दुनिया रे ताही कोआकु, आउर ईङ आम दुबाःड़े दराईंङा। ए पबितर बाबा अपन होना नुमू तरअः हुंकू के बंचाव कुमे, जेके आम ईङ के एमा तदिंङाम, ची हुंकू जे लकान आलांग मियां-डालाङ, हिना लकान हुंकू होः मियांड ताहिनकु। 12#सिरिंग 41:9; सं.जोह 13:18जब तक ईङ हुंकू लोः ताही निनिंग ईङ हुंकू के आम आला नुमू रेनअः सवांग रे बंचाव लिकुईंग जेके आम ईङ के एमा तदिङाम। नास रिनी होपोन के बाई केते ओके आला होः नास का हुयाव नेना। जेकर से ची धरम पुथी पुरायोअ। 13नहाअः दो ईङ आम दुबाःड़े दराईंङा, जब तक ईङ दुनिया रे एदानिया नोःआँ जामा कंहड़ीः दाईंग, जेकर से ची हुंकू ईङ आला खुसी अपन रे भरल-पुराल नाम दाड़ी कु। 14ईङ आम आला वचन हुंकू के सोदोर उकु लाईङ, आउर दुनिया हुंकू तरअः बैर लःअय, एता लःअय ची जे लकान ईङ दुनिया रिनी नलागे, हिना लकान हुंकू होः दुनिया रिनकु नलागे। 15ईङ नोःआँ काईंग गोहराअ ताना ची आम हुंकू के दुनिया तरअः इदी गुल ताकुमे बकिर नोःआँ ची आम हुंकू के खपतान सैतान तरअः बंचाव कुमे। 16जे लकान ईङ दुनिया रिनी नलागे हिना लकान हुंकू होः दुनिया रिनकु नलागे। 17सचाई तरअः हुंकू के पबितर कुमे, आम आला बचन सच एदनाआ। 18जे लकान आम ईङ के दुनिया रे कुलगोःड लिङाम, हिना लकान ईङ होः हुंकू के दुनिया रे कुलगोःड ताडकुईंग। 19हुंकू लःअय अपन के पबितारोअ तनिङ, जेकर से ची हुंकू होः सचाई तरअः पबितारोअ-कु।
जामा बिसवासीकु लःअय बिनती
20“ईङ हुंकू लःअय भाईर काईंग गोहराअ ताना, बकिर हुंकू लःअय होः जे नुकू आला वचन आयुम केते ईङ रे बिसवासे-आकु। 21जेकर से ची हुंकू जामा मियांड जुनोअकु। जे लकान ए बाबा आम ईङ रेमेआ, आउर ईङ आम रे एदानिया। हिना लकान हुंकू होः आलांग रे मियांड जुनोअकु, जेकर से ची दुनिया बिसवासेकु ची आम गी ईङ के कुलगोःड तदिङाम। 22होना महिमा जे आम ईङ के एमा लिङाम ईङ हुंकू के एमा लिकुईंग, जेकर से ची हुंकू आलांग लकान गी हुंकू होः मियांड जुनोअकु। 23ईङ हुंकू रे ताहीनुईंग आउर आम ईङ रे, जेकर से हुंकू सिध केते मियांड जुनोः कु आउर दुनिया नोःआँ पाड़ी कु ची ईङ के आम कुलगोःड तदिंङाम, आउर जे लकान आम ईङ के दुलार लिङाम, हिना लकान हुंकू के होः पेरेम लिकुईंग। 24हे बाबा, ईङ चहाअ तानिङ ची जेके आम ईङ के जिमाओ तदिंङाम जे एड़े ईङ एदानिङा हिनाःड़े हुंकू होः ईङ लोः ताहिनकु जेकर से ची हुंकू ईङ आला महिमा नेल-दड़ीकु, जेके आम ईङ के एमा तदिंङाम, एता लःअय ची आम दुनिया सिरजअः तरअः पहिल ईङ के दुलार लिङाम। 25ए धरम बाबा दुनिया ईङ के काकु पाड़ी लिङा, बकिर ईङ आम के पाड़ी लिमिईङ, आउर नुकू होः पाड़ी लिङाकु ची आम गी ईङ के कुलगोःड तदिङाम। 26ईङ हुंकू के आम आला नुमू के उदूः लिईङ आउर उदूः एका-कुईंग, जेकर से आम जे दुलार रे ईङ के पेरेम लिङाम, होना पेरेम हुंकू रे बनाल ताहिनोअ, आउर ईङ होः हुंकू रे बनाल ताहिनुईंग।”
دیاریکراوەکانی ئێستا:
संत.जोहन 17: ASR
بەرچاوکردن
لەبەرگرتنەوە
بەراوردکردن
هاوبەشی بکە
دەتەوێت هایلایتەکانت بپارێزرێت لەناو ئامێرەکانتدا> ? داخڵ ببە
© 2023 NLCI CC BY-NC-ND 4.0