संत.लुकास 21
21
राँगेःग राँड़ी आउराईत आला दान
(संत.मरकुस 12:41–44)
1तेकर ईसु हुंकू के, बोहोअ बिरिःड केते गीरहतकु के बड़े बिनती ओड़ाअ रे अपन-अपन भेंट बाक्सा रे सासजाव नेल लिकुआय, 2तेकर हुनी मियांड रांगेःग राँड़ीयाही के होः होना रे बरिया ठर्ड़रा सासजाव नेल लियाय। 3तेकर ईसु, “सथेगी कंहड़ीओ दिपीईङ, नुई रांगेःग राँड़ीयाही जामेकु तरअः जादे सजाव तदाय। 4हुंकू जामाकु दो अपन-अपन बढ़ती मे से दान सजाव तदाकु; बकिर नुई, अपन घटी रे जे जिवीडोः लःअय ताहीना होना जामा के नुर लःअय।”
बड़े बिनती ओड़ाअ उयुगोः रेनअः कंहड़ी
(संत.मत्ती 24:1–2; संत.मरकुस 13:1–2)
5तेकर थोड़ेक होड़ बड़े बिनती ओड़ाअ रआ बारे ची होना बढ़ियाँ टुकू, हेतरअ दान रकाःब लेनअ जिनीस ते सिंगार तदाकु। मेन केते कंहड़ी केनाकु, 6दो ईसु “होना दिन हीःग कोआ होना रे जे आपे नेल दापे, जामा रे टुकू तेङ रे टुकू लादी लआ एरे ताहिनोआँ; जामा घहराव कोआ” मेन लःअय।
दुख हेतरअ सताव
(संत.मत्ती 24:3–14; संत.मरकुस 13:3–13)
7तेकर हुंकू “ए गुरू, नोःआँ ओका हिला हुयाव कोआ? तेकर नोःआँ बात पुरायोः बेरा एतान चिनहा नेल कोआ?” मेन केते कुली लियाकु।
8तेकर हुनी कंहड़ी लःअय, “चौंचित ताहिन पे; आपे के जाहें आलकु बहकाव केपे। ढेर होड़, ईङ आला नुमू रे हीःग कोआकु, ‘तेकर ईङ गी! ख्रीस्त हेके, बेरा सोदोर हीःग ना!’ कंहड़ी केआकु, दो हुंकू के आलपे ओतोङ किकु। 9आपे-आपे लड़ाई हेतरअ हुमाअ उपड़ीनोः रेनअः खभाईर आयुमेआपे दो आपे आलपे आकबकाव कोओ; नोःआँ कंहड़ी दो पहिल रे हुयाव कोआ, बकिर तुरते एरे अंतोआ।”
10तेकर ईसु हुंकू के कंहड़ीओ लिकुआय, “जाईत एटाअ जाईत आला बिरोध रे; हेतरअ राईज एटाअ राईज रेनअः बिरोध रे बिरिःड कोआ। 11तेकर बड़े-बड़े भुईंडोल हुयाव कोआ, तेकर ठाँव-ठाँव रे महामारी, हेतरअ आकाल हुयाव कोआ; तेकर सिरमा तरअः भयभयान बात हेतरअ अजिब चिनहा नेल कोआ। 12बकिर नोःआँ जामा बात पुरायोः तरअः पहिल रे, ईङ आला नुमू चलते आपे के सा:ब केपेआकु, हेतरअ सताव केपेआकु; तेकर पंचाईत ओड़ाअ रे ईदी केपेआकु हेतरअ जेहेल चिकपेआकु; तेकर राजाकु आला हेतरअ हाकिमकु आला मड़ांग रे ईदी केपेआकु। 13बकिर नोःआँ रे आपे लःअय गोवाही एमोअ लःअय बढ़ियाँ मोका भेटाव कोआ। 14#सं.लुका 12:11,12हिना लःअय आपे नोःआँ जामा बात लःअय तेयार ताहिन पे, आपे अपन बंचाअ लःअय एता लकान कंहड़ी केआले मेन केते अपन मन रे आलपे सोंचाव के, 15जब ईङ आम के नोकान लुर आउर बचन एमामेईङ हिना तरअः ईङ आपे आलकु जामा मुदाई ईरकु हराव दड़ीआ आउर ना गलत साबित केमेआकु। 16आपे के, आपे आलकु एंगा-आपा, हेतरअ बोको, आउर अपन कुटुमकु, हेतरअ गातीकु होः सःब ची केपेआकु; हेतरअ आपे रे थोड़ेककु के गोएःग ची केपेआकु। 17तेकर ईङ आला नुमू चलते जामे होड़ खिसओ केपेआकु। 18बकिर आपे आला बोहोअ रेनअः मियांड ऊःब होः एरे टेड़हा योआ। 19अपन जीव के आसथिर दोदोहो रअः चलते आपे अपन आतमा के बंचाव ताकेआपे।
जिरोसालेम नासोः बारे पहिल रे उउदूः
(संत.मत्ती 24:15–21; संत.मरकुस 13:14–19)
20“जिरोसलेम के पलटन घेराव लिनकु नेलेआपे, दो होना ऊजाड़ जुनोः हेनाःड ना के पड़ीपे। 21होले जे जाहुदिया परदेस रे ताहीनोः कु बुरु ते नीर जुनोः कु; तेकर जिरोसालेम भीतरी रे ताहिन कु बाहरी ते उडुंग जुनोः कु, तेकर जे डिही रे ताहिन कु होना रे आलकु बोलो कोओ। 22#होसे 9:7एता लःअय ची ‘होना बदला रेनअः दिन कोआ,’ जे बेरा जे जामा लिखा ताना होना जामा पुराव कोआ। 23हिमीन बेरा भारी गतार हेतरअ तोवा पियाव कु लःअय हाय! हाय एता लःअय ची राईज रे मुरुक संकट हुयाव कोआ, हेतरअ नुकू होड़ रे परकोप कोआ। 24हुंकू तलवाईर रे मांअ चिन कोआकु, हेतरअ हुंकू के बन्दी बनाव केते होना जामा राईज रे ईदी किकुआकु; तेकर एटाअ जाईतकु आला बेरा अनौरी पुरायोः जगुत जिरोसलेम एटाअ जाईतकु तरअः तीका सेरेःड कोआ।
मनवा होपोन आला हीःग रूवाड़ोः
(संत.मत्ती 24:29–31; संत.मरकुस 13:24–27)
25 #
जसा 13:10; जहेज 32:7; जोए 2:31; दि.वचन 6:12,13 “तेकर सितोम बोंगा रे हेतरअ चानु, तेकर इपील रे, चिनहा-छकरीत बात हुयाव कोआ। तेकर ओत रे समुदर साड़ीयोः, हेतरअ हलफा रे जामा जाईत-जाईत रिनकु बिपाईत रे आकबकाव कोआकु। 26होड़कु दुनिया रे हिजो वाला मुसिबात रअः चलते बोर रे बेहोस कोआकु, एता लःअय ची सिरमा रेनअः सवांग हिलाव कोआ। 27#दानि 7:13; दि.वचन 1:7हिमीन रे मनवा होपोन के सवांग, हेतरअ महिमा लोः रिम्बिल रे हिजोअ नेल कियाकु। 28तेकर नोःआँ बात हुयाव एहेबोआ, दो बिरिःड केते तिंगुनपे आउर अपन बोहोअ बिरिडेपे, एता लःअय ची आपे आला छुटकारा हेनाःड कोआ।”
अंजीर सिंङ रेनअः उदाहरन
(संत.मत्ती 24:32–35; संत.मरकुस 13:28–31)
29तेकर ईसु हुंकू के मियांड गाम कंहड़ीओ लिकुआय, “अंजीर सिंङ हेतरअ जामा सिंङ के नेलेपे। 30होना फुनगी उडुंगोआ के नेल केते, जेठ दिन नहाअः दो हेनाःड ना मेन के पाड़ी आपे। 31निआँ लकान आपे, नोःआँ कंहड़ी के हुयाअः नेलेआपे, दो परमेसर आला राईज हेनाःड ना के पड़ीपे।
32“सचे बेताः दिपीईंग नोःआँ जामा कंहड़ी अनौरी हुयाअः जगुत, नोःआँ बेरा रिनकु होड़ ईरकु चाबायोआ। 33सिरमा हेतरअ ओत ओचोः जुनोआ, बकिर ईङ आला कंहड़ी ओका हिला होः एरे ओचोः गोआ।
बिरिःड एकान पे
(संत.मत्ती 24:36–44; संत.मरकुस 13:32–37)
34-35“चौंचित ताहिन पे, कोवान दो भोग-बिलास आउर बुलोअ, तेकर जिनगी रेनअः सोंच-फिकिर रे आपे आला मन हेंदवव, हेतरअ होना दिन आपे रे अचाका फंदा लकान हीःग कोआ। एता लःअय ची होना, गोटा धरती रे ताहिनोःकु तेङ रे हीःग कोआ। 36आपे नोःआँ हिजोआ घटना तरअः बंचाअ लःअय, हेतरअ मनवा होपोन मड़ांग रे तिंगु दाड़ी लःअय, जामा बेरा बिरिःड एकान पे हेतरअ जामा बेरा बिनती एकाय पे।”
37 #
सं.लुका 19:47
हुनी सिंङ दो बड़े बिनती ओड़ाअ रे उपदेस एमाकु केनाय, निदा बाहरी उडुंग केते, जैतुन नुमू रेनअः बुरु रे सेन केते ताहीनोः केनाय। 38तेकर निदवारे अनगुती बिरिःड केते जामा होड़ हुनी आला कंहड़ी आ-आयुम लःअय, बड़े बिनती ओड़ाअ रे हुनी दुबाःड़े हिजोअ केनाकु।
دیاریکراوەکانی ئێستا:
संत.लुकास 21: ASR
بەرچاوکردن
لەبەرگرتنەوە
بەراوردکردن
هاوبەشی بکە
دەتەوێت هایلایتەکانت بپارێزرێت لەناو ئامێرەکانتدا> ? داخڵ ببە
© 2023 NLCI CC BY-NC-ND 4.0