زەبوورەکان 1:14-7
زەبوورەکان 1:14-7 پەیمانی نوێ و زەبوورەکان بە سۆرانی (PNTZS)
نه‌زان له دڵی خۆیدا ده‌ڵێت: “خودا نییه” ئه‌وانه گه‌نده‌ڵن و كرده‌وه‌كانیان گڵاوه، كه‌س نییه چاكه بكات. په‌روه‌ردگار له ئاسمانه‌وه سه‌یری ئاده‌میزادان ده‌كات، تا بزانێت: ئایا كه‌س هه‌یه تێگه‌یشتوو بێت و به‌دوای خودا بگه‌ڕێت؟ هه‌موو پێكه‌وه ڕوویان وه‌رگێڕا، هه‌موو گه‌نده‌ڵ بوون. كه‌س نییه چاكه بكات، ته‌نانه‌ت یه‌كێكیش نییه. ئایا گوناهباران نازانن، ئه‌وانه‌ی وه‌ک نان گه‌له‌كه‌ی من ده‌خۆن و له په‌روه‌ردگار ناپاڕانه‌وه؟ له‌وێ ترسێكی گه‌وره‌یان لێ نیشت، چونكه خودا له‌نێو كۆڕی خوداناسان ئاماده‌یه. سووكایه‌تی به بۆچوونی هه‌ژار ده‌كه‌ن، چونكه په‌روه‌ردگار په‌ناگا‌ی ئه‌وه. با ڕزگاریی ئیسڕائیل له سیهیۆنه‌وه ده‌ربكه‌وێت. كاتێ په‌روه‌ردگار گه‌له‌كه‌ی خۆی له ڕاپێچكراوی ده‌گێڕێته‌وه، یاقوو شاد و ئیسڕائیل دڵخۆش ده‌بێت.
زەبوورەکان 1:14-7 كوردی سۆرانی ستانده‌رد (KSS)
گێل لە دڵی خۆیدا دەڵێت: «خودا نییە.» ئەوانە گەندەڵن و کردەوەکانیان پیسە، کەس نییە چاکە بکات. یەزدان لە ئاسمانەوە سەیری ئادەمیزاد دەکات، تاکو بزانێت کەس هەیە تێگەیشتوو بێت، کەس هەیە ڕوو لە خودا بکات. هەموو ڕوویان وەرگێڕا، هەموو گەندەڵ بوون، کەس نییە چاکە بکات، تەنانەت یەکێکیش نییە. ئایا ئەم هەموو گوناهبارانە هیچ نازانن؟ ئەوانەی وەک نان گەلەکەی من دەخۆن و ئەوانەی لە یەزدان ناپاڕێنەوە. لەوێ ترسێکی گەورەیان لێ نیشت، چونکە خودا لەناو کۆڕی ڕاستودروستان ئامادەیە. ئێوەی گوناهبار سووکایەتی بە پلانی هەژاران دەکەن، بەڵام یەزدان پەناگای ئەوانە. با ڕزگاریی ئیسرائیل لە سییۆنەوە دەربکەوێت! کاتێک یەزدان گەلەکەی خۆی لە ڕاپێچکراوی دەگەڕێنێتەوە، با یاقوب شاد و ئیسرائیل دڵخۆش بێت!