زەبوورەکان 1:95-11
زەبوورەکان 1:95-11 پەیمانی نوێ و زەبوورەکان بە سۆرانی (PNTZS)
وه‌رن په‌سنی بۆ په‌روه‌ردگار بڵێین، ده‌نگ هه‌ڵببڕین بۆ تاشه‌به‌ردی ڕزگاریمان. به سوپاسه‌وه بچینه به‌رده‌می، به په‌سنیه‌وه ده‌نگی بۆ هه‌ڵببڕین. چونكه په‌روه‌ردگار خوداوه‌ندێكی مه‌زنه، پاشایه‌كی گه‌وه‌ره‌یه به‌سه‌ر هه‌موو خوداوه‌ندكان. قوڵاییه‌‌كانی زه‌وی به ده‌سته و ترۆپكی شاخه‌كان هی ئه‌ون. ده‌ریا هی ئه‌وه و ئه‌و دروستی كردووه. به ده‌ستی خۆی وێنه‌ی وشكایی كێشاوه. وه‌رن، كڕنۆشی بۆ ببه‌ین و له به‌رده‌م په‌روه‌ردگاری ئافرێنه‌رمان چۆک دابده‌ین. چونكه ئه‌و خوداوه‌ندمانه و ئێمه گه‌لی له‌وه‌ڕگای ئه‌وین و مه‌ڕی ده‌ستی ئه‌وین. ئه‌مڕۆ ئه‌گه‌ر گوێتان له ده‌نگی بوو. دڵتان ڕه‌ق مه‌كه‌ن وه‌ک له مه‌ریبا، وه‌ک ئه‌و ڕۆژه‌ی مه‌سا له بیاباندا. له‌وێ باوباپیرانتان تاقییان كردمه‌وه. هه‌رچه‌نده كاره‌كانی منیشیان دیبوو. چل ساڵ له‌و نه‌وه‌یه تووڕه بووم و وتم: “ئه‌مانه گه‌لێكن دڵیان گومڕا بووه و ڕێگای منیان نه‌ناسی”. له كاتی تووڕه‌ییمدا سوێندم خوارد: “نایه‌نه نێو حه‌سانه‌وه‌ی من”.
زەبوورەکان 1:95-11 كوردی سۆرانی ستانده‌رد (KSS)
وەرن، هەلهەلە بۆ یەزدان لێبدەین، هاواری شادی بکەین بۆ تاشەبەردی ڕزگاریمان. بە ستایشەوە بچینە بەردەمی، بە مۆسیقاوە هاواری شادی بۆ بکەین. لەبەر ئەوەی یەزدان خودایەکی گەورەیە، پاشایەکی گەورەیە بەسەر هەموو خوداوەندەکانەوە. قووڵاییەکانی زەوی بە دەستە و لووتکەی شاخەکان هی ئەون. دەریا هی ئەوە و ئەو دروستی کردووە، بە دەستی خۆی شێوەی وشکانیی پێکهێنا. وەرن، کڕنۆشی بۆ ببەین و بیپەرستین، لەبەردەم یەزدانی دروستکەرمان چۆک دابدەین، چونکە ئەو خودامانە و ئێمە گەلی لەوەڕگاکەی ئەوین، مەڕی دەستی ئەوین. ئەگەر ئەمڕۆ گوێتان لە فەرمایشتی یەزدان بێت کە دەفەرموێت: «دڵی خۆتان ڕەق مەکەن وەک لە مەریبا ڕوویدا، وەک ئەو ڕۆژە لە مەسا لە بیابان، لەوێ باوباپیرانتان تاقییان کردمەوە، هەرچەندە کردارەکانی منیان بینی، بەڵام هەر تاقییان کردمەوە. چل ساڵ لەو نەوەیە تووڕە بووم، فەرمووم: ”ئەمانە گەلێکن دڵیان گومڕا بووە و ڕێگای منیان نەناسی.“ بۆیە لە تووڕەییمدا سوێندم خوارد: ”نایەنە ناو حەسانەوەی من.“»