Matiye 2
2
Məsənaŋ wənet ngərzleɗ azoŋguk ula Zezu
1Muwani Zezu a Betelihem awalaŋ gəla na dələv na Zude, daga Herodə asan aka məlĩya. Dərɓaga muwani, məsənaŋ wənnet gərzleɗ səmba pay nampum, azoŋko a Zerusalem. 2Assohoŋ na: Aŋgay win muwanəŋ di, an məs dədawsan məlĩ net Yahudiyenɗe di? Mulak ngərzla nan ambra pay nampum vini məde vi kaw gakdakani.
3Adan məlĩ Herodə apprəm vaska, makran azlahək diiɗa, daga ɗii na Zerusalem pakə atapetike. 4Herodə akkeletik ɗii gugiriɗ net məs dəlveŋge na Maŋgəlva, dit ɗii nan məsənaŋ ɗerewel na ma henziŋ na Maŋgəlva, atokonək met na, aŋgay adah wanən Messiya* di. 5Azlan sənənək na: A Betelihem dələv na Zude. Vaski məs kleŋ evere.
6Is Betelihem dələv na Zude
kəgəs azet walaŋ gəleɗe mbrit na Zude ɓa:
Vi sə Zoki məlĩ adawgilyeni
məs naw taɗ ɗii naw Israyel.
7Yaŋ Herodə aye məsənaŋ zəga məɗamma yaŋ apprəm pay mula ngərzla təstəs səmeti. 8Aslinik a Betelihem, apsit na, mədoŋ məkayan gəla winəŋ lewlewi, an kərəhnənka, kəzoŋ gən wənahsuwa ndaw gən əgakdakan tamə.
9Adan apprəmən vas səma məlĩya, ambataŋka. Yaŋ ngərzla məs awlaŋ amba pay nampum naka adawka abeti, adek izu aka gəla an məs wiyən asan adaka. 10Adan awlanən ngərzla, an nekenənək zit diiɗa. 11Atoŋgoŋko eŋgili, awlanənək wina dət man, Mari. Agdukoŋko fuŋ a gakdakanənka. Yaŋ apələn ma gabal net əmpa apsənənək zəga, meleŋge də gaŋgəlnya, gəm tursan nani. 12Yaŋ Maŋgəlva anah sit də wisine adaw milyeŋ kəla za Herodə ɓa, amndoŋko aka dələv net dəka tive mbərən.
Wənzuwa a Misra
13Dərɓaga məsənaŋ zəga ambataŋgə, maslay na Ɗəfdaya adek aza Zozef də wisine apsən na: Asili, aslan wina dət mani dok a Misra, asok adak ha gap nənah suk gəni. Vi Herodə wakayan wina, kawbayən.
14Zozef afɗahka aslanək wina dət mani dəfɗa ambataŋka Misra. 15Asanka daka ha gap Herodə zamə. Vas na vi kapprəman an Ɗəfdaya anah də ma məs kleŋ nani, nəyak wətu sə Misra.
Wəbay kirin mimeɗeŋɗe
16Adan Herodə awla məsənaŋ zəga ammakanənək dərwa, gədəvən adək diiɗa. Aɗɗak wənna, kawbay kirin mezeŋleket sə Betelihem pak gəm səket meŋge nan pakə, təŋ səka wəsva sula ha məs dəgapaŋ ɓa pakə, va an məs apprəm səmet məsənaŋ zəga va pay awlanən ngərzla nan egili. 17Yaŋ apprəmanənək an məs kleŋ Zeremiya apeli.
18Məpprəmni vamvəl a Rama,
wəhəmma də gugoyo tay diiɗa,
Rakel tatə həmma viyit kirtita,
tənger kapprəm wəɓət gət ɓa vi amtaŋka.
Wəmilyo sə Misra
19Dan Herodə amtə, maslay na Ɗəfdaya adek aza Zozef də wisine a Misra. 20Apsən na: Asili, aslan wina dət mani a amil dənɗaŋ aka dələv na Israyel vi məzu kayanən wiyən kawbayən amtaŋka.
21Asilke aslanək wina dət mani amilyeŋgək aka dələv na Israyel. 22Adan apprəmna Arkelawus dəsan məlĩ a gəla affəni, a Zude, geslne armak dawsan adaka, yaŋ wəsine ade azani amzla aka dələv na Galile. 23Ambatka asanək awalan gəla məs adawyaŋ na Nazaret. Vi kapprəman an məs kleŋɗe anahaŋ na: Kawyani na mə Nazaret.
Právě zvoleno:
Matiye 2: GDRNT85
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
Gidar New Testament © Bible Society of Cameroon, 1985.