Luke 23
23
Jesus Pilate-muurrauruq
(Matthew 27.1-2, 11-14; Mark 15.1-5; John 18.28-38)
1Tavra iluqaġmiŋ piqatigiich makinŋarut, aasii qaġġisivlugu Jesus Pilate-mun. 2Tavra iliŋisa uqautigirraqsiŋagaat uqaqłutiŋ, Iḷitchuġigikput una iñuk asiñuurriñiaqtuaguvlugu iñuptiŋnik, suli aitchuitquriŋił̣ł̣uni akiḷiutinik taxes-nik Caesar-mun, uqaqłuni ilaa Christ-gunivḷuni umialik. 3Tavra Pilate-gum apiġiŋagaa Jesus, Umialigivatin Jew-guruat? Tavra ilaan kiuŋagaa, Tainna uqallaktutin. 4Tavra Pilate uqallaŋaruq aŋaiyyuliqsiqpaŋnun iñusalaŋnullu, Patchisiksramik iḷitchuġiŋitchuŋa uumani iñuŋmi. 5Tavra iliŋich katchuŋaiñŋarut uqaqłutiŋ, Ilaan aŋalayyauġai iñuich, iḷisaurrivḷuni iluqaani Judea-mi, Galilee-miñqaŋa uumuŋaaglaan inimun.
Jesus Herod-muutigaat
6Tavra Pilate taamna tusaakamiuŋ, apiqsriŋaruq iñuk taamna Galilee-ġmiugummagaan. 7Tavra Pilate iḷitchuġikami Jesus Herod atanniqsimakkaŋani inniġman, ilaan Herod-muktinŋagaa, Herod Jerusalem-miinmimman taavrumani piviksrami. 8Tavra Herod tautukamiuŋ Jesus, ilaa quyapiaġataŋaruq, qanuq sivisuruami tautugumalaaŋavlugu, pisigivlugich tusaasuukkani ilaagun, suli tautugumaŋagaluaqtuq qanutchimik aliuġnaqtuamik savakpan. 9Tavra Herod-gum sivisuuraqtuami apiqsruqtuŋagaa Jesus, aglaan ilaan kiulaiñŋagaa. 10Tavra aŋaiyyuliqsiqpaich iḷisaurriḷḷu pitquranik makitaruat tamaani, suammakłutiŋ saŋunŋagaat Jesus. 11Tavra Herod-gum aŋuyaktiŋisalu aŋalataġiŋagaat pisaaŋŋatikun kipagivlugulu, kiisaimma annuġaalgitpaat annuġaaġipiaġataqtuanik umialiktun, aasii utiqtiłługu Pilate-mun. 12Tavraasii Herod-lu Pilate-lu avilaitqatigiiksinŋaruk avanmun taavrumanipiallak uvlumi, qanuq sivuani taavruma uumikkutiŋagaluaqtuak avanmun.
Jesus Tuquruksraġuġaat
(Matthew 27.15-26; Mark 15.6-15; John 18.39—19.16)
13Pilate tavrani ququaŋagai atautchimun aŋaiyyuliqsiqpaiḷḷu umialiŋnallu iñuiḷḷu, 14aasii uqallautivlugich, Qaġġirriŋagivsiŋa uumiŋa iñuŋmik asiñuurriñiaqtualivḷugu iñuŋnik. Aasii qanuġitilaaqqaaqługu sivuqqavsiññi, iḷitchuġiŋitkiga una iñuk piḷuutiqaġlugu nalliannik unnii pasikkutivsi ilaanun. 15Herod unnii iḷitchuġiŋiñmiuq pasikkutiksramik, qanuq utiqtisiññaŋammigaa uvaptiŋnun. Una iñuk piitchuq sumik tuqurrutauyumiñaqtuamik ilaanun. 16Tavra ipiġaqtuqtisiññaġniaġiga aasii tigutaaqtauŋaiqsillugu. 17[Tavra Pilate tigutaaqtauŋaiqsitchiruksrausuuruq atautchimik tigutaaqtamik niqinaqimmata qulaurrusiqiviŋmun itqaunmi.] 18Tavra iluqaġmiŋ iñusalaich atautchikun nipaallaŋarut, Tuqutauli taamna iñuk, aasii tigutaaqtauŋaiqsillugu Barabbas. 19Barabbas tigutaaqtauruaq pisigivlugu tuavaallaktitchiŋaniŋa iniqpaŋmi iñuaqłuniḷu. 20Pilate-gum nivliutitqikkalualgitkai atausivsaami, kipiġniuġaluaqłuni tigutaaqtauŋaiqsitchukługu Jesus. 21Tavra iliŋich saqłarraqsigiññaŋarut, Kikiaktuutili, kikiaktuutili aŋarrauramun. 22Piŋayuaŋni Pilate-gum uqallautigalualgitkai, Summan? Sumik pigiitchuamik piŋava? Iḷitchuġiŋitchuŋa ilaani qanusipayaamik patchisiksramik tuqurrutauyumiñaqtuamik. Tavra ipiġaqtuqtisiññaġlugu tigutaaqtauŋaiqsinniaġiga. 23Tavra iñuich katchuŋaiñŋarut, saqłakłutiŋ Jesus kikiaktuutiraksraupiaġnivḷugu aŋarrauramun. Kiisaimmaa saqłakłutiŋ akimavut. 24Tavra Pilate sivunniiŋaruq piruksraġuqługu kipiġniuġutaat. 25Tavra ilaan tigutaaqtauŋaiqsinŋagaa iñuk isiqtitauruaq tigutaaġviŋmun tuavaallaktitchiñikun iñuaġnikullu, ilaisa apiqsriaġikkaŋat, aglaan Jesus ilaan aitchuutigiŋagaa ilaiññun qanuq pisukparruŋ pitquvlugu.
Jesus Kikiaktuurrauruq Aŋarrauramun
(Matthew 27.32-44; Mark 15.21-32; John 19.17-27)
26Tavra aullautisaġniallaan Jesus, paaŋagaat iñuk Simon Cyrene-miu, tikitchaġataviksuaq iniqpaŋmun. Tigguġluŋagaat aasii iqsriqł̣ugu aŋarrauramik, iqsruquvlugu aquagun Jesus. 27Tavra iñusalaich, maliŋagaat aquagun aġnallu qiaqpakługu Jesus. 28Tavra Jesus kiŋiaqługich uqallautiŋagai, Aġnaat Jerusalem-mi, qirratigiŋaiqsiŋa uvaŋa. Qirratigisitchi ilivsiññun miqłiqtuvsiññullu. 29Qanuq uvlut tikiññiaqtut iñuich uqallagniaġmata, Quviasuglich miqłiqsiḷaitchuat, siŋaiyaulaitchuallu, miluktitchiŋaitchuallu qaŋaunnii. 30#Ho 10.8; Rev 6.16.Taimanigu iñuich uqaġniaqtut iġġiñun, Kattaqisigut, Qimiqqamullu iriqtigut. 31Qanuq tainna pikparruŋ iñuk patchisaitchuaq paŋmapak, qanutun piñiaġmivat iñuŋnun taimanigu?
32Malġuktauq allak, pitquranik kamaksriŋitchuaq, tuqutauruksraġuŋammigaich piqatigilugu Jesus. 33Tavra tikiññamik inimun atiqaqtuamun Niaquġruamik, tavrani kikiaktuutiŋagaat Jesus aŋarrauramun, malġuglu pitquranik kamaksriḷaitchuak ilaan avatiŋnun. 34#Ps 22.18.Tavra Jesus uqallaŋaruq, Aapaaŋ, suliqutigiŋaiġuŋ itqaumayumiñaiġḷugu piḷuutaat, qanuq nalurut suliqitilaamiŋnik. Suli saaptautigiŋagaich autaaġukługich ilaan annuġaaŋi. 35#Ps 22.7.Tavra iñuich makitaŋarut tamaani takunnaqłutiŋ. Aglaalli Jew-guruat umialiŋnaŋich kipakłiŋarut ilaanik uqaqłutiŋ, Ilaa annaurriŋaruq allanik, annautimmiḷi inmiñik, ilaa Christ-gugumi God-im Piksraqtaaŋa. 36#Ps 69.21.Aŋuyaktit kipagiŋammigaat, ullakługu aitchuŋagaat wine-mik, 37uqallautivlugulu, Umialigikpatin Jew-guruat, annauttuiñ iliŋnik. 38Ukua uqaluich aglautiŋammigaich qulaanun, Unauvva Umialgat Jew-guruat.
39Igḷuata pitquranik kamaksriḷaitchuam niviŋaruam pisaaŋaŋammigaa, uqaqłuni, Christ-guguvich, annautuiñ iliŋnik uvaguglu annautilunuk. 40Tavra igḷuata suaŋagaa igḷuni uqaqłuni, Sivuuġagiŋitpiuŋ God tainnatuttauq tuquaqsiḷḷamnuk? 41Uvaguk iḷumun piḷḷuataġaatiguk, qanuq aitchuusiaqaqtuguk nalaunŋaruamik savaaptiŋnun, aglaan una iñuk piŋaitchuq sumik pigiitchuamik. 42Tavra ilaa uqallaŋaruq Jesus-mun, Jesus, itqaumayumagiŋma qaiguvich umialiguġlutin. 43Tavra Jesus kiuŋagaa, Iḷumun uqallautigikpiñ, uvlupak itqatiginiaġiŋma Nakuuvlutiŋ Ayuruat Irvianni.
Jesus Tuquruq
(Matthew 27.45-56; Mark 15.33-41; John 19.28-30)
44 #
Ex 26.31-33. Tavra uvluq qitiqqaqpalliġman siqiñiq taaqsiŋaruq nunalu iluqani piŋasunugataqtillugu. 45Tavra talukiyaaŋa aŋaiyyuvikpaum aliŋaruq malġuułłuni. 46#Ps 31.5.Tavrani Jesus nipatusivḷuni uqallaŋaruq, Aapaaŋ, qaitkiga ilitqusiġa iliŋnun munaġitquvlugu. Aasii taamna uqallausiġianikługu aniġniġiŋaruq. 47Tavra aŋuyaktit atanauraŋata iḷitchuġikami taapkuniŋa piruanik, ilaan nanġaŋagaa God uqallakłuni, Nalupqinaitchuamik una iñuk patchisaiñŋaruq. 48Tavra iluqaġmiŋ iñusalaich kasimaruat qiñiqtuaġiaqłutiŋ, tautuanikamiŋ taapkuniŋa piruanik, utiŋarut aiyaavlutiŋ, atqunaq iłuiḷḷiuġutiqaqłutiŋ. 49#Lk 8.2, 3.Suli iluqaġmiŋ Jesus aunniuqsimakkaŋisa, aġnallu maliktuat ilaanik Galilee-miñ, makitaŋarut taavaniqpani qiñiqłutiŋ tamatkuniŋa.
Jesus Iḷuvviuġaat
(Matthew 27.57-61; Mark 15.42-47; John 19.38-42)
50,51Tavra iñuqaŋammiuq atiqaqtuamik Joseph-mik qairuamik Jew-guruat nunaaqqianniñ Arimathea-miñ. Ilaa iḷaugaluaqłuni aŋaiyyuvikpaum uqaqsitaaqtitchiriŋiñun, iviġaumagiŋaitkaa sivunniutaat savaaŋallu. Joseph iñulluatauŋaruq isumakkusiaqaġluataqłuniḷu niġiugivlugulu tikiññiksraŋa God-im atanniqsimmataa nunami. 52Taamna iñuk ullautiŋaruq Pilate-mun aasii apiqsriaġivlugu Jesus timaa. 53Tavra ilaan atqaŋagaa timaa, aasii nimaaqługu ukił̣haaġiksuamik iḷuvviuġunmik, aasii iḷuviqługu uyaġagruakun iḷuvviviḷiamun, iñuum qaŋaunnii iḷuviqtauvigiŋaisaŋanun. 54Taamna uvluq Jew-guruat Itqanaiyaġviat, savaiññiq isagutiaqsivḷuni.
55Tavra aġnat maliŋaruat Jesus-mik Galilee-miñ piqasiŋagaat Joseph, aasii tautukługu iḷuvvivik, qanuġlu Jesus timaa iḷisilaaŋanik. 56#Ex 20.10; Dt 5.14.Tavraniasii aiŋarut, aasii itqanaiyaqłutiŋ tivraġiksautinik uqsruġutiniglu atugaksramiŋnik Jesus timaanun. Savairraqsimmata iliŋich minġuiqsiŋarut kamagivlugich pitqurat.
Právě zvoleno:
Luke 23: INUPIAQ
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
Iñupiatun Mumiksat Uqalugiksuat (North Slope Iñupiaq Bible) © American Bible Society.
All rights reserved.
Bible text from the North Slope Iñupiaq Bible is not to be reproduced in copies or otherwise by any means except as permitted in writing by the copyright holder:
American Bible Society, 101 North Independence Mall East, Floor 8, Philadelphia, PA 19106-2155 (www.americanbible.org)