Luka 2
2
Amëntara a Hristollu
1Aceli xëli, Cezar August skôsi unë dekreti tas fëcja skërara a ômënjllu. 2Prota skërari ara faptë kënd Kuirini ara ma marrë tu Sirii. 3Tuc nëxja tas s'i skëra pit bilokërrë a llor. 4Shi Jozef, ci ara di Galilei, di kasabaja a Nazaret, nesi tu Judei, tu biloku a David, ci s'ja kjëma Betlehem, kë ara di kasa shi di fisja a David, 5tas s'i skirë dadun ku Maria, ku susita a lluj, ci ara grau. 6Kënd ara tu Betlehem i'j vini qërollu tas amintë, 7shi amëntë fiçorru a je. O-vërrti tu kullpënj, shi u bëgë tu grazhd, kë tu han nu avja bëlok goll, ti nësh.
Pikurarjë shi ëngjëjë
8Tu acell bilok ara ndoj pikurar ci tërcja nôptja pit aguri shi pështja kupia. 9Un ëngjëll a Domnëlu i'j s'i funusi allor shi s'ja vërrtirë ku llunjina a Dumëxë. Ej s'ja spërarë mullt, 10ma ëngjëllu llu xësi: “Nu v'ja spërac! Ja, us v'i dau unë sihariqi bunë, unë hërau mari ti tuc ômënjje: 11Azë, tu kasabaja a David amintë ti voj acell ci us v'i skapë, ci este Hristollu Domn. 12Nojma ti voj us hjibë aistë: us afllac un çilëman avërrtit tu kullpënj ci dôrmi tu grazhd.” 13Dadun ku ëngjëllu vinërë shi mullc allc ëngjëj dit Cerl, ci allëvda Dumëxëllu ashë: 14“Allëvdat s'hjibë Dumëxëllu nxjanë tu cerl, irini shi buniacë s'ajbë ômënjjë ci Ell j'ari tu inëmë.” 15Kënd s'dëpërtarë ëngjëjë di nësh, shi s'turrarë tu cerl, pikurarjë xësërë un-di-allant: “S'nëxem tu Betlehem, s'vëdem ci ari unxitë, ku aca ci n'ari spusë Domnëlu.” 16Ej di-unôrë nesërë shi ofllarë Maria ku Jozef, shi fiçorru a llor bëgat tu grazhd. 17Kënd u vëxurë, spusërë aca ci ll'u ara xësë ti çilëman. 18Tuc acej ci avxarë, arrëmasërë çudusic di aceli ci avxarë di pikurar. 19Maria l'i vëgja shi l'i mintjua tuti aisti tu inëma a je. 20Dapoja pikurarjë s'turrarë, shi allëvdarë Dumëxë ti tuti ci vëxurë shi avxarë, ashë kum ll'u ara spusë. 21Dupi optu xëli, kënd u fecërë synet, i'j bëgarë numa Jezus, numa ci avja xësë ëngjëllu ma ninti ci us gëdja tu pëndëku a mësa.
Jezus, çilëman tu tempull.
22Kënd tërkure xëlëli ti pëstrera a llor tu tempull, pi dupi nomlu a Moisiu, Jozef shi Maria o-dusërë Jezus tu Jerusalem, tas o-punë dininti a Domnëlu, 23ashë kum esti skërati tu skërëturëli a Domnëlu: “Kathi protu fiçor us i'j s'i parada a Domnëlu, 24shi us fakë kurbani doj turtuj iti doj pëllungj njic.” 25Tu acell qëro, bëna tu Jeruzalem un om ku numa Simeon. Aist om ara mullt ndrept dininti a Dumëxë. Sëmtul Duh ara ku nës. 26Sëmtul Duh j'avja zdëvëlitë, kë nu us mura n'i vëxut Hristollu a Domnëlu. 27Pims di Sëmtul Duh, ell vini tu tempull shi kënd përincjë o-dusërë Jezus njik, tas s'i fëcja aceli ci ara skërati tu nomlu a Moisiu, 28Simeon u llo Jezus mbracë, shi allëvdë Dumëxë ashë:
29“Tora o Dumëxë,
allasu ysmeqarru a tëll
tas fugë tu irini,
pi dupi zborru a Tëll,
30kë ku oqjë a njej
vëxuj skëpara a Ta,
31ci tini u fëcesh etëmë
tu oqjë ali tuti dunei,
32llunjinë tas skapë miletja
shi tinjii ti ômënjjë a tëj tu Izrael”.
33Tatësu shi mësa a Jezus ara mullt kënëqësic di tuti aceli ci s'i spunia ti nës. 34Dapoja Simeon i'j dedi ruçënjli sh'i'j xësi ali Marii, mësa a Jezus: “Ja, aist fiçor us'i fakë sëbepi t'i këderi shi t'i anëllcara a mullc ômënjllu tu Izrael, shi unë nojmë kondra, 35tas s'i zdëvëljastë mullti inëmi, ma acëa un këcut us t'u ncapë sufëlltu.” 36Ako tihjisi shi unë profeteshë, Ana, hjija a Fanuel di fisja a Asheru. Ija ara mujeri tërkutë. Avja bënatë shapti anj ku burbasu a je, 37shi ma nëpoj bënë ka vedu pën s'i feci optuxëc i patur di anj. Ija nu s'dëpërta di tempull, ma o-llëvda Dumëxë nôpti shi xuë, cënia presëni shi fëcja duvai. 38Pedhis ci tihjisi ako tu acell qëro, ahurhji shi ija tas allavdë Domnëlu, shi ll'u spunia ti çilëmanu acëllor ci ashtëptja skëpara a Jeruzalem.
S'turrarë tu Nazaret
39Kënd bitësirë llukërrë pi dupi nomlu a Domnulu, s'turrarë tu Galilei, tu kasabaja a llor, Nazaret. 40Fiçorru kërshtja sënëtos shi mintimen, shi aumbra a Domnëlu ara ku nës.
Jezus, çilëman tu tempull
41Përincjë a Jezus, nëxja kathi an tu Jerusalem ti Pashti. 42Kënd ell umpllu dojspërxaci di anj, nesërë napoj ako pi dupi zakoni. 43Dupi pashti ej nqësirë s'i tôrrë. Fiçorru Jezus arrëmasi tu Jerusalem, ma përincjë nu u llôrë di hëbari aistë gjëji. 44Allor ll'o-spëru kë fiçorru vinia ku socjë, shi imnarë tutë xua. Ma kënd ahurhjirë s'u kaftë pit kusërinj, 45nu o-fllarë, shi s'turrarë napoj tu Jerusalem tas u kaftë. 46Dupi tre xëli o-fllarë tu tempull. Stëtja mpadi ningi dhaskalënj, ci j'avxa sh i'j tërba. 47Tuc acej ci avxa s'çudusja ku zbôrrëli mintimeni ci xëcja. 48Kënd u vëxurë mësa i'j xësi: “Hjij, këce n'u fëcesh ashë? Mini shi tatëtu ma t'i këftam ku mari merak” 49Jezus ju turrë: “Këce ma m'i këftat? Nu u shtic voj kë lipseshti s'mi jau ku llukërrë a Përintëlu a njell?” 50Ma ej nu l'aduqirë zborrëli a lluj. 51Dapoja nqësi dadun ku nësh, s'turrë tu Nazaret sh i'j avxa. Mësa a lluj l'i vëgja tuti aisti tu inëmë. 52Shi Jezus kërshtja mintimen, bun, mushat, dininti a Dumëxë shi a ômënjllu.
Právě zvoleno:
Luka 2: ARUM
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
Gospel of Luke in Albanian Aromanian © Interconfessional Bible Society of Albania, 2013.
Evanghelu pi dupi Luka (Ungilli i Lukes arumanisht) © Shoqëria Biblike, 2013.