Yohanes Uram 6
6
Er Yesus biryi ilil tenen dinyi kikniboka ninyi lima ribu baryi nang asi roti kwaning karebmou uram
6:1-15
1Kunmai ani, Er Yesus ab Er miliramnyi nang ab anaboka co ngun-ngun dub aryi Galilea me kwan deici banmai ani, me kouboka otam katum dam mutuk asi binmai. Galilea me kwan ara yuk si sinung ara Tiberias me kwan enung asi binmai. 2Binmai ura, yuk nang ilinto ababyi Yesus bisi milibmai. Ara, Yesus biryi ilil tenen dinyi kikniboka youn taleramwe nang asi kweteramwe ba, asing eibmai deyok aryi sunci Yesus bisi milibmai. 3Ura, Yesus ab Er miliramnyi nang ab mutuk kon welebindoka tonkwa bukmai. 4A talak ara sun Yahudi yala nang kwaliramnyi kwalina si Paskah dam kubmou. Ara, “Nun abwe yabwe Mesir mutuk kuramnyi asi Er Imtamnyi biryi lebdeiboka taruk taleboka boyangaramwe,” tenen kanya teneiboka kwaliramnyi kwalina dam kubmou.
5Ura, Yesus biryi asing dinmou uca, ninyi ilinto aryi Er dam weleyanganmai asi asing eibmou. Ura, Erci Filipus bisi ato ebmou. “Ninyi ilinto weleyanganmang ara yina kikiman yibkwamang ati nunci una kubkwayeb do? Atei dam kum ton kum donung ati, nunci dantam bindoka roti dekwayeb do?” eboka asibdenmou. 6Erci ato eboka asibdenmou ara, “Filipus biryi Nisi dib tenebmanir do?” tenen ati asibdenmou. Er Yesus biryi, “Ilil tenen dinyi kikniboka roti yibkarebnyi uca, a nang nirya yina kikiman yibkwamang,” tenena ara Er sirya bikdanmou cok, Erci teneboka ato eboka asibdenmou.
7Asibdenmou uca, Filipus biryi ato ebmou. “A mitikanun kubmar keil uang bitinyok aryi yina dekoka a nang yubwa asi yibkarebtibyi ara kikiman kum kubkwamar. Nunci co bok ilinto bobtibiryi, roti ilinto dekoka a nang yubwa nirya asi roti mitik-mitik teleboka-teleboka karebtibyi ababyi, karebmatibyi bok, yibting ababyi kikiman kum yibting,” ebmou.
8-9Uca, Er Yesus miliramnyi nang kankan aryi yuknyi tentok si Andreas biryi ato ebmou. Ara, Simon Petrus er weit si Andreas biryi ato ebmou. “A tikmar mi ara roti tokol amubaryi ab mekinaia bitinyi ab kuboka bobmar. Bok, a mitikto roti tokol ab mitikto mekinaia ab bobmar dinyi akiryok, nunci una kuboka a bulubmang nang yubwa ilinto nirya asi kikiman yibkarebtibyi do?”
10Ebmou ba, Yesus biryi ato ebmou. “Sunci a buluboka wekmang nang asi, ‘Bukdarur,’ ebdarur,” ebmou. A kunmai ai ara sungsunga ilinto kuramwe ai asi a buluboka wekmai nang ara ninyi sal yoka dem akwe nungna lima ribu baryi nang kum buluboka wekmai. 11Sirya bukmai ura, Er Yesus biryi a roti tokol amubaryi dobtalebmou ura, Erci Er Imtamnyi bisi, “Ei Ni Nai,” eboka kibmou ura, Erci a roti toboka-toboka bokeibmou. Toboka bokeibmou uca, a roti ara mitikanun kubmou asi ilinto kibmou ba, a bulubmai nang nirya kikiman yibmai. Ba, mekinaia bitinyi ababyi neiktoto tub kwilikoka bokeibmou uca, ilinto kibmou ba, sun bulubmai nang nirya aryi kikiman yibmai.
12Ura, sun bulubmai nang nirya yinmai ani, sirya boubmou ura, Er Yesus biryi Er miliramnyi nang asi ato ebmou. “Kablobmang yina ara ton talyi bai donokingnyei ati bulubdarur,” ebmou. 13Sirya bulubdeibmai ura, kablobmai yina ara ilinto kubmou ati eibmai. Ati, sunci kablobmai yina asi bulubdeiboka win aling amolbaryi langdeiboka dongobmai. Ara, ninyi yana yubwa aryi roti tokol amubaryi atikwe kikiman yibmai ani, sun kablobmai yina langdeiboka kubmou.
14Ura, sun bulubmai nang aryi Er Yesus biryi ilil tenen dinyi kiknibmou asi asing eibmai ura, sunci ato ebdanmai. “Anyi bira Er Imtamnyi kunubkwande dinyi ebdeibmaca bobana deyoknyi kurur tenebmab. Musa biryi minob ebdeibmou to, Anyi bira ninyi kankan sirya yanmar ati nun dib tenebmab,” ebdanmai. 15Ura, sun bulubmai nang aryi, “Yesus bisi talebdongo bobindoka weik sienyi kibdeibkwayeb,” tenebmai. Bok, Yesus biryi sun tenen dinyi bikmou ura, Erci anaboka Er yuk bindoka mutuk kon dub ai welebindobmou.
Er Yesus biryi me kwan deici yibanmou uram
6:16-24
16Sirya kunuk dakmou ura, Er Yesus miliramnyi nang mutuk kon aryi kuboka yurbindoka me kwan me katum dam tamurbinmai. 17Me kwan me katum dam binmai ura, sunci co ngun-ngun dub wekmai ura, me kwan me deici banmai. Ara, “Me kwan koubokabibiryi, Kapernaum atei dam binkwayeb,” tenen banmai. Ura, sirya kunuk dakmou bok, Er Yesus bira sun dam kum yanmou bok, sun yuk banmai. 18Sun yuk banmai bok, ibalya mikib kuboka donmou uca, me kwatiboka lontik-lontik ebmou. 19Ura, sunci me kwan noutam banmai ba, Yesus sun dam yanmou. Ara, me kwan me deici aryi yibanmou cok, sunda co ngun-ngun kubmai nang dam yanmou. Yanmou ba, sun miliramnyi nang ara, “A yanganmaranyi bira Yesus kubmar,” tenen kum bikmai ati, sun kanya ara ilil weik kubmou. 20Sun kanya ara ilil weik kubmou bok, Yesus biryi sunsi ato ebmou. “Ilil kubsicei. Nira sun Du a kunum yanganman,” ebmou. 21Ato ebmou ba, sunci, “Co ngun-ngun dub ur wengyarum,” ebmai. Ura, co ngun-ngun umbura wengbinmou. Ura, barabyi ani, sunci, “Binkwamab,” tenebmaici banmai atei katum dam sirya dararbinmai.
22Ura, mabmai ani, berekmou ura, sun roti yibkarebmai nang ara me kwan katum dam otam tuba kunmai. Ati, sunci dinmai uca, yuk co ngun-ngun ara ton kum eibmai, erda Yesus miliramnyi nang wekoka anabdobmai co ngun-ngun kubmoua ab, Er Yesus sun ab tonkwa kum binmai ab aryi sunci ato tenebmai, “Yesus bira atam tuba kunmar,” tenebmai. 23Bok, Tiberias atei aryi kuboka yuk nang ababyi co ngun-ngun mikbaryi deici aryi yanmai. A nang ara, “Nunbabyi ilil tenen dinyi asing eibtibyi,” tenen Yesus biryi ilil tenen dinyi kiknibmou ai yanmai. Ara, Er Yesus biryi Er Imtamnyi bisi, “Ei Ni Nai,” ebmouci, sun bulubmai nang asi roti yibkarebmou ai yanmai. 24Ura, sun bulubmai nang aryi dinmai uca, Er Yesus bisi kum eibmai ura, sunci, “Yesus bibabyi Er miliramnyi nang ababyi anaboka bindobmang,” tenebmai ura, sunci a yanmai co ngun-ngun wekoka me kwan deici kuboka Kapernaum atei binmai. Ara, “Yesus ab ebdatibyi,” tenen ingkirikmaici, Kapernaum atei binmai.
Er Yesus biryi Erdamnyi biti, “Nira ninyi kam kurdeirin roti kunun,” eboka eterebdanmou uram
6:25-59
25Ura, Yesus bira Kapernaum atei dam kuboka me kwan katum dam kubmou ba, sun bulubmai nang aryi yandoka Ersi eibmai. Eibmai ura, sunci Ersi ato eboka asibdenmai. “Ninyi eterenanyi, Kan dan talak aryi atam yanmarim do?” eboka asibdenmai.
26Ato eboka asibdenmai bok, Yesus biryi sunsi ato ebmou. “Niryi sunsi dib en uram lak ebkwinsin ati, sunci diboka kekendarur. Sunci Nisi ingkiringmanurum ara Niryi ilil tenen dinyi deici aryi dib en uram lak kibdeibmase ati Nisi kum ingkiringmanurum. Eda, Niryi sunsi roti karebmasise uca, sun mundu boubmasou deyok aryi, sunci Nisi ingkiringmanurum. 27Ati, sunci, ‘Tukwetam roti yibkwayeb,’ tenen busul kuboka wa ibmunyei. A roti ara lubkwamariryok, tiya atikwe kurur. Eda, ‘Iya kam kurdeirin roti yibkwayeb,’ tenen busul kuboka wa ibdarur. Ni Ninyi Dasinyi biryi sunbabyi ato roti karebkwansin. Ni Nai Imtamnyi biryi Niti, ‘Dib en uram diboka etererandimnyi,’ eboka kisal dakmanou ati sunci Nisi dib tenebnindarur,” ebmou. 28Ebmou ba, sunci Ersi ato eboka asibdenmai. “Ato ebmarim ura, nunci una kubtibyi uca, Er Imtamnyi biryi arungdeirisurur wa asi kunubtibyi do?” eboka asibdenmai. 29Ato eboka asibdenmai ba, Yesus biryi sunsi ato ebmou. “Er Imtamnyi tenerur wa asi ibkwamunyi ara ato kuboka ibkwandarur. Ni Er Imtamnyi biryi bokwetebnounyi bisi sunci dib tenebnindarur. Nisi dib tenebnindate ara Er Imtamnyi biryi arungdeirisurur wa kunubdate,” ebmou.
30Uca, sunci Ersi ato ebmai, “Kanci nun urasintam asi una kubdetum eibtibiryi Kansi dib tenebkitibyi do? Kanci ilil tenen dinyi kiknibsiminyi uca, nunci Kansi dib tenebkitibyi. 31Nun abwe yabwe minob kuramnyi nang ara ninyi kun kum mutuk kuramnyi ura, imtam aryi kuboka roti si Manna yiramnyi. Ara, Er Imtamnyi Uram umbura aryi a deyok ati ato eteresurur,
‘Erci sunsi imtam roti kareramwe ba, yiramnyi,’ eboka eteresurur,” ebmai. (Mazmur 78:24)
32Ato ebmai ura, Yesus biryi sunsi ato ebmou, “Niryi sunsi dib en uram ton ebkwinsin ati diboka kekendarur. Sun abwe yabwe asi a roti kareramunyi bira Musa biryi kum kareramwe. Eda, Ni Nai Imtamnyi biryi sunsi a roti kareramwe ani, ukuryok ababyi imtam aryi kuboka roti dib dinyi karesurur. 33Imtam aryi kuboka roti ara Nira Er Imtamnyi biryi Bokwetebnounyi kunun ati ebman. Nira imtam aryi kuboka roti kunun cok, sun im dangna tukwe dangna nang asi kam kurdeirin dinyi karenun.” 34Ato ebmou ba, sunci Ersi ato eboka molobmai. “Nai, ukuryok aryi kuboka Kanci nunsi a roti iya karebsurum,” eboka molobmai.
35Ebmai ba, Yesus biryi ato lak ebmou. “Nira ninyi kam kurdeirin roti kunun. Ati, sun Ni dam yandobingnyi nang ara kwaning tuba kum atabkwande. Ba, unanyi-unaner aryi Nisi dib tenebningnyi nang ara me tuba kum atabkwande. 36Ba, sunci Nisi asing eibmanurum cok, Nisi dib kum teneranurum. Ara, sirya ebmasin to, tubto ebmasin. 37Ati, Ni Nai Imtamnyi biryi Ni taruk dam karebmanou nang nirya ara Ni dam yankwaming. Ati, sun Ni dam yandobkwaming nang ara Niryi kum yakdonokwan. 38Nira imtam aryi kuboka yuryanganmase ara, ‘Ni yuk aryi tenebmanyi tok kunubde binkwan,’ tenen kum yuryanganmase. Eda, ‘Ni bokwetebnounyi biryi teleb tenebmaci tok akwe kunubde binkwan,’ tenen yuryanganmase. A deyok aryi, Niryi Ni dam yankwaming nang asi kum bai donokwan ati ebman. 39Ura, Ni bokwetebnounyi biryi teleb tenerur to ara ato. Erci Nisi karebmanou nang ati, ‘Ninyi tentok ababyi waningminingna kum uca kalikdum,’ ebdeibmanou. Ani, sirya kobdob uki tum berekci ura, Niryi a nang nirya asi kam bukeibkwan. Er Imtamnyi biryi a nang ati teleb tenerur to ara ato ebmasin. 40Ni Nai Imtamnyi teleb tenerur to ara ato. Unanyi-unaner aryi Ni Er Imtamnyi Mi asing diboka eibningiryi dib tenebningnyi uca, iya kam kun dinyi dobdobkwaming. Ara, sirya kobdob uki tum berekci ura, Niryi a nang nirya asi kam bukeibkwan,” ebmou.
41Yesus biryi ato ebmou ura, sun Yahudi yala nang aryi, “A uram kekena ati nun li,” ebdanmai. Ara, Erci, “Nira imtam roti asi yuryanmasiryi kunun,” ebdanmou deyok aryi, sunci, “A uram kekena nun li,” ebdanmai. 42Ebdanmai cok, sunci ato ebdanmai. “Anyi bira Yusuf er mi Yesus kururcok, una deyok aryi Erci, ‘Nira imtam roti asi yuryanmasiryi kunun,’ ebdanmar do? Anyi Er nai ab Er kwin ab ara tukwetam nang bitinyi akwe kururung ara nun bingnub ati a uram dib kum tenebmab,” ebdanmai. 43Ebdanmai bok, Yesus biryi sunsi ato ebmou. “Sunci sun mamun aryi, ‘A uram kekena ati nun li,’ erdanmarum ara takdarur. 44Ninyi tentok ababyi er yuk aryi Ni dam kum yanute. Ara, Ni Nai Imtamnyi biryi taruk taleboka kum boyate ura, ninyi tentok ababyi Ni dam kum yanute. Ba, Er Imtamnyi biryi taruk taleboka Ni dam bobinmaci nang asi Niryi kam bukeibkwan. Ara, sirya kobdob uki tum berekmaci ura, Niryi sunsi kam bukeibkwan. 45Er Imtamnyi kunubkwande dinyi ebdeibmaci to lak etereramnyi nang ara a deyok ati ato eboka minob eramnyi.
‘Ninyi nirya asi Er Imtamnyi biryi eterebkwande ba, dib en uram bingdon nang kubkwaming.’ (Yesaya 54:13)
Ati, sun Er Imtamnyi Uram kekeramingnyi nang ara Ni dam yankwaning. 46Nirya ato ebman ara ninyi tentok ababyi ara Ni Nai Imtamnyi bisi asing ton kum eirinung. Eda, Ni tentok asi Er Imtamnyi biryi bokwetebnounyi bisi Er Imtamnyi bisi asing eiriranse. 47Niryi sunsi dib en uram ton ebkwinsin ati diboka kekendarur. Unanyi-unaner aryi Nisi dib tenebningnyi nang ara iya kam kun dinyi sirya doronung. 48Nira ninyi kam kurdeirin roti kunun. 49Sun abwe yabwe ara ninyi kun kum mutuk kuramiryi, roti si Manna yiramnyi nang ara roti si Manna yiramiryok, sirya diamnyi. 50Bok, Nira imtam aryi kuboka yuryase roti a kunum. Ati, sun Nisi yiraningnyi nang ara iya kum dibkwaming. 51Nira imtam aryi kuboka yuryase roti a kunum. Sun a roti asi yiraningnyi nang ara iya kam kubkwaming. A ebmasin roti ara Ni nong a kunum. Ati, Niryi sun im dangna tukwe dangna nang asi kam kun dinyi karebkwan ati Niryi Ni damnyi karebdankwan,” ebmou.
52Yesus biryi ato ebmou ba, sun Yahudi yala nang aryi sun mamun lulubdanmaici, ato eboka asibdanmai. “Anyi Er nong yibkwamatibyi ati ara una kuboka karebsute ba, yibkwamatibyi do?” 53Ato ebdanmai bok, Yesus biryi sunsi ato ebmou. “Niryi sunsi dib en uram ton ebkwinsin ati diboka kekendarur. Sunci Ni Ninyi Dasinyi tub ab ining ab kum yibmunyi ura, sunci kam kun dinyi kum dobdobkwandum. 54-55Ni tub ara yin dinyi diboka kurur. Tonda, Ni ining ababyi yin dinyi diboka kurur. A deyok aryi unanyi-unaner aryi Ni tub ab Ni ining ab yiramingnyi nang ara iya kam kun dinyi sirya dobdobmangiryi. Tonda, sirya kobdob uki tum berekci ura, Niryi a nang asi kam bukeibkwan. 56Unanyi-unaner aryi Ni tub ab Ni ining ab yiramingnyi nang ara Ni dam kun nang diboka kunung ba, Nibabyi diboka a nang dam kunanyi kunun. 57Ni Nai Imtamnyi biryi Nisi bokwetebnouci, Nisi kam kurdeirin dinyi karenurur to, Nibabyi kam kurdeirin deyoknyi kunun. Ara, sun Ni tub ab ining ab yibmaningnyi nang asi neiktoto kam kurdeirin dinyi karebkwan. 58Nira imtam roti asi yuryanmasiryi kunun. Ati, sun abwe yabwe ara ninyi kun kum mutuk kuramiryi, roti si Manna yiramnyi nang ara diamnyi. Bok, sun Ni imtam roti kunun asi yiramingnyi nang ara kum dibkwaming. Eda, iya kam kun dinyi dobdobkwaming,” ebmou. 59Er Yesus biryi ato eboka eterebmou ara Kapernaum atei Musa Uram eteren ai aryi eterenmouci, sun buluboka akai wekmai nang asi eterebmou.
Er Yesus bisi ninyi ilinto miliramiryok, taklobmai uram
6:60-71
60Ura, Er Yesus biryi ato eboka eterebmou ati, ninyi ilinto aryi ato ebdanmai. “A eterenmasir uram ara ikin weik kubmasir. Ati, unanyi-unaner aryi ato en uram dobdobkwamote do?” ebdanmai. 61Ura, Er Yesus bisi milibmai nang aryi ato ebdanmai ati Yesus biryi bikmou ati, Erci sunsi ato ebmou. “Niryi ato eterebmasin ati, sun yu kanya bobmarum do? 62Ni Ninyi Dasinyi kunun cok, Ni minob kuranse ai tubto welebinkwan ati ebmasin. Ati, Ni welebinkwan asi asing eibnindate ura, sunci tabakoka yu kanya boboka Nisi dib kum tenebkwanindate. 63Er Imtamnyi Kanya Roh Kudus aryi ninyi kam kurdeirin dinyi karesurur ati ebman. Bok, ninyi kanya aryi kam kurdeirin dinyi kum karerur ati ebman. Ati, Niryi sunsi eterebmasin uram ara Roh Kudus aryi eteren uram asi eteresunun. Tonda, ninyi kanya kam kurdeirin uram kurur. 64Bok, sun kankan aryi ton nang ara Nisi dib kum teneranurum,” ebmou. Ato ebmou ara, Yesus biryi Er miliramnyi nang asi yuma kobdob aryi bingnamwe. “A nang ara Nisi dib tenebkwaning ba, o nang ara Nisi dib kum tenebkwaning,” tenena ara Er bingnamwe. Tonda, “Nisi kikibkwaniranyi bira onyi biryi kikibkwanir,” tenena ara Er bingnamwe. 65Ura, Yesus biryi eterebmurubmouci, Erci sunsi ato ebmou. “Sunci Nisi dib kum teneranurum deyok aryi, Niryi sunsi ato eboka eterebmasise. ‘Ninyi tentok ababyi Ni dam kum yanute. Ara, Er Imtamnyi biryi mikib kum karebte uca, ninyi tentok ababyi Ni dam kum yanute,’” ebmou. 66Yesus biryi ato eboka eterebmou ba, ninyi ilinto ara Ersi miliramiryok, takloboka binsekdobmaici, Er Yesus bisi tuba kum miliramnyi. 67Ura, Yesus biryi Er miliramnyi nang amolbaryi asi ato eboka asibdenmou. “Ninyi ilinto ara Nisi taklobmaning ati sunbabyi Nisi taklobkwanurum do?” eboka asibdenmou. 68Ato eboka asibdenmou uca, Simon Petrus biryi Ersi ato ebmou. “Nai Du o, nunci Kansi taklobkitibyi ura, nun unanyi bisi bitibyi do? Kanci etereransirim uram nirya ara iya kam kun dinyi akwe etereransirim ati ebman. 69Ati, Kanda Er Imtamnyi biryi wibdeiboka bokwetebkounyi kurum ara nunci bikoka dib tenekunub,” ebmou. 70Ebmou ba, Er Yesus biryi ato ebmou. “Niryi sunda amolbaryi nang asi wibdeibmasise. Wibdeibmasise bok, sun kankan aryi kuboka tentoknyi bira isa sienyi milinanyi kurur ati ebman,” ebmou. 71Er Yesus biryi ato ebmou ara, Yudas bira Simon Iskariot er mi ati ato ebmou. Anyi bira Yesus miliramnyi nang kankan kuramuryok, Er Yesus bisi aminda aryi kikibkwamunyi kuramwe.
Právě zvoleno:
Yohanes Uram 6: MTG
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
@LAI 2007 (New Testament), @LAI2022 (Old and New Testament)