Jean 6
6
1Go né té nèn, Jésus ao toura tokou man Galilée té, ke ria to Tibériade.
2Dooudjé baya baya ao gè té, mbata dèdè do né mori ke Jésus da ke ndjè rò toodjé.
3Jésus al do err té, nè nisi nou ke ndjè kao gè tédjé.
4Ndò ke bo ndò Pâque lo Juifjdé dé ngosiba.
5Tokou ban, tokou Jésus oun kèmè ke tarr, nè no dooudjé baya baya ao dé rè té, nè mpa nare Philippe, Djèdjè djase ndoko mourou da wa, baa ta kare dooudjé nèn ön wa?
6Nè mpa tar nèn ta nèè, mbata nè ndja ngeré né ke nè na da.
7Philippe tél tar arè, Mourou ke ndoko ke denier kòr djo asedè ang, baa ta kare dèdè kada kada dön ngadji ngadji.
8Ndjè kao gè té kada, ria na André, ngokö Simon Pierre, pa arè,
9Ngon ngadji isi nèn ke mourou orge mi ke kaindjidjé djo, yèn to di baa dooudjé baya baya bé wa?
10Jésus pana, Aridjé dooudjé toï isi nange. Mou baya baya to loou té ke nou, tokou ban dooudjé toï isi nange, dèdè dase dourou mi.
11Tokou ban Jésus taa mourou, gè té ke nè nda woio Allah, nè nkai mourou dèdè ke disi nange, tokou ban nè naredè kaindjidjé to, dooudjé toï ön tokou mèdè ndiki.
12Gè té ke dèdè dön mèdè ndan, nè mpa nare ndjè kao gè tédjé, Mbòidjé kese mourou ke nai, mbata kare né kada nai ang.
13Tokou ban dèdè mbòn kesè nèn, dousou karè dòkou gérè djo ke kese mourou mi lo kandé orge, ke nai goukoudang ke dèdè dön mbä.
14Tokou ban, tokou dooudjé nèn wo né mori ke nè nda, dèdè mpana, Tokoro nè nto prophète nèn ke ata dé nange nèn.
15Tokou ban, tokou Jésus geré dèdè ndiki ta dé ta korè ke singa ta kisi to mbaibé, nè nïyadè nao do err té, nè ndja ke kadè.
16Tokou kade woei mbä, ndjè kao gè tédjé ao kare tòkou man té.
17Dèdè dao mè to té, ta kao toura tokou man té ke Capernaüm. Loou ndoul mbä, a Jésus nai dé ròdè té ang.
18Man ï nya mbata lél oula nya.
19Tokou ban, goukoudang ndjè kao gè tédjé òrou haï ase kourou deo mi aséh misä, dèdè do Jésus ndja do man té. Nè ndé ngosiba ke to, bel dadè.
20A Jésus pa aredè, To to ma ndja, ïyaidjé bel.
21Tokou ban dèdè ndiki ta kounè mè to té. Loshénè loshénè to téh kare kongo té, loou ke dèdè dao kendé.
22Ke sindò, dooudjé baya baya ke nai toura tokou man té, dèdè do mare to nou ang, sè to kadaba. Dèdè ngeré Jésus ao mè to té ke ndjè kao gè tédjé ang, a to ndjè kao gè tédjé ke ndai ke kadedè ba.
23A mare to ke ï Tibériade dé ngosiba ke loou ke dèdè dön mourou kendé nou, gè té ke Mbaibé Seigneur da woio mbä.
24Tokou ban, tokou dooudjé ke baya baya nèn wo Jésus ke ndjè kao gè tédjé déh nou ang, dèdè ndja dao mè to té, dèdè ntéh Capernaüm té, dèdè dao nsange Jésus.
25Tokou dèdè dingè toura tokou man té, dèdè mpa darè, Ndjè tòdjou tar, i téh nèn kade té ke da wa?
26Jésus tél pa aredè, pana, Tokoro, tokoro, ma mpa maresè, sésè esangemdjé ang mbata sésè woidjé né mori, a sésè esangemdjé mbata sésè öndjé mourou mèsè ndan.
27Edaidjé koula mbata mourou ke a toudjou ang, a edaidjé koula mbata mourou ke a to mbata tébe ke ke ndò ke ndò, mourou ke Ngon lo doou a karesè, mbata Bòi Allah ndja to nè ke né to la.
28Tokou ban dèdè mpa darè, To tar lodjè ta da di ta da koula lo Allah wa?
29Jésus tél pa aredè, Koula lo Allah éh nèn, ta ko mèsè té ke nè ke Allah oulè.
30Tokou ban dèdè mpa dare, Tokou ban i a da né mori di wa, baa ta kare djèdjè djase ta ko, ke ta kare djèdjè djo mèdjè té sei? I da koula di wa?
31Kadjèdjè ön mourou mè kòr té leo, tokou maketourou lo Allah pa,
Nè naredè mourou ke ï dara dé ta kon.
32Tokou ban Jésus pa aredè, Tokoro, tokoro, ma mpa maresè, to Moïse ke aresè mourou ke ï dara dé ang, Bòi aresè mourou ke tokoro ke ï dara dé.
33Mbata mourou lo Allah to yéh ke ï dara dé nange, ke nè nare tébe dooudjé ke nange nèn.
34Tokou ban dèdè mpa darè, Mbaibé Seigneur, aredjè mourou nèn ke ndò toï.
35Jésus pa aredè, Mam nto mourou tébe, doou ke dé rom té boo a dè ngadji ang, ke doou ke wo mèa té sem, kounda man a koè ndò kada ang.
36Ma mpa maresè, sésè womdjé mba, a sésè woidjé mèsè té ang.
37Dooudjé toï ke Bòi Allah arem, dèdè da dé rom té. Doou ke dé rom té, ma ma kilè daka ngadji ang.
38Mbata ma mï dara mam ndé ta da né ke mam ndiki ang, a ta da né tokou nè ke noulam ndiki.
39Yèn to né tokou nè ke noulam ndiki, nè ndiki mare né kada nai ang ke né toï ke nè narem mba, ke ma ma karè nï tarr ndò té ke goukou.
40Mbata yèn to né ke Bòi ndiki, dooudjé kada kada toï ke wo Ngonè, ke wo mèdè té sa, nè ndikidè ta kinga tébe ke ke ndò ke ndò, ke ma ma karedè dï tarr ndò té ke goukou.
41Tokou ban Juifdjé nanè sa, mbata nè mpana nè nto mourou ke ï dara dé nange.
42Dèdè mpana, Yèn to Jésus, ngon lo Joseph, ke djèdjè ngeré bèdjè ke këndjè ang wa? Deo di wa nase pana. Ma mï dara mam ndé nange mbä?
43Jésus tél pa aredè, Nanèdjé horosè té ang.
44Doou kada ase ta dé rom té ang, tokou Bòi Allah ke oulam barè ang, a ma ma karè nï tarr ndò té ke goukou.
45Maketourou lo prophètedjé pana,
Allah a tòdjou tar karedè toï.
Dooudjé kada kada toï ke wo, ke wo gel tar lo Bòi Allah mba, ndé rom té.
46Doou kada nai wo Bòi Allah ang bai, nè kada ke nï rò Allah té, nè no Bòi Allah mbä.
47Tokoro, tokoro, ma mpa maresè, doou ke wo mèa té isi ke tébe ke ke ndò ke ndò.
48Mam nto mourou tébe.
49Kasésè ke ön mourou mè kòr té leo, dèdè doei mbä.
50Yèn to mourou ke ï dara dé, baa ta kare doou ke ön a kwoei ang.
51Mam nto mourou tébe, ke ï dara dé mba. Tokou doou ön mourou nèn, nè na kisi tébe ke ndò ke ndò, ke mourou ke ma ma kare mbata tébe ke nange nèn to rom ndja.
52Tokou ban Juifdjé maitar horodè té, pana, Doou nèn ase ta karedjè rè djon to di wa?
53Tokou ban Jésus pa aredè, Tokoro, tokoro, ma mpa maresè, tokou sésè öndjé rò Ngon lo doou ang, ke sésè aihdjé mese la ang, sésè isidjé ke tébe mèsè té ang.
54Nè ke nön rom ke naih mesem, nè nisi ke tébe ke ke ndò ke ndò, a ma ma karè nï tarr ndò té ke goukou.
55Mbata rom to mourou ke tokoro, ke mesem to nè kaih ke tokoro.
56Nè ke nön rom ke naih mesem, nè nisi mem té, ke ma misi mèa té.
57Tokou Bòi ke ndjè tébe oulam, ke ma misi ke tébe mbata tar lo Bòi Allah, tokou ban doou ke öm, nè na kisi ke tébe to mbata tar lom.
58Yèn to mourou ke ï dara dé, to tokou mourou nèn ke kasésè ön leo ang, ke dèdè doei mbä. Nè ke nön mourou nèn, nè na kisi tébe ke ndò ke ndò.
59Jésus pa né nèn toï mè kei Allah té, tokou nè ntòdjou tar Capernaüm té.
60Tokou ban, tokou ndjè kao gè tédjé baya wo tar nèn, dèdè mpana, Yèn to tar ke ngeng, doou di ase ta ko tar nèn wa?
61Mbata Jésus geré mèa té ndja ke ndjè kao gè tédjé nanè mbata tar nèn, nè mpa naredè, Mèsè toosè mbata tar nèn wa?
62Tokou ban, tokou sésè woidjé Ngon lo doou ao dara loou té ke nè nisi kendé dongor, sésè edaidjé di wa?
63To ndii ndja ke are tébe, rò da né kada ang, tar nèn ke ma mpa maresè to ndii ke to tébe.
64Mare dooudjé éh horosè té ke wo mèdè té ang. Mbata Jésus geré dongor kèté dooudjé ke wo mèdè té ang, ke doou nèn ke ata ndokè.
65Nè mpana, Mbata yèn ma mpa maresè leo, doou kada ase ta dé rom té ang, tokou Bòi Allah arè mèa té ta dé ang.
66Mbata tar nèn, ndjè kao gè tédjé baya tél, dèdè ndja sa mare ang.
67Tokou ban Jésus pa aredè dòkou gérè djo, Sésè ndikidjé ta kao tö wa?
68Simon Pierre tél tar arè. Mbaibé Seigneur, djèdjè dja kao rò na té wa? I isi ke tar tébe ke ke ndò ke ndò.
69Djèdjè djo mèdjè té mbä, djèdjè ngeré i to nè kada ke madji toï lo Allah.
70Jésus tél tar aredè, Ma mmarsè dökou gérè djo, ke kada horosè té to to Satan ang wa?
71Nè mpa tar nèn ke ri Judas, ngon lo Simon Iscariot, mbata to nè ke na ndoko Jésus, nè nto kada lo dèdè dökou gérè djo.
Právě zvoleno:
Jean 6: KL1960
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
© 1960, 2018.
To learn more or sign up for email updates about the mission of BFBS, click here: