Matthieu 11
11
1Tokou Jésus eo ta tòdjou tar ndjè kao gè tédjé dòkou gérè djo mbä, nè nïya loou ke nou, nao ta tòdjou ke ta pa tar mè béh té lodè.
2Tokou Jean ke isi kei koula té wo tar koula lo Christ, nè noula tar deo ndjè kao gè tédjé.
3Nè mpa nare Jésus, I to nè ke nata dé wa, aséh djase ngebe mare doou ke dang wa?
4Jésus tél pa aredè, pana, Abidjé, epaidjé are Jean né ke sésè woidjé ke mbisè ke kemsè.
5Ndjè kem tòdjé wo loou, ndjè metedjé ndja, ro ndjè bandjidjé dé madji, ndjè ke mbidè outou wo tar, dèdè ke doei mba dï tarr, ke ntòdjou tar ke madji dangetédjé.
6Madji éh ke nè ke mèa tooè sem ang.
7Tokou dèdè dao mba, Jésus ounkotè ta pa tar lo Jean kare dooudjé ke baya baya ke mbona, pana, Sésè abidjé mè kòr té ta ko di wa? Kòbou ke lél yèè wa?
8Sésè abidjé ta ko di wa? Doou ke oula koubou ke madji wa? Woidjé, dèdè ke doula koubou ke madji disi kei mbaibédjé té.
9Sésè abidjé mbata di wa? Ta ko mare prophète kada wa? Aa, ma mpa maresè, nè mbo nouta prophète.
10Yèn to nè ke maketourou pa tar la leo,
Wo, ma moula ndjè koula lom dongor mari,
Nè na da deo loi dongor kari.
11Tokoro ma mpa maresè, horodè té ke dènèdjé oudjoudè mare kada ke tokou wota Jean ndjè da baptême goto, a nè ke nto nè ke ngadji ngadji mè béh ko té ke dara, nè nouta Jean.
12Ounkotè ke ndò lo Jean ndjè da baptême sar bokonè, béh ko ke dara ao dé ke singa mongou, ke dooudjé ke ndjè singa mongou tèè ke singa.
13Mbata prophètedjé toï ke tar ndedji mpa tar ke daka sar ndò té lo Jean.
14Tokou bo sésè ndikidjé ta ko tar nèn, nè nto Élie ke ata dé.
15Nè ke néh ke mbi ke ka ko, ase kare nè no.
16Deo di a ma ma tòdjou tar lo gel dooudjé nèn wa? Dèdè nto tokou ngandjé ke isi nata té ke mpa kare ndjè ke ndam kedè, mpana,
17Djèdjè nkòl mboula djaresè, a sésè laaidjé ang,
Djèdjè nnò, a sésè enòidjé ke man kemsè ang.
18Mbata Jean dé, nè nön mourou ang, ke nè naih ang, a dèdè mpana, Ndil ke madjang to mèa té.
19Ngon lo doou dé, nè nön mourou ke nè naih, a dèdè mpana, Woidjé, ndjè kon mourou nya, ke ndjè kaih nya, ke to ndjè bokora lo ndjè taa narè lʼimpôtdjé ke ndjè né da ke madjangdjé. A ngandjé ke ndjè kemkarè òsou gadjè gaté gaté.
20Tokou ban nè nounkotè ta ndange béh toï ke nè nda mare tokou koula la baya kendé, mbata dèdè mbeté kedji né da ke madjang lodè ang.
21Ongou a dai, Chorazin. Ongou a dai, Bethsaïda, mbata tokou dèdè nda tokou koula ke Tyr ke Sidon leo ke nda horosè té, dèdè da mbeté kedji né da ke madjang lodè leo, da koula koubou ke madjang ke bou pourou.
22A ma mpa maresè, ndò gange saria té, saria losè a to wota saria ke Tyr ke Sidon.
23Ke i, Capernaüm, da piti sar ke dara wa? Da kao sei djabao. Mbata tokou dèdè nda tokou koula ke Sodome leo ke nda sei, bana a kéh nderèng ndò té ke nèn.
24A ma mpa maresè, ndò gange saria té, saria loi a to wota saria nange té ke Sodome.
25Ndò té ke nou Jésus pa ke tarr, Mam ndai woio Bòi, Mbaibé ke dara ke nange nèn, mbata i iyaa tar nèn ke ndjè kemkarè ke ndjè geré gel tar, ke i tòdjoudè ngandjé ke ngadji.
26Aä Bòi, mbata tokou ban to madji kemi té.
27Bòi arem né toï djim té mba, ke doou kada geré Ngon ang, sè Bèdjè ndja kadaba. Doou kada geré Bòi Allah ang sè Ngonè ndja, ke doou ke Ngon ndiki ta tòdjè karè.
28Edéidjé rom té, sésè toï ke edaidjé koula, ke otoidjé né koto ke oi, ma ma karesè ta kwaa ròsè.
29Ounidjé kake bange lom dòsè té, woidjé tar ke mam ntòdjousè, mbata mam nto doou ke mem to dèkèkè, ke mem tokou ang, ke sésè a kingaidjé deo kwaa oumasè.
30Mbata kake bange né lom òlè, ke né koto lom oi ang.
Právě zvoleno:
Matthieu 11: KL1960
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
© 1960, 2018.
To learn more or sign up for email updates about the mission of BFBS, click here: