LOS HECHOS 5
5
Ektémakxa axta mey'asáxma Ananías tén han Safira
1Apheyk axta anhan xama énxet apwesey axta Ananías, aptáwa ekwesey Safira axta anhan apxegexma apyenyawa xama yókxexma apagkok. 2Cháxa énxet ekhawo axta mók elchetamso apwáxok ma'a aptáwa, apmákxeyk axta nekha selyakye, keñe axta anhan nekha selyakye apmésa énxet'ák seykha amya'a yakwayam etakmelcheshok apmeykha. 3Aptahak axta Pedro s'e:
—Ananías, ¿yaksak ektaha ektaxna nak apwáxok xép Satanás temésesek apmopwána amya'a exchep, apkelyexancháseyha m'a Espíritu Santo, apmákxeyk xép nekha selyakye kélyanmagkaseso axta apyamasma xóp apagkok? 4¿Háwe enxoho axta eykel'a apagkok xép ma'a xóp nak? Háweya axta apagkok xép ma'a selyakye nak? hakte xép axta apyamasma. ¿Yaksak ektaha ekxéna axta apwáxok etnehek xa? Melyexancháseyha exchep xama énxet enxoho, wánxa apkelyexanchásencha'a m'a Dios.
5Xama axta apleg'a Ananías xa, apkelpalenteyk axta náxop apketsapa, apkelakak axta apyókxoho énxet'ák ektaha axta apkellege amya'a. 6Keñe axta apkelxegakmo nápakha wokma'ák appextetwa'a apáwa Ananías aphápak. Apsákxeyk axta yakwayam yatawónek.
7Antanxo horas axta entahak ekyeykhe, keñe axta ektaxnegwokmo nahan Ananías aptáwa neyseksa megkay'áseyak ektahakxa atáwa. 8Aptahak axta Pedro apkelmaxneyeyncha'a s'e:
—Heltennés hana ko'o ¿Kélyenyókeya axta kéxegke xóp kélagkok ma'a ekwánxa axta ekyanmaga kélxénakxa kólyenyók?
Entahak axta eyátegmowágko kelán'a s'e:
—Ehay, cham'a ekwánxa axta ekyanmaga nenxénakxa agyenyók.
9Aptahak axta Pedro apcháneya s'e:
—¿Yaksak ektaha ekhawo nak mók kélwáxok yakwayam kólyekkónek Espíritu Santo apkeñama nak Wese' egegkok? Cháxa apkelchexyekmo wokma'ák apchátawanya exchek atáwa aphápak xa, xé' sat kaxwo' esakxak ápak.
10Axta yaknenhok nahan Safira étsapa m'a apkenmágkaxa axta Pedro. Xama axta apkelántaxnegwakto wokma'ák, apwetágwakteyk axta étsapa xa kelán'a nak, apsákxeyk axta anhan ápak yakwayam enxoho yatawónek nekha atáwa takhaxpop apagkok. 11Apkelakak axta apyókxoho énxet'ák ektaha axta apkeleñama kélakneykekxexa tén han ma'a apyókxoho énxet'ák ektaha axta apkellege amya'a ektahakxa.
Ekxámokma aksok sempelakkaso agweta' tén han ma'a magkenatcheso nak agweta'.
12Seykha amya'a axta apkeláneyak ekxámokma xa aksok magkenatcheso nak agweta', tén han ma'a sempelakkaso nak agweta' nepyeseksa énxet'ák; apyókxoho énxet'ák axta anhan yaknekxohok cha'a m'a kóneg tegma Salomón apagkok nak. 13Méko axta xama énxet apmáheyo enxoho epaxkaha xa énxet'ák nak, wánxa agkok, tásek axta eyke cha'a katnehek apkelxeyenma. 14Apxámágkek axta eyke énxet'ák apteme melya'áseyam Wese' egegkok, hawók axta nahan ma'a kelán'ák. 15Kélántekkesek axta apkelháxamap nekha ámay nepyeseksa tegma, kélnegkenwokmek axta yetlo apkeltaháno m'a, yakwayam enxoho káhapwomhok Pedro pesese apagkok pók xama apkelháxamap apyeykhágwokmo enxoho. 16Apxámok axta nahan énxet'ák apkeleñama nak ma'a keto' Jerusalén, apkelmeyánteyk axta nahan nepyeseksa tegma apwányam, kélnaklánteyk axta apkelháxamap ma'a, tén han ma'a énxet'ák kelyekhama' eknaktawáseykha nak; apyókxoho axta anhan kéltakmelchesekmok.
Enxet'ák seykha amya'a kélmenxeneykha
17Apnatha'ak axta m'a apkemha apmonye nak apkelmaxnéseso Dios énxet'ák apagkok, axta anhan apkelxegexma'a m'a énxet'ák ektaha axta apkelyetlo apkeltémakxa Saduceos. 18Apkeltamhok axta elmakpok énxet'ák seykha amya'a xa énxet'ák nak, kélhésekmek axta nahan sẽlpextétamakxa kélhésamakxa axta cha'a énxet. 19Wánxa agkok, xama Dios apchásenneykha apkeñama néten axta eyke apmeykesásak átog axta'a, apkelántekkesek axta anhan. Aptahak axta apkeláneya s'e: 20“Kólxeg, kólchánwakxa kañe' tegma appagkanamap kóltennasha sat apyókxoho énxet'ák se'e axnagkok nentémakxa nak.”#Jn 11.25; 14.6; Ro 6.4. 21Mók ekhem axta entahak, apkelmeyákxo tegma appagkanamap, axto'o axta m'a, apkelxekmósek axta énxet'ák ekhawo m'a ektahakxa axta amya'a apkeláneyákpo.
Keñe axta apkeláneyeyncha'a apkelámha apmonye'e énxet'ák Israel ma'a ektaha axta apkemha apmonye appasmo apkelmaxnéseso Dios énxet'ák apagkok, tén han ma'a apkelxegexma'al'a, apkeltamhok axta elának apchakneykekxa apkelánamákpoho apkeleñama axta nepyeseksa énxet'ák ekyawe nak kéláyo, apkeltamhok axta anhan kólántekkesekxak énxet'ák seykha amya'a m'a kañe' sẽlpextétamakxa yakwayam enxoho kólnaklantak aphágkaxa. 22Wánxa agkok, xama axta apkelwákxo sẽlpextétamo m'a kélxatmakxa axta, axta elwetágweykxak ma'a. Apkeltakháwok axta aksa yetlo apkelseykekxa amya'a. 23Aptahak axta apkelpakmeta s'e:
—Negwetágweykxeyk negko'o ektakmela kélapeykekxa átog kélxatmakxa axta, tén han apkenmeyncha'a sẽlpextétamo m'a átog, wánxa agkok, magwet'ak negko'o xama énxet negmeykesa exchek átog.
24Xama axta apkelleg'a énxet'ák xa, cham'a apkelámha apmonye'e nak appasmo apkelmaxnéseso Dios énxet'ák apagkok, tén han ma'a apkemha apmonye nak aptakmelcheso tegma appagkanamap, tén han ma'a pók apkelámha apmonye'e nak appasmo apkelmaxnéseso Dios énxet'ák apagkok, apkelmaxneyáha axta cha'a pók yaksak sat kexaha kaxwo' katnehek xa natámen nak. 25Apwakteyk axta xama énxet. Aptahak axta apkeláneya apnámokkok se'e:
—Apkelxekmósek apnámokkok kañe' tegma appagkanamap ma'a énxet'ák kélxatma axta kéxegke kañe' sẽlpextétamakxa.
26Apxegkek axta apkelchetama m'a énxet'ák seykha amya'a m'a apkemha apmonye nak aptakmelcheso tegma appagkanamap, axta anhan apkelxegexma'a apxega m'a énxet'ák ektaha axta anhan apkeltakmelcheso tegma appagkanamap; wánxa agkok, axta eyke enaktawáségkohok, hakte énxet'ák axta apkelakak elyetnak meteymog. 27Xama axta apkelwákxo makham ma'a, apnaklákxeyk axta énxet'ák seykha amya'a nápakta'awo' aphágkaxa m'a énxet'ák ekyawe kéláyo nak. Aptahak axta apkeláneya apkemha apmonye appasmo apkelmaxnéseso Dios énxet'ák apagkok seykha amya'a s'e:
28—Axta óltamhok negko'o kólxekmósek xama énxet xa aptémakxa nak ma'a énxet nak cháxa kéllana nak kéxegke. Kélpeykásékxeyk nahan ekyókxoho tegma apwányam Jerusalén xa kélxekmóso nak, keñe anhan kélmoko hẽlpehésetak eñama negko'o apketsapma m'a énxet axta.#Mt 27.25.
29Apkelátegmowágkek axta Pedro tén han ma'a apyókxoho seykha amya'a. Aptahak axta s'e:
—Cháxa eyéméxchexa nak negko'o antehek xa, ektakmela agko' antehek nelyaheykekxoho Dios megkaxnawok ma'a ektémakxal'a nelyaheykekxoho énxet. 30Apxátekhásekmek axta Jesús negko'o egyepmeyk nano' Dios apagkok, cham'a Jesús kélyepetchesa axta kéxegke aksok ektegyéso kélakha. 31Dios axta apya'áseykekxa néten, aphésakxeyk axta m'a ekpayhókxa nak apkelya'asamakxa, aptemésesek axta Wese' tén han segwagkasamo teyp, yakwayam enxoho etnekxak melya'áseyam Dios ma'a énxet'ák Israel, tén han meyakmagkásekxék Dios ma'a apkeltémakxa nak melya'asáxma. 32Negko'o nentaha negweteykegkoho xa, Espíritu Santo nahan apteme apweteykegkoho, cham'a apmésa axta Dios énxet'ák ektaha axta apkelyaheykekxoho.
33Xama axta apkelleg'a énxet'ák xa, apkellókok apagko' axta, apmokók axta ennápok seykha amya'a. 34Wánxa agkok, apheyk axta eyke xama fariseo nepyeseksa xa kelwese'e nak, Gamaliel axta apwesey m'a, apkelxekmóso ektémakxa segánamakxa axta m'a, apcháyókxa axta anhan apyókxoho énxet'ák. Apkempákxeyk axta néten nepyeseksa énxet'ák apkeltamho kólántekkesek sekxo' énxet'ák seykha amya'a m'a. 35Keñe axta aptaha nahan apkeláneya nápakha kelwese'e s'e:
—Enxet'ák Israel, Kólawho sat yakwánxa nak kóltemésesek xa énxet'ák nak. 36Kaxénwákxoho kélwáxók nentámen axta, apteyapma axta aksa énxet apwesey axta Teudas apxénamakpoho axta aksa apagko' aptaha énxet ekha kélyaheykekxoho, cuatrocientos axta anhan apyókxoho énxet apyetleykekxa. Wánxa agkok, apmatñeyk axta eyke m'a, keñe axta apkexpakna m'a apkelxegexma'a, cháxa ekmassegwánxa axta ekyókxoho xa. 37Néwomók axta natámen xa, aptekkek axta anhan Judas apkeñama Galilea, cham'a elánamáxko axta kélnaktáxeseyak apkelwesey énxet'ák, apwet'ak axta nahan énxet yakwayam étlakxak ma'a, wánxa agkok apmatñeyk axta eyke nahan ma'a, keñe m'a ektaha axta apkelyetleykekxa apkexpakna anhan. 38Ekeso eñamakxa seltennasa nak ko'o kéxegke seltamho kólhok aksa xa énxet'ák nak, nágkólpaxakwom nahan, énxet'ák apancha'awók agkok aptamheyak xa, kamassegwók sat; 39Dios agkok keñamak xa aksok nak, megkólwanchek sat kólmasésók ektémakxa nak apkeltamheykha. Kólawho sat kéxegke, kawomhok katnehek kélenmexeykha Dios.
Apkelyahakxók axta anhan xa énxet'ák nak. 40Keñe axta Kéláneyeyncha'a énxet'ák seykha amya'a, kélyekpexchetágkek axta anhan, axta kóltamhok cha'a elenxanmohok apkeltenneykha Jesús apwesey; keñe axta kélchexeykxo. 41Apkelántekkek axta énxet'ák seykha amya'a apkelenyekto nápakta'awo' ma'a énxet'ák kelwese'e nak, hakte apcha'awók axta Dios ellegagkohok ekmaso agko' eñama apkellegaso Jesús apwesey. 42Yókxoho ekhem axta apkelxekmóso énxet'ák ma'a amya'a ektakmela eñama nak Jesús, aptaha nak Mesías, apkeltenneykha axta anhan cha'a kañe' tegma appagkanamap, tén han ma'a nátegma.
Právě zvoleno:
LOS HECHOS 5: LEGN
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
Lengua Sur (Enxet) New Testament © United Bible Societies, 1992.