Madius 7
7
1Akumu jim aktaktai has vaig tah aijaua, va uhpu eti aktaktai has vai caua. 2Erupu aktaktai ineigki vai caua natimi aki aktaktai vai ra aijaua: erupu ago nedo ineigki vai caua natimi aki ago vai ra aijaua. 3Na auri aiek par almoi nahrincai an nesganimtai etoam, jam eti aktaktai inmasincai an nesganimtam? 4Et ehka vai euc intasvaig ehele etoam, um ika, Ekmu atipagki nahrincai an nesganimtam ainyak; et wat amen inmasincai an nesganimtam; 5ak natimi efaifa, namu uhup aiek um atipagki inmasincai an nesganimtam; va apu almoi upene aiek par atipagki nahrincai an nesganimtai etoam.
6Jim alayi kuri nitai caig itaup, um jim ati perl unyimia an nuhup u picad, va eri jim atga iran picad, ka ahidai ra kuri, um aces caua.
7Akumu ugni itai aijaua, uhpu alupai caua; akumu ahilek itai aijaua, akupu ecetai aijaua; akumu etcetcei intapanes aijaua, uhpu asalgei vai caua: 8aien et ugni itai aien, etpu leh aien; aien et ahilek itai aien, etpu ecetai aien; aien et etcetcei intapanes aien, uhpu asalgei vai yin. 9Natimi ineig yek eda iramia, et wat ugni nareto a inhal o un, et alaan inhat aien? 10ka et wat ugni numu aien, et alaan nimyiv aien? 11El eka ato aijaua, ak ilpu atimi auatatimi, par alupai ilpu hal unyimia niji itai tup ahtai upene, et esjilid a Etmamia an nohatag par alupai ilpu atimi ugni yin niji itai upene. 12Va nedo ineigki akumu ago nitai iji eigki asega va atimi aijaua, eka merit aijaua mika eri ago vai caua ara: intas alep neigki im intas o ilpu profeta.
13Akumu atga aijaua an neucse nirahed ehroehro: et alupas neucse nirahed, um alupas nefalaig, et yetpan an mas, era atga iran atimi et ahinag: 14ja et ehroehro neucse nirahed, um ehroehro nefalaig, et yetpan an nitai umoh iran, era atga iran atimi et eti elpat.
15Akumu aminjinai caua aijaua vai ilpu profeta efaifa, era aso ra irai apelumai umri siip ara, um apan ehelemia, ja et idivaig kuri aleg inliinmopura ara. 16Akupu ato ra aijaua va nohoai itai ura. Era eti ehlek nohoai vaine atimi irai ausekrai, im nohoai ateg irai aha: 17et pinid nohu itai upene asega nohoai itai upene; ja et pinid nohu itai has nohoai itai has: 18et ehka neteucvaig nohoai itai has an nohu itai upene, um lep ehka neteucvaig nohoai itai upene an nohu itai has. 19Er acaldei nauicai asega et eti ohoai itai upene, um erekhaigjai an cop. 20Akupu ato ra aijaua va nohoai itai ura.
21Eri ti apan an nelcau an nohatag natimi asega erupu ika ehelek ara, Ak Natimarid, ak Natimarid; ja aien ache et imyiaiji intas o Etmak an nohatag aien. 22Erupu ika ehelek natimi inyi ahinag an nadiat iyehki, Ak Natimarid, ak Natimarid, ecris tas aijama an nidam, um ahlo ilpu agelo has va nidam, um ago niji auritai esjilid is ahinag va nidam. 23Ja ekpu ika ehele ra ainyak, Ek idim eti ato caua ainyak: akumu atga unyimia aijaua, ak ilpu atimi auatatimi.
24Aien et atahaijeg intas iji eigki unyak aien, um imyiaiji, ek ika ainyak et idivaig natimi arapakau is ethi aien, is actaigse neom o un aien an mala: 25ja is asuol incaupda, um ahga inwai, um iji nimtinjop, um isji neom iyehki; ja is eti eropse: is ateucse an mala. 26Aien et atahaijeg intas iji eigki unyak aien, um imyipalea, et idivaig natimi ahnag is ethi aien, is tup actaigse neom o un aien an nauanahvig: 27ja is asuol incaupda, um ahga inwai, um iji nimtinjop, um isji neom iyehki; is um echedeliekse: is esjilid neropse o un.
28IS wat tas ehni a Iesu irai tas iji eigki asega, eris imyiali natimi va nesege o un: 29is esege imi ra aien is idivaig tah is esjilid natimi alupas o un, um eti idivaig ilpu atimi esege.
Právě zvoleno:
Madius 7: ATY1863
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
historic text maintained by the British and Foreign Bible Society