Matiu 6
6
Ineekau mampopetoia ane motulungikau hangka rangami
1“Nipamaroa-roa ineekau mobabehi rara mpoagama i lindonda tauna bosa bona raita peakau hangka rangami. Lawi ane nodo babehiami, barakau ina nawati Pue Ala, Umami au ara i suruga. 2Mewali, ane motulungikau tauna au meahi-ahi, inee nipopaisa i tauna bosa, nodo au rababehi tauna au maroa i raoa pea. Ihira mampetudungia kamaroana lalunda i lalu sou penombaa ba i rara au mahile bona ratoia hangka ranganda. Bara ara apa-apa au ina rahumba hangko i Pue Ala, lawi rahumbami petoia hangko i ranganda. 3Agaiana ikamu, ane moweikau ba apa pea i hangka rangami, niwei ngkandii i suka kabulana lalumi, 4dati raisa tauna bosa. Agaiana Umami au i suruga ina moisa babehiami au tewuniangi iti, hai ina Nahurungiakau.”
Ineekau mampopetoia ane mekakaekau
(Luk. 11:2-4)
5“Ane mekakaekau, ineekau nodo tauna au maroa peahe i humenda. Raunde meangka mekakae i lalu sou penombaa ba i porompengaa rara bona raita hai ratoiahe tauna. Mewali, anti karahumbanami petoianda ranganda, barapohe molambi pewati hangko i Pue Ala. 6Agaiana ikamu, ane mekakaekau, hangangaa mesuakau i lalu lincumi hadua-hadua, nituko babami, hangko mekakaerikau i Umami au bara niita. Lawi Ia moita mpuu babehiami au bara raisa rangami, hai Ia ina mohurungiakau.
7Ane mekakaekau, inee nipopenggoli-nggoli nodokau tauna au bara moisa Pue Ala. Rapekiri, ane ngkalanga pekakaenda, pamperapinda ina tepabukei. 8Inee nipeulai babehianda! Lawi naisa amimi Umami au ara i suruga apa au niparaluu hangko damani niperapi. 9Mewali, mekakaemokau node:
Umangki au ara indora i suruga,
Kipomahile hangaMu au malelaha.
10Nupopewalimi poparentaMu i dunia,
bona ope-ope tauna mobabehi peundeaMu
nodo au mewali i suruga.
11Nuwei wongkamia paandeki au handa i alo ide.
12Nuampungi wongkamia hangko i kamasalangki,
nodo ikami moampungi woringkai rangangki au masala irikami.
13Inee wongkamia Nupogiangaa nakelo tokadake
agaiana Nukabaha wongkamia hangko i kuasa au kadake.
[Lawi Oiomi ampu Kadatua hai Kuasa
hai Peawa,
hawe i hae-haena. Amin.]
14Ane moampungimokau rangami au masala irikamu, Umami au i suruga ina moampungi worikau hangko i kamasalami. 15Agaiana ane barakau moampungi rangami au masala irikamu, Umami au i suruga bara wori ina moampungikau hangko i kamasalami.”
Ineekau mampopetoia ane mopuasakau
16“Ane mopuasakau, inee marinti lindomi nodohe tauna au maroa i raoa peahe. Ane mopuasahe, marinti lindonda hai raoaka barahe mewawalindo ba mekarabi bona raita tauna kamopuasanda. Nikatuinao, anti karalambinami petoia hangko i ranganda, barapohe molambi apa-apa hangko i Pue Ala. 17Agaiana ane mopuasakau, hangangaa mewawalindo hai mekarabikau 18dati raisa tauna popuasami. Batena pea Umami i suruga au moisa popuasami. Ia ina moita mpuu babehiami au bara raisa rangami, hai ina Nahurungiakau.”
Inee morampu anu-anu dunia
19“Ineekau morampu anu-anu i dunia. Lawi anu-anu i dunia peisa naande bubu ba mewali tagara. Pambolia anu-anumi peisa rabungkahi hai ihina rapanangka. 20Agina nibabehi babehia au maroa, lawi ane nibabehi nodo, lempona mowolikau anu-anumi i lalu suruga. Anu-anumi iti bara ina matanta, lawi indora bara ara au mopatagara, bara ara au mopabubu, bara ara au mopakarugi, hai bara ara au mopanangka. 21Lawi iumba kaarana anu-anumi, inditi wori lalumi.”
22“Matami iami hulona watami, lawi ane maroa matami, manoto petotokimi. 23Agaiana ane wura matami, makaindi wori humalele watami. Ane hulo au ara i watami mewali makaindi, meruu ntepuu kamakaindina.”#6:22-23 Tunggaiana ngkora pandiri ide: ane matamu ba pekirimu moantiko mobabehi au manoto i peitana Pue Ala, ina maroa katuwomu. Agaiana ane matamu ba pekirimu moantiko mobabehi sala, bara ina maroa katuwomu hai kadake lalumu.
24“Bara ara hadua tauna au nabuku mampobagoa rodua tauna, lawi hadua ina napokaahi, hai hadua nakahihi. Hadua ina napeulai hawana, hai hadua bara napeulai. Nodo wori ikamu, barakau peisa mampeulai peundeana Pue Ala, hai mohaoki worikau anu-anu dunia.”
Inee karao inaomi
(Luk. 12:22-31)
25“Mewali, Kuuliangaakau, inee karao inaomi ba niuli, ‘Apami wei au taande hai taenu?’ Inee karao inaomi ba niuli, ‘Apami au tapohampi?’ Lawi katuwomi melumbu hangko i paande hai pehampi. 26Peitahe tadasi au membaro node hou node mai. Barahe mowia, barahe mepare, bara ara tambarunda. Nauri nodo, Umami au ara i suruga batena mopaandehe. Apa mani ikamu. I peitana Pue Ala, meliu katuwomi pane katuwonda tadasi. 27Apami pobunduana ngkaia au nipekiri? Kehapiri karao inaomi mampekiri mampopengaa, barakau peisa motambai tinuwumi nauri hambengia pea.
28Moapari hai karao inaomi mampekiri pehampimi? Peita bunga i pada. Barahe mobago, barahe mandau. 29Agaiana Kuuliangaakau, mogalori Datu Salomo au pebuku ntepuu, hampina bara himbela peraena hai bunga iti. 30Mewali, ane Pue Ala mampoperae hehi i pada au tuwo alo ide, hai rahuwe kahalo, apa mani ikamu? Meliu pekadipurana Pue Ala irikamu. Moapari hai bara niharunga pekadipuraNa? 31Inee karao inaomi ba niuli, ‘Apami wei au taande hai taenu? Apami wei au tapohampi?’ 32Ope-ope iti rahaoki liliu tauna au bara moisa Pue Ala. Agaiana ineekau langa, lawi ope-ope au niparaluu, naisa haha Umami au i suruga. 33Mewali, hangangaa nipaioru poparentana Pue Ala i lalu katuwomi hai hangangaa nibabehi liliu babehia au manoto i peitaNa. Ane nibabehi nodo, hinangkana au niparaluu batena Naweikau.
34Mewali, inee karao inaomi mampekiri apa au ina mewali kahalo. Alo ide handami kamaparina, inee mbuli nitambai mampekiri apa au ina mewali kahalo.”
Právě zvoleno:
Matiu 6: NPY
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
@LAI 2016