Matiu 9
9
Yesu mopatongawa kuasaNa moampungi dosa
(Mrk. 2:1-12; Luk. 5:17-26)
1Hangko inditi, mesawimi Yesu i duanga hihimbela hai topeguruNa, mowetahe mesule lao i paidaanda i boea Kapernaum. 2Kahawenda, arahe tauna au mokowa hadua topalu au rapopaturu i ale, maihe i Yesu. Kanaitana Yesu kamahilena pepoinalainda, mololitami i topalu iti, Nauli, “AnaNgku, nupakaroho lalumu! Teampungimi dosamu.”
3Bahangkia guru agama mohadi lolitana Yesu iti. Nauli lalunda, “Kadake mpuu tauna ide. Ia mopahimbela kuasaNa hai Pue Ala!”
4Agaiana naisa ntepuu Yesu apa au ara i lalunda. Ido hai Nauliangaahe, “Moapari hai kadakeri pekirimi? 5Umba au mamura rauli: ‘Teampungimi dosamu,’ ba ‘Pearo hai molumaomoko.’ 6Bona niisa, Iko, Ana Manusia, makuasaNa moampungi dosa i dunia. Ide-ide ina Kupatongawaakau kaarana kuasaNgku moampungi dosa.” Hangko inditi, membalilimi i topalu iti, Nauliangaa, “Mearomoko, nulolomi alemu, hai mesulemoko!” 7Mearo mpuumi topalu iti, hai mesule lao i souna.
8Karaitana tauna bosa apa au mewali iti, langamohe, hai motoiahe Pue Ala, rauli, “Mahile mpuu kuasana Pue Ala au Nawei manusia!”
Yesu mokakio Matiu mewali topeguruNa
(Mrk. 2:13-17; Luk. 5:27-32)
9Roo indo, padumi Yesu hangko inditi. I tanga rara, Ia moita hadua au mohuda i bambaru pobaiaria asele, hangana Matiu. Nauli Yesu iria “Peulamide Iriko!” Meangkami Matiu hai liliu meula Iria.
ToParisi mosalai Yesu lawi Ia mampogaloa tomadosa
10Hangko inditi, Yesu hai topeguruNa maandehe i souna Matiu. Tanganda maande, hawe worihe bosa toperuru asele hai tauna ntanina maande sambela hai ihira. Tauna iti raimbahe tauna au kadake. 11Arahe toParisi au moita iti. Ido hai rapekune i topeguruna Yesu, rauli, “Moapari hai gurumi maande sambela hai toperuru asele hai tomadosa?”
12Nahadi Yesu lolitanda, ido hai Nauliangaahe, “Tauna au bara mahai, bara moparaluu sando. Tauna au mahai pea au moparaluu sando. 13BaraNa mai mokakio tauna au manoto babehianda. Kamaingku ide, mokakioNa tomadosa bona menosohe hangko i dosanda. Mewali, nipekiri hampai apa lempona Ngkorana Pue Ala au teuki node:
‘Bara Kuperapi binata au nipopenomba Iriko.
Au Kuperapi bona maahikau i hangka rangami.’ ”#Hos. 6:6
Topeguruna Yesu bara mopuasa i tempona mani Ia ara hihimbela hai ihira
(Mrk. 2:18-22; Luk. 5:33-39)
14Hangko inditi, hawehe bahangkia topeguruna Yohane Toperiu i Yesu, mekunehe iria, rauli, “Ikami hai toParisi mopuasa. Moapari pane topeguruMu barahe mopuasa?”
15Nahanaihe Yesu hai ngkora pandiri, Nauli, “Tauna i posusa petauna barahe mopuasa i tempona toratauna tobalilo ara mani i olonda. Agaiana hambela tempo, toratauna tobalilo ina raala hangko i olonda. I tempo itirai, hangko mopuasahe.”
16Roo indo, Yesu mopahawe mani rompaka ngkora pandiri, Nauli, “Bara ara hadua tauna au motampelei badu au hae hai hasepa bana au wou. Lawi hasepa bana au wou ina mengkuru duuna mahepa badu au hae iti, alana kahile-hileari kahepana. 17Nodo wori bara maroa mokando anggoro au wou i pambolia#9:17 Hangkoia pambolia anggoro rababehi hangko i koli binata. au hae. Lawi ane rengke, ina mahepa pambolia au hae iti, alana anggoro mabubu, hai marugi wori pamboliana. Mewali anggoro au wou hangangaa rakando i pambolia au wou bona maroa ope-ope.”#9:16-17 Tunggaiana Yesu mopahawe ngkora pandiri ide, node: paturona Yesu, paturo au wou. Bara hintoto ane paturona Yesu ragalo hai ada agama Yahudi au hae.
Yesu mopatuwo hule hadua anangkoi, hai mopakaoha hadua towawine au mampetobo baduNa
(Mrk. 5:21-43; Luk. 8:40-56)
18Tangana mani Yesu mololita i topeguruna Yohane Toperiu, hawemi hadua tadulako sou penombaanda to Yahudi molingkudu i lindona Yesu merapi tulungi, nauli, “Anangku towawine hangko mate. Laoke i soungku, Nupetobo bona tuwo hule.” 19Laomi Yesu meula i tauna iti, hai topeguruNa meula worihe.
20I tempo iti i tanga mpolumaonda, ara hadua towawine au hampulomi hai rompare mantodiha nahumba. Towawine iti lao mohungkuki Yesu hangko i taleu hai natobo wuntu baduNa, 21lawi nauli i laluna, “Asala kupetobomi wuntu baduNa, hangangaa maohamona.”
22Membalilimi Yesu i towawine iti hai Nauliangaa, “AnaNgku, nupakaroho lalumu! Maohamoko, lawi mepoinalaiko Iriko.” Tempo iti pea womi, maohami towawine iti.
23Roo indo, pulomi Yesu lao i souna tadulako sou penombaa. Kahawena, Naita bosa tauna au motulali hai au moteria. 24Nauliangaahe, “Pelohokau ope-ope hangko inde. Anangkoi ide bara mate. Leta pea.” Karahadina, raele-eleri. 25Padumohe ope-ope, mesuami Yesu i paturuana anangkoi iti, hai Nakingki taiena. Liliu anangkoi iti mearo. 26Bambari ide tehawuka i humalele tampo iti.
Yesu mopakaoha rodua tobilo
27Tangana Yesu mopaliliu polumaoNa, ara rodua tobilo au meula-ula i bokoNa hai mekakakiohe, rauli, “Pemuleana Datu Daudi, Nupokaahi wongkamia!”
28Pesuana Yesu i lalu sou, maimohe tobilo au rodua iti mampohidupaa. Napekunehe Yesu, “Ba nipoinalai kaarana kuasaNgku mopakaohakau?”
Rahanai, “Kipoinalai, Pue!”
29Hangko inditi, Napetobomi matanda hai Nauliangaahe, “Kupakaohamokau moula pepoinalaimi.” 30Unga peahe meita. Roo indo, nakontohe Yesu, Nauli, “Inee nipopololita i hema pea apa au Kubabehi irikamu ide.” 31Agaiana lao peahe i humalele tampo iti mobambari apa au nababehi Yesu irihira.
Yesu mopakaoha tauna au bara peisa mololita
32Kapadunda tobilo iti, raanti wori i Yesu hadua tauna au mahai. Tauna iti bara peisa mololita lawi napesuangi seta. 33Yesu mampopelohomi seta hangko i tauna iti, pane peisami mololita. Rapotingkara tauna bosa moita au mewali iti, rauli, “Mahile ntepuu kuasaNa! Bara mani hambela taita au nodo Ia i tamponda to Isaraeli!” 34Agaiana toParisi, barahe mampoinalai kahangko i Pue Alana kuasana Yesu, rauli, “Tauna iti mopake kuasa hangko i datu seta, ido hai peisa mampopeloho seta.”
Maahi laluna Yesu moita tauna bosa
35Nodomi Yesu mampolumaongi boea-boeana. Ia mepaturo i sou penombaa, mopahawe Ngkora Marasa kana i poparentana Pue Ala. Napakaoha wori ope-ope tauna au mahai hai au bara masilolonga watanda. 36Moita tauna bosa iti, maahi laluNa lawi ngkaia kaparinda, hai barahe ara au motulungi, nodohe dimba au bara raporewu. 37Nauli Yesu i topeguruNa, “Tauna bosa nodohe pare au mangka. Ngkaia pare au mangkami, agaiana topepare barahe bosa. 38Ido hai hangangaa niperapi i ampu bonde bona Natuduhe tauna lao mepare i bondeNa.”
Právě zvoleno:
Matiu 9: NPY
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
@LAI 2016