Matius 5
5
Marasi' tauna to mpotuku' konoa Alata'ala
1Kanahilo-na Yesus tauna to wori' toera, manake'-imi hilou hi bulu'-na, pai'-i mohura. Rata-ramo topetuku'-na mpomohui'-i. 2Natudui'-ra, na'uli'-raka:
3”Marasi' tauna to mpo'inca kampe'ahii' tuwu'-ra hi poncilo Alata'ala,
apa' hira' toe-mi mpai' to jadi' ntodea Alata'ala,
pai' Alata'ala jadi' Magau'-ra.
4Marasi' tauna to susa' nono-ra,
apa' Alata'ala moto mpai' mpotanta'u-ra.
5Marasi' tauna to dingki' nono-ra,
apa' hira' mpai' to mporata napa to najanci Alata'ala.
6Marasi' tauna to doko' lia jadi' monoa' hi poncilo Alata'ala,
apa' Alata'ala moto mpai' to mpowai'-ra napa to rapali' toe.
7Marasi' tauna to ma'ahi' hi doo-ra,
apa' Alata'ala wo'o mpai' mpoka'ahi'-ra.
8Marasi' tauna to moroli' nono-ra,
apa' hira' mpai' to mpohilo Alata'ala.
9Marasi' tauna to mpopohintuwu' doo,
apa' hira'-mi mpai' to rahanga' ana' Alata'ala.
10Marasi' tauna to rabalinai' sabana mpobabehi-ra konoa Alata'ala,
apa' hira' toe-mi mpai' to jadi' ntodea Alata'ala,
pai' Alata'ala jadi' Magau'-ra.
11”Marasi'-koi ane raruge'-koi tauna, rabalinai' pai' rabalihi-koi hante wori' nyala lolita pebalihi sabana petuku'-ni hi Aku'. 12Nabi–nabi to owi, rabalinai' wo'o-ra-rawo hewa toe. Jadi', pakagoe'-mi nono-ni, apa' bohe mpai' rasi' to nirata hi rala suruga.
Topetuku' Yesus rarapai'-ki poi' pai' baja
13”Koi' to mpotuku'-a ma'ala rarapai'-ki poi', to mpokeni kalompea' hi manusia'. Aga ane uma-di nituku' tudui'-kue, koi' hewa poi' to mononto, uma-pi bisa rapomopoi' nculii', pai' uma-pi ria kalaua-na, alaa-na ratadi-mi pai' rapolisaa.
14”Koi' to mpotuku'-a, hewa baja to mpobajahi hawe'ea tauna. Ngata to rawangu hi lolo bulu' uma kalerua. 15Pai' uma ria tauna to mposuwe palita pai' napopoi' hante kura. Bate natu'u hi pontu'ua-na bona hini-na rahilo hawe'ea tauna to hi rala tomi. 16Wae wo'o baja to hi rala nono-ni neo' niwuni. Kana lompe' kehi-ni, bona hawe'ea tauna mpohilo, alaa-ra mpo'une' Tuama-ni to hi rala suruga.
Tudui' Yesus mpokahangai' atura agama Yahudi
17”Neo' nipekiri katumai-ku tohe'i-e, ba tumai mpokero Atura Pue' to na'uki' Musa hante tudui' nabi–nabi owi. Uma-a tumai mpokero. Katumai-ku toi-le, bona mpopadupa' napa to te'uki' hi rala Atura toe. #5:17 Katumai-ku toi-le, bona mpopadupa' napa to te'uki' hi rala Atura toe. tafsiran ntani'-na: Katumai-ku toi-le, bona mpotudui'-koi napa mpu'u batua-na to ra'uki' owi toe. 18Mpu'u–mpu'u ku'uli'-kokoi: butu mela lolita to te'uki' hi rala Buku Atura Pue' bate kana madupa'. Ane da rii–ria-pidi langi' pai' dunia' toi, uma ria hamelaa lolita hi rala Atura Pue' to uma madupa', nau' to kedi' lia. 19Toe pai' ku'uli'-kokoi, hema–hema to mpotiboki nau' hanyala-wadi parenta to hi rala Atura Pue', nau' parenta to kedi' lia, pai' mpotudui' tau ntani'-na mpobabehi hewa toe wo'o, tau tetui mpai' to kedi' lia katuwu'-na ngkai hawe'ea ntodea-na Alata'ala. Aga hema to mpotuku' hawe'ea parenta to hi rala Atura Pue' pai' mpotudui' tau ntani'-na mpobabehi hewa toe wo'o, tau tetui to bohe lia katuwu'-na ngkai hawe'ea ntodea Alata'ala. 20Jadi', ku'uli'-kokoi: ane uma-koi jadi' monoa' hi poncilo Alata'ala, bate uma-koi jadi' ntodea-na hi rala Kamagaua'-na. Pai' kamonoa'-ni tetu kana meliu ngkai kamonoa'-ra guru agama pai' to Parisi.
Neo' moroe
21”Ni'inca moto parenta to ra'uli'-raka ntu'a-ta owi to mpo'uli': ’Neo' mepatehi, pai' hema to mepatehi kana rapohurai kara–kara-na pai' rahuku'.’ 22Aga Aku' mpo'uli': hema to mpokaroe doo-na, bate rapohurai mpai' kara–kara-na. Hema to mpotipo' doo-na, bate-na rakeni hi topohura bohe. Pai' hema to mpakiwojo doo-na, masipato' lia-i ratadi hi rala apu naraka.
23”Jadi', ane rapa'-na mesua'-ta hi Tomi Alata'ala doko' mpokeni pepue'-ta, pai' muu–mule' takiwoi karia-na doo-ta to peda' nono-na hi kita', 24bahaka-mi ulu pepue'-ta hi nyanyoa meja' pontunua pepue', nculii'-tamo ulu momekalompei'. Oti toe-di, pai' lako' nculii'-ta hilou mpotonu pepue'-ta hi Alata'ala.
25”Wae wo'o, ane ria to doko' mpakilu-ta hi topohura, pari–pari mpali' kahintuwuaa' nto'u-ta hi lengko ohea-pidi hilou hi topohura. Apa' ane uma ria kahintuwuaa'-ta, bate nabua'-ta mpai' hi topohura, pai' topohura mpotonu-ta hi polisi, pai' polisi mpopesua'-ta hi rala tarungku'. 26Mpu'u–mpu'u ku'uli': uma-tapa tebahaka ngkai rala tarungku' ane da koo–ko'ia oti tabayari waya'-ta.
Tudui' Yesus mpokahangai' pebualohi
27”Ni'inca moto karia-na parenta owi to mpo'uli': ’Neo' mobualo'.’ 28Aga Aku' mpo'uli': hema to mponaa tobine pai' ria nono-na mpokahina-i, mobualo'-imi hi rala nono-na. 29Jadi', ane rapa'-na mata ka'ana-ta to mpakeni-ta mojeko', jungki' lau-imi pai' petadi. Agina lau-pi moronto mata-ta hamali, ngkai hawe'ea woto-ta ratadi hi rala naraka. 30Ane rapa'-na pale ka'ana-ta mpakeni-ta mojeko', pua' pai' petadi. Agina lau-pi moronto pale-ta hamali, ngkai hawe'ea woto-ta ratadi hi rala naraka.
Tudui' Yesus mpokahangai' pogaa' to ncamoko
31”Ria wo'o lolita owi to mpo'uli': Ane ria tomane to mpogaa'-ki tobine-na, kana nawai'-i sura pogaa'. 32Aga Aku' mpo'uli': hema to mpobahaka tobine-na, bo tobine-na toe uma-hawo mogau' sala', mojeko'-i, apa' hi'a to mebahaka toei mpakeni tobine-na mobualo', ane motomanei nculii'-i. Pai' tomane to mpotobine kabulisa doo, mobualo' wo'o-imi-hawo.
Neo' mosumpa
33”Ni'inca wo'o karia-na parenta to ra'uli'-raka ntu'a-ta owi to mpo'uli': ’Neo' mo'ungkere' ngkai pojanci-nu ba posumpa-nu. Napa to nujanci-mi hi nyanyoa Alata'ala, bate kana nubabehi.’ 34-35Aga Aku' mpo'uli': neo' lau-ta mosumpa. Ane mpobabehi-ta janci, neo' mosumpa mpokahangai' langi' ba dunia'. Apa' langi' pohuraa Alata'ala, pai' dunia' pentodua-na. Neo' mosumpa mpokahangai' ngata Yerusalem, apa' toe ngata Alata'ala, Magau' to bohe. 36Neo' wo'o mosumpa mpokahangai' woo'-ta, apa' uma tapakulei' mpakabula ba mpomo'eta wuluwoo'-ta, nau' ba hangkaho-wadi. 37Ane patuju-ta mpo'uli' io', uli'-mi ’Io'.’ Ane patuju-ta mpo'uli' uma, uli' wo'o ’Uma.’ Uma-hana lompe' ane taperohoi lolita-ta hante mosumpa, apa' kehi to hewa toe mehupa' ngkai Magau' Anudaa'.
Neo' mehawa
38”Ni'inca moto parenta owi to mpo'uli': ’Ane ria to motuda' pai' to hadua mpojungki' mata doo ba mpowuka ngihi' doo, jungki' wo'o-ki-hawo mata-na, pai' wuka wo'o-ki-hawo ngihi'-na.’ 39Aga Aku' mpo'uli': neo' tapehawai doo to mpobabehi to dada'a hi kita'. Ane rapa'-na ria to mpohopo' kulimpi-ta hamali, tonu wo'o-ki to hamali. 40Ane ria to mpakilu-ta hi topohura pai' mperapi'-i baju-ta, wai' lau wo'o-i abe'-ta. 41Ane hadua tantara mpewuku-ta mpokolo-ki kenia-na nte hakilo kalaa-na, kolo lau-miki kenia-na nte rokilo kalaa-na. 42Ane ria to mperapii'-ta ba napa–napa, wai'-i-hawo. Pai' neo' takabosii' doo to doko' mpeboloi-ta ba napa–napa.
Poka'ahi' bali'-ta
43”Ni'inca wo'o tudui' to mpo'uli': ’Poka'ahi' hingka doo-nu, pokahuku' bali'-nu.’ 44Aga Aku' mpo'uli': kana tapoka'ahi' bali'-ta, pai' taposampayai-ra to mpobalinai'-ta. 45Apa' ane lompe' nono-ta hi bali'-ta, tatuku'-mi po'ingku Alata'ala, Tuama-ta to hi rala suruga. Apa' lompe' nono-na Alata'ala hi hawe'ea tauna: napopehupa' eo hi tauna to lompe' pai' hi tauna to dada'a, napopana'u uda hi tauna to monoa' pai' hi tauna to bengku' nono-ra. 46Ane tapoka'ahi' muntu' tauna to mpoka'ahi'-ta-wadi, uma mpai' nahiwili-taka Alata'ala kehi-ta toe. Bangku' topesingara' paja' to dada'a gau'-ra, mpoka'ahi' moto-ra-rawo tauna to mpoka'ahi'-ra. 47Ane lompe' nono-ta muntu' hi ema'-ta-wadi, napa pelabia-na kehi-ta toe-e? Bangku' tauna to uma mpo'incai Alata'ala, bate toe wo'o-rawo po'ingku-ra. 48Kita' kana lompe' po'ingku-ta hante uma ria ruke–ruke-na, hewa po'ingku-na Alata'ala Tuama-ta to hi rala suruga.
Právě zvoleno:
Matius 5: PPK
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas