ZAŊ 11
11
Me də Lazar
1-2Hulum kəman yə məntu Lazar a jəŋ də ɗeme. Wə a jəŋ də kəsəənu anə Marta də Mari haa giidə wəlasi də Betaniŋa. Mari haa həlgə də minti a kaŋ son bə siisi pisiŋ kampar Barkaŋa daana a a sətnəy wəra də kaaɗe gə cəərəŋ. 3Kəsaanə kumsi ɓasiŋ gaŋ hulum bə ɗe a waate Yeesu minti: «Barkaŋ, daaram kasi kusru.» 4Yeesu əskəŋ kel teŋ kəyaŋ, wə minti: «Ɗeme toŋ, cuuru ɗe a awe me ba. Wə haa bə veɗe boblo kə Pepeŋ wəra kir minti boblo kə ten Kormə Pepeŋ gaa guudu la wəra.»
5Yeesu a bə bele anə Marta də Mari də siini Lazar. 6Wə a əskəŋ nuutu minti Lazar kasi kusru, də teŋ keɗe wə hətəŋ kəm a ko toŋ da ɓasi pa. 7Kəya wə waataŋ *kaa gə guuduŋ minti: «Áŋ harə la giidə seŋka də Zudeŋ.» 8Kəya yə minti: «Hulum bə hateŋ, kaanə Ziwifiŋ deegŋ kəna bə goldoma bə awe də pərki da ada, tam bele hebkəna minti tam hare ada na pə ko?» 9Wə minti: «Dər ko bə daawaya ha'aŋ, ler ada hor cəərə ɓasi bə mo? Hulum jəəne bə ɗe daaway, wə debe ba gud maa mo wə dər pəɗaki də cəərə seŋkaŋa. 10Səma wə jəəne bə ɗe dər ko bə duugŋaŋ, wə dabte gud maa mo pəɗaki nuutu paapa.»
11Wə waataŋ ada pa minti: «Daarə áŋ Lazar kəlaŋ kin, ten koore bə ɗe a gunu wəra.» 12Kaa gə guuduŋ minti: «Barkaŋ, jəəne minti wə kəlaŋ kin, wə seere yaŋ wəra.» 13Yə a bə ɗiki neeteŋ haa minti wə waate haa sam kin gə booboŋ, doloy ha'aŋ, wə a wəətənəy haa sam me də Lazar gadi. 14Kəya Yeesu wəətənəy wəra pəɗaki minti: «Lazar meŋ wəra. 15Ten də waale guudəŋa minti a me du ten paapa suru na ada na baŋ, bədoona ana aŋ de yaŋ guudəna. Áŋ koorə la cuuru.» 16Kəya Tomasi bə minti yə məntu Kəmkun waataŋ kumsu kaayaŋ minti: «Áŋ koorə la gud Barkaŋa bə ɗe a me duuru gəm.»
Yeesu hare Lazar wəra dədərgə adordə meŋa
17Bə minti Yeesu tuukuŋ wəra máŋ sar Betaniŋ, wə əskəŋ minti yə gaŋ titi də Lazar ne warna a huluki də pərkiŋ na hitiŋ máŋ wəra waaɗe ɗaw. 18Wəlasi də Betaniŋ anə maŋ sar Zeruzalema, aduubə di ji karman bə kelewmeeter soope. 19Gud teŋa ta, kaanə Ziwifiŋ ablaw a bəŋ sar anə Marta də Mari bə bi a tiŋiy diri gud me bə siiniŋa.
20Marta əskəŋ anəkay minti Yeesu bə ɗe daŋ, a kooroŋ a jəmu duru. Mari taŋ yaakaŋ aker da je'i. 21Marta tuluŋ sar Yeesu kəyaŋ, a əsəŋ bə wəətu minti: «Barkaŋ, tam a jəə la kənaŋ, seenən sə a me ba. 22Səma wəra də dərən minti koo nuutu hebkənaŋ karman bə minti tam məntu kasi Pepeŋaŋ, wə ayam dəm.» 23Wə minti: «Siiniŋ hare yaŋ wəra dədərgə.» 24A minti: «Wəra də dərən minti wə hare yaŋ wəra dədərgə dər hi bə adoro bə minti kaa kə mee-meŋ hare wəra dədərgə duruŋ.» 25Wə minti: «Ten haa hulum bə aye dədərgəŋ a kaŋ daana minti hərəy wəra dədərgə adordə meŋaŋ. Hulum bə minti doŋ ne guudənaŋ, wə mee la nuutu kəna me ɗaw, wə ji yaŋ caw saksaki. 26Hulum bə minti jəŋ ne caw bə doo-de guudənaŋ, toŋ me ba anə ceki. Te də doo-de gud kel teŋa mo?» 27A hərnu kel minti: «Ãã Barkaŋ, ten də doo-de minti tam haa *Hulum bə minti Pepeŋ ŋəmnuŋ, tam haa Kormə Pep bə minti sə a bi cəərə seŋkaŋaŋ.»
28Kəya Marta kooroŋ a veɗge Mari nawraŋ, a əsəŋ bə weska kela minti: «Hulum bə hate náŋ bə məntəy da kanda.» 29Mari əskəŋ kel teŋ kəyaŋ, a faŋ apəya anə patəkaw faɗi, a kooroŋ suru. 30Anaaŋa Yeesu a kəm doloy bay tuuki wəra giidə wəlasi də Betaniŋa, wə a kəm haa a ko bə minti Marta a ɗeŋ a fəlu ada naŋ. 31Kaanə Ziwifiŋ a jəŋ sar Mari akera ada bə teŋa dərə. Yə asna bə fe apəya patəkaw bə kele na warna kaynaŋ, yə təpaŋ guuda na faɗi, yə a ɗəkəŋ neeteŋ haa minti a ɗe kəna cəərə teɗker bə ɗe a hage. 32Bə minti Mari ɗeŋ a tuuki a ko bə minti Yeesu adaŋ, a əsnu kəyaŋ, a vaŋ də gəgəərə tiinu, a wəətunu minti: «Barkaŋ, tam a jəə la kənaŋ, seenən sə a me ba.» 33Yeesu asna bə hage də kan kə dərə də kaa kaayaŋ gə guudəŋ keɗe kəyaŋ, tərmuyu cəmaŋ wəra hasi, laaweŋ duunu gəm. 34Wə minti: «Aŋ gəənu ane mo?» Yə minti: «Barkaŋ bəəda, tam ɗe yaŋ a ase.» 35Kəya kan kə dər Yeesu vaŋ faɗi. 36Kaanə Ziwifiŋ əsəŋ bə waate cuuru minti: «Aŋ golə la kəm mo, wə a bə bəlu wəra hasi.» 37Sirdi kəman minti: «Wə bəŋəŋ dər hulum bə bəwə-bəwiŋ wəra, wə sə a neke bə he ku meŋ wəra cəərə Lazara gəm bə mo?» 38Kəya tarmə Yeesu haraŋ bə ceme wəra pisi camə pa, wə kooroŋ cəərə teɗker faɗi. Tələŋkəŋ a jəŋ haa a huluki də pərki, ku bə gisə-gisi də pərki boblo. 39Wə minti: «Aŋ haa pərki la wəra.» Marta nawrə Lazar minti: «Barkaŋ, titiŋ siisi gud maa mo a hətəŋ máŋ wəra a tələŋkə waaɗe.» 40Wə minti: «Ten a wəətənəy wəra minti te doŋ neŋ, te ase boblo kə Pepeŋ yaŋ bə mo?»
41Kəya yə haŋ pərkiŋ wəra faɗi. Yeesu haŋ duru apəya, wə minti: «Ten jəm suuse Barən gud minti tam əskənən kun. 42Wəra də dərən minti tam əskən kun saksaki, səma ten waate kel teŋ haa gud kaa kə ablawa gil sarəna kənaŋ minti yə doo la minti tam gaanan da haa tam.» 43Wə waataŋ kel teŋ bədoona waata kəyaŋ, wə naakaŋ ku koloŋ faɗi minti: «Lazar, kalə da warda!» 44Kəya titiŋ kəlaŋ warda faɗi. Kampara daana kaasa gə əntə-ənti də ku ladəra də caarə-caare, dərə də kulə-kuli də tərnə ladəra gəm. Yeesu minti: «Aŋ budu la wəra, aŋ yəəku la, wə ɗee la.»
Kaŋ de kuy cəərə Yeesu
(Mat. 26.1-5; Mar. 14.1-2; Liki 22.1-2)
45Ablaw də kaanə Ziwifi gə minti a bəŋ sar Mari daana asaŋ kar gə minti Yeesu jiiniŋ, doŋ guudu. 46Səma sirdiŋ kooroŋ bə ɗe a fele kaanə *Farisiyeŋ bə tupuy bəlam də kar gə minti wə jiiniy. 47Kəkamna kə *kaa kə keere Pepeŋ də kaanə Farisiyeŋ təpaŋ cəərə *kaa kəmtəŋ gə jeme kəəti kə kaanə Ziwifiŋ. Yə minti: «Áŋ jəə maa la mo? Hulum toŋ bə jəəti miɗiŋa ablaw. 48Áŋ yəəkunu ne bə raawe bədoonaŋ, kaŋ de wəra guudu keɗe. Kaanə Romeŋ vaŋ kuy ne adaŋ, yə bi a ɓalke *Kuli kə Pepeŋ náŋ wəra daana yə awe sam áŋ gə Ziwifiŋ wəra gəm.»
49Hulum kəman aduubə di məna yə məntu Kayifi a jəŋ akaceŋa *kumna boblo bə keere Pepeŋ. Wə minti: «Aŋ paapa bə əski ba anə ceki. 50Paapa də dərəŋ bə mo minti hulum meŋ ne gud kaŋa, haa maryaŋ. Bədoona kəyaŋ, gidiirə náŋ bə bese wəra ba.» 51Wə waataŋ kel teŋ paapa də ɗiki du ba. Wə a kumna boblo bə keereŋ ateŋa tə kəm, wə jogoŋ ku Pepeŋ wəra minti Yeesu bə me yaŋ wəra gud kaanə Ziwifiŋa; 52paapa guudi təwa ba, wə me haa bə kote cəərə karmə Pep gə minti a wəra gə meerə-meereŋ bə təpəy wəra məna.
53Kaa kəmtəŋ teŋ doŋ kuy dər hi toŋa bə awe Yeesu wəra. 54Kəya Yeesu yaakaŋ ɗeete kəkəri bə ko bə minti kaanə Ziwifiŋ ada ablaw wəra. Wə kooroŋ də *kaa gə guuduŋ bə ɗe a isi warna giidə vil də Efrayim na, maŋ sar fula.
55*Kəɗwəy kə kaanə Ziwifi gə minti yə məntəy Pakiŋ wəra maŋ. Ablaw də kaa gə minti giidə seŋka də Israyelaŋ kooroŋ Zeruzalem bə ɗe a ji to'osi də baadeŋ minti té jəə la wəra *cetceti tiinə Pepeŋa. 56Kaŋ goldoŋ Yeesu, yə təpaŋ ciiri giidə Kuli kə Pepeŋ kəyaŋ, yə lətaŋ ku kumsi minti: «Aŋ bə ɗiki minti wə bi yaŋ nuutu a kəɗwəy mo, paapa mo?» 57Kəkamna kə kaa kə keere Pepeŋ də kaanə Farisiyeŋ a waataŋ wəra minti, hulum kəman asaŋ ko bə minti Yeesu adaŋ neŋ, wə weskə té la cuuru, té daw.
Právě zvoleno:
ZAŊ 11: KERNT05
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
Texte de la Bible: Kera © Alliance Biblique du Tchad, 2004.