ZAŊ 13
13
Yeesu baade kampar kaa gə guuduŋ
1Dər dəəgŋa a ko bə minti *kəɗwəy gə Pakiŋ ɗe a ji a dibiinimaŋ, Yeesu asaŋ minti hi kə toŋ nəkaŋ ne bə yaake seŋkaŋ wəra bə koore sar Abaŋ. Wə a bə bele kaa nuutu gə cəərə seŋkaŋa saksaki, wə raawaŋ bə bələya hãã a me du bə guudiŋa. 2Yeesu də kaa gə guuduŋ a jəŋ bə hame. Nərtitiŋ a koloŋ ɗiki bə baymele ku tarmə Zudasi kormə Simoŋ Iskariyotiŋa minti wə malə gud Yeesu la wəra. 3A wəra də dər Yeesu minti tó a bəŋ sar Pepeŋ da, tó bə hare yaŋ suru pa daana minti Abaŋ ayaŋ səɓakiŋ wəra keɗe kasi tó gəm. 4Kəya wə faŋ apəya a ko bə hameŋa, wə pəŋ dəməəmə nuutu də cəərə kumsuŋ wəra, wə humuŋ dəməəmə də sete kusrum, wə əntənə təwru. 5Kəya wə gaŋ kan giidə təəyə, wə əsəŋ bə baade kampar kaa gə guuduŋa wəra, wə sətnəy di wəra də dəməəmə də təwruŋ faɗi gəm. 6Wə tuukuŋ cəərə Simoŋ Piyera kəyaŋ, Piyer minti: «Barkaŋ, tam gadi baadən kamparən! Paapa!» 7Wə minti: «Karman bə mini ten bə jəwa ha'aŋ, tam usku guuduŋ hebkəna faɗi ba, tam bə usku guuduŋ yaŋ ajew na.» 8Tó minti: «Paapa, tam baadən kamparən ba anə ceki!» Wə minti: «Ten baadənam kampəram baŋ, karman bə təpam dəərən pa pəda.» 9Kəya Piyer minti: «Barkaŋ, jəəne bədoonaŋ, a baadən kamparən təwa ba, baadən anə kaasən la də cəərən wəra ada gəm!» 10Wə minti: «Hulum bə minti a baadaŋ kusru ne wəraŋ, wə paapa də caadə bəədu pəda, wə baade máŋ haa kəmpuru təwa'i gud maa mo kusru wəra *cetceti keɗe'i. Aŋ wəra cetceti, səma paapa aŋ keɗe ba.» 11Hulum bə minti bə ɗe a məlu guudu wəraŋ də duru; haa gud teŋa ta wə a waataŋ minti: «Aŋ wəra cetceti, səma paapa aŋ keɗe ba.»
12Wə bəədənəy kəmpəri wəra baada kəyaŋ, wə haraŋ bə dere dəməəmə nuutuŋa, wə haraŋ cəərə hameŋa faɗi. Wə wəətənəy minti: «Karman bə minti ten jəənəŋ dəŋ sarəŋa ha'aŋ, aŋ uskunu guuduŋ nuutu mo? 13Aŋ mantan minti: ‹Hulum bə hate kaŋ› daana ‹Barkaŋ›, haa akəsa gud bə minti ten haa hulum toŋ gəəzi. 14Ten bə minti Barkaŋ daana Hulum bə hate kaŋ baadənaŋ kampəraŋ wəra hebkəna faɗi. Aŋ gəm, aŋ kir baadete kampar kumsəŋ aduubə də kumsəŋa bədoona ana. 15Gud maa mo, ten gaanaŋ dərəŋ haa cəərə kela kir minti karman bə minti ten a juunu sarəŋaŋ, aŋ jəw la gəm. 16Gəəzi, gəəzi, ten waataŋ, hulum bə joŋreŋ deŋe burduŋ ba, hulum bə digiŋ deŋe hulum bə minti gəənu daŋ bə gəm. 17Hebkəna ha'aŋ, aŋ asaŋ kel teŋ wəra, aŋ jiiniy neŋ, aŋ fele waale yaŋ.
18Ten waataŋ kel teŋ haa paapa cəərəŋa keɗe ba. Kaa gə minti ten vərnəy, yə də dərən. Səma, kel gə jeerə-jeere gə giidə Kefter kə Pepeŋ kir de kuy wəra minti: ‹Hulum bə minti ten ɓarsaŋ mappa katən duuruŋ, wə koloŋ ku cəərəna#13.18 Ps. 41.9.› 19Ten waataŋ teŋ wəra hebkəna faɗi, ajew də minti kel teŋ bə jiŋ, kir minti yə bə jəŋ neŋ, aŋ doo la minti ‹*Ten kəna ten› haa hulum toŋ. 20Gəəzi, gəəzi, ten waataŋ, hulum bə minti doŋ kel də hulum bə minti ten a gəənu neŋ, wə doŋ haa kel dən faɗi gəm. Hulum bə minti doŋ kel dən neŋ, wə doŋ haa kel də Hulum bə minti a gaanan da.»
Yeesu minti Zudasi mele gud tó wəra
(Mat. 26.20-25; Mar. 14.17-21; Liki 22.21-23)
21Adordə kel teŋa kəyaŋ, ɗiki də Yeesu cəmaŋ wəra hasi, wə əsəŋ bə waate wəra kaŋkaŋ minti: «Gəəzi, gəəzi, ten waataŋ, hulum bə gud aŋ lakiŋ kənaŋ bə ji akoloki yaŋ cəərəna.» 22Kəya *kaa gə guuduŋ əsəŋ bə gole kumsi, yə lenteŋ wəra dər ɗiki di minti wə waate haa sam mindi mo? 23Hulum aduubə də kaa gə gud Yeesuŋa, haa tó bə minti wə bəlu ablaw, a jəŋ maŋ suru. 24Kəya Simoŋ Piyer raawaŋ bə viɗku daana bə wəətu seteeta minti wə laa ku Yeesu la cəərə hulum bə minti wə bə wəətu səmuŋ. 25Kəya hulum bə sar Yeesuŋ cokoŋ ku suru na bə law ku minti: «Barkaŋ, hulum toŋ haa mindi mo?» 26Yeesu minti: «Ten cepe mappaŋ dər kəsawa, hulum bə minti ten əyu duŋ haa tó faɗi.» Kəya wə raawaŋ bə he mappaŋa, wə cepna, wə ayna a Zudasi, kormə Simoŋ Iskariyotiŋ. 27Zudasi doŋ mappaŋ anəkay, *Sataŋ vaŋ cuuru faɗi gəm. Yeesu əsəŋ bə wəətu minti: «Karman bə minti tam sə a jəw, jəw la cəlam faɗi.» 28Wə wəətunu bədoona haa səm moŋ, hulum anə məna gud kaa gə minti a jəŋ bə hameŋ əskəŋ guudi ba. 29Zudasi a jəŋ bə ame saki bə soloya haa tó tə bə moŋ, sirdiŋ ɗəkəŋ haa minti Yeesu wəətunu minti wə ɗee la a gusi kar gə minti té bə ji kəɗwəy diiriŋ da, kumundu ba, wə ɗee la a aye kar a kaa kə caacaŋ. 30Zudasi doŋ mappaŋ kəyaŋ, wə kəlaŋ warna faɗi. Koŋ a jəŋ haa duugŋ.
Ku gili kimirwi
31Adordə minti Zudasi kəlaŋ warnaŋ, Yeesu minti: «Hebkəna ha'aŋ, gud boblo kə ten *Kormə Hulúm bə veɗe wəra. Boblo kə Pepeŋ bə veɗe wəra guudəna gəm. 32[Gud boblo kə Pepeŋ vəɗaŋ wəra gud Kormə Hulúma tə gəm,] Pepeŋ də kusru vəɗu boblo nuutuŋ yaŋ wəra a kaŋ gəm. Wə bə jəw yaŋ hebkən-hebkəna faɗi. 33Karmanti, ten ji máŋ hebkəna sarəŋa haa anə sawəwa bagŋ. Kel gə minti ten a wəətənəy a kaanə Ziwifiŋ, ten waataŋ dəŋ gəm minti aŋ bə goldon yaŋ, səma ko bə minti ten bə ɗe ada naŋ, aŋ neke bə ɗe ada na ba. 34Ten ayaŋ *ku gili kimirwi, ku gili toŋ haa minti: aŋ balə kumsəŋ la adəwaldə kumsəŋa. Damdi ten a balnaŋ ana, aŋ balə kumsəŋ la bədoona gəm. 35Aŋ jəəne bə bele kumsəŋaŋ, kaŋ keɗe kole yaŋ bə ase minti aŋ haa *kaa gə guudən.»
Yeesu minti Piyer bə malte ku yaŋ cəərə tó
(Mat. 26.31-35; Mar. 14.27-31; Liki 22.31-34)
36Simoŋ Piyer laŋ ku Yeesu minti: «Barkaŋ, tam ɗe ane mo?» Wə minti: «Ko bə minti ten ɗe ada naŋ, tam neke bə ɗe guudəna ada na hebkəna ba, səma adoro tam bə ɗe yaŋ guudəna.» 37Wə minti: «Barkaŋ, ten neke bə ɗe guuduma hebkəna ba səm mo? Ten wəra bə ɗampə-ɗampe bə me guuduma!» 38Wə minti: «Piyer tam wəra bə ɗampə-ɗampe nuutu gəəzi bə me guudəna mo? Gəəzi, gəəzi, ten waatam, ajew də minti goglokiŋ hõõdeŋ, tam bə malte kum yaŋ wəra cəərəna kampa soope.»
Právě zvoleno:
ZAŊ 13: KERNT05
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
Texte de la Bible: Kera © Alliance Biblique du Tchad, 2004.