MATIYE 9
9
Yeesu seere hulum bə hurufiŋ
(Mar. 2.1-12; Liki 5.17-26)
1Kəya Yeesu haraŋ bə li giidə turtiŋa, wə cakɗaŋ warna cəərə kan kəmtəŋ na, wə tuukuŋ giidə vil nuutuŋa. 2A ko toŋa kəya kaa kəman həənu hulum bə hurufi da a gisi da lam. Yə bəŋ duuru suru. Bə minti Yeesu ɗeŋ a ase minti kaa teŋ gə doo-de gud tó ŋaanaanə moŋ, wə waataŋ hulum bə hurufiŋ minti: «Daarənti, teŋə dərəm la! Baymele nəmtiŋ fəlaŋ vəəgi bə giiduŋ ne.» 3Kəyaŋ, sərdə *kaa kə hate ku gili kə Pepeŋ əsəŋ bə le ku kusri minti: «Hulum toŋ sarte sam Pepeŋ gadi!» 4Yeesu asaŋ ɗiki neeteŋ, wə wəətənəy minti: «Aŋ yaakaŋ ɗiki bə baymele toŋ ku tarməyaŋa haa kel maa mo? 5Gə ji gəəli dəŋaŋ kumsiŋ gud kel té ɓasiŋa haa məntəŋ mo? ‹Baymele nəmtiŋ fəlaŋ vəəgi bə giidu ne›, ɗalba ‹faa la apəya, ɗee la› mo? 6Səma ten gaŋ dərəŋ yaŋ wəra hebkəna minti ten *Kormə Hulúm də abay cəərə seŋkaŋa kəna bə aye vəəgi bə giiduŋ cəərə baymeleŋa.» Kəya wə waataŋ hulum bə hurufiŋ minti: «Faa la apəya, haa gisi nəmtiŋ la, ɗee la akera.» 7Hulum faŋ apəya wə kooroŋ akera faɗi. 8Bə minti kaa kə ablaw asaŋ kel teŋ kəyaŋ, walka jəmnəy wəra, yə əsəŋ bə tokɗe Pepeŋa gud bə minti wə ayaŋ kumsə abay taŋ a kaa kəsarkaŋ gəm.
Yeesu mante Matiye
(Mar. 2.13-17; Liki 5.27-32)
9A ko toŋa kəyaŋ, Yeesu kooroŋ. Wə asaŋ hulum kəman bə əsə-isi giidə kuli bə *tope lambaŋa, səmu minti Matiye. Wə wəətunu minti: «Bəəda guudən da!» Kəya Matiye faŋ apəya, wə kooroŋ guudu faɗi. 10Adoro kəya Yeesu kooroŋ a hame ger Matiye. Bə minti wə bə hame adaŋ, kaa ablaw əsəŋ bə hame sar *kaa gə guuduŋa duuru keɗe. Kaa teŋ haa anə *kaa kə tope lambaŋ də kaa kə bayməlaŋ. 11Bə minti kaanə *Farisiyeŋ asaŋ kel teŋ kəyaŋ, yə əsəŋ bə waate kaa gə guuduŋa faɗi minti: «Hulum bə hataŋ hame də kaa kə tope lambaŋ də kaa kə bayməlaŋ haa naanaanə mo?» 12Yeesu əskəŋ kel gə minti yə wəətənəy, kəya wə minti: «Kaa gə minti wəra holoŋ ɗe a golde maa kasi doktora mo? Ɗe suru haa kaa kə ɗemeŋ. 13Kel gə minti kefter kə Pepeŋ bə waate ciiriŋ, aŋ goldə gud kel diŋ la. Yə minti: ‹Ten golde katən haa minti tam jəə giidim pəsaŋ la sar kaŋa dəŋaŋ ji bə keere də bege bə kəmpuruŋ#9.13 Osée 6.6.› Gud maa mo ten bəŋ paapa gud kaa ɗekeriŋa ba, ten bəŋ haa gud kaa kə bayməlaŋa.»
Yə le ku Yeesu cəərə je də kuma bay hameŋ
(Mar. 2.18-22; Liki 5.33-39)
14Sərdə kaa gə gud Zaŋ Batisi bəŋ sar Yeesu da, yə əsəŋ bə law ku minti: «Are də kaanə *Farisiyeŋ yaakte kusrə are bə jaate də ku are. *Kaa gə guudum paapa bə yaake kusri bə *je də kuy ba, haa səm mo?» 15Yeesu hərnəy kel minti: «Hulum bə de həlgəŋ, gədəəru gə minti suruŋ neke bə isi də laawe də ko bə minti wə siriŋ mo? Paapa! Səma koŋ bə neke yaŋ minti kaŋ bə daw yaŋ warna, gədəəru neke yaŋ bə yaake kusri bə je də kuy kəm haa a ko toŋa#9.15 Yeesu bele waate haa minti kaa kə toŋ neke bə jaate də kuy a ko bə minti tó kəm siriya caw ba. Yə je də kuy haa də ko bə minti tó jəŋ ne paapa siriya ada baŋ.. 16Hulum mele kepteŋ də dəməəmə təmarwa də minti kəm bay kuɗfi cekiŋ dər ko bə co'ə-co'e də dəməəmə də gayə-geyeŋa bə õya də kumsə ba. Gud maa mo dəməəmə təmarwaŋ hare bə he wəra a dərə meɗeɗ-ɗeɗi də nayta də gayə-geyeŋ warna ku na də pəə-pi. Kəya ko bə caarə-caareŋ ze guudu máŋ wəra ada pisi ze. 17Ana paŋ, hulum ge kumuy bə atələələm bə minti kəm bə de siipəŋa kimirwiŋ giidə mandəhaŋ golgo pəərəŋki ba. Wə gəənu ne adaŋ, wə naake wəra. Kumuy ãye wəra, mandəhaŋ bese wəra gəm. Kumuy bə minti kəm bə de siipəŋa kimirwiŋ, yə gaw la giidə mandəhaŋ kimirwi ɗaw#9.17 Yeesu bele waate haa minti kar gə minti tó hətəy a kaŋ ha'aŋ, yə kəmarwaŋ. To'osi də dayday yə kolə la..»
Tərnə hulum bə tiinə kaanə Ziwifiŋ, də həlgə də minti ɗootoŋ ku dəməəmə kə Yeesuŋ
(Mar. 5.21-43; Liki 8.40-56)
18Də ko bə minti Yeesu bə wəətəy kel teŋaŋ, hulum kəman bə tiinə kaanə Ziwifi tuukuŋ suru ada. Wə haɓaŋ tiinu faɗi bə wəətu minti: «Tərnən meŋ warda hebkəna da, səma bəəda a mele kaasam cəərə, kəya a hare yaŋ wəra dədərgə.» 19Kəya Yeesu faŋ apəya, wə təpaŋ gud huluma də *kaa gə guuduŋ faɗi.
20A ko toŋa kəyaŋ, həlgə kəman yaŋ ada, tiirə laataŋ bə ɗəma hor cuuru ɓasi. A zeŋ kerkə Yeesu, a ɗeŋ a ɗoote ku dəməəmə nuutuŋ yəlaŋ 21də ɗikiŋ minti: «Ten ɗootoŋ ku dəməəmə ne nuutuŋ anəkay təwaŋ, ten seere yaŋ wəra.» 22Yeesu haraŋ duru adoro kəyaŋ, wə asna, wə waatana faɗi minti: «Tərnənti, teŋə diri la! De niitiŋ siiriniy ne wəra.» Dər cəwa taŋa faɗi, həlgəŋ seereŋ wəra.
23Bə minti Yeesu tuukuŋ warna ger kumnaŋ naŋ, wə asaŋ kaa kə ufi kar bə ufi, naakte kuŋ nuutu gil bagŋ. 24Kəya wə wəətənəy minti: «Aŋ vaa la wəra tiilima, gud maa mo tər paapa də mee-me ba, a kəlaŋ kəna kin.» Kəya kaŋ əsəŋ bə dəfɗu faɗi. 25Kaŋ vaŋ wəra tiilima vaa kəyaŋ, wə kəlaŋ aləw na. Wə haŋ kasi tər, kəya a faŋ wəra apəya faɗi. 26Kel teŋ duusuŋ wəra giidə ko toŋa keɗe gəm.
Yeesu pəŋti dər kaa kə bəwə-bəwi ɓasi
27Bə minti Yeesu yaakaŋ ko toŋ wəraŋ, a kəkəy bə ɗe naŋ, kaa kə bəwə-bəwi kəman ɓasi kooroŋ guudu da bə naakte kuy da minti: «*Kormə Davidiŋ, asə caadə are la kəm mo!»
28Bə minti Yeesu tuukuŋ wəra akeraŋ, kaa kə bəwə-bəwiŋ zeŋ suru da. Kəya wə ləənəy kuy minti: «Aŋ yaŋ nuutu gə doo-de minti ten bə nakə-neke bə seereŋ wəra mo?» Yə minti: «Barkaŋ, are gə doo-de.» 29Kəya wə maltaŋ kəəsu diri, wə wəətənəy minti: «Gud bə minti aŋ doŋ minti ten bə nakə-neke bə seereŋ, aŋ seerə la wəra.» 30Kəya diri pəŋtəŋ wəra, a máŋ bə ase faɗi. Kəya wə wəətənəy wəra kaŋkaŋ minti: «Aŋ jeɓrə la pisi! Aŋ a waate kel teŋ kəya wəra minti hulum əsəy la ba.» 31Də teŋ keɗe, yə vaŋ warna kaynaŋ, yə əsəŋ bə wəətu səmu warna giidə koŋ na keɗe.
Yeesu biŋi ku hulum bə minti ba'-ba'iŋ wəra
(Liki 11.14-15)
32Də ko bə minti yə kooroŋ, kaa bəŋ da də hulum sar Yeesu da. Kəwal a jəŋ cuuru, yə kulnu wəra ba'-ba'i. 33Bə minti Yeesu pəŋ kəwal wəra cəərə huluma anəkay, hulum əsəŋ bə waate kela wəra faɗi. Kəya kaŋ ŋələŋ ablaw, yə əsəŋ bə waate minti: «Hulum asaŋ kumsə kel teŋ kəya hõy bə ji aduubə də kaanə Israyela ba.» 34Kəya kaanə *Farisiyeŋ əsəŋ bə waate minti: «Əynu abay də sarme kəwal haa kumna kə kəwal.»
Laaweŋ de Yeesu gud kaŋa
(Mar. 6.34; Liki 10.2)
35Yeesu əsəŋ bə gəryi giidə vila daana wəlasiŋa bə hate kaŋa giidə *kuli bə toose neeteŋa, bə waate *Kel pəsaŋ kəmarwaŋ gə cəərə *Kumna kə Pepeŋa, bə seerte gidiirə ɗemeŋa wəra keɗe də kaa kə dagtə-dagteŋ wəra keɗe gəm. 36Caaca duunu gud kaa kə ablawa gud bə minti yə wəra gə gayə-geye daana gə lentə-lente damdi kaamaŋ gə bay hulum bə əməy ana. 37Kəya wə əsəŋ bə waate kaa gə guuduŋa minti: «Kaasaw jəŋ ablaw, səma kaa gə cəməy gə kerpə-kerpe. 38Aŋ toose bərdə akaŋ la minti wə vaa kaa kə joŋre da də ada bə bi a cəmu kaasaw nuutuŋ wəra#9.38 Yeesu bele waate haa minti kaŋ ablaw bə mi minti hulum waatə *Kel pəsaŋ kəmarwaŋ gə ayə seereŋ la a té, səma kaa gə minti ɗe a wəətəy gə kerpə-kerpe..»
Právě zvoleno:
MATIYE 9: KERNT05
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
Texte de la Bible: Kera © Alliance Biblique du Tchad, 2004.