Ja̰ 1
1
Tar gə ɔji dɔ təbə, gə lokarə, gə Ngon kara
1Tar ja ga̰ kede dɔngɔr, Tar le ga̰ kede naa gə kara baa gə Luba, Tar le to gə Luba tɔ. 2Lo kuma kudu neje gə tɔ̰y le, ꞌne ga̰ naa gə gə Luba. 3ꞌNe ja ɓa n-unda ne neje tɔ̰y, ngaɓa ne kara be gə gə ga̰ gə lal kar n-to njegəl-e le godo tɔ. 4Ɗəw gə lə-a ꞌne ɓa təbə ga̰ ne, ngaɓa təbə le to gə lokarə gə ndogo dɔ dəwje gə tɔ. 5Lokarə le ndogo cil ciməri gə, ngaa cil ciməri dum dɔ-ɛ ang.
6Luba ula dəw kara gə ri-a na Ja̰. 7Ja̰ le ɗe gə nje pa tar naji lə lokarə le, mba kar ɗəw gə lə-a ɗaa dəwje tɔ̰y ꞌta ne kagə. 8Ja̰ le to gə lokarə ang, ngaa ye ɗe gə njetar naji lə lokarə. 9Lokarə le to gə lokarə gə tɔgərɔ gə ɗe ndogo dɔ nangə gə nee, mba kar dəw gə ɗa-ɗa kara o ne lo. 10Tar le ga̰ dɔ nangə gə nee, ngaɓa dɔ nangə le to gə nekunda lə-a, ngaa dəwje gə dɔ nangə nee ꞌtəl gər-e ang magə. 11N-ɗe horo njeka-ɛje gə ja, ngaa njeka-ɛje d-uwa-a gə rɔ-je gə ang. 12Ngaa dəwje tɔ̰y gə d-uwa-a gə rɔ-je gə ngaɓa nje gə ꞌta kagə gə ri-a ɗaa, n-ar-je singamongə ar ꞌtəl ꞌto ne gə nganje lə Luba. 13ꞌJejee nee le d-uji-je ɗəw məsə gə ang nəm, ɗəw mə njigi gə lə darɔ gə ang nəm, ɓa gə ɗəw gə mə njigi gə lə dəw ang nəm tɔ, ngaa gə ɗəw mə njigi gə lə Luba.
14Tar le təl rɔ-ɛ gə dəw, cibi ɓa isi horo-si gə mənuji gə tar gə tɔgərɔ ɗusu m-e tub-tub, ngaɓa sijee j-o rɔnduba lə-a, to to gə rɔnduba kar Ngon kara gə inga rɔ Bɔ-ɛje gə. 15Ja̰ Njeɗabatɛm pa tar naji lə-a, ila ne ndu-e nangə ɓolong na: Dəw gə nee le ɓa m-pa tar lə-a kede m-pa na: Dəw gə ore go-m le, ɗe no-m gə kede nam, mba n-ga̰ kede nam ɓa d-uji-m ꞌma ɓi. 16Be ɓa, gə go nebaw lə-a gə unda kubu le, sijee tɔ̰y j-inga ne ne ji-a gə ngaɓa mənuji lə-a kara j-inga gə dɔ mar-ɛ gə dɔ mar-ɛ gə nəm tɔ; 17mba Luba ar torondu-e ɗe gə ɗəw gə lə Moyiji, ngaa tar gə tɔgərɔ gə mənuji ɗaa ɗe ɗəw gə lə Jeju Kirisi. 18Dəw kara gə o Luba gə kəm-e le godo; ngaa, Ngon kara gə to Luba gə ga̰ naa gə kara baa gə bɔ-ɛje ɓa ɗe riba dɔ-ɛ ar-si ja gər-e.
JEJU UN KUDU KULA LƏ-A
Tar naji lə Ja̰ Njeɗabatɛm
Mat 3.1-6,11-12; Mrk 1.1-8; Lug 3.15-18; Ja̰ 5.33-36
19Oje tar naji gə Ja̰ Njeɗabatɛm pa, logə Jiibije gə Jerujalɛm d-ula njekapoloje gə nje gə gəl ka Lebi gə d-ar dəji-e tar na: ꞌI le ꞌto na wa? 20Ja̰ Njeɗabatɛm kara ɗəgə tar ang ɗaa ila-je kəne gə maj-ɛ ja na: ꞌMa m-to Kirisi ang baa.
21Ɗaa ꞌtəl ꞌdəji-e ja cibi na: Ɗaa ꞌto gə na ja wa? ꞌI le, ꞌTo Eli wa? N-pa na: M-to Eli ang baa. Ɗaa ꞌI ɓa ꞌto pajambərə le wa? Ɗaa n-ila kəne na: Ə̰ə̰ə̰. 22Ɗaa ꞌtəl ꞌpa d-ar-ɛ cibi na: ꞌI, ꞌto na ja wa? Mba kar ja təl j-aw pa j-ar nje gə d-ula si le; ꞌI ja le, tar ɗi ɓa ꞌpa ɔji dɔ-i wa? 23Ja̰ ila kəne na:
ꞌMa m-to dəw gə uru ꞌkuwi mə ndag lo gə na:
ꞌGɔl-je ɗəw lə Mbayɓe.
To gə pajambərə Ejay pa.
24Nje gə d-ula-je le ꞌto gə Parijiyɛ̰je 25ꞌDəji-e na: ꞌI le, to gə ɓo ꞌto Kirisi ang nəm, Eli ang nəm, ngaɓa ꞌto pajambərə ang nəm tɔ ngaa ꞌɗa dəwje batɛm mba ɗi wa? Ɗaa Ja̰ təl ila-je kəne na: 26ꞌMa, m-ar horo-si gə nee ja, m-ɗa dəwje batɛm mə man gə, ngaa dəw kara gə ꞌgər-eje ang ja aw ɗe go-m gə əng. 27ꞌMa m-asə tudu kula sabɔgɔ lə-a ang.
28Neje nee le nday mə ɓe gə Ɓetani, tura man Jurədɛ̰ gə, lo gə Ja̰ ɗa dəwje batɛm kəne.
29Lokar-ɛ ɗaa, Ja̰ o Jeju aw ɗe gə ɓə lə-a ɗaa, pa na: Oje Ngon badəm lə Luba gə a kɔr neɗa gə kṵra̰y lə dəwje gə dɔ nangə gə nee. 30Dəw gə m-pa tar lə-a m-pa na: Dəw gə ore go-m le, ɗe no-m gə kede nam, mba n-ga̰ kede nam ɓa d-uji-m ꞌma ɓi. 31ꞌMa ja kara m-gər-e ang, ngaa gə mba kar n-kila rɔ-ɛ gə ɗaga kəm Ijirayɛlje ɓa, m-ɗe m-ɗa ne batɛm mə man gə. 32Ja̰ pa tar naji lə Jeju na: M-o Njil ḭ dara to to gə dər kuul be ɗe isi dɔ-ɛ gə. 33Ngaɓa ꞌma, m-gər-e kede ang, ngaa Luba gə ula-m ar-m m-ɗa batɛm gə man le ja pa na: Dəw gə a ko Njil a kḭ dara ɗisi isi dɔ-ɛ gə ɗaa, ye ɓa to dəw gə a ɗa batɛm gə Njil Njerɔsangə. 34Be ɓa, ꞌma m-o gə kəm-m ɗaa m-ɗa tar naj-ɛ to gə ꞌne ja n-to Ngon lə Luba.
Ngan njenendoje lə Jeju gə dɔngɔr
Mat 4.18-22
35Lokar-ɛ ɗaa Ja̰ təl ar gə lo-e gə əng ja ɓi gə ngan njenendoje lə-a joo; 36n-a lo n-o Jeju gə aw nday ɗaa n-pa na: Oje ngon badəm lə Luba. 37Logə ngan njenendoje lə-a gə joo le d-o tar gə n-pa ɗaa d-ɔdə d-aw go Jeju gə. 38Logə Jeju kəl go-e, oje to gə d-aw ndole go-e ɗaa, dəji-je na: Ɗi ɓa aw sangəje wa? ꞌTəl D-ila-aje kəne na: Rabi – kɔr m-e na: Njenetɔji – lo kisi-i to ɗa wa? 39Jeju pa ar-je na: ꞌƊeje ɗaa a koje. Be ngaa, ꞌjejee d-ɔdə d-aw sə-a d-aw d-o lo kisi-e; ɗaa ꞌɗəm d-isi sə-a ndɔ-ɛ gə əng le tɔ. Kar-ɛ gə əng le a kaw gə ne gə ngira kar gə sɔɔ je əng be gə kar kumatagə.
40Ngan njenendoje gə joo gə d-o tar gə Ja̰ pa ɓa ꞌndole ne go Jeju le, dəw gə kara ri-a na Andəre, ngon ko̰ Simo Piyɛr. 41Ngon ko̰-ɛ Simo ja n-inga dɔngɔr, ɗaa n-pa n-ar-ɛ na: Sijee le j-inga Mesi, kɔr m-e na: Kirisi. 42Be ɓa n-ɔr no-ɛ n-aw sə-a ɓe lə Jeju. Logə Jeju a-e jii ɗaa pa na: ꞌI to Simo, ngon lə Ja̰: D-a ɓar-i Sepas, kɔr m-e na: Kɔr ər.
43Lokar-ɛ, logə Jeju njigi kaw gə Galile ɗaa, inga Pilibi, ɗaa pa ar-ɛ na: Uwa go-m. 44Pilibi gə Andəre je gə Piyɛr le, ɓe lə-je kara baa Bɛdəsayida.
45Pilibi inga Nataniyɛl ɗaa pa ar-ɛ na: Sijee j-inga dəw gə mbede lə Moyiji gə mbede lə pajambərəje ꞌpa tar lə-a, Jeju gə ɓe gə Najarɛd, gə to ngon lə Jəjəb le. 46Nataniyɛl ila kəne na: Ne gə may a kḭ ɓe gə Najarɛd tɔ wa? Be ɓa Pilibi təl pa ar-ɛ na: ꞌƊe ɓoo. 47Logə Jeju a lo o Nataniyɛl gə aw ɗe ɗaa pa na: Oje dəw gə Ijirayɛl gə kuji kəy gə pa tar gə ɗəgərə ang ɓa aw nee. 48Nataniyɛl təl dəji Jeju na: ꞌGərə-m lo gə ɗa gə wa? Ɗaa Jeju pa ar-ɛ na: Logə ar kɔy tungu gə, kede nam ɓa kar Pilibi ɓar-i ɓi ja m-o-i ɗɔdə. 49Nataniyɛl təl pa na: Njenetɔji, ꞌI le ɓa ꞌto gə ngon lə Luba, ꞌI le ɓa ꞌto gə mbay gə Ijirayɛl. 50Jeju ila kəne na: Mba m-pa na m-o-i kɔy tungu gə ɓa um mə-i kəne nee ɗaa, a ko neje gə to ɓəəl ya̰ ja ɓi! 51Tar gə tɔgərɔ ja m-pa m-ar-si, a koje ta dara a cɛ̰, ngaɓa anjije lə Luba d-a kal kaw taar gə ɗisi kuru nangə dɔ Ngon lə dəw gə.
Právě zvoleno:
Ja̰ 1: lap
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
© 2020, ATALTRAB. All rights reserved