Ja̰ 10
10
Njenekuul gə badəmje lə-a
1Tar gə tɔgərɔ, m-pa m-ar-si, dəw gə andə mə kinga gə lə badəmje gə ta ɗəw ang, ngaa al dɔ-ɛ gə lo gə mbɔr kara ɗaa, nj-ɛ nee le to gə nje ɓogo ngaɓa gə gayim nəm tɔ. 2Ngaa dəw gə andə gə ta ɗəw nama to gə njekuul badəmje. 3Njengəm ta ɗəw ɔr ta ɗəw ar-ɛ ɗaa badəmje d-o ndu-e; badəmje gə ꞌto gə njeka-ɛje le, n-ɓar-je, ye gə ɗa-ɗa kara gə ri-a ri-a, ɗaa n-aw gə je ɗaga. 4Logə n-ar-je ꞌce ɗaga tɔ̰y nam ɗaa, n-nja no-je gə kede, ɗaa badəmje d-uwa go-e, mba ꞌgərə ndu-e. 5D-a ndole go njembaa ang ja saar gə no; cibi ngaɓa, d-o-e nama d-a ka̰y-ɛ gə ka̰y mba ꞌgərə ndu njembaaje ang. 6Jeju pa tar gə ko̰ tar ar-je ngaa ꞌgərə gəl ne gə n-pa tar-ɛ nee le ang.
7Jeju təl pa to gə ɗangə cibi na: Tar gə tɔgərɔ ja, m-pa m-ar-si, m-to gə ta ɗəw kandə lə badəmje. 8Dəwje tɔ̰y gə ꞌɗe no-m gə kede le, ꞌto gə nje ɓogoje gə gayimje baa, ngaa badəmje d-o tar lə-je ang. 9M-to gə ta ɗəw, to gə ɓo dəw andə gə ɗəw gə ɓə lə-m nama a kinga təbə, n-a kaw gə n-a təl ɗaa n-a kinga nekusa t-ɛ. 10Njeɓogo ɗe gə mba ɓogo gə ɓogo, gə mba tɔl gə tɔl, ngaɓa gə mba busu ne gə busu ja baa. ꞌMa m-ɗe gə mba kar dəwje d-inga təbə, ngaɓa kar d-inga gə dɔ mar-ɛ dɔ mar-ɛ gə.
11ꞌMa m-to gə njenekuul gə may; njenekuul gə may ḭya̰ rɔ-ɛ ar yo mba badəmje lə-a. 12Njeɗakula lar gə to gə njenekuul gə tɔgərɔ ang, ngaɓa badəmje ꞌto gə k-ɛ ang le, n-o da ngangə aw ɗe ɗaa n-uba badəmje n-ḭya̰-je n-a̰y kagə n-aw; ɗaa da ngangə uwa-je gə k-ɛ ngaɓa sɛ̰rɛ̰-je pəsəsə tɔ. 13Mba n-to gə njeɗakula lar baa, ɗaa njɛ̰ ja baa kara ɔs-ɛ dɔ badəmje gə ang. 14ꞌMa m-to njekuul badəmje gə may, m-gərə badəmje lə-m, ngaɓa badəmje lə-m kara ꞌgərə-m tɔ, 15ɗəw kara baa to gə Bɔ dəwje gərə-m ꞌma ngaɓa ꞌma kara m-gərə Bɔ dəwje tɔ; ɗaa m-ḭya̰ rɔ-m m-ar yo mba badəmje lə-m. 16Badəmje lə-m gə ɗangə ꞌga̰ kəne əng ɓi gə ꞌgodo mə kinga gə nee ɗaa ꞌje gə kən kara, may kar-m m-ɗe gə je; d-a ko ndu-m ɗaa d-a kum naa gə kuduɓe kara baa ngaɓa njekuul-je kara kara baa tɔ. 17Bɔ dəwje ɓol-m mba m-ḭya̰ təbə lə-m m-ila kɔrɔ ɓa m-təl m-inga to gə ɗangə ɓi. 18Dəw kara kara ɔr təbə lə-m ang, ngaa ꞌma ja gə dɔ-m m-ḭya̰ təbə lə-m m-ila kɔrɔ; M-aw gə singamongə mba kḭya ne təbə lə-m kila kɔrɔ ngaɓa m-aw gə singamongə mba təl kinga ne to gə ɗangə tɔ; ye gə nee ɓa to gə ndu gə m-inga ta Bɔy gə.
19Kay naa təl to horo Jiibije gə ɔji dɔ tarje gə nee le tɔ. 20Dəwje bula ya̰ horo-je gə ꞌpa na: Njil gə kṵra̰y ɗa ɓe m-e gə, n-to gə mbə, mba ɗi ɓa oje tar lə-a wa? 21Ngaa nje gə ɗangə ꞌpa na: Tarje gə nee le to tar pa lə dəw gə njil gə kṵra̰y ɗa ɓe m-e gə ang; ngaɓa njil gə kṵra̰y asə cɛ̰ kəm nje kəm tɔ wa?
Dəwje ꞌmbadə Jeju
22ꞌƊa nay kun kəy kar Luba mə ɓebo gə Jerujalɛm, to gə nay kul. 23Jeju nja mə kəy gə lə Luba, aw gəl lo gə ꞌɓar-ɛ ta kəy lə Salomo tɔ, təl tɔ. 24Jiibije ꞌgugu dɔ-ɛ yir ɗaa ꞌpa d-ar-ɛ na: ꞌI a tɔ kəm lə-si masə gə be saar gə ndɔ gə ɗa gə wa? To gə ɓo ꞌto gə Kirisi nama ꞌpa ar-ɛ unja-si ngadə ja ar-si j-o. 25Jeju ila-je kəne na: M-pa m-ar-si ja ɗaa sisəy ꞌta-je kagə-m ang. Kulaje gə m-ɗa gə ri Bɔy le ja pa tar naji lə-m. 26Ngaa ꞌtaje kagə-m ang mba ꞌga̰je horo badəmje gə lə-m ang. 27Badəmje lə-m d-o ndu-m, ꞌma le, m-gərə-je, ɗaa ꞌjejee ꞌndole go-m tɔ. 28Ɗaa ꞌma, m-ar-je təbə gə to gə ndɔ gə ndɔ; d-a busu ang saar gə no ngaɓa dəw kara kara a kasə kuwa-je kɔr-je ji-m gə ang tɔ. 29Ne gə Bɔy gə ar-m le, to ɓəəl unda neje tɔ̰y ngaɓa dəw kara kara singamong-ɛ asə kɔr ne kara mə ji Bɔy gə ce ne ang. 30ꞌMa je gə Bɔy j-a to gə kara baa.
31Jiibije d-odo kɔr ər to gə ɗangə mba cila-a ne. 32Jeju təl pa ar-je na: M-tɔji-si neje gə may-may gə ḭ rɔ Bɔy gə bula ya̰. Ngaa ye gə ɗa ɓa ꞌnjigije gə mba cila-mje ne gə kɔr ər mb-ɛ wa? 33Jiibije d-ila-a kəne na: Mba kula gə may gə ꞌɗa ɓa j-a cila-i gə kɔr ər mb-ɛ ang ngaa mba taji gə ꞌtaji Luba, ngaɓa mba ꞌI gə ꞌto dəw nee ja baa uwa rɔ-i gə Luba. 34Jeju ila-je kəne na: Tar gə nee le, ꞌɗa mə torondu gə lə-si na: M-pa na: ꞌToje gə Lubaje! 35Be ɓa nje gə ꞌpa tar lə Luba d-ar-je le, ꞌɓar-je Lubaje tɔ. Mbede lə Luba gə nee le, dəw asə tuji ang. 36Dəw gə Bɔ dəwje ɔr-ɛ unda-a gə losang-ɛ ngaɓa ula-a dɔ nangə gə nee le, sisəy, ꞌpaje ar-ɛje na: ꞌTaji Luba, mba m-pa na: M-to gə Ngon lə Luba. 37To gə ɓo m-ɗa kulaje lə Bɔy ang ɗaa, ꞌtaje kagə-m ang! 38Ngaa to gə ɓo m-ɗa nama, le ꞌtaje kagə-m ang kara, ꞌtaje kagə kulaje nee gə mba kar ꞌgərəje ne unja-si ngadə to gə Bɔy isi mə-m gə ngaɓa ꞌma kara m-isi mə Bɔy gə tɔ. 39Be ɓa ꞌsangə ɗəw to gə ɗangə ja ɓi gə mba kuwa-a, ngaa n-ce ji-je gə. 40Jeju təl aw tura Jurədɛ̰ gə to gə ɗangə, lo gə Ja̰ un kudu ɗa batɛm kəne, ɗaa n-isi kəne. 41Dəwje bula ya̰ ꞌɗe rɔ-ɛ gə ɗaa ꞌpa na: Tɔgərɔ ja, Ja̰ le ɗa netɔji kara ang ja saar, ngaa tar tɔ̰y gə n-pa ɔji dɔ dəw gə nee le, to tar gə tɔgərɔ ja. 42Lo-e gə əng ɗaa, dəwje bula ya̰ ꞌta kag-ɛ.
Právě zvoleno:
Ja̰ 10: lap
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
© 2020, ATALTRAB. All rights reserved