Lugu 20
20
ꞌDəji tar ɔji dɔ Singamongə lə Jeju
Mat 21.23-27; Mrk 11.27-33
1Ndɔ kara be, Jeju aw tɔji dəw mə ɓeje ne mə kəy gə lə Luba ngaɓa ila mbərə Tar gə May ɗaa, buba njekapoloje gə njekɔr gəl toronduje ngaɓa buba ɓeje ꞌce pɔɔ d-inga-a. 2ꞌDəji-e na: Inga ndu nee le ta na gə ɓa aw ɗa ne ne gə nee le wa? Ose na ɓa ar-i ndu mba kar-i ꞌɗa ne wa? 3Jeju ila-je kəne na: ꞌMa kara m-a dəji si tar kara. 4Batɛm gə Ja̰ ɗa le ḭ dara ose ḭ rɔ dəwje gə wa? Ila-mje kəne. 5Ngaa ꞌwɛdə tar horo naa gə na: To gə ɓo j-ila kəne na: Ḭ rɔ Luba gə nama, n-a pa na: Mba ɗi ɓa sisəy ꞌtaje kag-ɛ ang wa? 6To gə ɓo j-ila kəne na: Ḭ rɔ dəwje gə nama, dəw mə ɓeje tɔ̰y d-a cila si gə kɔr ər tɔl si, mba ꞌgərə to gə Ja̰ to pajambərə. 7Be ɓa, d-ila Jeju kəne to gə ꞌgərə lo gə batɛm lə Ja̰ ḭ kəne ang. 8Ɗaa, Jeju pa ar-je na: ꞌMa ja kara dəw gə ar-m ndu ɓa m-ɗa ne nee gə kən le m-a pa kar-si ang tɔ.
Gusutar gə ɔji dɔ nje ɗa kula bḭyə̰
Mat 21.33-46; Mrk 12.1-12
9Ɗaa Jeju un kudu pa gusutar gə nee ar dəw mə ɓeje na: Dəw kara maa kagə gə ri-a na bḭyə̰. N-ḭya̰ ji njeɗa kula bḭyə̰je gə ɗaa, n-ɔdə n-aw mba gə kur-e əw. 10Logə nay kunja kandə bḭyə̰ le asə ɗaa, n-ula ngon njekula kara ɓə lə njeɗa kula bḭyə̰je le, mba kar d-ar-ɛ bḭyə̰ k-ɛ le n-ɗe ne n-ar-ɛ; ngaa ꞌtɔb-ɛ ji-a dɔro baa. 11N-təl n-ula ngon njekula gə ɗangə ja cibi; ngaa d-uwa ꞌkunda-a, ꞌtaj-ɛ ngaɓa ꞌtɔb-ɛ ji-a dɔro baa. 12N-təl n-ula njekum gə munda gə ɗangə, ye ja kara d-ar-ɛ do ɗaa ꞌtɔb-ɛ. 13Njendɔ bḭyə̰ le pa gə m-e gə na: M-a ɗa ban ngaa nee wa? M-a kula ngon njigi lə-m ja ngaa, ɗaa bayɛ̰ d-a ɓəəl-e. 14Ngaa logə njeɗa kula bḭyə̰je d-o ngon njigi le ɗaa, ꞌpa tar horo naa gə na: Oje ꞌne gə nje kuwa nenduba le ɓa nee, ꞌɗe-je ar-si j-a tɔl-ɛje, mba kar nenduba le to kar-si. 15Be ɓa ꞌndɔr-ɛ d-aw sə-a gir kinga gə ɗaga ɗaa ꞌtɔl-ɛ d-ila-a kɔrɔ. Ɗi ɓa njendɔ bḭyə̰ nee le a ɗa gə je wa? 16N-a ɗe kar ꞌtɔl njeɗa kula bḭyə̰je nee ɗaa n-a kun bḭyə̰ le kar nje gə ɗangə. Logə Parijiyɛ̰je d-o tarje nee be ɗaa, ꞌpa na: A to to gə be ang! 17Ngaa Jeju aje ji ɗa pa na: Tar gə to mə mbede gə nee le pa na ɗi wa?
Ər gə njekunda kəyje ꞌmbadə le
ye ja təl to ər kunda kil kəy.
18Dəw gə a ce koso dɔ ər gə nama, a guru rɔ-ɛ kəne, ngaɓa dəw gə ər nee ce oso dɔ-ɛ gə nama a rund-e pulug-pulug.
19Dɔ kar-ɛ gə əng ja njekɔr gəl toronduje gə buba njekapoloje ꞌsangə ɗəw mba kuwa Jeju, ngaa ꞌɓəəl bula dəwje. ꞌJeje ꞌgərə to gə Jeju pa gusutar nee ɔji dɔ-je.
Lar gədə ɓe lə Sejar
Mat 22.15-22; Mrk 12.13-17
20D-un kudu kunda kəm-je go Jeju gə ɗaa, d-ula dəwje gə ꞌɗa rɔ-je gə dəwje gə dana gadə-gadə be, d-ar d-aw ꞌnga̰ Jeju. ꞌSo̰-ɛ gə mba kinga tar gə ban wo̰yḭ t-ɛ gə, ɓa gə mba kuwa-a kula-a ne mə ji njeko̰ ɓeje gə Rɔm gə#20.20 Mrk 3.6. 21ꞌDəji-e tar gə tɔgərɔ na: Njenetɔji, j-a gərə to gə ꞌto nje pa tar gə tɔgərɔ, ngaɓa ꞌtɔji dəwje ne gə ɗəw gə dana gadə-gadə. ꞌI ɔr kəm dəwje ang ngaɓa ꞌtɔji dəwje pa nja gə ta kəm Luba nəm tɔ. 22Ɗəw to kar j-uga lar gədə ɓe lə Sejar ose j-uga ang wa? 23Ngaa Jeju gərə tar mula lə-je, ɗaa ila-je kəne na: 24ꞌTuji-mje sulay kara ar-mje m-o. N-dəji-je na njil dɔ na, gə ri na ɓa d-unja kəne wa? D-ila kəne na: To kar Sejar. 25N-pa n-ar-je na: Ne gə to kar Sejar nama ar-je Sejar, a ɓo ne gə to kar Luba nama ar-je Luba. 26D-asə pa tar kuwa Jeju ɔji dɔ tar p-ɛje ang. Tar gə n-ila-je kəne le dum dɔ-je ɗaa d-udu ta-je jigi.
Tar gə ɔji dɔ ndol lə nje gə d-uy
Mat 22.23-33; Mrk 12.18-27
27Be ɓa, Sadusiyɛ̰je gə kɛm ꞌɗe mbɔr Jeju gə. Sadusiyɛ̰je gə ꞌpa na dəw uy nama ndol ang le, ꞌdəji-e tar gə na: 28Njenetɔji, Moyiji ɗa mə mbede gə ar-si na: To gə ɓo dəw ta jene ɓa uji nganje ang baa ɓa uy nama, ngon ko̰-ɛ a ta jene nduba lə-a mba kunda ne ko ngon ko̰-ɛ gə uy le. 29To gə be ɓa, ngan ko̰ naaje siri, dəw gə dɔngɔr ta jene ɗaa uy, lal kuji ne nganje. 30Ye gə njekum gə joo, 31ngaɓa njekum gə munda kara ta jene le, ɗaa to gə be ja cibi, ngan ko̰ naaje gə siri nee le d-uy tɔ̰y ꞌlal kuji nganje. 32Go-je gə ɗaa, jene le kara uy tɔ. 33Ngaa ndɔ gə dəwje gə d-uy d-a ndol le se, na ɓa horo ngan ko̰ naaje siri nee le n-a to jene lə-a wa? Mba ꞌt-ɛje gə ta ja gə kəm-je gə siri tɔ̰y. 34Jeju ila-je kəne na: Dɔ nangə nee le jingawje kara ꞌta jeneje nəm, jeneje kara ꞌta ngaw nəm tɔ. 35Ngaa nje gə Luba oje to gə d-asə kandə ɓeko̰ gə lə-a ndɔ gə bara, ngaɓa d-a ndol naa gə gə nje gə d-uy le, jingawje gə jeneje d-a ta naa ang. 36D-a kasə kuy ang saar gə no, mba ꞌto ɗəw kara baa to gə anjije be, ɗaa d-a to nganje lə Luba mba Luba ja ndol-je kar ꞌto ngan-ɛ. 37Ɗaa may kar, dəwje gə d-uy le, ꞌndol ɓa. Moyiji ja kara pa arə ngadə, lo gə ꞌne n-ɔr ne gəl tar gə ɔji dɔ ko bul gə o̰ pər le, ꞌne ɓar Mbayɓe na: Luba lə Abəraham, Luba lə Ijagə, gə Luba lə Jakobo. 38Luba to Luba lə dəwje gə d-uy ang, ngaa nje gə d-isi kəm baa, mba tɔ̰y ja d-isi kəm baa ɔji dɔ-ɛ. 39Njekɔr gəl toronduje gə kɛm ꞌpa na: Njenetɔji, tar gə ꞌpa le to gə dɔ gɔl-ɛ ja. 40Be ɓa ꞌsangə ɗəw mba dəji-e tar ɔji dɔ ne gə ɗangə kara ang ngaa.
Kirisi to ngon lə Dabidi wa?
Mat 22.41-46; Mrk 12.35-37
41Jeju pa ar-je na: Na ban cibi ɓa dəw a pa na Kirisi to gə gəl kuji gə lə Dabidi ɓi wa? 42Mba Dabidi ja gə dɔ-ɛ pa mə mbede Paje gə na:
Mbayɓe pa ar Mbayɓe lə-m na:
Isi nangə dɔ ji kɔl-m gə,
43 Saar gə mba kar-m m-ar-i ꞌlagə njeba̰a̰je lə-i gə gɔl-i lag-lag wa?
44To gə ɓo Dabidi ɓar-ɛ Mbayɓe nama, n-a təl to ngon-e to gə ban cibi wa?
Tar gə ɔji dɔ njekɔr gəl toronduje
Mat 23.1-33; Mrk 12.38-40
45Jeju pa ar ngan njenendoje kəm bula dəwje gə d-ar d-o tar le na: 46Aje rɔ-si rɔ njekɔr gəl toronduje gə; ꞌnjigi mba nja gə kubu gə ngal yudu-yudu, ngaɓa kar d-unda ji-je go naa ɓa d-uwa ne ji-je ta nada; a ɓo kəy nendo gə nama, lokisi gə kede ja ɓa ꞌnjigi kisi kəne, cibi ꞌnjigi lo kisi riɓar lo muru bula gə. 47D-o̰ mə kəy lə jene ndubaje ləm-ləm d-ore dɔ-ɛ nangə ndəng ꞌdəji Luba ngɔɔgɔ-ngɔɔgɔ d-ar koro-je əwu mba kar dəwje d-o-je ne. D-a gangə tar gə to ɓəəl ya̰ dɔ-je gə.
Právě zvoleno:
Lugu 20: lap
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
© 2020, ATALTRAB. All rights reserved