LUKAS 24
24
Ar Yesus iluk agage wene
(Mat. 28:1-10; Mrk. 16:1-8; Yoh. 20:1-10)
1Hari minggu o keyalek mondok, ir kumi nen ongga obari pano mende pugurogo birugwa mende wolok kuburan arar lagugwa. 2Lagu-lagugwa, kuburan etoma nggir tu larek mende eti, arar danggologo lagagemo inil ka lagugwa. 3Kugu lagugwarik, ir enogo arar kwiyonla apmanggwe unggugu lagugwa, Ar Tuhan Yesus warek ebe dek arar karugwa. 4Nen ir eta inakla dibi yiluk, inobakte mbalek mendek werekma, ap inebe mbere tu putih mban akbinak ambik mende yugu, ineragalu inagur bikbak menari wagugwa. 5Menari wagugwama, ir inobade ambik arar etatuk, inendop yungguk togo agar taga yindu wandu yirugwa. Nen ir ap mbere enogo nen ir yoragu dogolir, “Ar ir akuni warek mende inakla nen iluk aga mende eti, nenaluk kir kwarir wagop? 6#Mat. 16:21, 17:22-23, 20:18-19; Mrk. 8:31, 9:31, 10:33-34; Luk. 9:22, 18:31-33Ar ebe yoma dek o. Ar arar iluk agama o! Wene ebe iluk paga: Ar o Galilea kinom dogolir, wene yokeragage mende, kinakla eberni o. 7‘Ar Akuni Inakbur eti, ap maduk ekwa mende ininggimo bugwi kalok, nen Ar ebe o kari karo paga warogo bugun o. Nen Ar inggi tiga hari paga warek dogoluk nen iluk arigin o,’ yiluk yirige eti, kir kinakla eberni o.”
8Yirugwama, ir kumi ernogo, Ar Yesus nen yirige mende eti, ir inakla ebertari wagage o. 9Etegerogo eku lagugwarik, ir kwiyonla yemenogo dambe kalok, arar uma lagugwarik, Ar Yesus aworomi inebe sebelas rasul mende enogo inom, nen ir ambetak mutok nugu lagugwa mende inom, wene ir ekugwa mende obogar yorarugwa. 10Kumi wene wolok rasul-rasul yora lagugwa enogo inendaga: Maria Magdalena o, Yohana o, nen Maria Yakobus agwiya o. Nen ir kumi amberak inom ar o. 11Ir Rasul-rasul nen, kumi yi wene nenggerogo yirtagwi, yiluk kumi wene yirugwa etanogo ebebar andalok dek. 12Ogwe, ar Petrus wundiluk mbu agan kuburan lagage. Lagagerek, we toba yiluk unggwi lagagerek, il birkega lagage, tu kain kafan nggolalek adigar il eta karige. Ar Petrus obade atuk, yoma nenggerogon etaga yiluk, akla idu wene eberir uma lagage.
Emaus tuan obakte nen ekugwa wene
(Mrk. 16:12-13)
13O eti paga, Ar Yesus aworomi ane waganggwi mende inebe mbere, o Yerusalem nen sebelas kilometer negen endaga Emaus etoma lagugwa. 14Imbirak lagu dogolir, wene ertagage mende mbililir lagugwa. 15Ir imbirak wene mbalir lagunem, Ar Yesus ebe arar inoba wagagerek, ir inom lagugwa. 16Ir nen Ar Yesus ebe inom laga inil karugwarik ar ogwe, nena nen talek ambi, Ar Yesus arar o, yiluk tenggelu ndak dek agage. 17Ma Ar Yesus nen ir yoraga dogolir, “Kir tuwan paga yoma, nena wene yir lektagwi o?”
Yoragi nanggige, inakla maduk atuk, inane nggaruk togon etagugwa.
18Nen, ir ap yanogo ambi endaga Keleopas ma, nen Ar Yesus yoga dogolir, “Nombae, kar kuro mende kadik ar, o Yerusalem yoma wene ngger etaga mende, kunggukdek keyagi o,” yiluk yorige.
19Ar Yesus nen wene kinok yoga dogolir, “Wene nena etaga nda?”
Wene onggo yogu dogolir, “Wene Ar Yesus ap ai Nazaret mende eti eke mende o. Ar ebe eti ap nabi arar ma, Ar ane obabur eka paga inom, nen yabu eka paga inom, nen Ar eti, Ar Allah ilka paga inom, nen akuni inilka paga inom, Ar ebe obarne ambik arar o.
20Ir Imam-imam kepala inom, nen akuni nir ninewai inom, ir nen, Ar ebe mondok min waruwak nen yiluk, pagago wogoragama, o kari karo paga warogo bega o. 21Nen Nir ninakla paga nen, Ar nen akuni Israel mende yoma ndilninabin andagwi mende o! Nen Ar warogo begarik kigik, yogondak hari ketiga paga arar etari waga o. 22Ambi ya eko o, kumi nir ninom mende, ir o keyalek kuburan lagu lagarik, nir ninagur lakbegama o. 23Nenaluk, Ar warek ebe dek agama o. Nen ir uma iniyok paga wagarik, yugu dogolir, nir malaikat mende mban ninil dago o, nen ir ap malaikat nen yugu dogolir, Ar Yesus ebe arar iluk agama yega o. 24Nen ap nir ninogari amberak, ir kuburan lagarik inil mbenarka mende, ir kumi nen wene yega mende eti, ebe wene ar yegama o. Nenaluk Ar Yesus warek ebe, ir inil kigikdek ar o.” 25Tuguluk Ar Yesus nen ir yoraga dogolir, “Kir nggembu mende arar o! Kiniliti mondok apir, wene ap nabi mende nen yirugwa mende ebebar andagwi dek o! 26Ar Ndilninakwa endaga mbogor eti, anggon panggon mende ndak ekbiluk, endaga mbogor etarigin yirige enaga kinonggok dek a?” 27Tuguluk Ar Yesus nen, wene Alkitab akla diru mbalek paga Ar abok yirugwa mende, Musa nen diru mbalkige mende paga inom, nen ir nabi-nabi diru mbalkugwa mende kudi paga inom, obogar emeriragage.
28Wene yir lagwi kigik, ir o desa lamo andarugwama etoma, oba korogar panggo yi lagugwa. Ogwe Ar Yesus enogo lak nen yiluk talek ar ekige. 29Eka agagemo, ir nen Ar pakbiluk yogu dogolir, “Nir werekma ninom doguwok o. Yogondak o muk ki aga o, nen ya o arar amum tebe agan lektaga o,” yiluk yorugwa. Yorugwama, Ar Yesus ir inuma inom nogo yuwok nen yiluk unggirige. 30Tuguluk erom inom nuwok nen yiluk korek tagugwarik nen, Ar Yesus nen Roti inggim wokbiluk, Allah wa, yiluk keyagi waka lagagerek, roti enogo inggi paga ugurogo wogoragage. 31Wogoraga kalok, yogo yi Ar Yesus ebe arar kogo o, yiluk andarugwa mende, tuguluk Ar Yesus ebe yanogo dek arar etagage. 32Dek agi nanggige, ir nen ar ambi yogik yugu dogolir, “Tuwan paga ninom wene mbalir wagu dogolir, Ar Allah wene Alkitab akla mende enggen mbililogo yorniraga kigik, niniliti adeknggen ambik etaga enaga kogop a?” yiluk yirugwa.
33Nen ir enogo arar mendok togon menatuk, o Yerusalem iniyok paga arar lagugwa. Lagugwa mende, ir Ar Yesus aworomi inebe sebelas enogo inom, nen akuni amberak inom etoma werekma, inil da lagugwa. 34Ir nen yugu dogolir, “Ar Yesus ebebar iluk agama o. Ar nen Simon nebe yi o, yiluk inugu kegemo o,” yiluk yirugwa.
35Ir Ar Yesus mutok lagu lagugwa mende, ir inebe mbere enogo wagugwarik, wene tuan paga inom abuk agugwa mende inom, nen roti ugurogo wogoraga paga yenggak karugwa mende inom, wene mbililogo yorarugwa.
Ar Yesus nen aworomi ane waganggwi mende inuguk darige wene
(Mat. 28:16-20; Mrk. 16:14-18; Yoh. 20:19-23; Kis. 1:6-8)
36Ir wene ekugwa mende yir lagunem ar, andalok dekma Ar Yesus inakla menaga lagagerek, wene yoraga dogolir, “Kinebe kinagurakma!” yiluk yoragage.
37Yiluk yigi nanggige inagur lalok, inobade agugwa. Nenaluk ir nen andagu dogolir, Ar agurengge ninoba waga yiluk andarugwa. 38Mende Ar Yesus nen yoraga dogolir, “Nenaluk kir ninobade yirtagwi o? Nen Nenaluk kiniliti pik pak panggol kikdek agotik? 39Ninggi inom, niyok inom, kinil kani. An nebe arar yoma neyagop a! Kinil birneyani, nen kininggi paknatni. Nenaluk, monggar eti, uno inom nen uwagalo inom dek o, An neyagop ya ndak-ndak, dek arar o.”
40Etegerogon yoraga dogolir, Ar Yesus nen ninggi naka yoma, nen niyok naka yoma, yiluk wakugwama inuguk darige. 41Eta paga, ir nen bi wakwi, adeknggen ekwi eku dogolir, iniliti oba panggolkwi negen dek agagemo, Ar Yesus nen yoraga dogolir, “Kir yoma erom amberak bogopma werek a?” yiluk yoragage. 42Yoragagemo, ir nen ikan goreng erek egu mbalek mende ambi wogorugwa. 43Wogorugwa ma, Ar Yesus nen ikan enogo wokbiluk, ir inuwagam yanogo ar narige.
44Tuguluk, Ar Yesus nen ir yoraga dogolir, “Wene ya, An kir ninom dogolir, An nen yokeragagi mende yanogo ar o: Ma wene An Nabok ar Musa yirige diru mbalek inom, nen ir ap Nabi nen yirugwa mende inom, nen Mazmur paga yirugwa mende inom, etoma obogar etarigin o.”
45Tuguluk Ar Yesus nen, Ir Alkitab wene diru mbalek mende eti, inakla ebetaruak nen yiluk tu kukige. 46Tu kurogo biluk, yoraga dogolir, “Alkitab mbalek paga nen, ndilninakwa endaga mbogor eti, Ar oba aik paik ndak erogo bumo, kener ndak waka dogoluk kambigin o. Kambiluk nen, Ar warek inggi mbere ambi dogoluk, ebe iluk arigin o. 47Nen, Ar Endaga Mbogor ndilninakwa eti endaga paga, ap inalebunu dombok etoma, ir maduk ekwi arar togok buak o, nen eti ekwi kalok, Ar Allah nen maga bagin o. Etiar ma, wene yi, o Yerusalem nen edo biluk, yorar wundino o. 48Ye wene nde wene etoma, obogar etarir waga karugup werek mende kinebe, kir yi arar o. 49#Kis. 1:4An nen, kir Kinombae nen wokiragin yiluk, Ar Ane amburu yirige mende eti, kinake arar lakbi warigin o. Ogwe kir nen, o kota ya ar torek welagwi kinagik, Ar Allah obarne kinoba wurabi warigin eti kudi paga arar o,” yiluk yoragage.
Yesus mbogor paga dagarige wene
(Mrk. 16:19-20; Kis. 1:9-11)
50Yoraga lagagerek, Ar Yesus nen ir wogorek, o Betania abel tekman paga etoma arar lagage. O eta arar ari lagugwarik, Ar inggi mbogor paga nggwe ilik bega lagagerek, ir enogo Ar Allah adeknggen mende inoba barige. 51Nen Ar eta eka kigik, Ar ebe mbogor paga arar wolok dagaga dogolir, Ar adik, ir inadik arar etagugwa. 52Eta eku lagugwarik, ir nen Ar endaga wogokdir iniliti adeknggen paga, o Yerusalem arar lagugwa. 53Lagugwarik, Ar Allah Ai Palek ma unggiluk dogolir, Allah endaga wogokdugu lagugwa o.
Právě zvoleno:
LUKAS 24: WLW
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas