Záan Bháàda
Bháàda
Zozi Klísɩ a Námadìè a bɔ́gʋ̀ɔ̀ lɩ̀à, kplɔkplɔnyɔ Záan jɩ́jrʋ̀ʋ, mà ɔ nɩ́ mɔ̀ɔ ɔ nyoku a ŋnɩ́ zɛ. Zozíi a kʋjɩ̀nyɔ̀ɔ̀ ɔ́ wà lɛ́ kpanyɩ bhè ɔ̀ kɔ̀ɔ wɔlɩ́ Záan cíle lɛ́ bɔ́gʋ̀ɔ̀ lɩ̀à mnɩ́ a, cémʋ́ ɔ nyoku ɔ́ sa a, nyʋa yì sáà (13.23; 19.26; 21.20).
Záan a bɔ́gʋ̀ɔ̀ lɩ̀à yà námadi ànɩ̀ɛ̀ ta a, bɔ́gwɩ̀ɛ̀ sɔ́ nɩ́ cí wɔlɩceamúó. Ʋ̀lɩa a mnɩ́, ɔ́ jɩ́jrà mɔ̀ɔ mà: Lagɔ a Yuwliyʋɔ́ a múóó ɔ́ ka a, ɔ́mɔ́ ŋwɔ́ɔ Zozíi. Lé ɔ́ cí sáà mà: «Lagɔ máa kɔ́ a nyʋa a wàwʋ́ kʋ́ lé ɔ́ sa ɔ yʋ́ a múóó ɔ́ ka a, lé nyɔɔ́ nɩ̀ kà ɔ́ fádùò a, ɔ nɩ ka tuo, ɔ ká kɔ́ɔ́ ʋ̀ nɩ́ bhɩada ka a yɛ́» (3.16). Zozíi a wɔlɩ́ kɔ́kɔ́mnɩ́ ànɩ kʋ ʋ́ lé ɩ nɩ́ námadì ànɩ̀ɛ̀ a bɔ́gwɩ a mnɩ́ ɩ̀ jɩ́jràlɔ̀ (Matíe, Málɩ́kɩ, lé Lúkɩ). Záan anɩ́ Zozíi nɩ cí lé ɔ́ nie lɛ́ mà: «Ná glíiyie nɩ́ àyɩ kla!» (2.4; 7.30; 8.20; 12.23; 3.27; 13.1; 16.32; 17.1). Ɔ kwɩ́ a yruó, yà ɔ lagɔɔ́ a gblàagblàayruó kʋ́ a wɔlɩ́ ɔ́ cíé, ɩ́ ka ŋnɩ́ lé ɔ bɔ́gʋ̀ɔ̀ lɩ̀à a mnɩ́ a wɔlɩ́ɛ́, ɔ́ɔ dílií mʋ́ lé ɔ́ cíí.
Tagàpɩ̀ɔ̀ ʋ́mʋ́ ŋwɔ́ɔ mà, lé Zozíi a glíyié ká kla a, ɩ́ wɔlɩ́ɛ́ ɔ́ nɩ a, Záan pápa àmɔ̀ mɩ́ (1.12). Ɔ́ anɩ́ Zán Batísɩ nɩ Zozíi a ŋwɔ́nɩ́srɩ̀lɛ. Ɔ́ anɩ́ cémʋ́ Zozíi wle ɔ tagàkʋ̀jɩ̀nyʋ̀àà a, Záan a bɔ́gʋ̀ɔ̀ sa àmɔ̀ mɩ́ dí kʋ́. Àa yɛ́ sáà cémʋ́ Zúfʋnyʋa a glɩ̀sɩ́sɩ̀ɛ̀ ka ŋnɩ́ lé Zozíi vʋ́vʋ̀à lé ɔ́ mʋ Zelízalɛ́mʋ a. Záan srʋ sɔ́kʋ́ àmɔ̀ cémʋ́ Zozíi yà nyʋa kɔ́kɔ́mnɩ́ sɔ́ cí lé ɔ́ cɩ́alaá Lagɔ̀wɔ̀lɩ kɔ́kɔ́mnɩ́ a. Ɔ́ cí sáà mà Zozíi nɩ lɛ̀wɔ̀lɩ kɔ́kɔ́mnɩ́.
Sɔ́ pɩɔ́, ʋ́mʋ́ ŋwɔ́ɔ mà, tányɩɛ́ mʋ́ Zozíi a glíyie kla a, ɩ́ tagàwɔ̀lɩ̀ɛ̀ ɔ́ nɩ a, Záan srʋ àmɔ̀ mɩ́ (13.21). Záan anɩ́, yruó kʋ́ aa na ká Zozíi bhlá a, ɩ dɩ́bɩ̀ɛ̀, ɔ yà ɔ́ kʋjɩ̀nyʋ̀àà sɔ́ li kʋ́. Lé ɔ́ pá á dɔ̀ɔ̀ ɔ̀ yi a fɩ́ nyɛ́ a, lé ɔ́ bhibhie sáà aa wlú.
Záan srʋ sáà àmɔ̀ cémʋ́ Zozíi a kwɩ́ a wɔlɩ́ɛ́ plɩ́plɩ mʋ́ a. Ɔ́ anɩ́ Zozíi kú a, ɔ́ gàlɔ̀, lé ɔ yà ɔ́ kʋjɩ̀nyʋ̀àà sɔ́ yɛ́yɛ sɔ́kʋ́.
Záan a bɔ́gʋ̀ɔ̀ a zɔ̀ bhɩa dà a, ɔ́ cí mɔ̀ɔ mà, Zozíi yà ɔ́ kʋjɩ̀nyʋ̀àà sɔ́ gbɩ́dà Galilée a nyíplʋɔ́ a bɩ́. Ɔ́ cí sɔ́kʋ́ mà, Simɔ́ Pɩ́ɛ́lɩ zie Zozíi a zà taa kʋ́ (18.15; Matíe 26.31,35; Málɩ́kɩ 14.27‑31; Lúkɩ 22.31,34).
Námadìè a bɔ́gʋ̀ɔ̀ a zɔ̀bhɩ̀àdàà, Zozíi nɩ wɔlɩ́ kɔ́kɔ́mnɩ́ mà nyɔ nɩ ka mɩ́ lé ɔ ká ɩ lɔ̀fɩ́ɛ́ bɔ́gʋ jɩ̀ ŋwʋ́.
Právě zvoleno:
Záan Bháàda: NEY
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
© (Active), Wycliffe Bible Translators, Inc. All rights reserved.