Matiye 5
5
Zezu ta' kwa wə wa igway'i
(Mak 3.13; Luk 6.12-13,20)
1Kəri məni Zezu we raw sôwâ, mum ur ta wa igway' ɓay mum suk hana. Sum ta zə rum mbə hay' rumu. 2Ɓay mum təŋ kə ta' kwa nday ne kə vun rum kə ini:
Kəɗam mə kəzini
(Luk 6.20-23)
3«Kəɗam zə sôwâ məni we wə vunduk nday i
handay sum ca kor Ifray,
zə handay də ke kə Ifray wə ri suk um məni
mum wə də suk jwə wa sôwâ umu!
4Kəɗam zə sôwâ məni wə ɗik dan,
zə Ifray də ɓu vun ndaya#Esa 61.2!
5Kəɗam zə sôwâ məni wə hom tu nday,
zə handay də ti nya ce' ndə məni
Ifray kawvun kə nday wa rumu#Nye 37.11!
6Kəɗam zə sôwâ məni kə mê' kədan handay gi
kwa mə njeŋ məni Ifray wə wa'a,
zə Ifray də nday ne ndaka!
7Kəɗam zə sôwâ məni wə we ca wa sôwâ məsin,
zə Ifray də we ca wa ndaya!
8Kəɗam zə sôwâ məni kə vunduk mə fel,
zə handay də we Ifraya#Nye 24.3-4!
9Kəɗam zə sôwâ məni wə gi sôwâ gay' heɓ mbok nji,
zə Ifray də nday ɗe kə daw umu!
10Kəɗam zə sôwâ məni wə ce boni zə handay wə gi
kwa mə njeŋ məni Ifray wə wa',
zə handay də ke kə Ifray wə ri məni
mum wə də suk jwə wa sôwâ umu!
11Sôwâ la' wə mi i, wə gi boni mi ne, ɓay wə hay dan wa ri,
kə in dan mə bro' cem cem wa ri zə hi sum ta zə rin si,
i tuk kəɗama!
12I kəɗam tu ri, ɓay i tuk kəɗam zə bal cik mə toŋ wə mi ji wafraya.
Zə sôwâ məsin gi boni ne kə sum ka' dan mə vun kofo ndəna' ta'a#2Izd 36.16; Sin 7.52.»
Vu ɓay ri mə ɓu
(Mak 9.50; Luk 14.34-35; 8.16; 11.33)
13«Hi ce' ndə vu du sôwâ nya. Ama vu la' so' walak um si, swə gak gi ma kədan mum um gi faŋ walak kərem su? Vu rum cu kə sin za' mi. Say swə um njay də rəka ɓay sôwâ ta wa rumu.
14Hi ce' ndə ri mə ɓu du sôwâ nya. Swə cu gak pe' so məni ɗam wə wa igway' mi#Zaŋ 8.12; 9.5. 15Swə ɗaw cu ge ku wə baŋgay kədan mum um cin də ɗəŋâl mi. Zawa, mum um cin wa kwa cin baŋgay kədan ɗeri wa sôwâ daŋ' məni wə rawti so rum rumu. 16Ndəna' ta', ri mə ɓu mi nə ɗeri kor sôwâ kədan handay we sin mə ɓay məni hi wə gi, ɓay kədan handay gi mbra' ne kə Ba mi məni wə wafraya.»
Zezu ta' kwa wa dan dlaya
17«I ɗik dan i na mbə kədan na ɗənok dan dlay Moyizə ko dan ka' sum ka' dan mi. Na cu mbə kədan na nday ɗənok mi, ama kədan na nyen mbi dan ndaya. 18Na in mi ne, kəzini: Kəri wafray kə nya wə də ndo', dan mə kî məni wây' wə du dan dlay ko kwa mə kî məni sôwâ wây' wa dan rum cu də vrum də rəka mi, hâ day vun ndo' kwa daŋ'ŋ. 19Zə rum, swə məni cu mun vun dan dlay nə, ko dan mə kî wə du dan dlay mi, ama mum ta' ne kə sôwâ məsin kədan handay gi ndə na' ta', bə rum də ke swə mə uray wə ri məni Ifray wə də suk jwə wa sôwâ umu. Ama swə məni ta zə dan dlay, ɓay mum ta' ne kə sôwâ məsin kədan handay gi ndə na' ta', bə rum də ke swə mə kə toŋ wə ri məni Ifray wə də suk jwə wa sôwâ umu. 20Na in mi ne: Hi la' cu gi kwa mə njeŋ məni Ifray wə wa' nə pâ sum pay zu dan dlay kə kul sôwâ Zuwif mə ɗe kə Farisiyen mi si, hi cu gak ze wə ri məni Ifray wə də suk jwə wa sôwâ um nə mi.»
Zezu ta' kwa wa dan baka
(Mak 11.25; Luk 12.57-59)
21«Hi mun dan məni ke in ne kə ba mbri mi: I ci mar mi: Sa su daŋ' məni ci mar, bə ɓok dan də ɓok dan wa rumu#Psi 20.13 .» 22Ama mə na, na in mi ne: Sa su daŋ' məni tle bak kə vay ba um, bə ɓok dan də ɓok dan wa rumu. Swə məni in ne kə vay ba um: tumbuɗzu, sôwâ də kor sum rôwâ Fada mə Mbri kə rumu. Swə məni in ne kə vay ba um: "laya", bə rum nde i də ri ku si. 23Ha la' mbə wə ri po' fur kor Ifray kə kwane si, ɓay ha la' dla' wa dan wə han i vay ba wû kə dan wa ru si, 24a ar kwane rum wə ri po' fur rum, ɓay a də gila' dan rum kə vay ba wû copo. Kəki rum, a faŋ mbə ne kwane rum ne kə Ifraya.
25«Ha la' kə dan kə swə ɓay mum wə də kor bə ɓok dan kə ru si, a ghar gila' dan wû kə rum kəri məni hi wə vari ɓo. La' cu mi si, mum ar nu də ɓa bə ɓok dan, ɓay bə ɓok dan nə də wû ar də ɓa soje, ɓay soje nə də wû ge də so daŋgay'i. 26Na in wû ne, kəzini: Ha cu də pâ mbə han mi, hâ ha po' bal səlay mə wa ru nə si cete!»
Zezu ta' kwa wa dan nja
27«Hi mun dan dlay ini: I gi nja mi. 28Ama mə na, na in mi ne: Sa su daŋ' məni kar ma swə məsin ɓay səna' sə, bə rum gi nja kə sə wə vunduk rum si. 29La' ndəna' si, i ɓa fun ru la' wû ɓu kədan ha nde du kwa mə bro' si, a par num ge də rəka seŋ kə ru. Pram zə ru kədan ha vi' kwa tu ru ɗaw, pâ məni sôwâ də ge tu ru daŋ' də ri ku. 30Ɓa fun ru la' wû ɓu kədan ha nde də du kwa mə bro' si, a hay num ge də rəka seŋ kə ru. Pram zə ru kədan ha vi' kwa tu ru ɗaw, pâ məni ha də ri ku mə də hâ kə tu ru daŋ'ŋ.»
Zezu ta' kwa wa dan bur ma
(Mat 19.9; Mak 10.11-12; Luk 16.18)
31«Dan rum ke in ta'a: Swə məni bur ma rum, bə rum gak wây' ɗerwa bur nji sə ne. 32Ama mə na, na in mi ne: Sasu daŋ' məni bur ma rum məti cu gi ghəghay mi, ɓay ta la' cin nji məsin si, ka bə rum pla' sə gi nja. Ɓay swə məni cin ma məti nji sə bur sə, mum gi nja ta'a.»
Zezu ta' kwa wa dan sur vunu
33«Hi mun dan məni ke in ne kə ba mbri ramba ta'a: A bur dan sur vun wû mi, ama a nyen mbi dan məni ha kawvun kə sur vun wa rum kor Bârî. 34Ama mə na, na in mi ne: I sur vun day mi! I sur vun kə wafray mi, zə ri suk Ifray wə hana. 35I sur vun kə nya mi, zə nya nə ri njay sem Ifraya. I sur vun kə so Jeruzalem mi, zə so rum so Jwə mə mbri. 36A sur vun kə wa tu ru mi, zə ha cu gak gi sâ wa tu ru ɗaw faŋ mə ɓu ko mə ura' mi. 37I in "awo" ko "â â" sara. Dan daŋ' məni ha in mə pâ dan məni nə car mbə hay' Satan.»
Zezu ta' kwa wa dan sa' bala
(Luk 6.29-30)
38«Hi mun dan məni ke ini: I wə po' i, ɓay se' wə po' se'e. 39Ama mə na, na in mi ne: I sa' bal wa swə məni wə gi kwa mə bro' hay' ri nə mi. Swə la' ge zə hum ɓa fun ru si, a faŋ mə ɓa gur cin ne num ta'a. 40Swə la' tum sem ru kədan mum tle mbraw mə nyêw wû si, a ar num tle mbraw jewre wû ta'a. 41Swə la' gi nu kə dole kədan ha tle kwazi' ta kə ndi i kilometrə ɗaw si, a tle kwazi' rum ta kə ndi kilometrə hoɓo. 42Swə la' o kwa ɓa ru si, a ne numu. Swə la' o bal ɓa ru si, a vaɗ ne num mi.»
I bə sum sî mi
(Luk 6.27-28,32-36)
43«Hi mun dan məni ke ini: A bə jik wû, ɓay a sî bə sî wû. 44Ama mə na, na in mi ne: I bə sum sî mi, ɓay i o Ifray zə sôwâ məni wə gi boni mi ne, 45kədan hi faŋ daw Ba mi mə wafraya. Zə mum wə ar fəta um dam zu mbə wa sôwâ mə bro' kə sôwâ mə ɓay hoɓ jaka. Mum wə ar buŋô se mbə wa sôwâ mə njeŋ kə sôwâ mə vur vur hoɓ jak ta'a. 46Hi la' wə bə sôwâ məni wə mi bə nə taw si, zə mi hi wə ji bal cik mə Ifray su? Sôwâ məni ɓawa grama wə gi ndəna' ta'a! 47Hi la' kaw jeɓ daw ba mi taw si, ka hi wə gi kwa mə toŋ su? Sôwâ mə dan we Ifray wə gi ndəna' ta'a! 48Zə rum, i ke njeŋ, ce' ndə məni Ba mi mə wafray mum njeŋe.»
Právě zvoleno:
Matiye 5: KMN
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
Le Nouveau Testament et Psaumes en Peve © Alliance Biblique du Tchad, 2014.