Matthew 27
27
Iesu Pilate oropa ve
1Vevelare hoa oharo haela oaria karikara haela hoaha ila Iesu ve la oharo hukavape, ehovea arero harive. 2Ere arero mai hahai Pontius Pilate gavana haela ve oropa ve lai aupe.
Judas apape hari
3Judas, arero hihila epape la haela arero heaha lei eavape, are areve mai haeae ve ikihuru leipe: are la 30 shillings aeka oharo haela i haela hoaha ila ve leia aiaupe. 4Are mariape, Arave haeae eapapo, ehovea ara mai ehoe haela hihila lepaila. Ere arero kavale maeape, Ela va ka, a havahu ve haeae. 5Are la 30 shillings Hehe Uvi ureve koavape, kai are ai elare maea airovo le kaeape. 6Oharo haela la 30 shillings kaila mari ape, Hehe Uvi ve moni kopererea aivaupaki pupu ila — ehovea apu ve kavale. 7Ere elare oharo hukavi hahu karikiki haela ve kekele uku ita lahua haela va kapu ita ve ilaea leipe. 8Laelave la ita aiai ma hoa areve rare va Apu ve Kekele. 9Laria Jeremiah peroveta haela maeape la oharo iele le leipe:
Ere va 30 shillings ilaea leipe haela ve kavale ra kailape,
Israel haela ilaea leipe la haela:
10Ere erero hahu karikiki haela ve kekele avarape,
Amua ahilape hovea.
Iesu Pilate, Gavana haela, oropa ve
11Iesu gavana haela oropa ve epavape. Gavana haela arero velavela leipe maria, A va Jew haela ve Amua ha? Iesu kai arero maeape, A le ave. 12Oharo haela haela hoaha ila areve la oharo maeape hoa are kavale au maeaila. 13Pilate arero maeape, A va ere a v'ila laila la oharo oaria au iapakue? 14Are arero kavale oharo au maeaila — ehoveala gavana haela ikihorahora eapapo leipe.
15La hurai hoa gavana haela ve mai, uvi muru aeaki haela haroapo paraeakive, ereve ikivere leiki la haela. 16La hoa haela haroapo rare Barabbas uvi muru aeape — la haela haela ore hiki. 17Laelave ere va korukaiape hoa Pilate erero mari maeaeape, Eve ikivere ara leita haela helauka paraeakive? Barabbas aka Iesu Keriso rare avape la haela. 18Ehovea are va ore ereva are i iri haela lai ekepe. 19Are heheavaki haha ra haiavape hoa areve uva arero oharo paraeape maria, A va la mai ehoe haela ka heheavalue — ehovea ara mahau hare ivahi hoa heraho eapapo laleila ma haela ve. 20Oharo haela i haela hoaha ila haela harekoko hakileavahaeape Barabbas paraeaki velavela leikive, kai Iesu harive. 21Gavana haela erero maeaeape, Eve ikivere ara ma haela orahokaila ve leita haroapo helauka paraeakive ha? Ere maeape, Barabbas. 22Pilate erero maeaeape, Ara va Iesu Keriso rare itavape la haela leari leikilai ha? Ere hareho maeape, Arero satauro harive. 23Pilate maeaeape, Ipileve — are va haeae le la leipe ha? Aka ere ara hai itavape maria, Arero satauro harive.
24Pilate eavape areve oharo aheke au leila, aka ere oaria hahari arive maia iele, are ma la avi, haela oaria ve oropa ve areve mai huhelape, kai mariape, Ma mai ehoe haela ve apu arave haeae va ka, eve haeae. 25Haela oaria kavale maeaeape, Heroe, areve apu elave horova, elave akoremari ve kara. 26Are la hoa Barabbas helauka paraeape — ere Iesu haru ha satauro harive lai aupe.
Iesu satauro ve apape hoa
27Gavana haela ve hevehe haela Iesu lalava eapapo ureve lai aupe, kai areve leia hevehe haela harekoko korukaiavahaeape. 28Ere areve pura hauavape, kai areve maea pura ovoka orape. 29Ere va kora mamareke korona hai areve haro ve korape, kai hirivo areve mai ore ve korape; ere va hareho areve oropa ve ekaopi heheo mariape, Iapaila, Jew haela ve Amua. 30Ere areve maea apea koape, kai areve mai ve la hirivo avi areve haro koape. 31Aeva ereve heheo kari lei pura ovoka hauavi are havahu ve pura kai orape, kai arero satauro harive lai aupe.
32Ere va kihoahuka Cyrene haela ae ra eavape — areve rare Simon. Ere la haela satauro oraiavaki ahilape. 33Ere va ita rare Golgotha auvahaeape (la rare ve iele: Haela haro ita). 34Ere va arero ma kaeake larive avarape — are va hovave lei haure le leipe. 35Ere arero satauro hape. Ere va koae koa areve pura hamuri elarelare le aeape — ehovea peroveta haela hape la oharo iele leikilai maria, Ere arave pura hamuri elarelare aeape, kai arave pura aeva koai koape. 36Ere va leia avai arero kiva leipe. 37Areve haro akea ve arero lei hape la oharo iele hohoa haeape maria, Maia Iesu, Jew haela ve Amua. 38La hoa haroapo, ere korea haela orahokaila are i hareho satauro haeape — aeva areve mai ore ukai aeva areve mai keva ukai ve. 39Leia ekevahaeape haela oaria haro koukou avahaeai arero o heaha maeape, maria: 40A va Hehe Uvi ra haipararapai — hare irehoila are kukive ape haela, A havahu elare lei makuri. A Aualari ve Akore iele ra leikilava, satauro ikupa ve hatuai kihoau. 41Oharo haela hohoa haealula haela kai haela hoaha ila kara laria arero heheo maeape: 42Are haela oaria lei makukuripe. Are havahu elare lei makuri haveva. Are Israel ve Amua iele la leikilava, heroe, are mave satauro ikupa ve kihoauki — ela areve rare iele kekelakilai. 43Are Aualari kekelape — Aualari arero ikivere la leikilava, are arero mave ovokake leiki paraeaki heroe, ehovea are mariape, Ara va Aualari ve Akore. 44Ere are i hareho satauro haeape la korea haela kara la heheo oharo arero maeape.
Iesu apape hoa
45Hare hihi hoa mea eapapo hareho muru le leipe, aiai hailaea 3 o'clock. 46Hailaea 3 o'clock hovea Iesu ara eapapo hai ape maria, Eli, Eli, lama sabachthani? La oharo ve iele — Arave Aualari e, arave Aualari e, ehovealeve a araro haure laleila? 47Leia apearoape haela uku la oharo iapai mari maeape, Ma hilavila Elias rare ra itavave. 48Haela aeva elavelave harava vivila latite kaivi ma kaeake hivi hirivo kao ve avikape kai are larive avarape. 49Kepea haela mariape, Lari kalailue — ela va hoa eavakilai — Elias iki arero lei makurikilai la. 50Iesu aeka ara eapapo hai ape — kai ove le paraeape.
51Iapaila, Hehe Uvi ve harihu‐urape au kovaelai hoai ipi ve le paraeape: meapuipui ekepe, have ehoaha le kovavaelape: 52Kapu ita le hapape — overa apihaeape haela ve maea urahukape. 53Ereva aireaki kapu ita ve kihoahukai hehe karikara ureve haela oaria ve oropa ve loa veavelaripe. 54Iesu kiva leipe la hevehe centurion i hareho apearoape la haela oaria mea puipui oaria ila eavavahaeape kai oaoka eapapo leivahaeai mariape: Iele havahu — ma va Aualari ve Akore.
55Iesu i Galilee ve hareho koarai ekevahaeape uavila oaria leia arai ve ovohae eavape: 56Mary Magdalene, Mary James i Joses ila ve lou, kai Zebedee ve akoremari ve lou, ereva uku la.
Iesu ve karu ihape hoa
57Hailaea hoa Arimathaea erohoho haela rare Joseph ekepe. Are kara Iesu ve airekai aupe haela. 58Are Pilate ve oki ai Iesu ve maea hilahila leipe. Pilate la maea avarakive oharo maeape. 59Joseph la maea kaivi pura hauhuka veveroro kohahape: 60Areve kapu ita are ihape. La ita are va have ita ihape. Are have eapapo kapu ita ve okiape kariki le aupe. 61Mary Magdalene kai Mary aea la kapu ita mahokaea ve avape.
62Hurai leiki hare karia lei — la opoa hare — oharo haela i Pharisee haela ila hareho Pilate ve leia auvahaeape. 63Ere mariape, Amua e, ela va iki alalaro, la opore haela areve ovokake hoa mariape, Hare irehoila ara va kai uroukilai. 64Ava haela maeaeaki, Kapu ita aheke leiki aiai hare irehoila kari leiki — areve kilea haela oroa iki areve maea korea kaivaki ave, kai haela oaria mari ari ave, Are va api kai le uroupe. Lahovea oropa haeae hekai, aireaki haeae eapapo iele. 65Pilate erero maeaeape, Eve kiva haela le apearo — e va auila — e havahu la ita kiva auhohi leiki. 66Laelave ere hoahuka kapu ita kiva auhohi leipe — have okiape kokauka aheke lei haela kiva auhohi leikive maeaeape.
Právě zvoleno:
Matthew 27: ORO
Zvýraznění
Sdílet
Porovnat
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
Published by the British and Foreign Bible Society 1963-1972