Jã 3
3
Mɔ̃ Jeju mɩɩnanɩ Nɩkɔdɛm dapha kuunida
1Juifi kɔ̃tɩ̃ bɩɛl kɔɔ hale a do jɔfʋ bʋ dʋdaar dɩ wa‐n wɩɩ Nɩkɔdɛm. 2A kɔɔ jaal Jejura dɩtɩnɔ a sʋʋraa ayɩ: Dɩɩrdaar, sɩ jɩrɛ dɩ fɛr dʋɔn dɩɩrdaarɩkɛ thɛnɩ Thãgbaa pa a ɩ̃, gɩdonɩ tibil na puno na cʋʋ nɔ kpaa thɩ̃ ca ƴɩrɛ fɩ‐n cʋʋnɩ saagado Thãgba haan kha na ntaa ga. 3Dɩ Jeju birsee: Sobɔr mɩ so far gel, ado Thãgba na kɔ̃ tibil kɔ̃ phaa ga, a na puno na lõ Thãgba fãgadaarɩ dɩra ga. 4Dɩ Nɩkɔdɛm bulee: Mɔ̃ɔ puno ca tibil na tɩ̃ na pɩ, sɩ na hana dɩ wa kʋ̃ɔ? A na punone na bir na lõ ɔɔ nɩɩ kɔ̃lora, dɩ na bir na kʋ̃ɔ balanyɔ wo ya? 5Dɩ Jeju birsee: Sobɔr mɩ so far gel, ado Thãgba na kɔ̃ tibil dɩ do daphaa dɩɩ the nyʋɔnna na Thu Phuurə ga, a na puno na lõ Thãgba fãgadaarɩ dɩra ga. 6Ʋrɛ tibil n kɔnɩ, tibillə a‐n do, sɩ ʋrɛ Thu Phuu n kɔnɩ, Thu Phuudaar a‐n do. 7Fa‐n do nʋɔ n kpaa fɩ gɩrɛraakɛ mɩ so farnɩ: Dɔ Thãgba n kɔ̃ fɩ kɔ̃ phaa ga. 8Ka jɩɛ n nanɩ, le a‐n phʋ̃ dɩ fɩ nɩɛ tutugore sɩ fa‐n jɩ ka a thenɩ na ka a‐n kanaˈ. Thalera gɩ‐n ha na tibil wo tibilikɛ Thu Phuu n kɔnɩ. 9Dɩ Nɩkɔdɛm bir bulee: Mɔ̃ thɩ̃ɛɛlera na fʋ sɩ na ha thale? 10Dɩ Jeju birsee: Fɛr dɔ Ɩjɩrayɛldaraa dɩɩrdaar sɩ fa jɩ thɩ̃ɛsɔɔkaa? 11Sobɔr mɩ so far gel, gɩrɛ sɩ jɩnɩ gɛr ser n mɩɩ, dɩ gɩrɛ sɩ yɩnɩ sɩ‐n mɩɩrɔ sobɔ so jɩ thɩmɩɩr, sɩ na‐n tu asɩ sobɔ so jɩ thɩmɩaˈ. 12Ado na‐n pɛr haar ɔbɔɔkɛ mɩ mɩɩ nɩnɩ thɩ̃ɛɛkɛ dɔnɩ thɩɩda ga, mɔ̃ na pɛr haar ɔbɔɔkɛ ma mɩɩ nɩnɩ thɩ̃ɛɛkɛ dɔnɩ ƴũdaa? 13Tibil bɩɛllakɛ na kɔɔ jʋʋn Thãgbaa dʋɔ saagado ʋrɛ thɛnɩ le Thãgbaa dʋɔ a gbũ gaaga, kɛ dɔnɩ mɛr tibili Bikuun.
14Dɩ mɔ̃kɛ Mʋɩjɩ kɔɔ khəini sɩ ther dɩɩ jã ƴũ bəənnə, dɔ wɩ khəi tibili Bikuun ɔmɛ̃,#Ther 21:9 15dɩ mɛ̃ tibil wo tibilikɛ na pɩɛrnɩ haar ɔrra, a na hananɛ yireekɛ na pɛnɩ yuuəˈ. 16Naʋʋkɛra Thãgba kɔɔ nanɩ tɩbɩla fɛʋ thɩɩra dɩɩ ka dʋɔn mɔ̃kɛ a ˈlaanɩ ɔɔ Bikũu bɩɛl ˈlẽˈlẽ, dɩ mɛ̃ tibil wo tibilikɛ na pɩɛrnɩ haar ɔrra, a na bu yuurakaˈ, sɩ a na hananɛ yireekɛ na pɛnɩ yuuəˈ. 17Gɩdonɩ Thãgba na kɔɔ thɔ̃ ɔɔ Bikuun thɩɩraakɛ a heene tɩbɩla soraˈ, sɩ ɔrra tɩbɩla fɛʋ na ˈlɛrɔ taarɛ. 18Ʋrɛɛkɛ na pɩɛrnɩ haar ɔrra, a na ˈlɛ so heenaˈ, sɩ ʋrɛɛkɛ na pɩɛrnɩ haaraˈ, a ˈlire ˈlɛr so heene pɩ gɩdonɩ aa pɛr Thãgbaa Bikũu bɩɛl ˈlẽˈlẽe i haaraˈ. 19Dɩ yɛ gɩrɛ ɛnanɩ so heenena, gɛr dʋɔn dahɩrɛɛ ɩ̃ɩkɛ a ɩnɩ kɛ thɩɩra sɩ dɩ tɩbɩla na dabirə a ka jɔ dahɩrɛ, gɩdonɩ awɩ thɔ̃ puurore ka. 20Gɩdonɩ tibil wo tibilikɛ n cʋɛnɩ puure a‐n laarɛ dahɩrɛ, aa‐n ˈla dɩ the dahɩrɛra ga, ga hor wa yɩrɛ ɔɔ thɔ̃ɔkɛ a‐n cʋʋnɩ. 21Sɩ ʋrɛɛkɛ n cʋɛnɩ gɩrɛ dɔnɩ sobɔr, ɔr n thɛ dahɩrɛra, dɩ mɛ̃ ɔɔ thɔ̃ɔkɛ a‐n cʋʋnɩ n yɩr, gɩdonɩ gɩrɛra a‐n cʋʋnɩ Thãgbara gɩ ha.
Jã Batɩsɩtɩɩ sobɔ so jɩ thɩmɩɩ gɩ wo
22A gele pɩ Jeju na ɔɔ kpãkpãadara gbaar jal Jude dɩɩra, dɩ le a kɔɔ toona kpãkpãadara da‐n kpɛɛ tɩbɩla nyʋɔnɔ. 23Jã dakha n kpɛɛrɛ tɩbɩla nyʋɔnɔ Enɔ̃ɔkɛ wɔrɔnanɩ Salɩm dɩɩ, gɩdonɩ le nyʋɔn jɔr, dɩ tɩbɩla n pɔr le da‐n kpɛɛ wɩ nyʋɔnɔ, 24gɩdonɩ ɔbɔɔle wa kɔɔ fʋ Jã a to khaɩra paˈ.#Mat 14:3; Mar 6:17; Lu 3:19–20
25Sɩ Jãa kpãkpãadarasɔ nakha Juifi bɩɛl kɔɔ ɩɩrnanɛ thɩ̃ banaa phɔphʋɔl thɩmɩɩrra. 26Dɩ wɩ gbaar jal Jãa pa a sʋʋraa: Dɩɩrdaar, ʋrɛɛkɛ kɔɔ hanɩ kha na fɛrɛ Jʋrdɛ̃ iiro, kɛ fɩ kɔɔ mɩɩrɔnɩ sobɔ so jɩ thɩmɩɩr, a hale gɩrɛ da‐n kpɛɛ tɩbɩla nyʋɔnɔ dɩ tɩbɩla fɛʋ ɔɔ pa wɩ‐n jal. 27Dɩ Jã birse wi: Tibil na puno na ˈlɛ thɩ̃ɛ saagado Thãgbaa pa gɩ thaa ga. 28Mee nɛrɛɛ thɛthɛ dʋɔn wɩrɛ kɔɔ nɩɛnɛnɩ gɩrɛ mɩ kɔɔ sonɩ ayɩ: Mɛrɛ, ga do Kirisiti ha maˈ, sɩ thɔ̃thɔn ha mɩ ɩ̃ kʋlɛɛ ƴɩɛ a ɩna.#Jã 1:20 29Dɩ ʋrɛ n hɩnanɩ khɛr, ɔr n dɔ khɛr he. Sɩ ʋrɛ dɔnɩ khɛr hee kuun n tɔɔnɩ da‐n pɛ ɔɔ thɩmɩɩ nũu, daʋ n fʋʋrɛ mɔ̃ a na‐n nɩɛnɩ khɛr hee wirə. Mɛ̃ gɩ daʋʋkɛ dɔnɩ ɩ̃ thɛthɛɛda, gɩ daan waa vʋ̃ʋ. 30Dɔ ɔr n kɔ̃tɩ̃ a na‐n pɛr sɩ ɩ̃ tɔ ma‐n wur.
Jã Batɩsɩtɩɩ pɩpɩɩ thɩmɩɩ
31Ʋrɛɛkɛ thɛnɩ ƴũ, ɔr kəəne a jɔ fɛʋ; sɩ ʋrɛ wɩ kɔnɩ thɩɩra, thɩɩ tibil a do, dɩ mɔna a donɩ thɩɩ tibil mɛ̃ a‐n mɩɩ thɩɩda. Ʋrɛ thɛnɩ ƴũ, ɔr kəəne a jɔ fɛʋ, 32dɩ ɔr n mɩa sobɔ so jɩɩr gɩrɛraakɛ a yɩnɩ na a nɩɛna, sɩ tibil bɩɛllakɛ na‐n tu ɔɔ sobɔ so jɩ thɩmɩaˈ. 33Sɩ ʋrɛɛkɛ tuonni ɔɔ sobɔ so jɩ thɩmɩɩ, a nɩnanɛ casɩ dɩ sobɔdaar Thãgba do. 34Gɩdonɩ ʋrɛ Thãgba thɔnɩ, thɩmɩaakɛ dɔnɩ Thãgbaada a‐n mɩɩ, gɩdonɩ ga do Thãgba mɩɛrɛ ɔɔ Thurə a haa ga. 35Thãgba Thɩrɛ nar ɔɔ Bikuun a gba thɩ̃ɛ fɛʋ a dʋʋ nyɔ̃kɔɔ.#Mat 11:27; Lu 10:22 36Ʋrɛɛkɛ n pɩɛrnɩ Bikuun haar a hananɛ yire khorr, sɩ ʋrɛ n nʋrɛnɩ nũu Bikuunna a na ˈlɛ yirəˈ, sɩ Thãgbaa nĩkhi heenuune.
Právě zvoleno:
Jã 3: LOBIRI
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
Bible Society of Burkino Faso 1985.