Jã 8
8
Khɛrɩkɛ wɩ fʋnɩ sopugo cʋʋ paar
1Sɩ Jeju gba jal gɔ̃gʋɔnaakɛ hananɩ olɩvɩ thɩra. 2A dɩɩ wɩl duuro phiphiphi, a kɛrrɛ bir Thãgba fʋɔr cɔ kɔ̃tɩɩna, dɩ tɩbɩla fɛʋ gbɛbɩ a pʋɔraa, dɩ too sa ma da‐n dɩɩr wɩ.
3Dɩ jɔfʋ dɩɩrdarasɔ na jɔfʋ bʋ dʋdarasɔ kpa khɛrɩkɛ wɩ fʋnɩ dɩ phɩna kuun a pɔna. Dɩ wɩ cʋgʋʋrɛ dɩ too tɩbɩla fɛʋʋ ƴɛra, 4sɩ dɩ wɩ so Jejura: Dɩɩrdaar, kuun khɛrɩkɛ phɩna dɩ wɩ fʋʋ. 5Mʋɩjɩɩ jɔfʋra gɩ so sarɛ sɩ dʋrɛ khɛr thakɛ na bokana a kɔ. Sɩ ado fɛrra gɩ, mɔ̃ fɩ‐n so?#Lev 20:10; Dət 22:22–24 6Sɩ wɩ sor thale a benaa bɩnɛ wa‐n hɩɩn, gɩdonɩ hʋɛ wɩ‐n ƴaal wɩ pɩɛraa sor. Sɩ Jeju gʋɛrɛ da‐n khere kherere thɩɩra na nyɔ̃bire. 7Sɩ mɔ̃ wɩ bonɩ dɩ wa‐n bulee, Jeju gbaar ƴɩɛ ƴũ sa so war: Ntɛɛkɛ na kɔɔ cʋɛnɩ sopugo kpɩɩrakɛ nɛrɛra ga n dɔ cacadaar a dʋɔ na bokaar. 8Sɩ a bire a gʋɛ wo da‐n khere kherere thɩɩra. 9Dɩ ɔbɔɔkɛ wɩ nɩɛnɩ thɩmɩɩ caale, wɩ mar dɩ wa‐n thɩɩr bɩɛlbɩɛl, kɔ̃tɩnasɔ kɔɔ ɩrɛ ɓo dɩ pɩpɩra na‐n kpaan. Agɩpɩ Jeju sɩ dɩbara na khɛrɩle dɩ jɩɩl ɔɔ ƴɛra. 10Dɩ Jeju bir gba ƴɩɛ ƴũ sa bulee: Khɛr ya, dɩ ka afɩ so pɛdarasɔra ha? Tibil bɩɛl na kɔɔ heen fɩ soraa? 11Dɩ khɛr birsee: Kpei Kɔ̃tɩn. Dɩ Jeju sʋʋraa: Dɩ mɛrɛ dakha, ma heen fɩ soraˈ. Jala kɔna, sɩ a fʋna nĩ fa‐n bir cʋʋ sopugo kpɩɩ bã.]
Jeju dʋɔn dahɩrɛ tɩbɩlala fɛʋ thɩɩra
12Jeju bire mɩɩna wɩ wo ayɩ: Mɛr dʋɔn dahɩrɛ tɩbɩlala thɩɩra. Ʋrɛɛkɛ n kpaan marnɩ a na ɩɩr dabirəra kpɩɩrakaˈ, sɩ a na hananɛ dahɩrɛɛkɛ dɔnɩ yireeda.#Mat 5:14; Jã 9:5
13Dɩ liirrə jɔfʋ bʋ dʋdarasɔ sʋʋraa: Fɩ‐n mɩɩrɛ afɩ sobɔ so jɩ thɩmɩɩ dɩ fa‐n pɛ afɩbara, afɩ so jɩ thɩmɩɩ na do sobɔraˈ.#Jã 5:31 14Dɩ Jeju so war: Ado ma mɩɩrakɛ sobɔ so jɩ thɩmɩɩr a na pɛ ɩ̃bararakɛ, sɩ ɩ̃ so jɩ thɩmɩɩ dʋɔn sobɔr, gɩdonɩ mɩ jɩrɛ kãkɛ mɩ thenɩ a ɩ̃, na kãkɛ mɩ‐n jalnɩ. Sɩ nɛrɛ, na jɩ kãkɛ mɩ thenaˈ na kãkɛ mɩ‐n jalnaˈ. 15Nɛrɛ, nɛr dɔ kɩɩldaraakɛ n kɩlɛnɩ mɔ̃kɛ tibil fɩlɛ hanɩ, sɩ mɛrɛ, ma do tɩbɩlaa Kɩɩldaaraˈ. 16Sɩ ado mɩ dor tɩbɩlaa Kɩɩldaar, ɩ̃ kɩɩl dor sobɔr gɩdonɩ ma ha dɩbara ga, sɩ Thɩrɛɛkɛ kɔɔ thɔna mɩnɩ sɩ hana kha. 17Anɩ jɔfʋra gɩ kherere ayɩ: Tɩbɩla yenyɔɔ sobɔ so jɩ thɩmɩɩ dʋɔn sobɔr. 18Mɩ‐n mɩɩrɛ sobɔ so jɩ thɩmɩɩr dɩ ma‐n pɛ ɩ̃bara, dɩ Thɩrɛɛkɛ kɔɔ thɔna mɩnɩ a‐n mɩɩrɛ sobɔ so jɩ thɩmɩɩrra da‐n pɛ mar wo. 19Dɩ wɩ bulee: Kana afɩ Thɩ ha? Dɩ Jeju birse wi: Na jɩ mɩ dɩ ɩ̃ Thɩ gɩ dɩ na jaˈ. Ado nɩ kɔɔ jɩ mɛr, na jɩrɛ ɩ̃ Thɩ dakha.
20Jeju kɔɔ mɩɩrɛ ga thɩmɩɩsɔɔle, ɔbɔɔkɛ a‐n dɩɩr wɩnɩ Thãgba fʋɔr cɔ kɔ̃tɩɩna, kãkɛ wɩ‐n pɛrnɩ Thãgba mũsumo, sɩ tibil bɩɛl na kɔɔ fʋʋaˈ, gɩdonɩ ɔɔ bɔ na kɔɔ dã paˈ.
Na puno na pɔ kãkɛ mɩ‐n jalnaˈ
21Dɩ Jeju so warɛ wo ayɩ: Mɩ‐n jaal sɩ na ƴaal mɛr, dɩ na khiire anɩ sopugorara. Na puno na pɔ kãkɛ mɩ‐n jalnaˈ. 22Dɩ Juifisɔ na‐n so: Dɩbara a na ba kʋ yaa, gɩdonɩ a sor ayɩ, sa puno na pɔ kãkɛ ɩnɩ‐n jalnaˈ. 23Dɩ so war: Nɛrɛ, tɩɛrdara nɩ do, sɩ mɛrɛ dɩ ɩ̃ do ƴũdaar. Nɛrɛ, nɩ dor thɩɩkɛɛda, sɩ mɛrɛ ma do thɩɩkɛɛda ga. 24Gɛr gɩ dɩ ɩ̃ kɔɔ so nar: Na khiire anɩ sopugosɔrara. Gɩdonɩ ado na‐n pɛr haar dɩ mɛr dʋɔnaˈ, na khiire anɩ sopugosɔrara. 25Dɩ wɩ bulee: Amɛ fɩ do? Dɩ Jeju birse wi: Mɔ̃kɛra mɩ kɔɔ so narnɩ caca fʋ paar gɩ. 26Mɩ hananɛ thɩ̃ɛ bərəəm anɩdara a na so sɩ na kɩɩlna nɩ. Sɩ ʋrɛɛkɛ thɔna mɩnɩ dʋɔn sobɔdaar, dɩ gɩrɛɛkɛ mɩ kɔɔ nɩɛraanɩ gɛr mɩ‐n so tɩbɩlala. 27Sɩ wa kɔɔ jɩrakɛ dɩ Thɩrɛɛda a‐n mɩɩ waˈ. 28Dɩ Jeju so war: Ɔbɔɔkɛ na khəini mɛr tibili Bikuun, le na jɩrakɛ dɩ mɩ dor dɩ ma‐n cʋʋ thɩ̃ bɩɛllakɛ ɩ̃bara ga, sɩ mɩ‐n mɩɩrɛ mɔ̃kɛ Thɩrɛ kɔɔ dɩɩr mɩnɩ. 29Ʋrɛɛkɛ thɔna mɩnɩ, a har kha na mɛrɛ. Aa faa mɩ dɩbara ga, gɩdonɩ wire fɛʋ mɩ‐n cʋʋ gɩrɛ n daaraanɩ. 30Mɔna a‐n mɩɩnɩ thale tibil jɔjʋɔ kɔɔ pɩɛrɛ haar.
Wɩrɛ dɔnɩ Abɩrahamɩ məl
31Dɩ Jeju so Juifisɔraakɛ kɔɔ pɩɛnɩ haar ayɩ: Ado nɩ too ɩ̃ thɩmɩɩra, na dor ɩ̃ kpãkpãadara sobɔr, 32dɩ na jɩrɛ sobɔr, dɩ sobɔrra na cʋʋ nɛr dɩ na do waɩa. 33Dɩ wɩ birsee: Abɩrahamɩ məl sɩ do, sa kɔɔ do tibili dee kpɩɩrakaˈ, sɩ mɔ̃ fɩ so aa, sa debire a na do waɩa?#Mat 3:9; Lu 3:8 34Dɩ Jeju birse wi: Sobɔr mɩ so nar gel, tibil wo tibilikɛ n cʋɛnɩ sopugo, sopugoo dee a do. 35Dee na‐n too cʋɔrɔ khorraˈ, sɩ ado bikuun gɩ, ɔr n tɔɔ cʋɔrɔ khorr. 36Ado Bikuun birsene ni ga dor waɩa nɩ do waa gel. 37Mɩ jɩrɛ dɩɩ do Abɩrahamɩ məl ha nɩ, sɩ dɩ na‐n ƴaal nɩ kʋ mɩ, gɩdonɩ ɩ̃ thɩmɩɩ na yɩ lõ paar anɩ hara ga. 38Me wer, gɩrɛɛkɛ mɩ kɔɔ yɩnɩ ɩ̃ Thɩra gɛr mɩ‐n mɩɩ. Sɩ nɛrɛ, nɩ‐n cʋʋrɛ gɩrɛɛkɛ nɩ kɔɔ nɩɛnɩ anɩ thɩra. 39Dɩ wɩ sʋʋraa: Abɩraham dʋɔn asɩ mama thɩ kɔ̃tɩ̃. Dɩ Jeju so war: Ado nɩ dor Abɩrahamɩ bɩsãsɔ, na‐n cʋɛ Abɩrahamɩ thɔ̃. 40Nɩ‐n ƴaalɛ nɛnɛ̃kɛ nɩ kʋ mɩ mɛrkɛ sɔ narnɩ sobɔrɩkɛ mɩ kɔɔ nɩɛnɩ Thãgbara. Abɩraham na kɔɔ cʋʋ gelaˈ. 41Anɩ thɩɩ thɔ̃ nɩ‐n cʋʋ. Dɩ wɩ birsee: Sa do khɛr pɔɩ bɩsãsɔaˈ, Thɩ bɩɛl dɩbara sɩ hana Thãgba gɩ. 42Dɩ Jeju so war: Ado Thãgba kɔɔ dʋɔn anɩ Thɩ na‐n na mɛr, gɩdonɩ Thãgbara mɩ the a ɩ̃. Ga do mɛr jɛ gɩ a ɩ̃ ɩ̃bara ga, sɩ ɔr kɔɔ thɔna mɩ. 43Mɔ̃gɩdo na‐n jɩ ɩ̃ thɩmɩɩsɔ kɩrʋa? Gɩdonɩ na puno na pɛ ɩ̃ thɩmɩɩ nũəˈ. 44Satã dʋɔn anɩ thɩ, dɩ nɩ‐n ƴaalɛ nɩ cʋʋ gɩrɛɛkɛ anɩ thɩ tuni. Tɩɩ kʋdaar a kɔɔ dorakɛ caca fʋ paar, dɩ aa‐n jɩɩl sobɔrra ga, gɩdonɩ sobɔr na haaraa kpɩɩaˈ. Ɔbɔɔkɛ a‐n kurni sõsor, ɔɔ thɩmɩɩ fɛʋ ɔɔ thɛthɛra gɩ‐n the, gɩdonɩ sõsodaar a do na sõsorɩ thɩ. 45Sɩ mɛrɛ gɩdonɩ sobɔr mɩ‐n so, gɛr gɩ na‐n pɛ mɩ haaraˈ. 46Amɛ nɛrɛɛ thɩ̃thɩɩn na nɛ marrakɛ sopugookɛ mɩ kɔɔ cʋʋnɩ? Dɩ mɔ̃gɩdo, ado mɩ so nar sobɔrrakɛ, na‐n pɛ mɩ haara? 47Ʋrɛɛkɛ dʋɔnnɩ Thãgbaada, a‐n pɛr Thãgbaa thɩmɩɩ nũu. Nɛrɛ, na‐n pɛ nũəˈ gɩdonɩ na do Thãgbaada ga.
Wɩ sor Jeju a cʋna Samarɩdaar
48Dɩ Juifisɔ bule Jeju: Sa hana hʋɛ a na so nayɩ, fɛr dʋɔn Samarɩdaar dɩ kɔ̃tɛɛbuu ha faraa ya? 49Dɩ Jeju so war: Kɔ̃tɛɛbuu na ha maraˈ, sɩ ɩ̃ Thɩ mɩ‐n cʋ. Sɩ nɛrɛ, na‐n cʋ maˈ. 50Ma‐n ƴaal ɩ̃ thɛthɛɛ i dʋbaˈ, sɩ bɩɛl hale da‐n ƴaal gɩ sa do Kɩɩldaar. 51Sobɔr mɩ so nar gel, tibilikɛ n hɩnɛnɩ ɩ̃ thɩmɩɩ, a na khi kpɩɩrakaˈ. 52Dɩ Juifisɔ sʋʋraa: Nɛnɛ̃ dɩphã, sɩ jɩrɛ mɛ̃ dɩ kɔ̃tɛɛbuu ha farɛ. Abɩraham kɔɔ khire na Thãgbaa bobonasɔ dakha, sɩ fɛrɛ dɩ fɩ so: Ado tibil na hɩɩn afɩ thɩmɩɩ a na khi kpɩɩrakaˈ. 53Fɩ ba kɔ̃tɩnɛ a jɔ asɩ mama thɩ kɔ̃tɩ̃ɩkɛ n dɔnɩ Abɩrahamɩkɛ khenɩ yaa? Thãgbaa bobonasɔ dakha khiire; sɩ fɛrɛ, amɛ fɩ‐n pɛr haar fɩ dor? 54Dɩ Jeju so war: Ado ma dʋbɩ ɩ̃ thɛthɛɛ i, ɩ̃ i dʋbɩ na do thɩ̃aˈ. Sɩ ɩ̃ Thɩ gɩɩkɛ n dʋbanɩ ɩ̃ i, dɩ ɔrra nɩ‐n so dɩ nɩ yɩ, ɔr dʋɔn anɩ Thãgba. 55Sɩ na jɩɩrakaˈ, sɩ me wer, mɩ jɩɩrɛ. Ado mɩ kɔɔ sor ayɩ ma jɩaˈ, gɩ hʋrɛ mɩ dor sõsodaar anɩ kha. Sɩ mɩ jɩɩrɛ dɩ ma‐n hɩɩnna ɔɔ thɩmɩɩ. 56Daʋ kɔɔ fʋrɛ anɩ mama thɩ kɔ̃tɩ̃ Abɩraham da‐n kãka, gɩdonɩ a kɔɔ hananɛ ha pɛrɛ ɩnɩ‐n yɛ ɩ̃ Wi. Dɩ a kɔɔ yɩɛrɛ dɩ daʋ fʋʋ. 57Dɩ Juifisɔ sʋʋraa: Mɔ̃ fɩ cʋʋ sa yɩ Abɩraham, fa hananɩ yɛna kpalanyɔ yʋɔr pa? 58Dɩ Jeju so war: Sobɔr mɩ so nar gel, Abɩraham na kɔɔ thenɩ dɩɩrarakɛ paˈ, mɛrɛ mɩ dor. 59Dɩ liir dɩphã mɛ̃ wɩ uul bokana wɩ dʋʋrʋʋ, sɩ dɩ Jeju wolõ the Thãgba fʋɔr cɔ kɔ̃tɩ̃ bɩnɔ.
Právě zvoleno:
Jã 8: LOBIRI
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
Bible Society of Burkino Faso 1985.