Luki 16
16
Sokpaa bubur thɩ̃ hɩɩndaarra
1Dɩ Jeju sor dakha ɔɔ kpãkpãadarara ayɩ: Lẽle kuun gɩ, a kɔɔ hale a hana thɩ̃ hɩɩndaar bɩɛl, dɩ wɩ pɔ a sʋʋraa mɔ̃ ɔɔ thɩ̃ hɩɩndaarra n kʋɛnɩ ɔɔ thɩ̃sɔ. 2Dɩ lẽle kuunile wɩɩrɛ a bulee: Anye ha gɩrɛ mɩ nɩɛnɩ dɩ wa‐n mɩɩ fɛrɛra? Thera thɩ̃ɛsɔ a nɛna mɩ ɩ̃ hɩɩn, gɩdonɩ fa puno a na do ɩ̃ thɩ̃ hɩɩndaar bã. 3Dɩ thɩ̃ hɩɩndaarɩle so ɔɔ dɩbara: Anye ma cʋʋ ya fɛ? Gɩdonɩ ɩ̃ kɔ̃tɩ̃ na faa mɛr. Ɩ̃ kʋʋl yaa? Sɩ ma hana fãga woaˈ. Ma‐n bɩɛl yaa? Sɩ yicuru na fʋ mɛr. 4Mɩ jɩrɛ gɩrɛɛkɛ ma cʋʋnɩ dɩphã, dɩ tɩbɩla na tee mɩ awɩ cɔ ɔbɔɔkɛ ɩ̃ kɔ̃tɩ̃ na faa mɩnɩ. 5Dɩ le a we wɩrɛɛkɛ kɔɔ pemanɩ thɩ̃ɛ ɔɔ kɔ̃tɩna bɩɛlbɩɛl fɛʋ, a bule cacadaar: Yemɔ̃ fɩ hana ɩ̃ kɔ̃tɩ̃ helu? 6Dɩ birsee: Ɓalãga niin tamaa gɩ. Dɩ thɩ̃ hɩɩndaar sʋʋraa: Gba afɩ sɛbɛ a tɔɔ khə̃khə̃, a kherene kpalanyɔ yʋɔr. 7Agɩpɩ dɩ bule ʋ̃ wo ayɩ: Sɩ fɛrɛ yemɔ̃ afɩ hel ha? Dɩ birsee: Jʋ kpona tamaa gɩ. Dɩ sʋʋraa: Gba afɩ sɛbɛ a kherene kpalanã. 8Dɩ kɔ̃tɩn khɩɩrɛ bubur thɩ̃ hɩɩndaarɩle, mɔ̃ a hananɩ kpɩɛrɛ gbãʋ thɩ̃ cʋʋrɛra. Gɩdonɩ nɛnɛ̃ bɔɔkɛɛ bɩsãsɔ n kpɩɛrɛ gbãʋ na awɩ hohosɔ a jɔ dahɩrɛɛ bɩsãsɔ.
9Sɩ mɛrɛ mɩ so narɛ: Nɩ gba lẽle thɩ̃ɛsɔɔkɛ na saranaˈ a kurona kuune, dɩ ɔbɔɔkɛ ga pɩnɩ, wa tee ner dɩ na lõ khorr waara. 10Tibilikɛ dʋɔnnɩ sobɔ cʋʋdaar thɩ̃ biisɔra, mɛna a na do sobɔ cʋʋdaar thɩ̃ kɔ̃tɩnasɔra dakha. Sɩ ʋrɛɛkɛ dʋɔnnɩ bubur cʋʋdaar thɩ̃ biisɔra, mɛna a na do bubur cʋʋdaar thɩ̃ kɔ̃tɩnasɔra dakha. 11Ado mɛ̃ gɩ, ado na kɔɔ do sobɔ cʋʋdara lẽle thɩ̃ɛsɔraakɛ na saranaa ga, amɛ na pɛ nar nɩ dɔ sobɔ lẽle thɩ̃ hɩɩndara? 12Dɩ ado na kɔɔ do sobɔ cʋʋdara gɩrɛraakɛ dɔnɩ tibil kpɩɩda ga, amɛ na hana nɩ gɩrɛɛkɛ dɔnɩ anɩda? 13Thɔ̃daar na hale a na puno na do thɔma kɔ̃tɩna yenyɔra ga, foo a na laarɛ bɩɛl sɩ a na na bɩɛl, agɩbo a na mar kha na bɩɛl sɩ a hɛbɩ bɩɛl. Na puno na do thɔma Thãgbara nakha lẽle thɩ̃aˈ.#Mat 6:24
Jɔfʋ bʋ dʋdarasɔɔkɛ Jeju kɔɔ phaannɩ
(Mat 11:12–13; 5:31–32; Mar 10:11–12)
14Dɩ jɔfʋ bʋ dʋdarasɔɔkɛ dʋɔnnɩ war nadara kɔɔ hale dɩ wa‐n pɛ thɩmɩaalera fɛʋ nũu, dɩ wɩ‐n maanɛ Jejura. 15Dɩ so war: Nɛrɛ, nɛr dʋɔn tɩbɩlaakɛ n cʋɛnɩ dɩ nɩ ho fɩl sardara tɩbɩlaa ƴɛra, sɩ Thãgba jɩrɛ anɩ hasɔ. Gɩdonɩ gɩrɛɛkɛ tɩbɩla n hɩɩnnɩ dɩɩ do thɩ̃ kɔ̃tɩ̃ɩ, gɛr dʋɔn kpɔ̃kpɔrɔ̃ thɩ̃ɛ Thãgbaa ƴɛra. 16A dana Jã Batɩsɩtɩɩ bɔɔ, jɔfʋ na Thãgbaa bobona kɔɔ haanle. Dɩ a fʋna ɔbɔɔlera, gɛr wɩ‐n mɩɩrɔ tutugo bʋɔɔ thɩmɩɩkɛ dɔnɩ Thãgba fãgadaarɩ dɩda, dɩ tɩbɩla bɩɛlbɩɛl fɛʋ n pɛrɛ fãga ɩnɩ‐n lona Thãgba fãgadaarɩ dɩra.#Mat 11:12–13 17Sɩ thãgbara ƴũ na thɩɩ pho ka yɔɔrɛ a ka jɔ dɩkhaa thɩ̃ bu bɩɛl fɩɩʋ jɔfʋra faa.#Mat 5:18
He kuur thɩmɩɩr
18A tibil faa ɔɔ khɛr sa bir a he khɛ kpɩɩ, khɛ kpɩɩ ƴaal sopugo a cʋʋ. Dɩ tibilikɛ na gbaannɩ khɛrɩkɛ ɔɔ ko faanɩ, khɛ kpɩɩ ƴaal sopugo a cʋʋ.#Mat 5:32; 1 Kor 7:10–11
Lẽle kuun na Lajaar
19Lẽle kũu bɩɛl gɩ, a kɔɔ hale dɩ to gbɩlã kẽkena, dɩ wire fɛʋ a‐n kãka da‐n phɩphɩlana. 20Dɩ bɔdaar kuun hale dakha dɩ wa‐n wɩɩ Lajaar, dɩ nɔra teguu tomɩr koo da‐n phɩna lẽle kuuni lõfonɔra. 21Dɩ a kɔɔ pɛrɛ haar ɩna‐n khɔ dɩkorɩkɛ n jaalɛnɩ lẽle kuuni dɩko kho pa. Dɩ benaa thɛthɛ n pʋɔnnakɛ dɩ wa‐n dɛlɛ̃ ɔɔ nɔrsɔra. 22Dɩ bɔdaar kuunilera khire, dɩ Thãgbaa thɔ̃thɔ̃daar thusɔ gbaa a jalna Abɩrahamɩ pa. Dɩ lẽle kuun dakha ɩ̃ a khi dɩ wɩ dʋʋ. 23Dɩ le khĩdi dʋɔ mɔ̃kɛ a‐n yɩnɩ bɔ gaarɛ jɔɔ, a gbaar da‐n hɩɩn a ˈlaa yɩ Abɩraham ƴɔɔ fĩi, dɩ Lajaar too ɔɔ kal ƴɔɔ. 24Dɩ le a hulẽ ayɩ: Ɩ̃ thɩ kɔ̃tɩ̃ Abɩraham, jɛ mɩ bʋɔrarakɛ sa thɔna Lajaar a ɓɛ nyʋɔn na ɔɔ nyɛ̃bi a ɩna a ɩɛna mɩ delẽbire, gɩdonɩ mɩ‐n gaarɛ bʋɔ ka dɔlɩnanɛnaakɛ. 25Sɩ Abɩraham birsee: Ɩ̃ bɩsã, jɛna fɩ kɔɔ ˈlɛr bɔɔ ɔbɔɔkɛ fɩ kɔɔ hanɩle thɩɩra, sɩ dɩ dakha Lajaar kɔɔ ˈlɛ puure. Sɩ nɛnɛ̃ a hakɛ a faa haar, sɩ fɛrɛ dɩ fa‐n gaar. 26Sɩ ga dorakɛ gele koo gɩ dɩbara woaˈ, sɩ kõkor pɛ hulõo hakɛ sɛrɛ na nɛrɛɛ thɩ̃thɩɩn, dɩ tɩbɩlaakɛ hanɩkɛ sa ƴaal wɩ seer le anɩ pa, wa punoəˈ. Dɩ dakha, wɩrɛɛkɛ hana fɩnɩ le sa ƴaal wɩ seer kɛ asɩ pa, wa punoəˈ. 27Dɩ lẽle kuun sʋʋraa: Dɩ a mɛ̃ gɩ, mɩ‐n bɩɛl fɛr thɩrɛ dɩ fa thɔ̃ Lajaar ɩ̃ thɩɩ cɔ, gɩdonɩ mɩ hananɛ õkona yemɔɩ, 28a jala a kpãkpaanɛ war. Ado mɛ̃ gaa, wɛr dakha wa ɩnɛ ˈwãga paarɩkɛra. 29Dɩ Abɩraham birsee: Wɩ hananɛ sɛbɛsɔɔkɛ Mʋɩjɩ na Thãgbaa bobonasɔ kɔɔ kherenɩ. Dɔ wɩ pɛ wele nũu. 30Dɩ lẽle kuun bir birsee: Kpeehe ɩ̃ thɩ kɔ̃tɩ̃ Abɩraham, a khĩdidaar bɩɛl jala a yɩ wɩ wa debire haar. 31Dɩ Abɩraham sʋʋraa: A wa pɛ Mʋɩjɩ na Thãgbaa bobonasɔɔda nũəˈ, sɩ dɩ khĩdidaar bɩɛl ɩɩrrakɛ a the khirera, ga cʋʋ wɩ dɩ wa pɛr haaraˈ.
Právě zvoleno:
Luki 16: LOBIRI
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
Bible Society of Burkino Faso 1985.