Génesis 9
9
Dios la schap sc'op soc Noé
1Dios la ya'be bendición te Noé soc te snich'nab, hich la yalbe: Sitinan, p'ohla abahic, nojesahic te q'uinale. 2Ya me xnihquic soc ya me xiwic ta atojolic spisil chambahlametic ayic ta q'uinal, spisil mutetic ayic ta sjamalil ch'ulchan, spisil bintic ya xbehenic ta lumq'uinal, soc spisil te chayetic ayic ta mar; ay ta ac'abic. 3Ya xhu' yac awe'ic spisil bintic cuxul soc te ya xbehenic, hich te bin ut'il te itaj soc te yaxal ha'mal. La jca'beyexix spisil. 4Yan te ti'bal te yich'oj to sch'ich'el, te ha scuxlejal, ma me xawe'ic stuquel, 5como ya me xc'opojon yu'un ach'ich'el te ya yich' malel, ya ca'be stoj spisil chambahlam soc spisil winic; ya ca'be stoj ta jujutuhl te ya smalbe sch'ich'el te spat-xuhque.
6Te mach'a ya smalbe sch'ich'el winic,
winic nix ya xmalbot sch'ich'el yu'un;
como pajal yilel soc Dios
la yich' pasel te winique.
7Te ha'exe sitinan soc p'ohla abahic, al-nich'anajanic, nojesahic te bahlumilal, xchi te Diose.
8Te Dios la yalbe xan te Noé soc te snich'nab: 9Ya jchap jc'op ta atojol soc ta stojol ats'umbal te patil ya xtal, 10soc spisil bintic cuxajtic te sjoquinejex: ha te mutetic, chambahlametic, soc spisil alaq'uil chambahlametic ta bahlumilal te sjoquinejex, spisil te chambahlametic te loq'uic ta barco. 11Ya jchap jc'op ta atojolic, ma ba ya caq'uix xan ta lajel ta puhlel spisil bintic cuxajtic, ma xtalix yan puhlel te ya sjin te bahlumilale, xchi.
12Soc la yal te Diose: Hich ay te seña yu'un te chapbil-c'op te ma xlaj sc'oblal te ya cac' ta jtojol soc ta atojolic soc spisil bintic cuxajtic: 13Cac'oj ta tocal te xojob cu'un, ha seña ya xc'oht yu'un te jc'op la jchap soc te bahlumilale. 14Te c'alal ya cac' tal tocal ta sba te bahlumilal, ya me xchicnaj te xojob cu'un ta tocal. 15Hich ya jna' a te jc'op la jchap ta atojol soc ta stojol spisil te bintic cuxajtic, ma ba ya xtal xan puhlel te ya slajin spisil te bintic cuxajtique. 16C'alal ya xchicnaj te xojob ta yohlil te tocal, ya me quil soc ya me jna' te chapbil-c'op te ma xlaj sc'oblal ta stojol Dios soc ta stojol spisil bintic cuxajtic ta bahlumilal, xchi.
17Te Dios la yalbe te Noé: Ha seña yu'un te chapbil-c'op ini te la jchap soc ha'at soc spisil bintic cuxajtic ta q'uinal, xchi.
Yacub Noé
18Te snich'nab Noé te loq'uic ta barco, ha te Sem, Cam soc Jafet. Ha stat Canaán te Cam. 19Ha'ic te oxtuhl snich'nab te Noé, ha ta scuentahic te noj xan te bahlumilale.
20Patil te Noé hahch schahpan te lumq'uinal, la sts'un sts'usubil. 21La yuch'be ya'lel te ts'usube, yacub yu'un, la schol sc'u' spac' ta yutil snahilpac'. 22Te Cam, te ha stat te Canaán, la yil te mayuc sc'u' spac' te state; la yalbe ya'iy te sbanquil soc yihts'in te ayic ta fuera. 23Hich te Sem soc te Jafet la stsaquic jlihc c'u'ul, la yac' bahel ta snehquelic, walac'pat behenic ochel, la smuquic a te static te mayuc sc'u' spac', hich ma ba la yilic a te mayuc sc'u' spac' te statique.
24C'alal cux yo'tan ta yacubel te Noé soc te la sna' te bin pasbot yu'un te squerem-nich'an, 25hich la yal:
¡Bohlubuc me sc'oblal te Canaán!
¡A'bat yu'un a'batetic ac'a c'ohtuc ta stojol te yermanotac! xchi sc'oblal.
26Soc la yal xan:
¡Te Jehová te Dios cu'un, ac'a ya'be bendición te Sem,
yan te Canaán ha ya'bat ac'a c'ohtuc!
27¡Ac'a tohyuc sc'oblal yu'un Dios te Jafet,
ac'a snahimbe snahilpac' Sem,
yan te Canaán ha ya'bat ac'a c'ohtuc! xchi sc'oblal.
28Te c'alal c'axemix a te puhlel, lajuneb swaxaclajunwinic (350) xan ha'bil cuxul te Noé. 29C'alal ayix lajuneb swaxacwinic yoxbahc' (950) ya'bilal a te Noé, cham.
Právě zvoleno:
Génesis 9: TZH
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
Biblia Tzeltal Bachajon © Sociedad Bíblica de México, A.C., 2006.