لوقای انجیل 21
21
ندار بیوه زناکِ پیشکش
1عیسی دور بر نیگاه گوده و دارا آدمؤنی بدِه که خوشونه پیشکشؤن معبد بیت المال صوندوق میئن توده دبون. 2او میئنه ندار بیوه زناکی هم بدِه که دو قُرؤن صوندوق میئن تَودَه. 3عیسی بوته: «راست راستِ شمرِه گونَم، ایی ندار بیوه زناک از همه اوشون ویشته هَدَه. 4چونکه اوشون همته از زیادی خوشونه دارایی هَدَئن، امّا ایی زناک خوشِ نداری میئن، خو تمؤم روزیِ هَدَه.»
آخر زمؤن نیشونه أن
5وختی بعضی أن معبد وصف واسه گب زئدبؤن که چُطو قشنگ سنگؤن و پیشکشون وقف امره بساته ایسّه، عیسی بُوته: 6«او روزؤنی رسنه اوچیزی جی که اِره اینین، هیچ سنگی اویکته سنگ سر نومؤنه بلکه همه فگردنه.»
7اوشؤن بپورسه ئن: «اوستاد، ایی اتفاقؤن کِی دکئنه و اونه نیشؤنه نزدیکَ بوئن چیسه؟» 8عیسی جواب بَدَه: «واخُب ببین که گُمراه نبین چونکه خیلی ان می ایسم امره هنن و گونن: ”مو هو ایسّم“ و ”موعود زمون برسه“. اوشونه دومبالسر نشین.
9«و وختی که جنگؤن و آشوبؤن خبرِ ایشتؤنین، واهیمه ندارین. چونکه اول باید ایجور چیزون اتفاق دکای، ولی آخر کار هودَم نرسنه.» 10بازین عیسی اوشونه بوته: «یکته قوم، قوم دیگر ضد و یکته مملکت، مملکت دیگر ضد ویریسنَن. 11پیله زمین لرزه أن و قحطی و وبا خیلی جائان میئن هنه، و ترسناک اتفاقؤن دکِئنه، نیشونه های خوفناک آسمؤنِ میئنای ظاهیرَ بنه.
12«امّا پیش از ایی همه اتفاقون، شمره گرفتارَ کوئنن، آزار رسونبئنَن و یهودی أن عبادتگاه أن و زندؤنؤنِ میئن تؤدئنَن، و می ایسم واسه، شمره پادشاه أن و فرماندارؤن ورجه بئنَن 13و ایطوری مُهلت پیدا کوئنین تا گوایی بدین. 14اینه خوب یاد بدارین که جلوتر، ایی فیکرونِ میئن دنِبین که خودتون دفاع به چی بوگوین. 15چونکه شمره کلام و حکمتی هدِئنم که هیّته از شیمه دُشمنؤن منِئن مقاومت یا مخالفتی اونه أمره بکونن. 16حتی شیمه پئر و مَئر و برارون، و خویشؤن و رفیقؤن شمره دُشمن دست هدِئنَن و بعضی از شمه أنِ کوشنَن. 17مَردم همته می ایسم واسه شمرای نفرت پیدا کؤنَن. 18امّا یکته مو، شیمه سرا جی ابیرَ نبنه. 19صبر أمره، شیمه جؤنِ نجات دِئنین.
20«وختی بَینین اورشلیمِ، دشمن لشگر دوره بوده، بُدؤنین که اونه ویرؤنی نزدیک ایسّه. 21بازین اوشونی که یهودیه میئن ایسئن کوهؤنِ میئن فرار کوئنَن و اوشونی که شهر میئن ایسَئن شَهرای بیرون شنن، و اوشونی که دشت و صحرا میئن ایسَئن شهرِ میئن نأنَن. 22چونکه او روزؤن، مکافات روزؤن ایسّه که هرچی بنویشته بوبوُ عملی بنه. 23وای برشوکُمدار زناکؤن و مَئرونی که خوشؤن زاکؤن او روزؤنِ میئن شیر دِئنن! چونکه پیله بلایی ایی سرزمینِ سر هنه و ایی قوم، به غضب خدا دچار بنه. 24شمشیر ضربه امره کِئنَن و همته قومؤن دیگه میئن اسیری به ببورده بنن و اورشلیم، غیریهودی أنای جی لَغَد دمج بنه تا هوموقع که غیریهودی أن دوره، به انجوم برسی.
25«نیشونه‌أنی آفتاؤ و ماه و ستاره أن میئن پیدا بنه. زمین سر، قومؤن دریا کولاکای سراسیمه و پریشؤنَ بنن. 26مَردم از ترسِ اوچیزی که دنیا به اتفاق دکتدره، وحشت أمره غَش کوئنن، چونکه آسمؤن قُوا أن به لرزه در هنه. 27بازین انسون ریکه اینین که ابرِ میئن پیله قوت و جلال امره أمئدره. 28هیطو که ایی اتفاقون شروع ببی راست بَیسین و شیمه سر جورا گیرین، چونکه شیمه نجات نزدیکه!»
29و ایی حیکایت اوشون به بأرده: «انجیل دار و اویکته دارؤنِ یاد بأرین. 30هیطو که وَلگ دِئنَن، تینین بینین و بفهمین که تابستؤن اَمَئدره. 31هینه واسه، هر زمون بَینین که ایی چیزؤن اتفاق دکتدره، فَهمنین که خُدا پادشاهی نزدیکِ. 32راست راستِ، شمره گونَم، تا همۀ ایی اتفاقون دنکای، ایی نَسل از بین نشنه. 33آسمؤن و زمین از بین شنه، امّا می گبؤن هرگی از بین نشنه.
34«واخوب ببین، نبی که کِیف و نوش و مستی و ایی زندگی دیل نیگرؤنِین شیمه دیلِ سختَ کونی و او روز یکته دؤم مورسؤن یکدفاری شیمه سر بکّای. 35چونکه ایی اتفاق همۀ مَردم سر، تمومِ دنیا به دکئنه. 36پَس همیشه بپایین و دوعا بکونین تا بتونین همه ایی اتفاقونَ جی که خیلی زود دکِئنه، در أمؤن بومؤنین و انسون ریکه ورَجه بَیسین.»
37عیسی هر روز معبد میئن مردم آموتی. و هر شؤ شهرای بیرون شو و کوهی که زیتون ایسم داشتِ شوء صوبَه گود. 38صوبه دمؤن مَردم اونَ گبؤنِ ایشتؤسن به معبد میئن جومَه بوئن.
Právě zvoleno:
لوقای انجیل 21: EGB
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
@ 2024 Korpu Company