ລູກາ 2
2
ອມາກັນເກີດພະເຢຊູຕັລລາ
(ມທ 1:18-25)
1ປະມານຕາເປັ່ດກາແຊຕາປິ່ຈອັດໂຢຮັນເກີດ, ຈັກກະພັດໂຣມຈັຣແມັຮອອລໂອຄຸໂຕອໍເບ່ນໂຕ່ຣນັບຢັຮດັອງຈຣາຈັຣແມັຮລີ່ມອມາດຮັຣປຸ່ກກຣູງໂຣມ. 2ເດັ່ນລາອາເກີດລາງຕັຣແນັບໂຕຈຣານຈັຣແມັຮໂຕປຶດປຣະພາສີຈຸ່ມງາຍຕັກກັຮກາເດັ່ນກີຣີນີໂອຊັອກເກີດພູປົກຄອງກຣູງຊີເຣຍງອໍອາຈັກໂຣມ. 3ຄອງອອລເດັ່ນອາເກີດອມາໂຕ່ຣງອໍອາຈັກໂຣມກັຮໃກອມາດວີ່ລຣັຣປຸ່ກກຸ່ຮນະເບ່ນຢໍ່ອ໌ຈຣານຈັຣແມັຮນາວີ່ລນາເມືອງໃອເບີມ. 4ໃກເບີ່ໂຢເຊັບລາລັອຮຢໍ່ອ໌ອັດເມືອງນາຊາເຣັດເຕິ່ແຂວງຄາລີເລ ເພືອຢໍ່ອ໌ຮາເມືອງເບັດເລເຮັມແຂວງຢູດາຍເມືອງງອໍກະສັດດາວິດ, ໂຢເຊັບຢໍ່ອ໌ຮາໃກຄອງອໍລາເກີດຈຸ່ມເຈືອງອໍກະສັດດາວິດ. 5ອໍເບ່ນຢໍ່ອ໌ຈຣານຈັຣແມັຮຢັຮກັນມາຣີຈັຣຣອຍຍງອໍ. ຮາກກັນມາຣີໃກຄຳລັງອາຫແຕວ. 6ຕອນກອຍອັດເຕິ່ເມືອງເບັດເລເຮັມໃກ ອາພາດີເຕິ່ກາແຊກັນມາຣີເກີດແຈະ. 7ກັນມາຣີເກີດແຈະໂກຍຍຕາແນມ, ອໍເດ່ງໂຊະຕາດກາໂຊບຢັຮຊຳປິ່ເດີ່ອ໌ເຕິ່ເປັ່ດບັນສັດ, ຄອງເຕິ່ດົ່ງລັບຕາມອຍໃກເຍ່ະຈຶກບອນຣັຣນັອຮດັອງກອຍອັດ.
ເທວະດາຊຳປັ່ຮຮາຈຸ່ມບັນແກະ
8ກັຣວາງເດັ່ນວີ່ອມາດບັນແກະອັດກລາງຕາລາປິ່ປັນການ່າແກະ ງອໍຈຸ່ມກອຍຢາມປຣັ່ຮຮາບື່ 9ວີເທວະດາເມີຍອ໌ນະງອໍພຣະເຈົ້າເບ່ນເຕິ່ຊຳປັ່ຮດັອງຈຸ່ມກອຍຢັຮປັຣອາງຈຣາລງອໍພະເຈົ້າ ອາບາລອາງລີ່ມຕະກັ່ງຈຸ່ມກອຍ. ກັຮໃກຈຸ່ມກອຍເບີ່ຕົ່ຮລອມຢຸ່ຫແຕ 10ຮາກເທວະດາໃກ ເບ່ນກັຣແລວຮາຈຸ່ມກອຍອອລ, “ມະຢຸ່ເອົາ ເກົາກັນເຕີເຕືສອມາຢຽມດັອງຈຸ່ມແຍັມຈອມ ເກີດອມາໂຢະລາງກຣິ່ຮກໂຣ່ນເຕິ່ຮາມາດວີລຣັຣປຸກເຕືຮນະ. 11ຄອງອອລຕາໃງແກະເດັ່ນອໂນ່ພູໂປຣດັອງຕາປິ່ຈມເມີ່ຍອ໌ນະ ກັຮພະເຢຊູປັຣລັບອອລກັຮພຣະຄຣິດເບ່ນເກີດອັດເຕ່ິເມືອງງອໍດາວິດສຳລັບຈຸ່ມແຍັມກັຣນຶ່ຣ 12ເດັ່ນເຮິຍອ໌ເກີດມາຍສຳຄັນ ດັອງຮາຈຸ່ມແຍັມກັຮຈຸ່ມແຍັມຢັຮເບ່ນຮາເຕີ່ມ ພຣະແຈະເກີນເມິຍອ໌ອົງ ກາປຽລໂຊ່ະຕາດປິ່ຮກັລລຸງກັຣວຽລເປັ່ດ.” 13ຕອນໃກວີການ່າເທວະດາແຫງສະຫວັນເກີດການ່າ. ເຕິ່ຊຳປັ່ງຮາເທວະດາເມີ່ຍອ໌ນະໃກ ຕັຣແນງບອຈກຣາວພະເຈົ້າອອລ, 14“ປັຣອ່າງຈຣາລດັອງວີ່ດັອງຮາພະເຈົ້າເຕິ່ປຣັ່ຮສະຫວັນໂຕອາປຣູ່ສຫແຕ ຢັຮຮາກຣູງກາຕຽກ ດັອງວີໂຢະລາງຮາອມາດເຕືຮນະຮາອໂນ່ພູພະອົງປໍ່ລອມໃກ.” 15ເຢີ່ຈຸ່ມການ່າເທວະດາຈຸ່ມໃກຕູ່ອັດຈຸ່ມກອຍຊັອກສະຫວັນເຢີ່ ຈຸ່ມອໂນ່ບັນແກະເບ່ນກັຣແລວຮາຕັຣລີອໂນ່ອອລ, “ດັອງຈຸ່ມແຮຕັຣແນງຢໍ່ອ໌ຮາເມືອງເບັດເລເຮັມຊັຮ ຢໍ່ອ໌ເມີ່ລອມາໂຕອາເກີດໃກ ຕຳປູນກັຮພະເຈົ້າເບ່ນກັນເຕີເຕືສຈຸ່ມແຮຈອມໃກ.” 16ຈຸ່ມກອຍຊຳເປັ່ຣລຢໍ່ອ໌ຢັຮຮາເຕີ່ມມາຣີຢັຮໂຢເຊັບ. ຢັຮຕາມຸ່ຮແຈະຫລຸງປິ່ເຕິ່ກັຣວຽລເປັ່ດ. 17ເຢີ່ຈຸ່ມບັນແກະຮາເຕີ່ມແຈະຫລຸງໃກຈຸ່ມກອຍລາຕັຣເຕືສອມາໃກ ກັຮຈຸ່ມກອຍເບ່ນແຊັງເທວະດາໃກເຕືສຮາແຈະຫລຸງໃກ. 18ອມາດກຸ່ຮນະເບ່ນຊາແງຈຸ່ມບັນແກະຕັຣເຕືສມາຣຈັຣເລິນລອມຮາອມາຈຸ່ມບັນແກະໃກເບ່ນຕັຣເຕືສ. 19ນາກັນມາຣີເບ່ນຊັງກື່ລເດີ່ອ໌ມັຮອມາເດັ່ນເຕິ່ກັລລຸ່ງລອມ. 20ເຢີ່ຈຸ່ມບັນແກະລາໂຈວີ່ງຢັຮ ບອຈກ່ຣາວພະເຈົ້າກຸ່ຮແນວໂຕໃອເບີ່ມເບ່ນແຊັງ ຢັຮເບ່ນຕາມຸ່ຮ ກັຮເຫດການໂຕເບ່ນເກີດໃກກັຮເທວາດາໂຕພະເຈົ້າເບ່ນຢູ່ນດັອງເຕືສຮາຈຸ່ມກອຍໃກ.
ປັນຈຸ່ຮແຈະເກີນກັລລຸງປັນໂຈ່ມ
21ຕາໃງຕາກອລອັດແຈະເກີນໃກເກີດ, ເດັ່ນເຕິ່ຕາໃງຕັກພິທີກັດຮາອໍຈຸ່ມກອຍຈັຣແມັຮແຈະຫລຸງໃກອອລເຢຊູ ຕຳປູນເທວະດາເບ່ນເຕືສ ຢື່ງກັນມາຣີຮອມເບ່ນຫແຕວໃກ.
ອມາປັນຈຸຮແຈະເກີນຮາດົ່ງປັນໂຈ່ມ
22ເບີ່ເວລາກຳນົດລອາາເຕິ່ ສຳລັບໂຢເຊັບຢັຮມາຣີໂຕຕັກພິທີຊຳປຣ່າຈຈັນນັກດັອງສະອາດ, ຕຳປູນກັຣຮອດງອໍໂມເຊເບ່ນເຕືສເດີ່ອ໌, ຈຸ່ມກອຍເດ່ງແຈະຫລຸງໃກ ຢໍ່ອ໌ຮານະຄອນເຢຣູຊາເລັມເພື່ອປັນຈຸ່ຮພະເຢຊູພູປຣາ່ຈຕາງາດັອງຮາພະເຈົ້າເພືອເກີດໂຊລພະເຈົ້າ, 23ຕຳປູນກັຣຮອດໂຕວີຈຣານເດີ່ອ໌ເຕິ່ກັຣຮອດງອໍພຣະເຈົ້າຕັລລາອອລ, “ແຈະໂກຍຍຕາແນມກຸ່ຮນະດັອງເຕິ່ປັນຈຸ່ຮດັອງພຣະເຈົ້າຕັລລາ.” 24ໂຢເຊັບຢັຮມາຣີເບ່ນຢໍ່ອ໌ປັນຈຸຮເຄືອງກັນໂຕ່ງຕຳປູນກັຣຮອດກັຣຮອດງອໍພຣະເຈົ້າເບ່ນເຕືສເດີ່ອ໌ໃກ ກັຮຈີມກາຕຣູເມີ່ຍອ໌ຄູ ຢັຮຈີມຫຕຣ່າບາຣປັນນົງຢໍ່ດັອງປະໂລຫິດອໂນ່ໂຕບົ່ຮຊຳມາຈີມໃກເຕິ່ກັນໂຕ່ງຊຳມາເພືອຊຳລະມາຣີ. 25ຕອນໃກເຕິ່ນະຄອນເຢຣູຊາເລັມວີໂກຍຍເມີ່ຍອ໌ນະຈັຣແມັຮອອລ ຊີເມໂອນອໍເກີດອມາດປັຣເຕັ່ດຈັຣແນັບພະເຈົ້າຢັຮ ເບ່ນປັນພູໂປຣດັອງຕາປິ່ຈຊາດອິດສະຣາເອນ ໂຕພະເຈົ້າປັຣລັບປັຣເອີອ໌ອອລແອອ໌ຢູນດັອງໂປຣຈຸ່ມກອຍດັອງຕາປິ່ຈອັດປາກອນງອໍຈຸ່ມກອຍ, ຣັັຣວາຍບອກຕາງາເບ່ນຕັຣແນງຊີເມໂອນ. 26ຣັັຣວາຍບອກຕາງາເບ່ນຊຳປັ່ຮດັອງອໍຈອມອອລອໍເຍ່ະກາຈີດ ຫຢືງເບ່ນຕາມຸ່ຮພຣະຄຣິດອໂນ່ໂຕເຕິ່ອັດພະເຈົ້າຕັລລາ. 27ຕາໃງໃກຮັຣວາຍບອກຕາງາ ເບ່ນຕັຣແນງຊີເມໂອນຢໍ່ອ໌ຮາຫມ່ອງດົ່ງປັຣອັດພະເຈົ້າ, ມາຣີຢັຮໂຢເຊັບເບ່ນເດ່ງແຈະຫລຸງໃກເຢຊູໂມ່ດຮາກັລລຸງດົ່ງປັຣອັດພະເຈົ້າ ເພືອຕັກຕຳປູນກັຣຮອດງອໍໂມເຊໂຕເບ່ນເຕືສເດີ່ອ໌ກຽວຮາແຈະຫລຸງໃກ 28ຕອນຊີເມໂອນເບ່ນຕາມຸ່ຮແຈະຫລຸງໃກເຢຊູເບີ່ອໍລາກາອື່ຮາປຣັອງໃອເບີ່ມ ຢັຮອໍບອຈກຣາວພະເຈົ້າອອລ: 29“ໂອພະເຈົ້າຕັລລາອາ ມັຮອເນົາພະອົງເບ່ນດັອງອມາດໂຊລງອໍໃມເກີດໂຢະລາງຕຳປູນພະຄຳງອໍໃມ. 30ກັຮອອລມັດງອໍເກົາເບ່ນຕັຣມຸ່ຮອມາຕາປິ່ຈໂຕອາເຕິ່ອັດໃມເຢີ່ 31ພຣະອົງວີແພນການເດີ່ອ໌ໂຕແອອ໌ໂປຣອມາດເຕິ່ກາຕຽກເດັ່ນດັອງຕາປິ່ຈເດີ່ຍນາພະເຢຊູໂປຣດັອງຕາປິ່ຈເດີ່ຍນາອໍວີ່ຮາກູ່ຮຊາດຊາມາດຕາມຸ່ຮເບ່ນ. 32ຄືປັຣອາງຈແຣັດ ບາລອາງ ເປີດເຜີຍ ພຣະປັຣຢູ່ນດັອງອມາດມາຣຊາດ ຢັຮຢົ່ກເດ່ງ ອາງອື່ງເຕິ່ອມາດ ອິດສະຣາເອນ ພົນລະເມືອງອັງອໍຕັລລາປຣັ່ຮ.”
33ຕັຣລັລອເຢິ່ຍອົ່ມອັງອໍພຣະແຈະເກີນ ຢັຮຈັຣເລິ່ນລອມ ກັລລຸງແນວ ຢັຮຊີເມໂອນເບ່ນກັຣແລວເຕິ່ ພຣະແຈະເກີນໃກ. 34ຊີເມໂອນເບ່ນອວຍພອນຈຸ່ມກອຍຢັຮກັຣແລວຢັຮມາຣີເຢິ່ຍງອໍແຈະເກີນໃກອອລ, ຄອງອອລແຈະຫລຸ່ງເດັ່ນກັຮແຈະຫລຸ່ງເດັ່ນ “ພະເຈົ້າປັນຈຸຮເດີ່ອ໌, ພະເຈົ້າແອອ໌ທຳລາຍກື່ຣນະຮາຊາດອິດສະຣາເອນ, ຢັຮພະເຈົ້າແອອ໌ໂປຣຮາອມາດກັນນັອຮເອີອ໌ກື່ຣນະເຕິ່ຊາດອິດສາຣາເອັນ 35ກັຮອມາຣັຣງິ່ຮກັລລຸງລອມງອໍອມາດກັນນຶ່ຣເບ່ນຊຳປັ່ຮດັອງແຈງ ຮາກໃມໃອໂອຣກັຮອາໃກຣປລາດາວເຈັດອາຮາໂລ່ະຣອຈລອມ. ເດີ່ຍການກັລລັກອໍຈຸ່ມກອຍແອອ໌ສະແດງດັອງຕາມຸ່ຮໂຕກອຍຄຶດກັລລຸ່ງລອມໂຕອາຫແຕງອໍກອຍ.” 36ເມີ່ຍອ໌ຕາໃງໃກເຮິຍອ໌ວີ່ອມາດກັຣແລວຕາງກັນເມີຍອ໌ນະ ຈັຣແມັຮອານາອໍລາອັດເຕິ່ໃກເຕິ່ຫມ່ອງດົ່ງປັນໂຈ່ມ. ເກີດແຈະກັນກາໂມຣງອໍຟານູເອນໂຕເກີດຈຸ່ມເຈືອງອໍອາເຊ. ກັນເດັ່ນອໍກັຣຣີງເຢີ່ອໍວີກາຢຶກຕອນອໍເປິ່ຍນຸ່ມ ເບີ່ເບ່ນອັດຢັຮກາຢຶກໃກຕາເບ່ນໂປລກາມໍ, 37ເບີ່ກຳມາຍລະວາງຕາກອລຈີດປວນກາມໍກັນເດັ່ນເຍ່ະເບ່ນຕັຣຕູ່ອັດຫມ່ອງດົ່ງປັຣອັດພະເຈົ້າມັຮລັບຈູບ, ກັນເດັ່ນເບ່ນໃຊເວລາເຕິ່ຫມ່ອງດົ່ງປັຣອັດພະເຈົ້າອໍໂປບກຣາບພະເຈົ້າເຕິ່ໃກເຍ່ະອອລຕາໃງຕາບື່ ເດີ່ຍເຍ່ະຈາອາແມັຮຕອນເວລາໃກ ຢັຮເປີ່ກາເວິ່ຮຮາພະເຈົ້າ 38ຊີເມໂອນກັຣແລວຊຸດເຢີ່, ກັນອານາເບ່ນໂມ່ດຮາໂຢເຊັບຢັຮມາຣີຕອນກອຍເປິ່ຍອັດເຕິ່ໃກເຕິ່ຫມ່ອງດົ່ງປັຣອັດພະເຈົ້າ ກັນອານາເບ່ນໂມ່ດຢັຮກ່ອບລອມພະເຈົ້າ. ກັນເດັ່ນເບ່ນກັຣແລວ ອອລຮາແຈະຫລຸ່ງໃກກັຮພະເຢຊູດັອງກຸຮ່ນະເຕິ່ນະຄອນເຢຣູຊາເລັມຮາອໂນ່ໂຕກື່ມພູໂປຣດັອງຕາປິ່ຈອັດປາກອນງອໍຈຸ່ມກອຍ.
ອມາໂຈວີ່ງຮານາຊາເຣັດ
39ເຢີ່ໂຢເຊັບຢັຮມາຣີຕັກກຸ່ຮແນວເຢີ່ ຕຳປູນກັຣຮອດງອໍພະເຈົ້າຕັລລາເຢີ່ ຈຸ່ມກອຍລາໂຈວີ່ງວີລເມືອງກອຍເບີ່ມຮານາຊາເຣັດຮາແຂວງຄາລີເລ. 40ນາແຈະຫລຸ່ງໃກລາກຣິ່ຮອງອໍອາຍຊັອກວີ່ກັນເນິ່ງຈັລນວລ ຢັຮປີ່ງແນະຕຳບາຈຕຳມາຍຍພະຄຸນງອໍພະເຈົ້າ ລາຊຽຣອັດຢັຮພະອົງ.
ແຈະເກີນໃກເຢຊູເຕິ່ດົ່ງປັນໂຈ່ມ
41ກຸ່ຮກາມໍ ເຢິ່ຍອົ່ມເຢຊູ ເຄີຍຊັອກນະຄອນເຢຣູຊາເລັມ ເພື່ອສະຫລອງຕັກບຸນປັຮງອຈຈະນາຈາເປີຍກາດເຍ່ະຈຶກປູ່ຮ. 42ເບີ່ແຈະກລຸ່ງໃກເຢຊູອາຍຸເບ່ນເມີ່ຍອ໌ຈິ່ດບາຣກາມໍ ຈຸ່ມກອຍລາເບ່ນຢໍ່ອ໌ຕັກປັຣງອຈຈານາເດັ່ນ ເຕິ່ເມືອງເຢຣູຊາເລັມກັຮເຄີຍຕັກກູ່ຮກາມໍ. 43ເຢີ່ຕັກປັຣງອຈເຢີ່ ເບ່ນຕາໂປ່ລຕາໃງ ເຢິ່ຍອົ່ມເຢຊູໂຈວີ່ງເຮິຍອ໌ຮາດົ່ງ, ເຢິ່ຍອົ່ມອໍແຍະຈອມອອລອໍ, ພະເຢຊູໃກເປີ່ຍອັດເຕິ່ນະຄອນເຢຣູຊາເລັມ ຄອງເຢິ່ຍອົ່ມອໍລາເຍ່ະຈອມ. 44ກອຍບຣາຮນະຮັຣງິ່ຮອອລ ເຢຊູເດັ່ນອັດຢັຮອມາດກັນນື່ຣກຳລັງໂຈ່ວີ່ງມາລີ. ກັຮໃກຈຸ່ມກອຍເປິ່ຍຈາກ່າວຢໍ່ອ໌ເບ່ນເມີຍອ໌ຕາໃງ, ໃກເບີ່ກອຍຕັຣແນງຊູຕາແມັຮເຮິຍອ໌ເຢຊູປັລລ່າຈຸ່ມເອ່ມອາຍຢັຮອໂນ່ນ່າ. 45ເຢີ່ເຍ່ະຮາເຕີ່ມຈຸ່ມກອຍລາໂຈວີ່ງ ຢໍ່ອ໌ຊູຮານະຄອນເຢຣູຊາເລັມ. 46ເຢີ່ຊູເບ່ນແປຕາໃງເຢີ່ ຈຸ່ມກອຍລາເບ່ນຮາເຕີ່ມແຈະເກີນຕາເງົາເຕິ່ກລາງອມອ່ງດົ່ງປັຣອັດພະເຈົ້າ ຕາເງົາເຕິ່ຕັຣອື່ຍຈຸ່ມອາຈານອມາດຢິວຄຳລັງຊາແງຢັຮຕາແມັຮຈຸ່ມອາຈານຈຸ່ມໃກ. 47ເຕືຮນະໂຕເບ່ນແຊັງພະເຢຊູກັຣແລວມາຣຈັຣເລິນລອມຢັຮຕຕາບັຈຕຳມາຍຍເຕິ່ອມາໂຕອໍຕຳບອງໃກ. 48ນາເຢິ່ຍອົ່ມຈັຣເລິນລອມເຢີ່ເບ່ນຕາມຸຮ ຢັຮເຢີ່ຍເບີ່ຕາເແມັຮອອລ, ແຈະອາ, ເກີດກັຮແມັຮໃມຕັກຮາຈີ່ກັຮກາເດັນ? ເຢິ່ຍຢັຮອົ່ມຕັຣວຽລຊູໃມເດີ່ຍກາວົນລອມທຳມາດ. 49ແຈະເກີນຕຳບອງອອລ, ອາເກີດກັຣແມັຮແຍັມຊູເກົາ? ຈຸ່ມແຍັມເຍ່ະຈອມອອລອາ ເກົາຕັອງອັດເຕິ່ປັຣອັດງອໍເກົາ? 50ຮາກຈຸ່ມກອຍແຍະຈອມກັຣແລວຕຳບອງງອໍແຈະເກີນໃກ. 51ເບີ່ແຈະເກີນໃກເຢຊູປັຣລັກໂຈວີ່ງຢັຮຈຸ່ມກອຍຮາເມືອງນາຊາເຣັດ ຢັຮຍອມຊາແງຈຸ່ມກອຍ ນາເຢີ່ຍລາກຳອມາໃກປາເຕືຮເດີ່ອ໌ກັລລຸ່ງລອມ. 52ພະເຢຊູອໍຕັລລາເບ່ນກຣິ່ຮອັງອາຍນາຈັນນັກຈັນນຶ່ນ ຢັຮຕຳມາຍຍຫແຕເດີ່ຍຕາບັຈຕຳມາຍຍງອໍພະເຈົ້າ. ເຍ່ະອອລພະເຈົ້າຢັຮອມາດລາປໍ່ລອມຢັຮລາຈັຣແນັບພະເຢຊູ.
Právě zvoleno:
ລູກາ 2: NGT
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
Kriang (ກຣຽງ) Bible by Beyond Translation is licensed under Creative Commons Attribution-ShareAlike 4.0 License.