TA KƏLA 13
13
1Abəram ḭḭ Ejiptə aw̄ gogə́ gō nang kə́ Negeb tə́ kə nə̄yá̰neé ō, kə yá̰a̰ kənge yān gēé malang ō. Lot i seneé.
Abəram nin̄ kə Lot əya̰n̄ naā
2Abəram ənge yá̰á̰ ngá̰ý. Yá̰a̰ kul̄ yān gə̄ ō, gində̄ arjā̰a̰ yān ō, lɔ́r yān ō, i ngá̰ý. 3Ni-ḭḭ gō nang kə́ Negeb tə́ njə̄rā bátə́ ugə̄ Betel, loo ń udə kújə tandā yān tū tə́ kété tə́ ní, i dɔ dán Betel nin̄ kə Ai tə́. 4I loo ń ni-rāā loo tun̄ yá̰a̰ ba ɓāŕ Nə́ɓā na i Kɔ́ɔ̄ɓē kem ndɔ̄ȳ yān tə́ tū tə́ kété ní.
5Lot ń i seneé ní aw̄ kə batə̄ gə̄ ō, bə̄yā̰ gə̄ ō, man̄g gə̄ ō, kújə tandā gə̄ ō. 6Yá̰a̰ kənge yādə́ i ngá̰ý, adə̄ loo asə kadə̄ ndinə̄ń mbak alé, tɔdɔ̄ Kanaan gə̄ kə Periji gə̄ ndin̄ dɔ nang ní tə́ ō. 7Ngé kul̄ yá̰a̰ yā Abəram gə̄ ō, ngé kul̄ yá̰a̰ yā Lot gə̄ ō, kɔ̄lə̄n̄ naā. 8Anī Abəram əda Lot na:
Majə kadə̄ kɔ̄l̄ naā to dɔ dáńjí tə́ aĺ ō, to dɔ dáń ngé kul̄ yá̰a̰ yājí gə̄ tə́ aĺ ō, tɔdɔ̄ jḭḭ seí i ngákó̰o̰ naā gə̄. 9Dɔ nang n to kə̄ noí tə́ malang noó aĺ a? Ī-ndi seḿ to̰ alé. Ré āw̄ dām̄ kə́ ko̰ó̰ tə́ anī, m-ā m-āw̄ dām̄ kə́ geleé tə́. Ré āw̄ dām̄ kə́ geleé tə́ anī, m-ā m-āw̄ dām̄ kə́ ko̰ó̰ tə́.
10Lot un kumən kə́ dɔɔ́ anī a̰a̰ ndágə loo kə́ Jurdḛ tə́ ń man̄ aw̄ tū tə́ majə ní. Kété tá kadə̄ Kɔ́ɔ̄ɓē nujə Sodom ō, Gomor ō ní, ndágə loo kə́ Jurdḛ tə́ ní to i tītə̄ loo kə́ kem ndɔr̄ yā Kɔ́ɔ̄ɓē tə́ ō, to i tītə̄ dɔ nang kə́ Ejiptə tə́ ō, bátə́ ugə̄ń Soar. 11I nang kə́ Jurdḛ tə́ n Lot gə̄rā tām̄ yān nəkɔ́ tə́ malang ní, adə̄ ni-aw̄ kumən kə́ gír ɓē tə́. Nin̄ əya̰n̄ naā i beé. 12Abəram ndi i nang kə́ Kanaan tə́, ba Lot ndi i gidə ɓē gə̄ kə́ gō nang kə́ Jurdḛ tə́. Ni-aw̄ bátə́ udə kújə tandā yān Sodom. 13De kə́ Sodom gə̄ i de kə́ kemdə́ ndul ngá̰ý gə̄. Nin̄-rāān̄ yá̰á̰ kə́ majaĺ ngá̰ý gə̄ ta kum Kɔ́ɔ̄ɓē tə́.
14Dan ń Lot əya̰n̄ naā kə Abəram ní, Kɔ́ɔ̄ɓē əda Abəram na:
Ún kumií kə̄ dɔɔ́ loo ń ī-ra tū tə́ noō, ba á̰a̰ loo kə̄ mbɔ́r ɓē kə́ ko̰ó̰ tə́ ō, mbɔ́r ɓē kə́ geleé tə́ ō, kum kə̄ gír ɓē tə́ ō, no ɓē tə́ ō. 15Dɔ nang malang ń á̰a̰ā̰ noó, m-ā m-ādə̄sí sḭḭ̄ kə ngán kaaí gēé, kadə̄ i yá̰a̰ yāsí njɔ́ḿ. 16M-ā m̄-rāā kadə̄ ngán kaaí gə̄ i ngá̰ý tītə̄ nán̄g ngárə̄ḿnjēý, kadə̄ ré deē asə tə́dá nán̄g ngárə̄ḿnjēý təgā anī, kɔ́ɔ̄ a asə tə́dá ngán kaaí gə̄ təgā ō. 17Ḭ́ḭ dɔɔ́, ī-njə̄rā á̰a̰ loo, á̰a̰ ngālən ō, laan ō, tɔdɔ̄ m-ā m-ādī loo ní.
18Abəram ndɔ́tə̄ kə kújə tandā yān gēé, aw̄ ndi ɓē mbo̰ō̰ kāgə̄ sén gə̄ kə́ Mamre tə́ kadə Hebron tə́ ngɔr. Ni-ɔy kūbə̄rū mbal̄ gə̄ tə́ndā dɔ naā tə́ loo ń noō tə́, rāań loo tun̄ yá̰a̰ tām̄ yā Kɔ́ɔ̄ɓē tə́.
Právě zvoleno:
TA KƏLA 13: SARDC
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
Bibəl ta Sar̄ © L'Alliance Biblique du Tchad, 2006, 2010.