Kəla rāā Ngámbang kəla gə̄ 21
21
Pol aw̄ kə̄ Jerusalem
1Dan ń jə-rāā bátə́ á j-əya̰ naā anī, j-un to bo ba j-aw̄ kumjí súmūú ta kaw̄ kə̄ Kos. Teē kə ndɔ̄ kə́ noō anī j-aw̄ j-ugə̄ Rodes. J-ḭḭ noó j-aw̄ Patara. 2J-ənge too bo kógə̄ḿ kə́ a aw̄ kə̄ Penisi kem ɓē ngeé ń noō tə́. J-al̄ kemeé ba j-aw̄. 3Dan ń j-ugə̄ ngɔr á j-a̰a̰ dor̄ kə́ Sipər anī, j-əya̰n dɔ jī geljí tə́ ba j-əndā to kumjí sɔɔ̄ dɔ nang kə́ Siri. J-əla to kum kā̰ā̰ kə́ Tir tə́, tɔdɔ̄ i loo ń noō tə́ n a ɔyn̄ yá̰á̰ kə́ kemeé tū tə́ ní. 4J-ənge ngé ndóō yá̰a̰ gə̄ noó, adə̄ jə-ndi sedə́ ndɔ̄ sīrí. *Ndíĺ kə́ Táĺ tāādə́ adə̄ nin̄-ədan̄ Pol na kə lōō kaw̄ *Jerusalem. 5Ba dan ń ndɔ̄jí təgā á j-əsō róbó yā kaw̄ anī, nin̄ malang kə nə̄yá̰də́ gə̄ kə ngáńdə́ gə̄ əndān̄jí róbó bátə́ ugə̄n̄ sejí gidə ɓē tə́. J-ɔsə kejəjí nang tə́ ta bā bo tə́ ba jə-ndɔ̄ȳ Nə́ɓā kə̄ loo ń noō tə́. 6Dan ń jə-rāā naā lápə́ya j-a̰ȳń ta njají oy anī, jḭḭ j-al̄ kem too boó banī nin̄-télən̄ ta kaw̄ kə̄ gogə́ ɓēé.
7Yā tɔ̄ləń ta njə̄rā mbā yājí kə to boó ní, j-ḭḭ Tir j-aw̄ Pətolemayis. Jə-rāā ngákó̰ó̰jí kə́ kem ɓē ngeé ń noō tə́ gə̄ lápə́ya ō, jə-ndi sedə́ ndɔ̄ kógə̄ḿ ō. 8Teē kə ndɔ̄ kə́ noō anī j-ɔr̄ dɔɔ́ j-aw̄ Sejare. Dan ń j-ugə̄ anī, j-aw̄ ɓē yā Pilipə nge kɔjə Najə̄ kə́ Majə tə́ ba jə-ndi looneé. Ni i de kə́ dan ngé kə́ sīrí gə̄ ń gə̄rān̄də́#21.8 Ngé kə́ sīrí gə̄ ń gə̄rān̄də́: Á̰a̰ī Kəla 6.5; 8.5 ní tə́. 9Ni-aw̄ kə ngánən kə́ dəyá̰ gə̄ sɔ́ kə́ gerə̄n̄ dəngam aĺ gə̄. Nin̄ i *ngé kəda najə̄ kə́ Nə́ɓā əndā tadə́ tə́ gə̄. 10Jə-ndi noó ndɔ̄ ngá̰ý. Anī *nge koō ta kógə̄ḿ kə́ dɔ nang kə́ Jude tə́ reē ugə̄, rīn na i Agabus. 11Ni-reē rɔ̄jí tə́, un kəlā do̰ō̰ ɓōdə̄ yā Pol tó̰o̰ń njan gə̄ ō jīn gə̄ ō ba əda na:
Yá̰á̰ ń *Ndíĺ kə́ Táĺ əda ní n toó: Deē ń i kɔ́ɔ̄ kəlā do̰ō̰ ɓōdə̄ ń toō ní, *Jipə gə̄ a do̰ō̰nən̄ beé kem ɓē kə́ *Jerusalem tə́, ba a əlanən̄ jī de gə̄ ń nin̄ i Jipə aĺ gə̄ ní tə́.
12Dan ń j-oō beé anī, jḭḭ ō ngé kə́ Sejare tə́ gə̄ ō, jə-rāā Pol ɓɔ́ kadə̄ kə lōō kaw̄ Jerusalem. 13Anī ni-tél ədají na:
Ī-nōōī ō, ī-sāāī kadə̄ kemḿ gān̄g man̄ ō i tām̄ rí tə́? Mā m-ə̄ndā dɔ rɔ̄ḿ danaá kɔ̄ɔ́ i yā kadə̄ do̰ō̰mə̄n̄ kə kəlaá ngóy alé, ba i yā kadə̄ m-óy Jerusalem gə̄gē ɓáý tām̄ yā rī Kɔ́ɔ̄ɓē Jeju tə́.
14Dan ń j-ɔjə̄n sétə́ tā ní, jə-lōō gírí ba j-əda na:
Ādə̄ Kɔ́ɔ̄ɓē rāā yá̰á̰ ń kemən nəkɔ́ ndigə ní tā!
15Gō ndɔ̄ gə̄ ngeé ń noō tə́ ní, jə-rāā gō rɔ̄jí ba j-ɔr̄ dɔɔ́ ta kaw̄ kə̄ *Jerusalem. 16Ngé ndóō yá̰á̰ kə́ Sejare gə̄ n sāān̄ kaw̄ *Jerusalem ō ní, əhɔn̄jí róbə́ tə́. Nin̄-aw̄n̄ sejí ɓē dəngam kógə̄ḿ kə́ rīn na i Mənaso̰ adə̄ jə-to looneé. Ni i de kə́ dor̄ kə́ Sipər tə́ ō, ni i nge ndóō yá̰á̰ kə́ kə ta nja gə̄ tə́ beē ō.
Pol aw̄ go̰ō̰ Jakə tə́
17Dan ń j-ugə̄ Jerusalem ní ngákó̰ó̰jí gə̄ əhɔn̄jí kə̄ rɔ̄də́ tə́ majə ngá̰ý. 18Teē kə ndɔ̄ kə́ noō anī Pol aw̄ sejí ɓē Jakə loo ń *kum kɔɔ̄ gə̄ malang kánə̄n̄ naā tū tə́ ní tə́. 19Dan ń ni rāādə́ lápə́ya oy anī, ɔjədə́ gotə yá̰a̰ gə̄ ń Nə́ɓā rāā dan de gə̄ kə́ nin̄ i *Jipə aĺ gə̄ tə́ kə ta kūl̄ kəla yān nəkɔ́ Poló ní kə ta njaá. 20Dan ń nin̄-oōn̄ najə̄ yān oy anī, ɓōkə́n̄ Nə́ɓā tɔ̄ȳ ba tél ədan̄ Pol na:
Ngōkó̰ó̰jí, īkɔ́ á̰a̰ā̰, de gə̄ dūbú ngá̰ý dan Jipə gə̄ tə́ taān̄ kem. Tá nin̄ malang ní i de gə̄ kə́ o̰o̰də́ tɔdɔ̄ *ndū najə̄ gə̄ ngá̰ý. 21Ədan̄də́ na yá̰á̰ ń ḭ̄ ī-ndóō de gə̄ ní, na a rāā kadə̄ *Jipə gə̄ malang ń ndin̄ dan nápar de kə́ rang gə̄ tə́ ní tūrə̄n̄ gidədə́ kɔ̄ɔ́ ta *ndū najə̄ yā Moijə tə́ ō, lōōn̄ gír *kəja mɔtə ngáńdə́ gə̄ tə́ ō, lōōn̄ gír kun gō yá̰a̰ kāgə̄ ɓē yā *Jipə gə̄ tə́ ō. 22Ń toō ní kə jə-rāāī i ba̰ý tā? Tɔdɔ̄ nin̄ a oōn̄ gáŕ kadə̄ ḭ̄ na ī-reē ūgə̄ laā. 23I beé ní ī-rāā yá̰á̰ ń j-a jə-rāā yā kədaī toó. Jḭḭ j-aw̄ kə de gə̄ sɔ́ laā kə́ nin̄-ənīn̄ ndūdə́ adə̄n̄ Nə́ɓā. 24Ɔ́ýdə́ ba āw̄ ī-tə́go rɔ̄í sedə́ ō, ādə̄ yá̰a̰ tām̄ yādə́ tə́ ādə̄ dəsān̄neé dɔdə́ ō. Loo ń noō tə́ de gə̄ malang a gerə̄n̄ kadə̄ ḭ̄ i de kə́ nge rāā yá̰á̰ ń *ndū najə̄ yā Moijə əda ní ō. 25Banī de gə̄ ń nin̄ i *Jipə aĺ gə̄ ba taān̄ kem ní, ndūjí ń jə-ra dɔ tə́ ní jə-ndang j-adə̄də́ kɔ̄ɔ́. J-ədadə́ na majə kadə̄ əsan̄ dā̰ kə́ tun̄ kadə̄ ɓesə̄ gə̄ aĺ ō, əsan̄ mósə dā̰ aĺ ō, əsan̄ dā̰ kə́ tūŕ míndə aĺ ō, kadə̄ əya̰n̄ sāā naā loo kaya tə́ kɔ̄ɔ́ ō.
26Teē kə ndɔ̄ kə́ noō anī Pol ɔy de kə́ sɔ́ gə̄ ní ba aw̄ tə́go rɔ̄n sedə́. Gō tə́ anī ni-aw̄ kem *kújə yā Kɔ́ɔ̄ɓē tə́ ba əda ndɔ̄ ń gíŕ tə́go rɔ̄ yādə́ a gāngəń ní, kumən na i ndɔ̄ ń kadə̄ ndējə̄n̄neé *yá̰a̰ tun̄ kə́ tām̄ yādə́ gə̄ tə́ kógə̄ḿ kógə̄ḿ ní.
Əhɔn̄ Pol kem kújə yā Kɔ́ɔ̄ɓē tə́
27Ndɔ̄ kə́ sīrí gə̄ ń jə-ndiń *Jerusalem ní a rāā yā təgā ngɔr anī, *Jipə kə́ gō nang kə́ Aji tə́ gə̄ a̰a̰n̄ Pol kem *kújə yā Kɔ́ɔ̄ɓē tə́. Nin̄-sə̄lān̄ kósə de gə̄ malang ba əhɔn̄ Pol. 28Nin̄-əgan̄ kɔŕ ədan̄ na:
*Israel gə̄ ī-dḭḭ̄jí tə́! Á̰a̰ī deē ń a aw̄ kə̄ loo gə̄ tə́ malang a ndóoń de gə̄ malang kadə̄ mbātə́n̄ gír deē yājí gə̄ ō, *ndū najə̄ yā Moijə ō, *kújə yā Kɔ́ɔ̄ɓē ń toō ō ní, ni n toó! Ba kə́ kal̄ naā ní ni udə kə de gə̄ kə́ nin̄ i *Jipə aĺ gə̄ kem *kújə yā Kɔ́ɔ̄ɓē tə́ rāań adə̄ *loo kə́ táĺ ń toō tél kə́ yḛr kɔ̄ɔ́. 29Nin̄-ədan̄ beé i tɔdɔ̄ a̰a̰n̄ Təropim ń i de kə́ Epejə tə́ ní seneé kem ɓēé, adə̄ ɔjənə̄ń na Pol na aw̄ seneé kem *kújə yā Kɔ́ɔ̄ɓē tə́.
30Najə̄ ní taā loo kem ɓēé, adə̄ de gə̄ teēn̄ kə̄ ta loo gə̄ tə́ malang reēn̄. Nin̄-əhɔn̄ Pol, ndɔ́r̄ teēn̄ seneé kɔ̄ɔ́ kem *kújə yā Kɔ́ɔ̄ɓē tə́, ba utə̄n̄ ta kə̄ ta jī tə́ noō. 31Dan ń nin̄ a sāān̄ tɔ̄lən anī, reē ədan̄ ngol áskar gə̄ kə́ bo kə́ dɔ ɓūtə̄ áskar gə̄ kə́ Rom tə́ na de kə́ *Jerusalem gə̄ malang na ran̄ witing ngá̰ý. 32Anī kə̄ ta jī tə́ noō ni ɔy ngol áskar gə̄ ō, áskar gə̄ ō ba a̰ȳ ngɔ̄də̄ kum kə̄ dɔ kósə de gə̄ tə́. Dan ń nin̄-a̰a̰n̄ ngol áskar gə̄ kə́ bo ō, áskar gə̄ ō anī asədə́ tə̄ndā Pol. 33Anī ngol áskar gə̄ kə́ bo njə̄rā kə̄ rɔ̄ Pol tə́ əhɔn, ba adə̄ ndūn kadə̄ tṵ́ṵ̄nən̄ kə súĺ gə̄ jōó. Gō tə́ anī ni-dəje na ké deē ní i náā wa, ké rāā i rí wa. 34Banī dan kósə de gə̄ ń ran̄ tə́ ní náā nəkɔ́ ɓáa un ndūn kə̄ dɔɔ́ ngá̰ý ədań i yá̰á̰ kə́rēý ō, madə̄n kə́ kadən tə́ əda yá̰á̰ kə́ rang ō. Dan ń najə̄ de gə̄ ɓār̄ sow ngá̰ý ní, ni-asə koō najə̄ kógə̄ḿ kə́ danaá sew alé. Adə̄ ni-adə̄ ndūn kadə̄ aw̄n̄ kə Poló gérgereé. 35Loo ń Pol ugə̄ loo kəndā nja kə́ yā kalə̄ń kə̄ dɔɔ́ kə́ ta gérger tə́ anī, áskar gə̄ ətōnən̄ i dɔɔ́ dɔ kósə de gə̄ tə́. 36Tɔdɔ̄ kósə de kə́ kem ɓēé gə̄ unən̄ gōdə́ ɓuk ɓuk ba əgan̄ kɔŕ ədan̄ na kə tɔ̄l̄nən̄ kɔ̄ɔ́.
Pol ɔr̄ najə̄ dɔ rɔ̄n tə́
37Dan ń a rāān̄ yā kudə kə Poló kə̄ kem gérgereé anī, Pol dəje ngol áskar gə̄ kə́ bo ní na ké n-asə kədan yá̰á̰ kógə̄ḿ karī wa.
Anī ngol áskar gə̄ kə́ bo ní tél dəjen na ké ger̄ ta Gərek wa. 38Beé ɓáa ḭ̄ i de kə́ Ejiptə ń sól̄yō de gə̄ kété laā ngɔr, ba ɔy ngé tɔ̄l̄ de gə̄ dūbú sɔ́ aw̄ sedə́ kem dəla loo tə́ ní aĺ tā.
39Pol tél ədan na:
Mā i *Jipə kə́ ojəmə̄n̄ i Tarsə, dɔ nang kə́ Silisi tə́. Mā i ngōn̄ kem ɓē kə́ rīn ɓār̄ ngá̰ý. m̄-rāāī ɓɔ́ ba ādə̄ m-ɔ̄r̄ najə̄ kə de gə̄ ń toō.
40Ngol áskar gə̄ kə́ bo ní əya̰ Pol adə̄ ɔr̄ najə̄. Anī Pol ra dɔ loo kəndā nja kə́ yā kalə̄ń kə̄ dɔɔ́ kə́ ta gérger ní tə́, wél̄ jīn, anī de gə̄ tél ran̄ jəke. Pol ɔr̄ najə̄ sedə́ kə ta Hebəro əda na:
Právě zvoleno:
Kəla rāā Ngámbang kəla gə̄ 21: BS
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
© 2006, 2010 Alliance Biblique du Tchad