Xa̱bo̱ Róma̱ 10
10
1A̱ngui̱nꞌ, phú naꞌne a̱kui̱nꞌ jamí na̱tha̱n-jáñuu Ana̱ꞌlóꞌ, rí ma̱jáwíin mbá xúgíin xa̱bo̱ Israél. 2Ikhúúnꞌ na̱tha̱n mbá rí máján ga̱jma̱á numúu̱: phú naꞌne máꞌ a̱kuíi̱n rí mune̱-mba̱a̱ Ana̱ꞌlóꞌ, i̱ndo̱ó máꞌ numuu rí tsífruꞌúu̱n xáne gúne̱-mba̱a̱. 3Numuu rí tsíyáa̱ rí i̱ndo̱ó máꞌ Ana̱ꞌlóꞌ ñajuun tsí naꞌthán xí nánda̱a̱ aꞌkhúún xa̱bo̱, ikhaa jngó ikhii̱n nuxna-mijnée̱ tsiakhe̱ kajngó maꞌthán Ana̱ꞌlóꞌ rí nánda̱a̱ aꞌkhúu̱n, jamí tsídri̱guíi̱ awan rí niꞌgí Ana̱ꞌlóꞌ. 4Numuu rí mbá xúgíí xtángoo ni̱gu̱ma-mbáníí ga̱jma̱á nindxu̱u̱ Krísto̱, kajngó maꞌthán Ana̱ꞌlóꞌ rí nánda̱a̱ aꞌkhúun jámba̱a̱ tsí nanimbo̱o̱ꞌ jaꞌyoo Krísto̱.
Mbá xúgíin xa̱bo̱ ma̱goo ma̱jáwíin
5Xáꞌnii niꞌtháán Moisés ga̱jma̱á numuu xa̱bo̱ tsí ma̱ꞌne nánda̱a̱ aꞌkhúun ga̱jma̱á majñu̱u̱ xtángoo: «Xa̱bo̱ tsí naꞌne-mbánuu mbá xúgíí xtángoo, ma̱xtáa̱ mba̱ꞌyee̱ ga̱jma̱á numuu ne̱».#10.5 Ajngáa ríge̱ꞌ na̱ꞌkha̱ ná I̱yi̱i̱ꞌ rí naꞌthán ga̱jma̱á numúú xa̱bi̱i Lebí 18.5. 6Xómáꞌ ga̱jma̱á numuu rí nánda̱a̱ aꞌkhúun tsí wéje̱ a̱kui̱in ná inuu Ana̱ꞌlóꞌ rá, xáꞌnii ka̱ma naꞌthán: «Ma̱xára̱tha̱n ná awúun a̱kia̱anꞌ: “Tsáa gátsimuu mikhuíí róꞌ”, (kajngó ma̱ꞌkha̱ jayáa̱ Krísto̱ ge̱jyoꞌ). 7Ni máꞌ ma̱xára̱tha̱n: “Tsáa gága̱taa ná numbaa rí gachúún wa̱jen róꞌ”, (kajngó ma̱ꞌnii̱ rí ma̱ga̱jnáa Krísto̱ ná gatiin tsí nijáñúú)». 8Dí iꞌthée̱n xúꞌkhue̱n rá. «Mijngi máꞌ ríga̱ ajngáa ga̱jma̱á nindxa̱a̱ꞌ, ná rawaanꞌ jamí ná awúun a̱kia̱anꞌ».#10.6-8 Mbá tikhu ajngáa ríge̱ꞌ na̱ꞌkha̱ ná I̱yi̱i̱ꞌ rí naꞌthán ikhaa máꞌ xtángoo 30.12-14. Ikhaa ríge̱ꞌ ñajuun ajngáa rí nu̱tha̱n-ráꞌaxo̱ꞌ, rí ma̱we̱je̱ a̱kia̱nꞌlóꞌ ná inuu Ana̱ꞌlóꞌ. 9Xí ga̱jma̱á rawaanꞌ narathán-jmbaaꞌ rí Jesús ñajuun Táta̱ tsí naꞌthán-ñájun, jamí ga̱jma̱á a̱kia̱anꞌ nanimba̱a̱ꞌ rí Ana̱ꞌlóꞌ neꞌne rí mbayáa̱ mbiꞌyuu̱, a̱ꞌkhue̱n rí ma̱jríñáaꞌ. 10Numuu rí ga̱jma̱á a̱kia̱anꞌ gíꞌmaa rí ma̱nimba̱a̱ꞌ kajngó maꞌthán Ana̱ꞌlóꞌ rí nánda̱a̱ aꞌkháanꞌ, jamí ga̱jma̱á rawaanꞌ gíꞌmaa rí ma̱ra̱tha̱n jmbaaꞌ rí nanimba̱a̱ꞌ xtayáa̱ kajngó ma̱jríñáaꞌ.
11Numuu rí xáꞌnii ka̱ma naꞌthán ná i̱yi̱i̱ꞌ ajngóo Ana̱ꞌlóꞌ: «Jámba̱a̱ tsí nanimbo̱o̱ꞌ jaꞌyoo̱ ikhaa̱, ma̱xáthájwíin a̱kuii̱n».#10.11 Ajngáa ríge̱ꞌ na̱ꞌkha̱ ná I̱yu̱u̱ꞌ Isaía̱s 28.16. 12Numuu rí nda̱a̱ máꞌ rí kriꞌkhuiin xa̱bo̱ judío̱ gajmíí xa̱bo̱ tsí ra̱ꞌkháa judío̱ ñajúún, numuu rí mbáwíi máꞌ Táta̱ tsí naꞌthán-ñájwanlóꞌ mbá xúgiáanꞌlóꞌ. Ikhaa̱ maphú mba̱a̱ naꞌne-tsakun-rámii̱ mbá xúgíin tsí nu̱xríga̱á mbiꞌyuu̱. 13Numuu rí jámba̱a̱ tsí naxrígo̱o̱ mbiꞌyuu Táta̱, ma̱jríya̱a̱ꞌ.
14Xáne gúxri̱gáa̱ mbiꞌyuu tsí tánimbúu̱n juyáa̱ rá. Xáne gánimbúu̱n juyáa̱ tsí túdxawíi̱n ga̱jma̱á numuu rá. Xáne gúdxawíi̱n xí ndawa̱a̱ tsí maꞌthán-rúꞌúu̱n rá. 15Jamí xáne gúthan-raꞌee̱ xí ndawa̱a̱ tsí ixúnguii̱nꞌ rá. Xómá ka̱ma naꞌthán ná i̱yi̱i̱ꞌ ajngóo Ana̱ꞌlóꞌ: «¡Rí maphú mitsaan ído̱ rí naguáꞌnú tsí naguwá juñu̱ú ajngáa rí tsímáá, ikhiin máꞌ tsí nuthan-raꞌa ajngáa máján!».#10.15 Ajngáa ríge̱ꞌ na̱ꞌkha̱ ná I̱yu̱u̱ꞌ Isaía̱s 52.7.
16I̱ndo̱ó máꞌ numuu rí ra̱ꞌkhá mbá xúgíi̱n ni̱dri̱guíi̱ ajngáa máján. Xómá niꞌthán Isaía̱s: «Táta̱, tsáa ninimbo̱o̱ꞌ ajngáa rí ni̱tha̱n-ráꞌaxo̱ꞌ róꞌ».#10.16 Ajngáa ríge̱ꞌ na̱ꞌkha̱ ná I̱yu̱u̱ꞌ Isaía̱s 53.1. 17Ikhaa jngó, ndaꞌyóo rí mu̱dxawíín xa̱bo̱ ajngóo Ana̱ꞌlóꞌ,#10.17 Ríga̱ mbá tikhu i̱yi̱i̱ꞌ griégo̱ rí wayuu rí naꞌthán: «ndaꞌyóo rí mu̱dxawíín xa̱bo̱ ajngáa máján ga̱jma̱á numuu Krísto̱». a̱ꞌkhue̱n rí ma̱goo ma̱we̱je̱ a̱kuíi̱n ná inuu̱. 18Xómáꞌ ikhúúnꞌ na̱ra̱xe̱lo̱ꞌ: Á gakon rí xóó túdxawíi̱n rá. Phú gakon rí ni̱dxawíi̱n máꞌ. Xómá ka̱ma naꞌthán ná i̱yi̱i̱ꞌ ajngóo Ana̱ꞌlóꞌ:
«Mbá xúgíí tsu̱du̱u̱ ju̱ba̱ꞌ niwán a̱ꞌwúu̱n,
jamí asndo mbá xúgíí rawuun numbaa ni̱ga̱nú ajngúu̱n».#10.18 Ajngáa ríge̱ꞌ na̱ꞌkha̱ ná I̱yu̱u̱ꞌ ajmúú 19.4.
19Jamí na̱ra̱xe̱ mbu̱júꞌ: Á táfruꞌu̱ún ríge̱ꞌ xa̱bo̱ Israél rá. Rí ginii jayu, Moisés niꞌtháa̱n rí waꞌtháa̱n neꞌne Ana̱ꞌlóꞌ:
«Ikhúúnꞌ ma̱ne̱ rí ma̱xíya̱ꞌlaꞌ gúne̱ mbá xuajiin xa̱bo̱ tsí na̱nguá gíꞌdoo numúú,
jamí ma̱ne̱ rí ma̱jiꞌnáaꞌlaꞌ gúne̱ mbá xuajiin xa̱bo̱ tsí tsífruꞌu̱ún».#10.19 Ajngáa ríge̱ꞌ na̱ꞌkha̱ ná I̱yi̱i̱ꞌ rí naꞌthán ikhaa máꞌ xtángoo 32.21.
20Xómáꞌ Isaía̱s ni̱ꞌngo̱o̱ a̱kui̱in niꞌthán ajngáa rí niꞌthán máꞌ Ana̱ꞌlóꞌ:
«Ikhiin xa̱bo̱ tsí na̱nguá i̱ꞌñúú, ni̱xkamúú,
jamí ni̱snga̱jmá-mina̱ꞌ inúú xa̱bo̱ tsí na̱nguá i̱ra̱xe̱ numuꞌ».#10.20 Ajngáa ríge̱ꞌ na̱ꞌkha̱ ná I̱yu̱u̱ꞌ Isaía̱s 65.1.
21Xómáꞌ ga̱jma̱á numúú xa̱bo̱ Israél, xáꞌnii niꞌthán Ana̱ꞌlóꞌ:
«Jañii mbiꞌi ni̱tsriya̱ꞌ ñawúnꞌ
rí ma̱mbáñúú xa̱bo̱ tsí najñaguun jamí tsínimbu̱únꞌ».#10.21 Ajngáa ríge̱ꞌ na̱ꞌkha̱ ná I̱yu̱u̱ꞌ Isaía̱s 65.2.
Právě zvoleno:
Xa̱bo̱ Róma̱ 10: tcf
Zvýraznění
Sdílet
Porovnat
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
© 2025 SIL Global. Creative commons license CC BY-SA.