Ng’olwa 11
11
Petulo anguvasimulila vanu ku Yelusalemu ndongwa tso tsihumye kwa vanu wosi Vayawudi
1Vatumi hamwe na vanu vanji wo vamutumbye Chilisito wo vavaga kuko ku Yudeya vakahulikaje kuta vanu wosi Vayawudi nawo hihilaga vatsidiche Ndongwa tsa Mulungu. 2Ihyo Petulo hoavaga kuwuya ku Yelusalemu, vala vanu wo vaditaga malajitso ga likumbi wo vavaga vamutumbye Chilisito vakamulongaje fibi kuta, 3“Heve uhele mu nyumba tsa vanu wo sivinje likumbi na wichite na kulya hamwe nawo!” 4Iho lelo Petulo akantsaje kuvalonjela ndongwa tseka tso tsikakoliche kuko luhuma chilongola mbaka cha wudugo akalongaje kuta, 5siku yimwe hontsavaga ku muji gwa Yafwa ntsingumusuka Mulungu, simusika ngawonaje nduntsuchilo, ngawonaje mu nduntsuchilo chinu cho chinakota mugolole chinkwiswa hasi kuhuma Kilanga kwa membo tsake tsitayi mbaka hontsavaga heni. 6Ngavaje kuhunjilila mugati na kuhima finofu ngajiwonaje minyama ja mwijejele jo jinya magulu gatayi, na minyama jo jinkwava, hamwe na fideje. 7Simusika ngahulikaje litsi, Petulo winuche, usintse ulye. 8Lechelelo heni ngalongaje, Ndaya Mutwa! Heni ntsing'ali kulya chinu cho chalemitswe mu malajitso ga Musa. 9Lila litsi kuhuma Kilanga likawilaje lwa kavili kuta Mulungu alemitse kuta ulekaje kuhotsa munu yoyuve yosi Muyawudi sinambe aganiche halutalo ha Mulungu. 10Lulongwa ulo lukiwilaje mala kadatu na hawudugo wake finu fyeka fikapilulwaje Kilanga. 11Simusika vakatsaje vanu vadatu wo vavaga vatumilwe kuhuma ku Kayisaliya vatse kwa heni, vakimaje halutalo ha nyumba yo ntsikalaga. 12Muhe va Mulungu akandonjelaje ndeche kihotsa ila mbitase nawo. Vanu iva sita wo vamutumbye Chilisto kuhuma ku Yafwa tukabitasaje hamwe mbaka ku Kayisaliya, tukinjilaje mu nyumba ya Kolineliyo. 13Kolineliyo akatulonjelaje hila fyo amuwene mutantsi va kilanga va Mulungu yo avaga imile ha nyumba yake na kumulonjela, “Uvatume vanu vabite ku muji gwa Yafwa kwa munu yo anchemwa Simoni litawa linji Petulo. 14Uyo mwene akukulonjela ndongwa tso tsikukukulusa heve na vanu veka wovali mu kaye yako. 15Heni hontsavaga kwantsa kulonga hela, luvala lulo nawo vakanuchilaje Muhe va Mulungu kota hila fyo twamwanuchye hetwe iho hamutalo. 16Iho ho ngiwukaje tsila Ndongwa tsa Mutwa tso avaga atulonje kuta Yohana abatitse kwa malenga, lechelelo henye mukubatitswa kwa Muhe va Mulungu. 17Ihyo manyi yive Mulungu avapelye Muhe vake vanu vano kota fyo atupelye na hetwe yo tumutumbye Mutwa Yesu Chilisito, heni yo tsi nani mbaka njele kuva tebe na Mulungu?”
18Hovavaga kuhulika ndongwa itso, vakalekaje kusumwana nayo, ila vakamutsumitsaje Mulungu na kulonga, “Nachene Mulungu avapelye na vanu wosi Vayawudi vihale na kutsileka ndongwa tsawo ntsibi na kuvapela wumi wo wugaya wudugo”
Chikundi cha vanu wo vamutumbye Chilisito cha ku Andiyochiya
19Ihyo vala vanu wo vavaga vamutumbye Chilisito wo vavaga vatagalye kwasawuli ya ng'odeko tso tsihumye kwasawuli ya chifo cha Sitefwani, vakabitaje kutali mbaka ku Foyiniche, na ku Chipulo, na ku Andiyochiya. Nawo si vakavikwe Ndongwa tsa Mulungu kwa munu yoyuve ila kwa Vayawudi ng'ani. 20Lechelelo kwavaga na vanu vatunga wo vamutumbye Chilisito wo vahumye ku Chipulo na ku Chilene wo vahele ku Andiyochiya kuvikula Ndongwa Nofu tsa Mutwa Yesu kwa vanu wosi Vayawudi. 21Wuvetso wa Mutwa wavaga hamwe nawo na vanu wolofu vakatumbaje na kumupituchila Mutwa.
22Ndongwa itso hotsavaga kuhulikwa na vanu wo vavaga vamutumbye Chilisito ku Yelusalemu, nawo vakamutumaje Balinaba abite ku Andiyochiya. 23Nayo hoavaga kufika na kuwona hila Mulungu fyo avaditye wuwuya wake, akasangalalaje ndalahela na kuvalonjela vanu veka vihantse na Mutwa luhuma mugati mu numbula tsawo. 24Balinaba avaga munu muwuya na avaga amutumbye Chilisito na kulongotswa na Muhe va Mulungu, nawo vanu wolofu vakongetsekaje kumutumba Mutwa. 25Kaha Balinaba akabitaje ku muji gwa Taliso kumusaka Sawuli. 26Avaga kumuwona akamutolaje vakabitasaje ku Andiyochiya na kwa luvala lwa mwaka gweka Balinaba na Sawuli vitang'anaga na chikundi cha vanya litumbilo lya Chilisito na kuvadahitsa vanu wolofu. Iho ho vadahitswa ho vantsitse kuchemwa Vachilisito uko Andiyochiya.
27Luvala ulo valoli va Mulungu vakikaje kuhuma ku Yelusalemu mbaka Andiyochiya.
28Muloli yumwe va Mulungu litawa lyake achemwaga Hagabo, akimaje akantsaje kulonga kwa wuvetso wa Muhe va Mulungu kuta ntsala ngomi yikuhumila ku inyi tseka, nayo yikahumilaje ha siku tsa wuntsajila wa Kayisali Chilawudiyo. 29Vala vadahitswa vakalamulaje kuta chila munu kota wuwetso wake fyowuli, atawule finu ili kuvatanga mu katsi iyo vayawo wo vamutumbye Chilisito wo vangikala ku Yudeya. 30Vakaditaje hihyo na finu fyawo fyo vatawe fikasindikwaje kwa vavina vawo kukolela kwa Balinaba na Sawuli.
Právě zvoleno:
Ng’olwa 11: SBV
Zvýraznění
Sdílet
Porovnat
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
The New Testament in Sagala Language @The Word for The World International and Sagala Language translation. All rights reserved.