Ng’olwa 8
8
1Hihilaga Sawuli nayo avaga baho, awonaga sava hela lulongwa ulo lwa kukopolwa kwa Sitefwani.
Sawuli ankwantsa kuvakoda vanu wo vamutumbye Chilisito
Siku yila kukahumilaje ng'odeko ngomi kwa vanu wo vamutumbye Chilisito wo vavaga kuko ku Yelusalemu, veka vakatagalilaje na kubilimila ku Wuyawudi na ku Samaliya, lechelelo vakasigalaje vatumi ng'ani. Chimunyi chila kukahumilaje ng'odeko ngomi kwa chikundi cha vanu wo vangumutumbila Chilisito kuko Yelusalemu, vakatagalilaje na kuchimbilila ku Yudeya na ku Samaliya. 2Vanu wo vamutumbye Mulungu vakamutsikaje Sitefwani na kumulomboketsela ndalahela.
3Luvala ulo Sawuli ajelaga kuvakoda vanu wo vamutumbye Chilisito, injilaga mu chila nyumba na kuvabata valume na vadala, na kuvasindika mu nyumba tsa vawopwa.
Fwilipo anvikula Ndongwa Nofu ku Samaliya
4Ihyo vala vanu wo vavaga vatagalye vakavikulaje Ndongwa Nofu chila hono hovavaga vachimbilye. 5Fwilipo nayo akabitaje ku muji gwa Samaliya na kumuvikula Chilisito kwa vanyakaye va hono iho. 6Malugu ga vanu ho vavaga kumuhulikitsa Fwilipo na kujiwona jila mitinuso jo aditaga, vakamuhulikitsaje finofu ndongwa tsila tso alongaga. 7Misoka javahumaga vanu wolofu na kuyova, na vanu wo vavaga vapotsile mivili na fiteve vakaponetswaje. 8Ihyo vanu va muji gula vakasangalalaje ndalahela. 9Duve kwavaga na munu yumwe litawa lyake Simoni, yo aditaga ndongwa tsa wuhavi kwa siku ntsolofu ha muji ugo, vanu va inyi ya Samaliya vapomotswaga kwa ndongwa tsake, nayo idutsaga kuta mwene yo munu muvina. 10Vanu veka vavina kwa vadodo vamuhulikitsaga finofu na kulonga, “Munu yuno yo wuvetso wa Mulungu wo wun'tselanika kota, wo Wuvetso Wukomi.” 11Vamuhulikitsaga ndalahela yula muhavi kwasawuli vapomotswaga kwa siku ntsolofu kwa katsi tsake tsa wuhavi tso akolaga. 12Lechelelo vanu hovavaga kutsihulika Ndongwa Nofu tsa wuntsajila wa Mulungu tso avikulaga Fwilipo kwa litawa lyake Yesu Chilisito, vakatsitumbaje na kubatitswa valume na vadala. 13Nambe Simoni nayo akatsitumbaje Ndongwa Nofu tsa Mulungu na kubatitswa. Akamufwataje Fwilipo chila hono na kupomotswa na mitinuso mikomi hamwe na ndajilo tso atsiwonaga. 14Vala vatumi wo vavaga kula ku Yelusalemu hovavaga kuhulika ndongwa itso kuta vanyakaye va ku Samaliya nawo vatsidichye ndongwa tsa Mulungu, ihyo vakavatumaje Petulo na Yohana vabite kuko. 15Hovavaga kufika vakavasuchilaje iwo wovamutumbye Chilisito ili vamwanuchile Muhe va Mulungu, 16kwasawuli uyo Muhe va Mulungu avaga ang'acha ang'ali kumufichila nambe munu yumwe, ila vavaga vabatitswe kwa litawa lya Mutwa Yesu hela. 17Ihyo Petulo na Yohana vakavikaje mawoko gawo kwa vala vanu, nawo vakamwanuchilaje Muhe va Mulungu.
18Simoni avaga kuwona kuta vanu vangumwanuchila Muhe va Mulungu kwa kuvichilwa hela mawoko ga vatumi, akaganaje kuvapela magobole vatumi. 19Ihyo Simoni akalongaje, “Mumele na heni wuvetso wuno, ili chila munu yo ngumuvichila mawoko gangu amwanuchile Muhe va Mulungu.” 20Ihyo Petulo akamujibulaje, “Uyajile kutali na magobole gako, kwasawuli unhotsa kuta ufuluche ugule chifunje cha Mulungu kwa magobole! 21Hetwe situfuluche twitanje na heve mu katsi yino, kwasawuli numbula yako siyo ngolofu kwa Mulungu. 22Ihyo wihale wubi wako wo ulinawo na kuwuleka, na umusuche Mutwa ili akuhulumile mahotso mabi go unhotsa. 23Tun'tsela kuta heve umemile wusungu ndalahela na uwofilwe mu ndongwa ntsibi!”
24Simoni akavajibulaje, “Ntsimuyenyu nyongitse, musuchile kwa Mutwa ili anyetsele finu ifyo fyeka fyo mulontsile fileche kunyumila.”
25Petulo na Yohana hovavaga kudahitsa ndongwa tsa Mutwa, vakawuyaje ku Yelusalemu. Nawo hovavaga mung'asi vavavikulilaga vanu Ndongwa Nofu mu fijiji fyolofu fya ku Samaliya.
Fwilipo na muvina va ku Esiyopiya
26Mutantsi va kilanga va Mulungu akamulonjelaje Fwilipo, “Ubite lubali lwa kusika kwa kukolela ng'asi ya ku mbuga yo yinhuma ku Yelusalemu kubita ku Gatsa.” 27Ihyo Fwilipo akawukaje na kwantsa lujendo. Hoavaga mung'asi akamuwonaje munu muvina va inyi ya Esiyopiya yo avaga muchiliti, munu uyo avaga avisilwe na Malichiya#8:27 Malichiya yo chilongotsi muvina va inyi yo avaga mudala va ku Esiyopiya ili imilile ndongwa tsake tsa magobole. Nayo muvina uyo avaga ahele ku Yelusalemu kumufugamila Mulungu. 28Muchiliti yula hoavaga mulujendo an'wuya kukaye, avaga ichite mu mutuka gwa kukwengwa na fwalasi kuno ansoma chitabu cha Yisaya muloli va Mulungu. 29Muhe va Mulungu akamulonjelaje Fwilipo, “Hejelele habehi na mutuka gula.” 30Fwilipo akabilimaje mbaka habehi na mutuka gula akamuhulikaje muvina yula ansoma chitabu cha muloli Yisaya. Fwilipo akamuputsaje yula munu, “Mbe, ungutsitsela ndongwa itso tso unsoma?”
31Muvina uyo akamujibulaje, “Ngutsela chinya ndawuli bila munu va kundahitsa?” Ihyo akamusukaje Fwilipo akwine mu mutuka ili vikalase hamwe. 32Muvina uyo asomaga chifungu cha Mandiko ga Mulungu go gatyaga hino,
“Alongwitswe kota ng'olo yo yim'bita kusintswa,
na avaga akatwiche kota ntsanang'olo fyo yikatukaga halutalo ha yula yo anguyimoga wubahila,
nayo sialontsile chinu chochive.
33Vamuhonje nyoni na ku muwonela.
Kuduhu munu yo afuluche achilonjele chilelo chake.
Kwasawuli wumi wake wahetsitswe kuhuma mu inyi.”
34Yula muvina va ku Esiyopiya akamuputsaje Fwilipo, “Ntsinsuka undonjele, uyu muloli anlonga chinu chachi? Anlonga ndongwa tsake awu tsa munu yunji?” 35Ihyo Fwilipo akantsaje kumujibula kukolela Mandiko gagala go asomaga, akamulonjelaje Ndongwa Nofu tsa Yesu. 36Hovavaga vang'acha vankwendelela na lujendo vakafikaje hono hohavaga na malenga, na yula muvina akamulonjelaje Fwilipo, “Lave hono hano hana malenga! Chinu chachi cho chikundemetsa heni ndeche kubatitswa?” 37Fwilipo akamulonjelaje, “Manyi witumbe kwa numbula yako yeka, ufuluche ubatitswe.” Yula muchiliti akamujibulaje, “Ntsintumba kuta Yesu Chilisito yo Mwana va Mulungu#8:37 Bibiliya tsinji tsilihela musitali guno. .”
38Muvina uyo akalajitsaje mutuka gula gwime. Ihyo Muchiliti na Fwilipo vakikaje hala ha malenga, nayo Fwilipo akamubatitsaje yula muchiliti. 39Hovavaga kuhuma mumalenga, Muhe va Mutwa akamuchipulaje Fwilipo, yula muchiliti si akamuwene kaha, mwene yula muvina akendelelaje na lujendo lwake kuno asangale. 40Nayo Fwilipo akawonekaje ku muji gwa Atsoto, na hoavaga mung'asi avikulaga Ndongwa Nofu mu miji jeka mbaka ho afisile ku muji gwa Kayisaliya.
Právě zvoleno:
Ng’olwa 8: SBV
Zvýraznění
Sdílet
Porovnat
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
The New Testament in Sagala Language @The Word for The World International and Sagala Language translation. All rights reserved.