Yohana 20
20
Yesu an'tsilipuka
Matayo 28:1-8; Maliko 16:1-8; Lukasi 24:1-12
1Hamilawu kung'acha kucha siku ya kwantsa ya wichi, Maliyamu va ku Majidala akabitaje kula kukabuli na kuliwona lila liganga lyo lyavaga mulango gwa kabuli lihetsitswe. 2Ihyo akabitaje luvilo kwa Simoni Petulo hamwe na yula mudahitswa yunji yo aganagwa na Yesu, na kuvalonjela kuta, “Vaguhetsitse muvili gwa Mutwa mukabuli, na sinambe tutsele kula ko vaguvisile.” 3Petulo hamwe na yula mudahitswa yunji vakawukaje luvala lulo na kubita kula kukabuli. 4Veka vavili vavaga vam'bilima, lechelelo yula mudahitswa yunji abilime hilo kuliko Petulo, akalongolaje kufika kukabuli. 5Hoavaga kufika, akahonamaje na kuhunjilila mula mukabuli, akatsiwonaje sanda ng'ani tsivisilwe, lechelelo mwene sainje mukabuli. 6Nayo Simoni Petulo akafikaje na kwinjila mu kabuli, akatsiwonaje tsila sanda ng'ani, 7na chila chitambala choali apintsilwe Yesu kumutwi chavaga chipilingine na chiliyena. 8Kaha na yula mudahitswa yo avaga alongwe kufika kukabuli nayo akinjilaje mugati, akalolaje na kutumba. 9Kwasawuli mbaka luvala ulo vavaga vang'acha kugatsela gala Mandiko ga Mulungu go galongaga kuta yin'ganika Yesu atsilipuche. 10Duve vala vadahitswa vakapilukaje kukaye.
Yesu angumuhumila Maliyamu va ku Majidala
Matayo 28:9,10; Maliko 16:9-11
11Maliyamu va ku Majidala hoavaga imile hivala hakabuli kuno anvemba. Hoavaga anvemba akahonamaje na kuhunjilila mukabuli, 12akavawonaje vatantsi vavili va Kilanga va Mulungu wo vafwite myenda myelu, vikite hala hogwali muvili gwa Yesu, yumwe avaga kumutwi na yunji kumagulusika. 13Vala vatantsi va Kilanga va Mulungu vakamuputsaje, “Yuva un'vembela chichi?” Nayo akavalonjelaje, “Vaguhetsitse muvili gwa Mutwa vangu na sinambetsele ko vaguvisile!” 14Hoavaga kulonga ihyo, akapitukaje na kumuwona Yesu imile, lechelelo siamukagwe kuta yo Yesu. 15Yesu akamuputsaje, “Yuva umnvembela chinu chachi? Ungumusaka nani?” Nayo Maliyamu atyaga kuta anlongana na mutuntsaji va chinyungu, nayo Maliyamu akatyaje “Muvina manyi uve yo heve uguhetsitse, undonjele ko uguvisile mbite ngagutegule.” 16Yesu akamuchemaje, “Maliyamu!” Iho Maliyamu akapitukaje nakulonga nayo kwa Chiyebulaniya, “Laboni!” Linya mana ya, “Mudahitsi!” 17Yesu akamulonjelaje, “Uleche kimbata, kwasawuli ntsing'acha kubita Kilanga kwa Dada. Lechelelo ubite ukavalonjele vang'olotsangu kuta, ntsim'bita Kilanga kwa Dada vangu yo Dada venyu, na kwa Mulungu vangu yo Mulungu venyu.” 18Ihyo yula Maliyamu va ku Majidala akabitaje na kuvalonjela vadahitswa va Yesu kuta, “Ntsimuwene Mutwa!” Kaha akavalonjelaje ndongwa tsila tso amulajitse Mutwa.
Yesu anguvahumila Vadahitswa vake
Matayo 28:16-20; Maliko 16:14-18; Lukasi 24:36-49
19Hoyavaga kufika mumihe mwa siku ya kwantsa ya wichi. Vadahitswa vavaga vitang'ine hamwe mu nyumba, na ntsitsi tsali tsidinditwe kwasawuli ya kuwogopa vavina va Vayawudi, Yesu akavahumilaje na kwima hagati hawo, akavalonjelaje, “Wusichimafu wuve na henye!” 20Hoavaga kulonga ihyo, akavalajilaje mawoko gake na lubafu lwake. Ihyo vala vadahitswa hovavaga kumuwona Mutwa, vakamwemwetelaje ndalahela. 21Yesu akavalonjelaje kaha, “Wusichimafu wuve na henye! Kota hila Dada fyo anumile heni na heni ntsinguvatuma na henye.” 22Nayo Yesu hoavaga kulonga ihyo, akavaputilaje muhe na kuvalonjela kuta, “Mwanuchile Muhe va Mulungu. 23Manyi muvahulumile vanu wovave ndongwa tsawo ntsibi, iwo vakuhulumilwa na Mulungu, na manyi muleme kuvahulumila vanu wovave ndongwa tsawo ntsibi, iwo vakusigala mu ndongwa tsawo ntsibi.”
Yesu angumuhumila Tomasi
24Lechelelo yumwe va vala vadahitswa kumi na vavili, Tomasi yo achemwaga kaha munya mbili, avaga alihaduhu hala Yesu hoavaga avahumye vadahitswa vake. 25Ihyo vala vadahitswa vanji vakamulonjelaje, “Tumuwene Mutwa!” Lechelelo Tomasi akavalonjelaje, “Manyi ndeche kutsiwona ng'ofu tsila tsa misumali mu mawoko gake, na kwambalagata kwa liwoko lyangu mu ng'ofu ya mulubafu lwake, singuhogola kutumba.” 26Hotsavaga kulutila siku nane, vadahitswa vake hovavaga valihamwe mugati munyumba, nayo Tomasi avaga alihamwe navo. Kaha Yesu akavahumilaje kuno ntsitsi tsali ntsidinditwe, na akimaje hagati hawo akatyage, “Wusichimafu wuve na henye!” 27Kahi akamulonjelaje Tomasi, lete chala chako hano ulole mawoko gangu, golole liwoko lyako wambalagate lubafu lwangu. Un'ganika utumbile, uleche kuva na muhwehwe. 28Tomasi akamupitulaje kuta, Mutwa vangu na Mulungu vangu! 29Yesu akamulonjelaje, “Mbe, unumbye kwasawuli umbwene? Vatambichilwe na Mulungu vala yo vakunumba bila kumbona.”
Chambutso cha kwandika chitabu chino
30Yesu adisile ndajilo tsinji ntsolofu halutalo ha vadahitswa vake tso sitsandikwe mu chitabu chino. 31Lechelelo ndajilo tsino tsandikwe ili mutumbe kuta Yesu yo Chilisito Mwana va Mulungu, na kwakutumba uko muve na wumi wo wugaya wudugo, kwa kikala mugati mwake.
Právě zvoleno:
Yohana 20: SBV
Zvýraznění
Sdílet
Porovnat
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
The New Testament in Sagala Language @The Word for The World International and Sagala Language translation. All rights reserved.